(ພາບ: VGP)
ຕອນເຊົ້າວັນທີ 05 ຕຸລາ, ກອງປະຊຸມຄັ້ງທີ 4 ຄະນະບໍລິຫານງານສູນກາງພັກກອມມູນິດ ຫວຽດນາມ ຊຸດທີ XIV ໄດ້ໄຂຂຶ້ນຢ່າງສົມກຽດ. ທ່ານ ໂຕເລີມ, ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ, ປະທານປະເທດ ຫວຽດນາມ ໄດ້ເປັນປະທານກອງປະຊຸມ; ທ່ານ ເຈິ່ນແທັງເໝີ້ນ, ປະທານສະພາແຫ່ງຊາດ ໄດ້ບໍລິຫານວາລະໄຂກອງປະຊຸມ.
ກ່າວຄຳເຫັນໄຂກອງປະຊຸມ, ທ່ານເລຂາທິການໃຫຍ່, ປະທານປະເທດ ໂຕເລີມ ຊີ້ແຈ້ງວ່າ ກອງປະຊຸມໄດ້ຈັດຂຶ້ນໃນສະພາບການທີ່ທົ່ວພັກ, ທົ່ວປວງຊົນ, ທົ່ວກອງທັບ ພວມພະຍາຍາມປະຕິບັດສຳເລັດໜ້າທີ່ພັດທະນາເສດຖະກິດ - ສັງຄົມ ປີ 2026, ກະກຽມແຜນການປີ 2027 ແລະ ຊຸມປີຕໍ່ໆໄປ. ທ່ານເລຂາທິການໃຫຍ່, ປະທານປະເທດ ສະເໜີໃຫ້ຕ້ອງຍົກສູງກຳລັງຄວາມສາມາດໃນການປ່ຽນແປງໃໝ່ ດ້ວຍຕົນເອງ, ປັບປຸງດ້ວຍຕົນເອງ ແລະ ກຳນົດທິດພັດທະນາປະເທດຊາດ.
“ມະຕິສະບັບໃໝ່ຕ້ອງສົມທົບການກໍ່ສ້າງເຂົ້າກັບການປັບປຸງ, ການສຶກສາຢ່າງແໜ້ນແຟ້ນ. ການປ້ອງກັນກັບການແກ້ໄຂຢ່າງເຂັ້ມງວດ. ສ້າງກົນໄກເພື່ອໃຫ້ການຈັດຕັ້ງພັກ, ສະມາຊິກພັກແຕ່ລະຄົນສາມາດພົບເຫັນ, ປັບປຸງຂໍ້ບົກຜ່ອງດ້ວຍຕົນເອງ. ຕ້ອງອີງໃສ່ປະຊາຊົນເພື່ອກໍ່ສ້າງພັກ, ຮັບປະກັນການເຂົ້າຮ່ວມຂອງປະຊາຊົນໃນການປະກອບສ່ວນເຂົ້າໃນແຜນນະໂຍບາຍ, ຕິດຕາມກວດກາການປະຕິບັດ ແລະ ການໄດ້ຊົມໃຊ້ຜົນປະໂຫຍດຢ່າງແທ້ຈິງ... ນີ້ແມ່ນພື້ນຖານເພື່ອປັບປຸງຄວາມມະຫາສາມັກຄີ, ເຕົ້າໂຮມກຳລັງແຮງຂອງຊາດ”.
ທ່ານເລຂາທິການໃຫຍ່, ປະທານປະເທດ ໂຕເລີມ ກໍ່ໄດ້ສະເໜີໃຫ້ສູນກາງ ປຶກສາຫາລືລົງເລິກເຂົ້າບັນດາການຄັດເລືອກໃຫຍ່, ບັນດາບັນຫາທີ່ຍັງມີຄວາມແຕກຕ່າງກັນ; ທຸກໆການຄັດເລືອກຕ້ອງຖືຜົນປະໂຫຍດຂອງປະເທດຊາດ, ຂອງຊາດ, ສິດ ແລະ ຜົນປະໂຫຍດອັນຊອບທຳຂອງປະຊາຊົນຢູ່ເໜືອກວ່າສິ່ງໃດໝົດ.
