ພາຍຫຼັງຜ່ານໄລຍະທາງທີ່ລະອິດລະອ້ຽວ, ເສົາທຸງຊາດ ອາປາຈາຍ ໄດ້ປາກົດຂຶ້ນ, ຍິ່ງຂຶ້ນສູງທິວທັດພູຜາປ່າໄມ້ສະຫຼັບສັບຊ້ອນ ຍິ່ງປາກົດຂຶ້ນຢ່າງໃຫຍ່ໂຕມະໂຫຖານ. ແລະ ເມື່ອຢືນໃຕ້ເສົາທຸງຊາດ, ເບິ່ງຜືນທຸງປິວສະບັດໃນທ່າມກາງສາຍລົມ, ແຕ່ລະຄົນຕ່າງກໍ່ມີວຄາມເອກອ້າງທະນົງໃຈ. ອ້າຍ ເຈິ່ນມິງຈຶ້ງ ແຂກທ່ອງທ່ຽວມາຈາກນະຄອນ ໂຮ່ຈີມິນ ໃຫ້ຮູ້ວ່າ:
“ເປັນຄັ້ງທຳອິດທີ່ເຮົາໄດ້ໄປເຖິງ ອາປາຈາຍ ເຮົາບໍ່ສາມາດພັນລະນາໄດ້ ກ່ຽວກັບຄວາມເອກອ້າງທະນົງໃຈຂອງຊາວ ຫວຽດນາມ ເມື່ອໄປເຖິງເຂດດິນທາງທິດຕາເວັນຕົກຂອງປະເທດຊາດ. ທັດຊະນີຍະພາບພູຜາປ່າໄມ້ຂອງ ຫວຽດນາມ ແລະ ພິເສດແມ່ນຢູ່ ອາປາຈາຍ ແມ່ນສະຫຼັບສັບຊ້ອນງົດງາມທີ່ສຸດ
ໂດຍໄດ້ລົງມືກໍ່ສ້າງນັບແຕ່ເດືອນ ພະຈິກ ປີ 2023 ຢູ່ຕາແສງ ສິນເທົ່າ ແຂວງ ດ້ຽນບຽນ, ເສົາທຸງຊາດ ອາປາຈາຍ ຕັ້ງຢູ່ລວງສູງ 1.459 ແມັດ ເມື່ອທຽບໃສ່ໜ້ານ້ຳທະເລ ແລະ ຫ່າງຈາກຈຸດໄຂວ່ກັນເສັ້ນຊາຍແດນສາມປະເທດ ຫວຽດນາມ ລາວ ຈີນ 1,3 ກິໂລແມັດ. ຫຼຽວເບິ່ງຈາກບ່ອນສູງ, ເນື້ອທີ່ 407 ຕາແມັດຂອງກິດຈະກຳ ປຽບເໝືອນດອກບານພວມບານສະພັ່ງ. ຢູ່ທີ່ນີ້ຜຶນທຸງຊາດມີເນື້ອທີ່ 37,5 ຕາແມັດ ໃນນັ້ນຕົວເລກ 7,5 ມີຄວາມໝາຍເຖິງວັນໄຊຊະນະ ດ້ຽນບຽນຝູ໋ ວັນທີ 7 ພຶດສະພາ. ຢູ່ທາງລຸ່ມແມ່ນລະບົບແຜ່ນຮູບແກະຄວັດສະຫຼັກ 5 ແຜ່ນ ພັນລະນາເຖິງເລື່ອງລາວກ່ຽວກັບກົກເຄົ້າເຫງົ້າກໍ, ພັນລະນາເຖິງຊີວິດການອອກແຮງງານ, ຄວາມງາມທາງດ້ານວັດທະນະທຳ ແລະ ການເຫຼື້ອມໃສ ພ້ອມກັບວາດຟ້ອນສຽງແຄນ ສຽງຂຸ່ຍທີ່ລຽບງ່າຍ. ພິເສດຮູບແກະຄວັດສະຫຼັກກ່ຽວກັບປະທານ ໂຮ່ຈີມິນ ກັບພໍ່ແມ່ພີ່ນ້ອງເຂດ ເຕີຍບັກ ສະແດງໃຫ້ເຫັນນ້ຳໃຈຄວາມສາມັກຄີ. ພັນຕີ ດິງກວັກເຕິບ ຮອງກຳມະການການເມືອງ ປ້ອມປ້ອງກັນຊາຍແດນ ອາປາຈາຍ, ກອງບັນຊາການທະຫານຊາຍແດນແຂວງ ດ້ຽນບຽນ ໃຫ້ຮູ້ວ່າ:
“ເສົາທຸງ ອາປາຈາຍ ໄດ້ຮັບການກໍ່ສ້າງ, ທີໜຶ່ງ ແມ່ນເພື່ອຢັ້ງຢືນອະທິປະໄຕຜຶນແຜ່ນດິນທີສັກກະລະບູຊາຂອງປະເທດຊາດ. ທີສອງ ແມ່ນເພື່ອສຶກສາອົບຮົມມູນເຊື້ອຮັກຊາດ ຮັກບ້ານເກີດເມືອງນອນໃຫ້ແກ່ຊາວ ຫວຽດນາມ ລຸ້ນຕ່າງໆ. ແລະ ທີສາມ ແມ່ນເພື່ອອະນຸລັກ ແລະ ເສີມຂະຫຍາຍບັນດາຄຸນຄ່າວັດທະນະທຳພື້ນເມືອງຂອງເຂດ ເຕີຍບັກ ເວົ້າລວມ ເວົ້າສະເພາະແມ່ນຂອງແຂວງ ດ້ຽນບຽນ”.
