ທ່ານຮອງນາຍົກລັດຖະມົນຕີ ນາງ ຟ້າມທິແທັງຈ່າ ຕີລາຄາສູງບັນດາການປະກອບສ່ວນສຳຄັນຂອງ WHO ຕໍ່ການພັດທະນາຂອງລະບົບສາທາລະນະສຸກ ຫວຽດນາມ ໃນຕະຫຼອດໄລຍະ 50 ປີ ຜ່ານມາ. ຕາມທ່ານຮອງນາຍົກລັດຖະມົນຕີ ຫວຽດນາມ ແລ້ວ, ບັນດາບຸລິມະສິດຂອງ WHO ໃນປັດຈຸບັນ ກໍແມ່ນບັນດາກຳນົດທິດໃຫຍ່ ເຊິ່ງ ຫວຽດນາມ ພວມສຸມໃສ່ຜັນຂະຫຍາຍ, ພິເສດແມ່ນການເພີ່ມທະວີຄວາມເຂັ້ມແຂງໃຫ້ແກ່ສາທາລະນະສຸກຂັ້ນຮາກຖານ, ຊຸກຍູ້ການປ້ອງກັນ, ຕ້ານພະຍາດ, ຍົກສູງກຳລັງຄວາມສາມາດຮັບມືກັບກໍລະນີສຸກເສີນ ແລະ ປັບຕົວກັບການປ່ຽນແປງຂອງດິນຟ້າອາກາດ. ທ່ານນາງ Angela Pratt ຫົວໜ້າ ຜູ້ຕາງໜ້າອົງການອະນາໄມໂລກ ປະຈຳ ຫວຽດນາມ ໃຫ້ຮູ້ວ່າ: ບັນດາເປົ້າໝາຍຂອງ WHO ກໍແມ່ນບັນດາບຸລິມະສິດ ເຊິ່ງ ຫວຽດນາມ ພວມມຸ່ງໄປເຖິງ. ໃນນັ້ນ, WHO ໃຫ້ຄວາມເອົາໃຈໃສ່ເປັນພິເສດເຖິງການພັດທະນາສາທາລະນະສຸກຂັ້ນຮາກຖານ, ເພີ່ມທະວີວຽກງານປ້ອງກັນ, ຕ້ານຜົນຮ້າຍຂອງຢາສູບ, ພ້ອມດຽວກັນນັ້ນ ກໍ່ຍົກສູງກຳລັງຄວາມສາມາດຮັບມືກັບການປ່ຽນແປງຂອງດິນຟ້າອາກາດ ແລະ ຄວບຄຸມມົນລະພິດສິ່ງແວດລ້ອມ ເພື່ອແນໃສ່ຮັກສາສຸຂະພາບຊຸມຊົນ. ໃນການຕ້ອນຮັບ, ສອງຝ່າຍກໍໄດ້ເຫັນດີເປັນເອກະພາບຊຸກຍູ້ການຮ່ວມມືລະຫວ່າງ ຫວຽດນາມ ແລະ WHO ໃຫ້ມີປະສິດທິຜົນ ເພື່ອເປົ້າໝາຍຮັກສາສຸຂະພາບຂອງປະຊາຊົນ ແລະ ການພັດທະນາແບບຍືນຍົງ.
