ເຂດທີ່່ໝັ້ນ ເວີ່ນ, ຢູ່ຕາແສງ ຫວຽດຮົ່ງ, ແຂວງ ລາວກາຍ ແມ່ນເຂດດິນທີ່ຂີດໝາຍຫຼາຍເຫດການສຳຄັນຂອງຂະບວນການປະຕິວັດກ່ອນໄລຍະດຳເນີນການປະຕິວັດເດືອນສິງຫາປີ 1945. ຜ່ານໄລຍະກວ່າ 80 ປີ, ມາຮອດປະຈຸບັນ, ບັນດາຄຸນຄ່າປະຫວັດສາດນັ້ນຍັງຄົງໄດ້ຮັບການຮັກສາໄວ້ ແລະ ເສີມຂະຫຍາຍ, ກາຍເປັນບ່ອນອີງດ້ານຈິດໃຈເພື່ອໃຫ້ປະຊາຊົນບືນຕົວຂຶ້ນ. ພາຍຫຼັງການໂຮມແຂວງເຂົ້າກັນ (ເດືອນ 7/2025), ພື້ນທີ່ພັດທະນາໄດ້ຮັບການເປີດກວ້າງ, ສ້າງໂອກາດຕື່ມອີກເພື່ອໃຫ້ ຫວຽດຮົ່ງ ຂຸດຄົ້ນຄວາມສາມາດບົ່ມຊ້ອນກ່ຽວກັບ ປ່າ, ກະສິກຳ, ການທ່ອງທ່ຽວ, ກໍ່ສ້າງບ້ານເກີດເມືອງນອນໃຫ້ນັບມື້ນັບຮັ່ງມີ, ສວຍງາມ, ສີວິໄລເທື່ອລະກ້າວ.
ເດືອນ ພຶດສະພາປີ 1945, ຢູ່ເຂດທີ່ໝັ້ນ ເວີ່ນ, ກອງຫຼອນ ເອົາເກີ ໄດ້ກຳເນີດຂຶ້ນ. ນີ້ແມ່ນໜຶ່ງໃນບັນດາຂີດໝາຍສຳຄັນຂອງຂະບວນການປະຕິວັດຢູ່ ອຽນບ໋າຍ.
ຫຼັງຈາກນັ້ນ 1 ເດືອນ, ຄະນະພັກລະຫວ່າງແຂວງ ອຽນບ໋າຍ - ຟູ໋ທໍ້ ໄດ້ສ້າງຕັ້ງຂຶ້ນໃນວັນທີ 7/5/1945, ຄະນະກຳມະການບໍລິຫານການຕໍ່ຕ້ານແຂວງ ອຽນບ໋າຍ ໄດ້ສ້າງຕັ້ງຂຶ້ນ ແລະນຳພາການຕໍ່ຕ້ານສຳເລັດຜົນ.
ເຖິງວ່າກວ່າ 8 ທົດສະວັດໄດ້ຜ່ານພົ້ນໄປແລ້ວກໍ່ຕາມ, ແຕ່ປະຊາຊົນຍັງຄົງເຄົາລົບຮັກສາບັນດາສະຖານທີ່ ທີ່ຕິດພັນກັບບັນດາເຫດການປະຫວັດສາດຂອງເຂດທີ່ໝັ້ນ ເວີ່ນ ຄື: ເຂດເຮືອນຂອງທ່ານ ເຈິ່ນເດິ່ງແຄ໋ງ, ສາລາບ້ານ ເວີ່ນ, ຕົ້ນງິ້ວ, ຕົ້ນຕິນເປັດ, ຖ້ຳເຢີຍ, ສາລາບ້ານ ຢອກ…ໄວ້ຢູ່.
ນີ້ບໍ່ພຽງແຕ່ແມ່ນສະຖານທີ່ “ແດງ” ເພື່ອທ່ຽວຊົມເທົ່ານັ້ນ, ຫາກຍັງແມ່ນສະຖານທີ່ທັດສະນະສຶກສາເພື່ອໃຫ້ລຸ້ນປະຈຸບັນມີຄວາມເຂົ້າໃຈກວ່າກ່ຽວກັບປະຫວັດສາດ ແລະການເສຍສະຫຼະຊີວິດຂອງບັນດານັກຮົບວິລະຊົນອີກດ້ວຍ.
