ໂດຍຫ່າງຈາກໃຈກາງ ຮ່າໂນ້ຍ 100 ກິໂລແມັດ ໄປທາງທິດຕາເວັນຕົກສຽງເໜືອ ເຊິ່ງໄດ້ຊ້ອນຕົວໃນທ່າມກາງເຂດພູຜາປ່າໄມ້ ແທັງເຊີນ, ເຂດທ່ອງທ່ຽວຊີວະພາບ ຫງອກດົ່ງ ໄດ້ສ້າງຄວາມປະທັບໃຈ ເຮັດໃຫ້ແຂກທ່ອງທ່ຽວຮູ້ສຶກມີຄວາມແຕກຕ່າງກັບຊີວິດເນືອງນັນຢູ່ເຂດຕົວເມືອງ.
ໃນເນື້ອທີ່ກວ່າ 10 ເຮັກຕາ, ເຂດທ່ອງທ່ຽວຊີວະພາບ ຫງອກດົ່ງ ໄດ້ຖືກສ້າງຂຶ້ນຕາມຮູບແບບທ່ອງທ່ຽວກະສິກຳ ສົມທົບກັບການພັກຜ່ອນບຳລຸງສຸຂະພາບ ດ້ວຍບັນດາເຂດເຮືອນພັກ, ທັດຊະນີຍະພາບ ແລະ ສະຖານທີ່ຄົ້ນຫາຕົວຈິງທີ່ຕິດພັນກັບທຳມະຊາດ. ດ້ວຍບັນຍາກາດສະຫງົບງຽບ, ອາກາດປອດໂປ່ງ ພ້ອມກັບການຄົ້ນຫາຕົວຈິງທີ່ໃກ້ຊິດສະໜິດສະໜົມກໍ່ແມ່ນເງື່ອນໄຂທີ່ເຮັດໃຫ້ແຂກທ່ອງທ່ຽວຕ່າງປະເທດຫຼາຍຄົນຮູ້ສຶກເປັນໜ້າຈັບໃຈ. ອ້າຍ ດານີເອນ ການໂລວາແກຣນ ແຂກທ່ອງທ່ຽວມາຈາກ ອັງກິດ ເປີດເຜີຍວ່າ:
“ການເດີນທາງທ່ອງທ່ຽວຄັ້ງນີ້ ແມ່ນເປັນໜ້າຈັບໃຈອີຫຼີ. ພວກຂ້າພະເຈົ້າໄດ້ຊອກຫາໂຮມສະເຕທາງສື່ສັງຄົມ. ນີ້ກໍ່ແມ່ນສະຖານທີ່ທ່ອງທ່ຽວທີ່ດີທີ່ສຸດ. ພວກຂ້າພະເຈົ້າໄດ້ຮັບຊົມການຕີລາຄາ ແລະ ຄິດວ່ານີ້ແມ່ນສະຖານທີ່ສົມບູນແບບ ເພື່ອພັກຜ່ອນບຳລຸງສຸຂະພາບ. ຢູ່ແຫ່ງນີ້ມີຄວາມສະຫງົບງຽບ ແລະ ທັດຊະນີຍະພາບງົດງາມທີ່ສຸດ”.
ຢູ່ໂຮມສະເຕໃນເຂດທ່ອງທ່ຽວຊີວະພາບ, ແຂກທ່ອງທ່ຽວບໍ່ພຽງແຕ່ໄດ້ພັກຜ່ອນເທົ່ານັ້ນ ຫາກຍັງຮ່ວມຊີວິດພ້ອມກັບຊາວທ້ອງຖິ່ນອີກດ້ວຍ. ເຮືອນຫຼັງຕ່າງໆຖືກກໍ່ດ້ວຍໄມ້ແບບລຽບງ່າຍ ມີປະຕູມຸ່ງໄປສູ່ໂນນຊາຂຽວອຸ່ມທຸ່ມ ແລະ ສວນຕົ້ນໄມ້ກິນໝາກ. ກໍ່ຍ້ອນຄວາມລຽບງ່າຍເຫຼົ່ານີ້ໄດ້ສ້າງຄວາມດຶງດູດໃຈສະເພາະໃຫ້ແກ່ ຫງອກດົ່ງ ສິ່ງທີ່ເຂດທ່ອງທ່ຽວບຳລຸງສຸຂະພາບລະດັບສູງຫຼາຍແຫ່ງຍາກທີ່ຈະບັນລຸໄດ້. ນາງ ຈີນາ ມາກລີ ແຂກທ່ອງທ່ຽວຊາວ ອັງກິດ ໃຫ້ຂໍ້ສັງເກດວ່າ:
“ພວກຂ້າພະເຈົ້າໄດ້ມາທ່ຽວຢູ່ທີ່ນີ້ໄດ້ໜຶ່ວັນແລ້ວ ແລະ ໃນມື້ນີ້ແມ່ນມື້ທີ່ທ້ອງຟ້າແຈ່ມໃສ ອາກາດປອດໂປ່ງ. ປະຊາຊົນຢູ່ທີ່ນີ້ມີຄວາມຮັກແພງແຂກ ພວກຂ້າພະເຈົ້າໄດ້ຕຶກປາຢູ່ໜອງ ແລະ ມີຄວາມຮູ້ສຶກສະຫວາດສະເຫວີຍເມື່ອມານີ້”.
