ວັນບຸນວັດທະນະທຳເຜົ່າມົ້ງ ຄັ້ງທີ IV ຢູ່ແຂວງດຽນບຽນ ປີ 2026 ໄດ້ດຳເນີນແຕ່ວັນທີ 9 ຕຸລາ ຫາວັນທີ 11 ຕຸລາ, ດ້ວຍການເຂົ້າຮ່ວມຂອງບັນດານັກສິລະປະການ, ນັກສະແດງ, ນັກກິລາຊາວເຜົ່າມົ້ງ ຂອງ 11 ແຂວງ, ລວມມີ: ດຽນບຽນ, ຕວຽນກວາງ, ຝູເຖາະ, ໄທງວຽນ, ເຊີນລາ, ກາວບັ່ງ, ລາຍເຈົາ, ລາວກາຍ, ແທັງຮວາ, ເງະອານ ແລະ ດັກລັກ. ໃນໂອກາດນີ້, ຢູ່ແຂວງດຽນບຽນ ໄດ້ດຳເນີນຫຼາຍກິດຈະກຳວັດທະນະທຳຄື: ລາຍການສະແດງສິລະປະແຄນມົ້ງ; ລາຍການວາງສະແດງ, ແນະນຳ, ໂຄສະນາວັດທະນະທຳພື້ນເມືອງເຜົ່າມ້ົງ… ທີ່ການຖະແຫຼງຂ່າວໃນຕອນແລງວັນທີ 24 ກັນຍາ, ຢູ່ຮ່າໂນ້ຍ, ທ່ານ ເຈິ່ນຫ໋າຍຮ່າ, ຫົວໜ້າພະແນກວັດທະນະທຳ, ກິລາ ແລະ ການທ່ອງທ່ຽວ ແຂວງດຽນບຽນ ໃຫ້ຮູ້ວ່າ:
ວັນບຸນວັດທະນະທຳຊາວເຜົ່າມົ້ງຄັ້ງນີ້ ມີການປ່ຽນແປງໃໝ່ກ່ຽວກັບຂອບຂະໜາດ ແລະ ຮູບແບບການຈັດຕັ້ງ. ແທນທີ່ບັນດາການເຄື່ອນໄຫວວັນບຸນທົ່ວໄປຄື: ການລະຫຼິ້ນ, ບັນເທິງ, ການອະນຸລັກຮັກສາ, ການເຊີດຊູວັດທະນະທຳ, ວັນບຸນຄັ້ງນີ້ໄດ້ຕິດພັນກັບການພັດທະນາເສດຖະກິດ, ສັງຄົມຂອງທ້ອງຖິ່ນ ຕິດພັນກັບການໂຄສະນາການທ່ອງທ່ຽວອີກດ້ວຍ. ອີກຈຸດໜຶ່ງທີ່ໃໝ່ອ່ຽມນັ້ນແມ່ນ ລາຍການ Carnaval. ນີ້ແມ່ນການແຫ່ຂະບວນຕາມຖະໜົນທີ່ໃຫຍ່ໂຕມະໂຫຖານທີ່ສຸດໃນການຈັດຕັ້ງວັນບຸນວັດທະນະທຳເຜົ່າມົ້ງຄັ້ງຕ່າງໆນັບແຕ່ກ່ອນມາຮອດປັດຈຸບັນ, ດ້ວຍຂອບຂະໜາດຜູ້ເຂົ້າຮ່ວມ 3.000 ຄົນ, ລົດແຫ່ຂະບວນ 3 ຄັນ ແລະ ຫຼາຍກຸ່ມກຳລັງອື່ນໆອີກ.
