ຕອນເຊົ້າ(ວັນທີ18/8), ຢູ່ທີ່ນະຄອນຫຼວງ ຮ່າໂນ້ຍ, ກະຊວງຍຸຕິທຳຫວຽດນາມ ໄດ້ຈັດເວທີກອງປະຊຸມກົດໝາຍອາຊຽນ 2026 ພາຍໃຕ້ຫົວຂໍ້ “ນຳໃຊ້ປັນຍາປະດິດ (AI) ເຂົ້າໃນວຽກງານກໍ່ສ້າງ ແລະ ປະຕິບັດກົດໝາຍໃນທົດສະວັດຫັນເປັນດີຈີຕອນ”. ພິທີດຳເນີນເປັນເວລາ 2 ວັນແຕ່ວັນທີ (18 -19), ກອງປະຊຸມດັ່ງກ່າວ ແມ່ນແນວຄວາມຄິດຂອງກະຊວງຍຸຕິທຳຫວຽດນາມເປັນຜູ້ສະເໜີ ເພື່ອແນໃສ່ຊຸກຍູ້ການຮ່ວມມືລະຫວ່າງບັນດາອົງການກົດໝາຍ, ຍຸຕິທຳທີ່ຂື້ນກັບບັນດາປະເທດສະມາຄົມອາຊີຕາເວັນອອກສ່ຽງໃຕ້ (ອາຊຽນ) ເພື່ອແລກປ່ຽນບົດຮຽນ, ມາດຕະການ, ຂຸດຄົ້ນທ່າແຮງທາງດ້ານປັນຍາປະດິດ (AI) ໃຫ້ມີປະສິດທິພາບໃນການສ້າງ ແລະ ປະຕິບັດກົດໝາຍ ປະກອບສ່ວນເຂົ້າໃນວິໄສທັດຂອງປະຊາຄົມອາຊຽນປີ 2045 ໃຫ້ປະກົດເປັນຈິງ. ມີຄຳເຫັນໃນກອງປະຊຸມ, ທ່ານຮອງນາຍົກລັດຖະມົນຕີ ເລ ຕ່ຽນ ເຈົາ ໄດ້ເໜັ້ນໜັກວ່າ:
ຫວຽດນາມ ເປັນເອກະພາບຢ່າງສູງ ແລະ ຖືເປັນສຳຄັນບົດບາດເປັນໃຈກາງຂອງອາຊຽນໃນການຮ່ວມມືດ້ານກົດໝາຍດີຈີຕອນໃນພາກພື້ນ ບັນດາຫຼັກການ, ມາດຖານ, ເງື່ອນໄຂກ່ຽວກັບການໝູນໃຊ້ປັນຍາປະດິດໃນຂົງເຂດກົດໝາຍ ແລະ ຍຸຕິທຳຕ້ອງໄດ້ສ້າງໃຫ້ເປັນຮູບປະທຳ ກ່ອນອື່ນໝົດແມ່ນພາຍໃນອາຊຽນ ແລະ ແມ່ນອາຊຽນເອງຕ້ອງລິເລີ່ມນຳພາບົນພື້ນຖານຄວາມເປັນເອກະພາບ ແລະ ເຄົາລົບອະທິປະໄຕຂອງແຕ່ລະປະເທດສະມາຊິກ. ກ້າວເຂົ້າສູ່ປີທີ່ສອງຂອງໂຄງການຜັນຂະຫຍາຍວິໄສທັດປະຊາຄົມອາຊຽນ 2045, ຂ້າພະເຈົ້າເຫັນວ່າ ອາຊຽນ ມີຄົບເງື່ອນໄຂເພື່ອກາຍເປັນພາກພື້ນນຳໜ້າຂອງໂລກກ່ຽວກັບການນຳໃຊ້ປັນຍາປະດິດດ້ວຍຄວາມຮັບຜິດຊອບໃນຂົງເຂດກົດໝາຍ ແລະ ຍຸຕິທຳ. ຜ່ານສິ່ງດັ່ງກ່າວນັ້ນ, ຈະປະກອບສ່ວນສຽງຂອງຕົນເຂົ້າໃນຂະບວນການຄຸ້ມຄອງປັນຍາປະດິດຂອງພາກພື້ນ ແລະ ທົ່ວໂລກ.
ທ່ານຮອງນາຍົກລັດຖະມົນຕີ ເລ ຕ່ຽນ ເຈົາ ຮຽກຮ້ອງໃຫ້ບັນດາປະເທດໃນອາຊຽນ, ຄູ່ຮ່ວມມືພັດທະນາ ແລະ ອົງການຈັດຕັ້ງສາກົນພ້ອມກັນຜັນຂະຫຍາຍ 4 ທິດທາງ: ສ້າງຫຼັກການລວມກ່ຽວກັບການໝູນໃຊ້ AI ເຂົ້າໃນການກໍ່ສ້າງ ແລະ ປະຕິບັດກົດໝາຍ; ແລກປ່ຽນມາດຕະຖານ, ມາດຖານຂໍ້ມູນກົດໝາຍ ແລະ ບົດຮຽນຫັນເປັນດີຈິຕອນ; ຮ່ວມມືກໍ່ສ້າງບຸກຄະລາກອນ, ໂຄງລ່າງຖານຂໍ້ມູນ, ແບ່ງປັນເຕັກນິກ, ຫຼຸດຊ່ອງວ່າງຄວາມສາມາດດ້ານດີຈິຕອນ; ຮັກສາກົນໄກການແລກປ່ຽນ, ແບ່ງປັນບົດຮຽນປະສົບການ ແລະ ເຊື່ອມໂຍງດ້ານຊ່ຽວຊານ./.
