ປ່າສະຫງວນແຫ່ງຊາດ ກອນກ່າກິງ ນອນຢູ່ທາງທິດຕາເວັນອອກສຽງເໜືອຂອງແຂວງ ຢາລາຍ ຫ່າງຈາກນະຄອນ ເປຼກູ 50 ກິໂລແມັດ ໄປທາງທິດຕາເວັນອອກສຽງເໜືອ. ນີ້ແມ່ນສະຖານທີ່ທ່ອງທ່ຽວທຳມະຊາດທີ່ເປັນໜ້າຈັບໃຈແທດເໝາະກັບແຂກທ່ອງທ່ຽວ ຢາກມີບ່ອນພັກຜ່ອນບຳລຸງສຸຂະພາບ ດ້ວຍທິວທັດທຳມະຊາດຫຼາຍຮູບຫຼາຍສີ. ຈາກທາງຫຼວງ 19 ເຂົ້າໄປສອງສາມກິໂລແມັດ, ຜູ້ຄົນທັງຫຼາຍຕ້ອງຕົກສະເງິ ດ້ວຍທິວທັດທຳມະຊາດສວຍງາມແປກປະຫຼາດ ດ້ວຍແຖວຕົ້ນໄມ້ໃຫຍ່ອາຍຸນັບຮ້ອຍປີ, ສຽງນ້ຳຫ້ວຍໄຫຼປະສານກັບສຽງນົກຮ້ອງ ໃນທ່າມກາງບັນຍາກາດປອດໂປ່ງເຢັນສະບາຍ. ເຂົ້າໄປເລິກກວ່າອີກ ແຂກທ່ອງທ່ຽວຈະພົບເຫັນຝູງກວາງສີກາພວມກິນຫຍ້າ, ຝູງລີງພວມຢູ່ເທິງກິ່ງໄມ້… ທ່ານ ຟ້າມແອັງຕ໊ວນ ປະທານຄະນະກຳມະປະຊຊົນແຂວງ ຢາລາຍ ໃຫ້ຮູ້ວ່າ:
“ປ່າສະຫງວນແຫ່ງຊາດ ກອນກ່າກິງ ແມ່ນຂອງປະເສີດໂດຍທຳມະຊາດບັນດານໃຫ້ ບໍ່ພຽງແຕ່ແຂວງ ຢາລາຍ ເທົ່ານັ້ນ ຫາກຍັງໃຫ້ແກ່ ຫວຽດນາມ ແລະ ໂລກອີກດ້ວຍ. ພວກຂ້າພະເຈົ້າພວມໄປສຳຫຼວດຕົວຈິງ ເພື່ອຊອກຫາວິທີອະນຸລັກ ແລະ ເສີມຂະຫຍາຍຄຸນຄ່າການທ່ອງທ່ຽວ ພ້ອມທັງເຊື້ອເຊີນເພື່ອນມິດສາກົນມາຄົ້ນຫາແຫ່ງນີ້”.
ດ້ວຍເນື້ອທີ່ປ່າດົງດິບເກືອບ 42.000 ເຮັກຕາ ແລະ ລະດັບປົກຄຸມເກືອບ 94%, ກອນກ່າກິງ ແມ່ນຊາຍຄາຂອງພຶກສາຊາດ 1.700 ຊະນິດ ແລະ ສັດເກືອບ 800 ປະເພດ ໃນນັ້ນມີຫຼາຍປະເພດທີ່ມີຄ່າຫາຍາກ ນີ້ຍັງແມ່ນແຫ່ງທີ່ເປັນຍອດນ້ຳຂອງຫຼາຍລຳແມ່ນ້ຳໃຫຍ່ໃນເຂດ ເຕິຍ ງວຽນ ຄື ແມ່ນ້ຳ ບາ, ແມ່ນ້ຳ ດັກແນ, ແມ່ນ້ຳ ອາຢຸນ… (ເທບ). ເຂດເຄິ່ງກາງຂອງປ່າສະຫງວນແມ່ນເຂດດຳລົງຊີວິດຂອງເຜົ່າ ບານາ ດ້ວຍວັດທະນະທຳທີ່ເປັນເອກະລັກຂອງສາລາບ້ານ, ຄ້ອງ, ແຜ່ນແພພື້ນເມືອງ ແລະ ບັນດາງານບຸນປະເພນີ. ທັງໝົດເຫຼົ່ານັ້ນທັງເປັນສ້າງເປັນຮູບພາບສັງລວມ ທັງໃຫຍ່ໂຕະໂຫຖານ ທັງຮົກເຮື້ອ ແລະ ຊ້ອນແຝງບັນດາເລື່ອງລາວທີ່ເປັນເອກະລັກ. ທ່ານ ເຈິ່ນຫວຽດແອັງ ປະທານສະຫະສະມາຄົມທ່ອງທ່ຽວແຂວງ ດັກລັກ ຖືວ່າ:
“ພວກຂ້າພະເຈົ້າຈະສ້າງບັນດາລາຍການທ່ອງທ່ຽວພິເສດ ສົມທົບກັບການທ່ອງທ່ຽວທະເລ ແລະ ທ່ອງທ່ຽວ ປ່າໄມ້ ວິທີສົມທົບນີ້ຈະເຮັດໃຫ້ລາຍການທ່ອງທ່ຽວມີຄວາມໃໝ່ອ່ຽມ ແລະ ສ້າງຄວາມດູດດື່ມໃຫ້ແກ່ແຂກທ່ອງທ່ຽວຢູ່ພາຍໃນ ແລະ ຕ່າງປະເທດ”.
