 ງານວາງສະແດງຮູບຖ່າຍກ່ຽວກັບ ຫວຽດນາມ ແລະ ໂຮນລັງ |
ງານວາງສະແດງໄດ້ແນະນຳຕາມ 6 ຫົວຂໍ້ດ້ວຍຮູບຖ່າຍກ່ວາ 100 ແຜ່ນ, ປາດຖະໜາຢາກໂຄສະນາບັນດາຮູບຖ່າຍກ່ຽວກັບການພົວພັນດ້ານການທູດ ແລະ ນ້ຳໃຈມິດຕະພາບລະຫວ່າງ ຫວຽດນາມ - ໂຮນລັງ, ວາດພາບຄວາມງາມໃນການດຳລົງຊີວິດ, ການອອກແຮງງານ ແລະ ທິວທັດທຳມະຊາດຂອງ ຫວຽດນາມ ພ້ອມທັງສົ່ງສານກ່ຽວກັບ ຫວຽດນາມ ຮັ່ງມີສວຍງາມ, ສັນຕິພາບ, ຂະຫຍັນຂັນເຄື່ອນ ແລະ ພັດທະນາ.
ກ່າວຄຳເຫັນທີ່ພິທີໄຂງານວາງສະແດງໃນວັນທີ 15 ພະຈິກ, ທ່ານ ຮ່ວາງຫວີງບາວ ຮອງລັດຖະມົນຕີກະຊວງຖະແຫຼງຂ່າວ ແລະ ສື່ສານ ຫວຽດນາມ ໄດ້ຕີລາຄາສູງການພົວພັນຮ່ວມມືພັດທະນາລະຫວ່າງ 2 ປະເທດໃນ 45 ປີຜ່ານມາໃນທຸກຂົງເຂດ; ແລະ ຖືວ່າ ຫວຽດນາມ ແລະ ໂຮນລັງ ມີຫລາຍຈຸດຄ້າຍຄືກັນ ເພື່ອກາຍເປັນຄູ່ຮ່ວມມື ແລະ ເພື່ອນມິດໃນຫລາຍຂົງເຂດ.
ສ່ວນທ່ານ Peter Potman, ຫົວໜ້າກົມ ອາຊີ - ມະຫາສະໝຸດ, ກະຊວງການຕ່າງປະເທດ ໂຮນລັງ ໄດ້ສະແດງຄວາມປະທັບໃຈຕໍ່ບັນດາຮູບຖ່າຍກ່ຽວກັບປະເທດຊາດ ແລະ ຊາວ ຫວຽດນາມ ພ້ອມທັງຖືວ່າ: ບັນດາຮູບຖ່າຍໄດ້ບັນທຶກບັນດາເຫດການໃນການພົວພັນລະຫວ່າງ 2 ປະເທດ ທີ່ໄດ້ພິສູດໃຫ້ເຫັນການພົວພັນພັດທະນາອັນດີງາມລະຫວ່າງ 2 ປະເທດໃນຕະຫລອດ 45 ປີຜ່ານມາ.
ພ້ອມກັບງານວາງສະແດງຮູບຖ່າຍ, ວັນທີ 17 ພະຈິກ, ສະຖານທູດ ຫວຽດນາມ ປະຈຳ ໂຮນລັງ ກໍ່ຈັດຕັ້ງງານບຸນອາຫານການກິນ ເພື່ອໂຄສະນາແນະນຳເຍື່ອງອາຫານພື້ນເມືອງຂອງ ຫວຽດນາມ.