ບໍ່ພຽງແຕ່ແມ່ນສະຖານທີ່ພັກຜ່ອນບຳລຸງສຸຂະພາບເທົ່ານັ້ນ, ຫງອກດົ່ງ ຍັງແມ່ນແຫ່ງທີ່ແຂກທ່ອງທ່ຽວມັກຄົ້ນຫາວັດທະນະທຳທ້ອງຖິ່ນ ຈາກອາຫານການກິນທີ່ອຸດົມສົມບູນ ຕະຫຼອດຮອດຊີວິດປະຈຳວັນ. ບັນດາເຍື່ອງອາຫານຢູ່ແຫ່ງນີ້ມີ ປີ້ງປາ, ສົ້ມໝູ, ຜັກປ່າ ທີ່ເຂັ້ມຂົ້ນໄປດ້ວຍລົດຊາດເຂດພູຜາປ່າໄມ້ ແທັງເຊີນ. ໃນທ່າອ່ຽງທ່ອງທ່ຽວຄົ້ນຫາທຳມະຊາດ, ບັນດາຄຸນຄ່າທີ່ແທ້ຈິງເຊັ່ນນີ້ ໄດ້ກາຍເປັນສະຖານທີ່ດຶງດູດໃຈແຂກທ່ອງທ່ຽວທັງຫຼາຍ. ທ່ານ ຫງວຽນວັນແທັງ ເຈົ້າຂອງບ້ານຊຸມຊົນຊີວະພາບ ຫງອກດົ່ງ ຕາແສງ ແທັງເຊີນ ແຂວງ ຝູເຖາະ ໃຫ້ຮູ້ວ່າ:
“ຂ້າພະເຈົ້າໄດ້ເຮັດທ່ອງທ່ຽວຊີວະພາບແມ່ນເພື່ອຄວາມຫວັງຢາກປະກອບສ່ວນເຫື່ອແຮງເລັກນ້ອຍ ເພື່ອສ້າງສາບ້ານເກີດເມືອງນອນ. ຂ້າພະເຈົ້າເລືອກເອົາການເຮັດທ່ອງທ່ຽວ ເພາະວ່ານີ້ແມ່ນຜະລິດຕະພັນເສດຖະກິດແບບຍືນຍົງ ຂ້າພະເຈົ້າໄດ້ເລືອກເອົາທິດທ່ອງທ່ຽວຊີວະພາບ ດັ່ງນັ້ນຢູ່ທີ່ນີ້ກໍ່ມີຕົ້ນໄມ້ຂຽວອຸ່ມທຸ່ມຫຼາຍປະເພດ. ແຂກທ່ອງທ່ຽວສາກົນມາທ່ຽວຊົມຢ່າງຫຼວງຫຼາຍ”.
ດ້ວຍບັນດາຄຸນຄ່າເຫຼົ່ານີ້, ຫງອກດົ່ງ ພວມກາຍເປັນສະຖານທີ່ທ່ອງທ່ຽວທີ່ເຕັມໄປດ້ວຍຄວາມສາມາດບົ່ມຂອງຂະແໜງທ່ອງທ່ຽວ ຝູເຖາະ. ນີ້ແມ່ນແຫ່ງເພື່ອໃຫ້ແຕ່ລະຄົນໄດ້ເຊື່ອມເຂົ້າກັບທຳມະຊາດ ແລະ ບັນດາສິ່ງທີ່ລຽບງ່າຍທີ່ສຸດ.