ເອື້ອຍ ຫວູເຮືອງຢາງ, ຢູ່ຕາແສງ ອຽນບ໋າຍ, ແຂວງ ລາວກາຍ, ຜູ້ທີ່ມາຢາມເຂດທີ່ໝັ້ນ ເວີ່ນ, ແບ່ງປັນວ່າ:
ແຕ່ລະສະຖານທີ່, ແຕ່ລະກົກໄມ້ ແລະວັດຖຸພັນລ້ວນແຕ່ຕິດພັນກັບບັນດາເຫດການ, ເລື່ອງລາວສະເທືອນໃຈກ່ຽວກັບຊຸມວັນເດືອນອັນຫຍຸ້ງຍາກລຳບາກແຕ່ສະຫງ່າອົງອາດ, ຈົ່ງຮັກພັກດີຂອງລຸ້ນພໍ່ລຸ້ນອ້າຍຢູ່ເຂດທີ່ໝັ້ນ ເວີ່ນ, ເຊິ່ງແມ່ນສິ່ງທີ່ລຸ້ນປະຈຸບັນນິຍົມນັບຖື ແລະຮູ້ບຸນຄຸນທີ່ສຸດ.ມາແຫ່ງນີ້ພວກຂ້າພະເຈົ້າເຫັນວ່າບັນດາສະຖານທີ່, ວັດຖຸພັນແຫ່ງໄລຍະປະຕິວັດນັ້ນ, ອຳນາດການປົກຄອງ ແລະປະຊາຊົນຢູ່ທີ່ນີ້ໄດ້ບຸລະນະຮັກສາດີທີສຸດ, ຜ່ານນັ້ນຊ່ວຍໃຫ້ນັກທ່ອງທ່ຽວມີຄວາມເຂົ້າໃຈຕື່ມ ແລະສາມາດຫວນຄິດໄດ້ສ່ວນໜຶ່ງແຫ່ງຊຸມເດືອນປີປະຫວັດສາດອັນສະຫງ່າອົງອາດກ່ອນນີ້ 80 ປີ.
ຈາກອະນຸສອນກ່ຽວກັບເຂດທີ່ໝັ້ນປະຕິວັດ, ເລື່ອງລາວຂອງ ຫວຽດຮົ່ງ ໃນມື້ນີ້ພວມໄດ້ຮັບການຂຽນຕໍ່ດ້ວຍການປ່ຽນແປງໃນຊີວິດການເປັນຢູ່.
ພໍ່ແມ່ປະຊາຊົນຊາວເຜົ່າກິງ, ໄຕ່ ຢູ່ແຫ່ງນີ້ພວມຕັ້ງໜ້າແຂ່ງຂັນອອກແຮງງານທຳການຜະລິດ, ກ້າຫັນປ່ຽນວິທີເຮັດວຽກ, ຊອກຫາທິດທາງພັດທະນາເສດຖະກິດໃຫ້ເໝາະສົມກັບທ່າໄດ້ປຽບຂອງທ້ອງຖີ່ນ. ລ້ຽງປາສະເຕີຈຽນ, ເປັດຫົວຂຽວ, ຄວາຍ, ໝູແມ່ພັນ; ປູກໄຜ່ເອົາໜໍ່ ບ໋າດໂດ້; ປູກພືດສະໝູນໄພ, ເຮັດບໍລິການທ່ອງທ່ຽວຊຸມຊົນ… ນັບມື້ນັບມີຫຼາຍຮູບແບບທີ່ໃຫ້ ປະສິດທິຜົນທາງດ້ານເສດຖະກິດ. ມີບາງຮູບແບບບັນລຸລາຍຮັບແຕ່ 500-600 ລ້ານດົ່ງ/ປີ. ທ່ານ ຫງວຽນວັນໂທຍ, ຢູ່ບ້ານ ໜາ, ຕາແສງ ຫວຽດຮົ່ງ, ແຂວງ ລາວກາຍ ໃຫ້ຮູ້ວ່າ:
ຢູ່ໃນບ້ານ ໜາ ປະຊາຊົນສ່ວນຫຼາຍພັດທະນາອາຊີບປ່າໄມ້ທີ່ສ້າງລາຍຮັບສູງ. ໃນຊຸມປີຕໍ່ໄປ, ເຂົາເຈົ້າສືບຕໍ່ພັດທະນາເສດຖະກິດ, ປູກປ່າ, ພິເສດແມ່ນຜັນຂະຫຍາຍການປູກໄຜ່ເອົາໜໍ່ ບ໋າດໂດ້ ໃນເນື້ອທີ່ກວ້າງຂວາງ.
ເດືອນ 7/2025, ຕາແສງ ຫວຽດຮົ່ງ ໄດ້ຮັບການສ້າງຕັ້ງບົນພື້ນຖານໂຮມ 3 ຕາແສງ: ຫວຽດຮົ່ງ, ຫວຽດເກື່ອງ, ເວິນໂຫ້ຍ ເຂົ້າກັນ, ດ້ວຍເນື້ອທີ່ 100 ຕາຕະລາງກິໂລແມັດ, ມີພົນລະເມືອງກວ່າ 10.800 ຄົນ, ເປີດຄວາມສາມາດບົ່ມຊ້ອນ ແລະ ໂອກາດໃຫຍ່ເພື່ອໃຫ້ບ້ານເກີດເມືອງນອນແຫ່ງການປະຕິວັດພັດທະນາກະໂດດຂັ້ນ.
