ວັນທີ 13 ຕຸລາ, ສະມັດຊາໃຫຍ່ ສປຊ ໄດ້ປ່ອນບັດຮັບຮອງເອົາມະຕິວ່າດ້ວຍການກ່າວປະນາມເລື່ອງ ລັດເຊຍ ປະກາດໂຮມບາງເຂດຂອງ ຢູແກຼນ ເຂົ້າດິນແດນຂອງຕົນ ພ້ອມທັງຮຽກຮ້ອງໃຫ້ ລັດເຊຍ ຕ່າວປີ້ນການກະທຳຂອງຕົນ. ມະຕິສະບັບນີ້ ໄດ້ຮັບບັດສະໜັບສະໜູນ 143 ບັດ, ບັດຄ້ານ 5 ບັດ ແລະ ບັດຂາວ 35 ບັດ. ມະຕິກໍຮຽກຮ້ອງໃຫ້ທຸກປະເທດ, ສປຊ ແລະ ບັນດາອົງການຈັດຕັ້ງສາກົນ ບໍ່ຮັບຮອງເອົາຖະແຫຼງການດັ່ງກ່າວຂອງ ລັດເຊຍ ແລະ ຮຽກຮ້ອງໃຫ້ ລັດເຊຍ ຈົ່ງຕ່າວປີ້ນການກະທຳໃນທັນທີ. ມະຕິສະບັບນີ້ ກໍຊົມເຊີຍ ແລະ ສະແດງການສະໜັບສະໜູນຕໍ່ຄວາມມານະພະຍາຍາມຂອງ ທ່ານເລຂາທິການໃຫຍ່ ສປຊ ແລະ ບັນດາປະເທດສະມາຊິກ, ເພື່ອແນໃສ່ຫຼຸດຜ່ອນຄວາມເຄັ່ງຕຶງຂອງສະພາບການປັດຈຸບັນ ແນໃສ່ການສ້າງສັນຕິພາບໂດຍຜ່ານການເຈລະຈາ ແລະ ໄກ່ເກ່ຍ.
ນັກຂ່າວ VOV ປະຈຳ ອາເມລິກາ.