ຢູ່ ອາປາຈາຍ ຄຸນຄ່າວັດທະນະທຳ ຮ່າຍີ່ ຍາມໃດກໍ່ໄດ້ຮັບຄວາມເຄົາລົບ ແລະ ຮັກສາຈາກປະຊາຊົນຢູ່ແຫ່ງນີ້. ຈາກອາຊີບເຮັດເຄື່ອງຈັກສານ ຕະຫຼອດຮອດການສ້າງຊຸດອາພອນ ເຊິ່ງແມ່ນມໍລະດົກວັດທະນະທຳບໍ່ເປັນວັດຖຸລະດັບຊາດ, ທັງໝົດເຫຼົ່ານັ້ນກໍ່ຊ້ອນແຝງຄວາມຄາດຫວັງ ອະນຸລັກສີສັນທີ່ເປັນເອກະລັກຂອງເຜົ່າຕົນ. ຄວາມຄາດຫວັງນີ້ຍັງສະແດງໃຫ້ເຫັນຜ່ານສຽງດົນຕີ ວາດຟ້ອນທີ່ເປັນເອກະລັກຂອງຊາວເຜົ່າ ຮ່າຍີ່. ນາງ ລໍ່ຊໍປື໊ ຢູ່ແຫ່ງນີ້ ໃຫ້ຮູ້ວ່າ:
“ໃນຕອນກາງເວັນໄປເຮັດວຽກແລ້ວ ຮອດຕອນຄ່ຳຈຶ່ງແອບຟ້ອນນຳກັນ. ກອງສິລະປະວັນນະຄະດີຂອງບ້ານເຮົາໃນຍາມບຸນປີໃໝ່ປະເພນີ ຮ່າຍີ່ ກໍ່ໄດ້ພົບປະແລກປ່ຽນສະແດງສິລະປະນຳກັນ. ມີແຂກມາເຮົາຈຶ່ງພົບປະແລກປ່ຽນກັບແຂກ”.
ໄປຮອດເຂດທາງທິດຕາເວັນຕົກ ອາປາຈາຍ ບໍ່ພຽງແຕ່ໄດ້ໄປຮອດເຂດຊາຍແດນຕອນເໜືອສຸດຂອງປະເທດຊາດເທົ່ານັ້ນ ຫາກຍັງແມ່ນການເດີນທາງທີ່ເຕັມໄປດ້ວຍຄວາມເອກອ້າງທະນົງໃຈຂອງຊາດ. ບັນດາເລື່ອງລາວກ່ຽວກັບຄວາມຮັກບ້ານເກີດເມືອງນອນ ແລະ ຄວາມຄາດຫວັງຂອງພໍ່ແມ່ພີ່ນ້ອງບັນດາເຜົ່າຍັງຄົງຖືກຂຽນຕໍ່ຢູ່ແຕ່ລະຄອບຄົວ ເພື່ອສ້າງຄຸນຄ່າໃຫ້ແກ່ດິນແດນ ດ້ຽນບຽນ ປະຫວັດສາດແຫ່ງທີ່ເມື່ອໄປຮອດ ແຂກທ່ອງທ່ຽວຈະມີຄວາມຊົງຈຳຍາກທີ່ຈະຫຼົງລືມໄດ້.
