ຕ້ອງຮັບປະກັນຄວາມໝັ້ນຄົງທາງໄຊເບີ, ຄວາມປອດໄພດ້ານຂໍ້ມູນ ແລະ ປ້ອງກັນຂໍ້ມູນແຫ່ງຊາດ. ນັ້ນແມ່ນຄຳຢືນຢັນຂອງທ່ານ ໂຕເລິມ, ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ, ປະທານປະເທດ ຫວຽດນາມ, ຫົວໜ້າຄະນະຊີ້ນຳສູນກາງກ່ຽວກັບການພັດທະນາວິທະຍາສາດເຕັກໂນໂລຊີ, ນະວັດຕະກຳ ແລະ ການຫັນເປັນດີຈີຕອນ ທີ່ວາລະປະຊຸມຫົວເລື່ອງສະເພາະກ່ຽວກັບວຽກງານຫັນລະບົບການເມືອງເປັນດີຈີຕອນ ເຊິ່ງໄດ້ຈັດຂຶ້ນໃນຕອນບ່າຍວັນທີ 25 ມິຖຸນາ, ຢູ່ສຳນັກງານສູນກາງພັກ, ທີ່ ຮ່າໂນ້ຍ. ເຂົ້າຮ່ວມວາລະປະຊຸມຍັງມີທ່ານ ເຈິ່ນແທັງເໝີ້ນ, ປະທານສະພາແຫ່ງຊາດ, ທ່ານ ເຈິ່ນເກິມຕູ, ຜູ້ປະຈຳການຄະນະເລຂາທິການສູນກາງພັກ.
ທ່ານເລຂາທິການໃຫຍ່, ປະທານປະເທດ ໂຕເລິມ ຮຽກຮ້ອງໃຫ້ບັນດາອົງການບໍ່ປະໃຫ້ເກີດສະພາບຂໍ້ມູນແຫ່ງຊາດ, ຂໍ້ມູນຂອງປະຊາຊົນ, ວິສາຫະກິດຖືກຮົ່ວໄຫຼ, ຊື້ - ຂາຍ ຫຼື ຂຸດຄົ້ນຢ່າງຜິດກົດໝາຍ. ທ່ານກໍ່ໄດ້ເນັ້ນໜັກໜ້າທີ່ຈຸດສຸມຈຳນວນໜຶ່ງທີ່ຕ້ອງສຸມໃສ່ປະຕິບັດໃນໄລຍະຈະມາເຖິງວ່າ:
“ຍູ້ແຮງບັນດາໜ້າທີ່ຫັນເປັນດີຈີຕອນ ຮັບໃຊ້ການເຄື່ອນໄຫວລະບົບການເມືອງຂອງອຳນາດການປົກຄອງ 3 ຂັ້ນໃຫ້ຄົບຊຸດ, ລຸລ່ວງ ແລະ ມີປະສິດທິຜົນ. ສຸມໃສ່ສ້າງພື້ນຖານໂຄງລ່າງດີຈີຕອນຢ່າງຄົບຊຸດຈາກສູນກາງລົງຮອດຂັ້ນຕາແສງ, ຮັບປະກັນບັນດາເງື່ອນໄຂເພື່ອໃຫ້ອຳນາດການປົກຄອງທຸກຂັ້ນເຄື່ອນໄຫວໃນສະພາບແວດລ້ອມດີຈີຕອນສະດວກຢ່າງແທ້ຈິງ. ຍູ້ແຮງການປະຕິຮູບລະບຽບການບໍລິຫານ ຕິດພັນກັບການຫັນເປັນດີຈີຕອນ”.
ສະເພາະການພັດທະນາ ແລະ ນຳໃຊ້ປັນຍາປະດິດໃນການບໍລິຫານ, ຄຸ້ມຄອງວຽກງານ, ທ່ານເລຂາທິການໃຫຍ່, ປະທານປະເທດ ໂຕເລິມ ເນັ້ນໜັກວ່າ ຕ້ອງຖືປັນຍາປະດິດແມ່ນວິທີການໜູນຊ່ວຍສຳຄັນເພື່ອຍົກສູງປະສິດທິຜົນ, ປະສິດທິພາບໃນວຽກງານ, ແຕ່ບໍ່ອາດປ່ຽນແທນໜ້າທີ່ຄວາມຮັບຜິດຊອບ, ສິດອຳນາດ ແລະ ການຍົກອອກບັນດາຂໍ້ກຳນົດຂອງມະນຸດໄດ້.
