ນາຍົກລັດຖະມົນຕີຫວຽດນາມຕ້ອນຮັບຜູ້ບັນຊາການປ້ອງກັນປະເທດລາຊະອານາຈັກໄທ

(vovworld) - ທີ່​ການ​ຕ້ອນຮັບ​ທ່ານ Surapong Suwana Adth, ຜູ້​ບັນຊາ​ການ​ປ້ອງ​ກັນ​ປະ​ເທດ​ລາຊະ​ອານາຈັກ​ໄທ ຢູ່​ສຳນັກງານ​ນາຍົກລັດຖະມົນຕີ, ທ່ານນາຍົກລັດຖະມົນຕີ ຫງວຽນ​ຊວນ​ຟຸກ ສ​ະແດງ​ຄວາມ​ເຊື່ອ​ໝັ້ນ​ວ່າ, ການ​ຢ້ຽມຢາມ ​ແລະ ​ເຮັດ​ວຽກ​ຂອງ​ຄະນະ​ຢູ່ ຫວຽດນາມ ຈະ​ປະກອບສ່ວນ​ສຳຄັນ​ເຂົ້າ​ໃນ​ການ​ເພີ່ມ​ທະວີ ​ແລະ ປັບປຸງ​ສາຍ​ພົວພັນ​ມິດຕະພາບ​ອັນ​ດີງາມ​ລະຫວ່າງ​ສອງ​ປະ​ເທດ​ກວ່າ​ອີກ, ນຳ​ການ​ພົວພັນ​ຮ່ວມ​ມື​ລະຫວ່າງ​ ​ກອງທັບ​ສອງ​ປະ​ເທດ​ໃຫ້​ພັດທະນາ​ຢ່າງ​ເລິກ​ເຊິ່ງກວ້າງຂວາງ. ທ່ານນາຍົກລັດຖະມົນຕີ ຫງວຽນ​ຊວນ​ຟຸກ ​ເນັ້ນ​ໜັກ​ວ່າ, ການ​ພັດທະນາ​ສາຍ​ພົວພັນ​ລະຫວ່າງ ຫວຽດນາມ - ​ໄທ ​ເວົ້າ​ສະ​ເພາະ ​ແລະ ການ​ພົວພັນ​ລະຫວ່າງ ຫວຽດນາມ ​ກັບ​ ອາ​ຊຽນ ​ເວົ້າ​ລວມ​ແມ່ນ​ບຸລິມະສິດ​ແຖວ​ໜ້າ​ໃນ​ນະ​ໂຍບາຍ​ການ​ຕ່າງປະ​ເທດ​ຂອງ ຫວຽດນາມ, ຕີ​ລາຄາ​ສູງ​ຫຼັກ​ໝັ້ນ​ສະ​ເໝີ​ຕົ້ນ​ສະ​ເໝີ​ປາຍ​ຂອງ ​ໄທ ​ໃນ​ໄລຍະ​ຜ່ານ​ມາ ກ່ຽວ​ກັບ​ບັນດາ​ບັນຫາ​ລວມຂອງ​ພາກ​ພື້ນ, ​ໃນ​ນັ້ນ​ມີ​ບັນຫາ​ທະ​ເລ​ຕາ​ເວັນ​ອອກ, ທ່ານຫວັງ​ວ່າ ​ໄທ​ ຈະ​ສືບ​ຕໍ່​ເສີມ​ຂະຫຍາຍ​ບົດບາດ​ຂອງ​ຕົນ, ພ້ອມ​ກັບ ຫວຽດນາມ ​ແລະ ບັນດາ​ປະ​ເທດ ອາ​ຊຽນ ອື່ນໆ ຊຸກຍູ້​ການ​ປະຕິບັດ​ບັນດາ​ຈຸດໝາຍ​ຂອງ​ປະຊາ​ຄົມ ອາ​ຊຽນ. ທ່ານ​ຢືນ​ຢັນ​ວ່າ ລັດຖະບານ ຫວຽດນາມ​ ສະໜັບສະໜູນ ​ແລະ ສ້າງ​ທຸກ​ເງື່ອນ​ໄຂ​ສະດວກ​ເພື່ອ​ໃຫ້​ກອງທັບ​ສອງ​ປະ​ເທດ​ເພີ່ມ​ທະວີ​ການ​ຮ່ວມ​ມື ​ແນ​ໃສ່​ຍົກ​ສູງ​ປະສິດທິ​ຜົນ​ການຈັດ​ຕັ້ງ​ປະຕິບັດ​ຂໍ້​ຕົກລົງ​ນີ້. ຫວຽດນາມ​ ປາຖະໜາ​ວ່າ ​ໄທ​ ຈະ​ມີ​ສະຖຽນ​ລະ​ພາບ ​ແລະ ພັດທະນາ​ຢ່າງ​ແຮງ; ຫວັງ​ວ່າ​ຈະ​ພ້ອມ​ກັບ​ ​ໄທ ມານະ​ພະຍາຍາມ​ຜັນ​ຂະຫຍາຍ​ການ​ພົວພັນ​ຄູ່​ຮ່ວມ​ມື​ຍຸດ​ທະ​ສາດ ຫວຽດນາມ - ​ໄທ, ​ເພື່ອ​ການ​ພັດທະນາ​ລວມຂອງ​ສອງ​ປະ​ເທດ, ​ເພື່ອ​ຄວາມ​ວັດ​ທະນາ​ຖາວອນ ​ແລະ ຄວາມ​ໝັ້ນຄົງ​ຂອງ​ອາ​ຊຽນ, ປະກອບສ່ວນ​ຮັກສາ​ສັນຕິພາບ, ສະຖຽນ​ລະ​ພາບ, ການ​ຮ່ວມ​ມື ​ແລະ ພັດທະນາ​ໃນ​ພາກ​ພື້ນ ​ແລະ ​ໃນ​ໂລກ.