ສ່ວນທ່ານ ໂງດຶກຖັງ ຜູ້ອຳນວຍການປ່າສະຫງວນແຫ່ງຊາດ ກອນກ່າກິງ ຫວັງວ່າຢູ່ແຫ່ງນີ້ຈະພັດທະນາກາຍເປັນສະຖານທີ່ທ່ອງທ່ຽວທຳມະຊາດຂຽວຍືນຍົງ. ທ່ານກ່າວວ່າ:
“ໃນໄລຍະທີ່ຈະມາເຖິງພວກຂ້າພະເຈົ້າຈະຍູ້ແຮງການຄຸ້ມຄອງປົກປັກຮັກສາທັດຊະນີຍະພາບ, ຄຸນຄ່າປ່າໄມ້ ຮັບໃຊ້ວຽກງານອະນຸລັກ ພ້ອມທັງເພີ່ມທະວີການສົມທົບກັບບັນດາບໍລິສັດທ່ອງທ່ຽວ ສ້າງຜະລິດຕະພັນການບໍລິການ ແລະ ພື້ນຖານໂຄງລ່າງຮັບໃຊ້ແຂກທ່ອງທ່ຽວ”.
ໃນໄລຍະທີ່ຈະມາເຖິງພ້ອມກັບການອະນຸລັກ, ແຂວງ ຢາລາຍ ໃຫ້ບູລິມະສິດໃຫ້ແກ່ການສ້າງແຜນຜັງ, ສ້າງໂຄງລ່າງຕິດພັນກັບການອະນຸລັກຮັກສາສິ່ງແວດລ້ອມ. ທ່ານ ຟ້າມແອັຕ໊ວນ ໃຫ້ຮູ້ຕື່ມອີກວ່າ:
“ພວກຂ້າພະເຈົ້າຈະສຳຫຼວດກວດກາວຽກງານທັງໝົດ ຈາກການວາງແຜນຜັງຕະຫຼອດຮອດການຈັດຕັ້ງປະຕິບັດ. ສຸດທ້າຍແມ່ນການຈັດຕັ້ງຕ້ອນຮັບແຂກຖືກຕາມລະບຽບການຂອງປ່າສະຫງວນແຫ່ງຊາດນີ້”.
ມາທ່ຽວຢູ່ ກອນກ່າກິງ ແຂກທ່ອງທ່ຽວຈະໄດ້ລົງຢ້ຽມຢາມບັນດາໝູ່ບ້ານຂອງເຜົ່າຕ່າງໆຂອງເຂດ ເຕິຍງວຽນ ພິເສດການຮ່ວມຊີວິດວັດທະນະທຳທີ່ເປັນເອກະລັກຂອງຊາວເຜົ່າ ບານາ ຍັງຖືກຮັກສາໄວ້ເໝືອນເດີມ. ປ່າສະຫງວນແຫ່ງຊາດ ກອນກ່າກິງ ແມ່ນສະຖານທີ່ເປັນໜ້າຈັບໃຈສຳລັບແຂກທ່ອງທ່ຽວມັກມາພັກຜ່ອນບຳລຸງສຸຂະພາບ.
