ຕອນຄ່ຳວັນທີ 21 ສິງຫາ, ຢູ່ຫໍສະພາແຫ່ງຊາດ (ທີ່ ຮ່າໂນ້ຍ) ໄດ້ຈັດພິທີປະກາດມະຕິຂອງຄະນະປະຈຳສະພາແຫ່ງຊາດ ກ່ຽວກັບການສ້າງຕັ້ງອົງການສະມາຊິກກລັດຖະສະພາມິດຕະພາບ ຫວຽດນາມ ຂອງສະພາແຫ່ງຊາດຊຸດທີ 16. ນີ້ແມ່ນເຫດການສຳຄັນໃນການເຄື່ອນໄຫວຂອງສະພາແຫ່ງຊາດ ຫວຽດນາມ ກໍຄືການພົວພັນຕ່າງປະເທດລະຫວ່າງ ສະພາແຫ່ງຊາດ ຫວຽດນາມ ກັບລັດຖະສະພາບັນດາປະເທດໃນໂລກ.
ກ່າວຄຳເຫັນທີ່ພິທີປະກາດ, ທ່ານ ເຈິ່ນແທັງເໝີນ, ປະທານສະພາແຫ່ງຊາດ ຫວຽດນາມ ຖືວ່າ, ພາຍຫຼັງ 40 ປີແຫ່ງການປ່ຽນແປງໃໝ່, ຫວຽດນາມ ບັນລຸໄດ້ຜົນງານສຳຄັນຫຼາຍຢ່າງ, ຮອບດ້ານໃນຫຼາຍຂົງເຂດ, ໃນນັ້ນມີບົດບາດສຳຄັນຂອງການເຄື່ອນໄຫວພົວພັນຕ່າງປະເທດ, ປະກອບສ່ວນຢືນຢັນຖານະບົດບາດ ແລະ ອິດທິພົນຊື່ສຽງຂອງ ຫວຽດນາມ ບົນເວທີສາກົນ, ສ້າງປະຖົມປັດໃຈ ແລະ ຄວາມໄວ້ເນື້ອເຊື່ອໃຈຢ່າງໝັ້ນແກ່ນໃຫ້ແກ່ປະເທດຊາດເພື່ອກ້າວເຂົ້າສູ່ສັງກາດໃໝ່. ການທູດລັດຖະສະພານັບມື້ນັບເສີມຂະຫຍາຍບົດບາດ ແລະ ລັກສະນະພິເສດ, ຕິດພັນຢ່າງແໜ້ນແຟ້ນກັບການທູດພັກ, ການທູດລັດ ແລະ ການທູດປະຊາຊົນ, ກາຍເປັນຊ່ອງການທູດສຳຄັນ ປະກອບສ່ວນເຂົ້າໃນໝາກຜົນລວມຂອງການທູດ ຫວຽດນາມ.
ອົງການຈັດຕັ້ງສະມາຊິກລັດຖະສະພາມິດຕະພາບ ຫວຽດນາມ ຂອງສະພາແຫ່ງຊາດຊຸດທີ 16 ລວມມີ 64 ກຸ່ມສະມາຊິກລັດຖະສະພາມິດຕະພາບຕິດພັນກັບລັດຖະສະພາຂອງ 64 ປະເທດໃນໂລກ.
