ໃນຂອບເຂດການຢ້ຽມຢາມ ລັດເຊຍ ຢ່າງເປັນທາງການຂອງ ທ່ານ Min Aung Hlaing ປະທານາທິບໍດີ ມຽນມາ, ວັນທີ 18 ສິງຫາ, ຢູ່ວັງ Kremlin, ທ່ານ Vladimir Putin ປະທານາທິບໍດີ ລັດເຊຍ ໄດ້ໂອ້ລົມເຈລະຈາກັບຄູ່ຮ່ວມຕຳແໜ່ງ ມຽນມາ, ແລກປ່ຽນກ່ຽວກັບການພົວພັນສອງຝ່າຍ.
ກ່າວຄຳເຫັນທີ່ການເຈລະຈາ, ທ່ານ Vladimir Putin ປະທານາທິບໍດີ ລັດເຊຍ ໄດ້ເນັ້ນໜັກວ່າ ການພົວພັນລະຫວ່າງ ລັດເຊຍ ແລະ ມຽນມາ ພວມພັດທະນາຢ່າງຕັ້ງໜ້າ, ພ້ອມທັງຕີລາຄາສູງການປະສານສົມທົບຂອງປະເທດນີ້ໃນການພົວພັນລະຫວ່າງ ລັດເຊຍ ແລະ ອາຊຽນ.
ການພົວພັນລະຫວ່າງສອງປະເທດໄດ້ສ້າງຕັ້ງແຕ່ປີ 1948 ແລະ ມີການພັດທະນາຢ່າງບໍ່ຢຸດຢັ້ງ, ພິເສດໃນຊຸມປີມໍ່ໆມານີ້ ນັບມື້ນັບມີຄວາມໄວ້ເນື້ອເຊື່ອໃຈ. ພວກຂ້າພະເຈົ້າຂອບໃຈທ່ານທີ່ໄດ້ສະໜັບສະໜູນການຊຸກຍູ້ການພົວພັນລະຫວ່າງ ລັດເຊຍ ແລະ ອາຊຽນ. ສອງປະເທດຕັ້ງໜ້າປະສານສົມທົບໃນເວທີສາກົນ. ເຖິງຢ່າງໃດກໍຕາມ, ພວກເຮົາຕ້ອງສືບຕໍ່ຍູ້ແຮງການຮ່ວມມືດ້ານເສດຖະກິດ, ໃນນັ້ນສອງຝ່າຍໄດ້ມີບັນດາພື້ນຖານ ແລະ ໂຄງການທີ່ດີ. ການພົວພັນໃນຂົງເຂດຄວາມໝັ້ນຄົງກໍ່ພວມໄດ້ຮັບການເພີ່ມທະວີ.
ສ່ວນທ່ານປະທານາທິບໍດີ Min Aung Hlaing ຢັ້ງຢືນວ່າ ມຽນມາ ແມ່ນຄູ່ຮ່ວມມືທີ່ມີຄວາມໄວ້ເນື້ອເຊື່ອໃຈຂອງ ລັດເຊຍ ຢູ່ອາຊີຕາເວັນອອກສ່ຽງໃຕ້ ແລະ ພ້ອມແລ້ວທີ່ຈະເປີດກວ້າງການຮ່ວມມືໃນຫຼາຍຂົງເຂດ. ພ້ອມທັງຮຽກຮ້ອງໃຫ້ບັນດານັກລົງທຶນ ລັດເຊຍ ເພີ່ມທະວີການລົງທຶນຢູ່ ມຽນມາ.
