ຕອນເຊົ້າວັນທີ 26 ຕຸລາ, ຢູ່ສຳນັກງານລັດຖະບານ (ຮ່າໂນ້ຍ), ທ່ານ ເລມິງຮຶງ ນາຍົກລັດຖະມົນຕີ ຫວຽດນາມ ໄດ້ເປັນປະທານພິທີຕ້ອນຮັບ ທ່ານ Donald Tusk ນາຍົກລັດຖະມົນຕີ ສ.ໂປໂລຍ ເນື່ອງໃນໂອກາດມາຢ້ຽມຢາມ ຫວຽດນາມ ຢ່າງເປັນທາງການແຕ່ວັນທີ 24 – 26 ຕຸລາ.
ພາຍຫຼັງພິທີຕ້ອນຮັບ, ນາຍົກລັດຖະມົນຕີສອງທ່ານໄດ້ພົບປະກັນກ່ອນທີ່ຈະນຳພາຄະນະຜູ້ແທນຂັ້ນສູງສອງປະເທດດຳເນີນການພົບປະເຈລະຈາເພື່ອແນໃສ່ຕີລາຄາໝາກຜົນຂອງການຮ່ວມມືລະຫວ່າງສອງປະເທດໃນໄລຍະຜ່ານມາ ແລະ ສະເໜີບັນດາທິດທາງການຮ່ວມມືໃນໄລຍະຈະມາເຖິງ.
ຕາມທ່ານ ຮ່າຮວ່າງຫາຍ ເອກອັກຄະລັດຖະທູດ ຫວຽດນາມ ປະຈຳ ໂປໂລຍ ແລ້ວ, ການຢ້ຽມຢາມ ຫວຽດນາມ ຂອງທ່ານ Donald Tusk ນາຍົກລັດຖະມົນຕີ ໂປໂລຍ ໄດ້ຮັບຄວາມຫວັງວ່າຈະສ້າງໂອກາດຊຸກຍູ້ການຮ່ວມມືເສດຖະກິດ - ການຄ້າ ແລະ ການລົງທຶນຕາມທິດທີ່ແທ້ຈິງ, ປັບປຸງເງື່ອນໄຂການເຂົ້າເຖິງຕະຫຼາດ ແລະ ແກ້ໄຂບັນດາຮົ້ວກີດຂວາງສຳລັບສິນຄ້າສອງປະເທດ.
ໃນຂະນະນັ້ນ, ທ່ານນາງ Joanna Skoczek ອຸປະທູດຊົ່ວຄາວ ສະຖານທູດ ໂປໂລຍ ປະຈຳ ຫວຽດນາມ ໄດ້ແບ່ງປັນວ່າ ການຢ້ຽມຢາມຂອງ ທ່ານ Donald Tusk ນາຍົກລັດຖະມົນຕີ ໂປໂລຍ ແມ່ນເພື່ອແນໃສ່ກຳນົດ ແລະ ຢັ້ງຢືນບັນດາຂົງເຂດທີ່ມີແງ່ຫວັງຮ່ວມມືໃຫຍ່ທີ່ສຸດລະຫວ່າງສອງປະເທດ, ນັ້ນແມ່ນການສຶກສາ, ການຄ້າ, ການຮ່ວມມືຢູ່ບັນດາເວທີປາໄສສາກົນ, ວັດທະນະທຳ ແລະ ການພົບປະແລກປ່ຽນປະຊາຊົນ.