ບາງຂໍ້ເນັ້ນໜັກແມ່ນ ທາງຕາແສງໄດ້ສ້າງມະຕິສະເພາະຫົວເລື່ອງ ແລະແຜນງານພັດທະນາການທ່ອງທ່ຽວໄລຍະ 2025-2030, ວິໄສທັດເຖິງປີ 2045 ດ້ວຍເປົ້າໝາຍດຶງດູດແຂກທ່ອງທ່ຽວໃຫ້ໄດ້ 26.000 ກວ່າເທື່ອຄົນ, ດ້ວຍລາຍຮັບ 20,8 ຕຶ້ດົ່ງ (812 ໂດລາສະຫະລັດ). ໄປຄຽງຄູ່ກັນນັ້ນ, ວຽກງານວາງແຜນຜັງໂຄງລ່າງອຸດສາຫະກຳກໍ່ໄດ້ຮັບຄວາມເອົາໃຈໃສ່ປະຕິບັດ ດ້ວຍເຂດອຸດສາຫະກຳ 2 ແຫ່ງລວມເນື້ອທີ່ 500 ເຮັກຕາ. ປະຈຸບັນລາຍຮັບສະເລ່ຍໃສ່ຫົວຄົນບັນລຸ 62 ລ້ານດົ່ງ/ຄົນ/ປີ (2.385 ໂດລາສະຫະລັດ/ຄົນ/ປີ). ທາງຕາແສງສູ້ຊົນເຖິງປີ 2030 ລາຍຮັບສະເລ່ຍໃສ່ຫົວຄົນບັນລຸ 65 ລ້ານດົ່ງ/ຄົນ/ປີ (2.500 ໂດລາສະຫະລັດ/ຄົນ/ປີ) ແລະ ບໍ່ມີຄອບຄົວທຸກຍາກຕາມມາດຕະຖານທຸກຍາກແບບຫຼາຍມິຕິ…ຕາແສງບັນລຸເປົ້າໝາຍເຖິງປີ 2030, ມີເຂດປູກໄຜ່ເອົາໜໍ່ລວມສຸມດ້ວຍເນື້ອທີ່ 500 ເຮັກຕາ.
ທ່ານ ຫງວຽນຕ໋ຽນຈ໋ຽນ, ປະທານຄະນະກຳມະການປະຊາຊົນຕາແສງ ຫວຽດຮົ່ງ, ແຂວງລາວກາຍ, ໃຫ້ຮູ້ວ່າ:
ໃນການພັດທະນາເສດຖະກິດປ່າໄມ້, ພວກຂ້າພະເຈົ້າຫັນປ່ຽນພືດບາງຊະນິດທີ່ບໍ່ໃຫ້ປະສິດທິຜົນດີ ມາປູກໄຜ່ເອົາໜໍ່ ບ໋າດໂດ້, ເພື່ອເພີ່ມມູນຄ່າເສດຖະກິດປ່າ, ຍົກສູງລາຍຮັບໃຫ້ແກ່ປະຊາຊົນ. ພວກຂ້າພະເຈົ້າກໍ່ສືບຕໍ່ລົງທຶນກໍ່ສ້າງໃໝ່ ແລະຍົກລະດັບບັນດາພື້ນຖານໂຄງລ່າງເສດຖະກິດ, ສັງຄົມ, ສ້າງເງື່ອນໄຂເພື່ອໃຫ້ປະຊາຊົນພັດທະນາເສດຖະກິດ.
ເຂດທີ່ໝັ້ນ ເວີ່ນ ໄດ້ໄປຜ່ານຊຸມເດືອນປີອັນດຸເດືອດຂອງປະຫວັດສາດ. ບັນດາຮ່ອງຮອຍຍັງຄົງຢູ່ນັ້ນ ເພື່ອເຕືອນໃຫ້ລະນຶກເຖິງຄົນລຸ້ນກ່ອນທີ່ໄດ້ປະກອບສ່ວນສ້າງເປັນເອກະລາດໃຫ້ແກ່ປະເທດຊາດໃນລະດູໃບໄມ້ຫຼົ່ນ.
ປະຈຸບັນ, ໃນເຂດດິນທີ່ເຄີຍເປັນຖານທີ່ໝັ້ນປະຕິວັດນັ້ນ, ໄລຍະທາງໃໝ່ພວມເປີດອອກ. ເສີມຂະຫຍາຍກຳລັງແຮງມະຫາສາມັກຄີບັນດາເຜົ່າ, ປຸກລຸກນ້ຳໃຈກຸ້ມຕົນເອງ, ປ່ຽນໃໝ່ຈີນຕະນາການ ແລະ ຂຸດຄົ້ນຄວາມສາມາດບົ່ມຊ້ອນ, ທ່າໄດ້ປຽບໃຫ້ມີປະສິດທິຜົນ, ຫວຽດຮົ່ງ ພວມມຸ່ງໄປເຖິງເປົ້າໝາຍບັນລຸມາດຕະຖານຊົນນະບົດໃໝ່ແບບຍົກລະດັບໃນປີ 2030, ຍົກດັດຊະນີຄວາມຜາສຸກຂອງປະຊາຊົນຂຶ້ນ 78%.
