ຈາກໃຈກາງຕາແສງ ຟອງກວາງ, ແຂກທ່ອງທ່ຽວໄດ້ເລີ່ມເດີນທາງໄປຍັງເຂດແກນກາງຂອງປ່າທຳມະຊາດ. ຍິ່ງເຂົ້າໄປເລິກບັນຍາກາດກໍ່ຍິ່ງສົດໃສເຢັນສະບາຍ.
ປ່າ ຊ່າງລໍ ຢູ່ ຟອງກວາງ ແມ່ນໜຶ່ງໃນບັນດາຈຸດທີ່ພົ້ນເດັ່ນໃນການຍ່າງຂ້າມປ່າ. ຜ່ານການຍ່າງເປັນເວລາເກືອບໜຶ່ງຊົ່ວໂມງ, ນ້ຳຕົນຕາດ ຫຼຸ໋ງບ໊າງ ໄດ້ປາກົດຂຶ້ນປຽບເໝືອນຍຸວະນາລີ ພວມນັ່ງຢູ່ກາງປ່າເຢັນສະບາຍ. ມານີ້ແຂກທ່ອງທ່ຽວຈະໄດ້ເຊື່ອມຕົວເຂົ້າກັບກະແສນ້ຳເຢັນສະບາຍ ພ້ອມທັງໄດ້ຖາຍຮູບທີ່ລະນຶກທີ່ເປັນໜ້າຈັບໃຈ. ອ້າຍ ເລືອງຢຸຍແຢັວງ ແຂກທ່ອງທ່ຽວມາຈາກ ຮ່າໂນ້ຍ ໃຫ້ຮູ້ວ່າ:
“ນ້ຳຕົກຕາດ ຫຼຸ໋ງບ໊າງ ງາມທີ່ສຸດ ແລະ ມີຄວາມສູງ 30 ແມັດ ນ້ຳໄຫຼຕະຫຼອດປີ. ນີ້ແມ່ນສະຖານທີ່ຈັບໃຈ ເພື່ອໃຫ້ແຂກທ່ອງທ່ຽວມາຄົ້ນຫາ, ທັງໄດ້ພັກຜ່ອນທັງໄດ້ອາບນ້ຳ ພາຍຫຼັງການເດີນທາງດ້ວຍຄວາມອິດເມື່ອຍ”.
ຈາກນ້ຳຕົກຕາດ ຫຼຸ໋ງບ໊າງ, ແຂກທ່ອງທ່ຽວສືບຕໍ່ຍ່າງຂ້າມປ່າ, ຜ່ານແຖວໄຜ່ປ່າ, ຊ່າງລໍ, ຜ່ານຫ້ວຍນ້ຳໄຫຼເຢັນສະບາຍ, ແຂກທ່ອງທ່ຽວຈະໄປຮອດເຂດທົ່ງຫຍ້າທີ່ກວ້າງໃຫຍ່ຂຽວອຸ່ມທຸ່ມ ໃນທ່າມກາງແສງແດດທີ່ອົບອຸ່ນ. ນອກຈາກນັ້ນແຂກທ່ອງທ່ຽວຍັງຈະພົບເຫັນບັນດາຕົ້ນຊາໃຫຍ່ ຊານຕວ໊ຽດ ທີ່ມີອາຍຸນັບຮ້ອຍປີ. ນາງ ເຈິ່ນທິຮ່ຽນ ແຂກທ່ອງທ່ຽວມາຈາກແຂວງ ເງະອານ ໃຫ້ຮູ້ວ່າ:
“ມານີ້ເຫັນນ້ຳຕົກຕາດ ຫຼຸ໋ງບ໊າງ ງາມທີ່ສຸດ, ຄວາມອິດເມື່ອຍທຸກຍ່າງຈະໄດ້ຫາຍໄປໝົດ. ພາຍຫຼັງໄດ້ຮັບຟັງການແນະນຳກ່ຽວກັບຕົ້ນຊາ ຊານຕວ໊ຽດ ນ້ອງກໍ່ດີໃຈທີ່ສຸດ. ຈາກນ້ຳຕົກຕາດຜ່ານເນື້ອທີ່ປ່າ ແລ້ວກໍ່ຮອດຮ່ອມພູທີ່ກວ້າງໃຫຍ່ງາມຕາ. ຍ່າງເຂົ້າໄປເລິກອີກຈະພົບເຫັນປ່າໄມ້ໄຜ່, ປ່າກ້ວຍ ນີ້ກໍ່ແມ່ນການຄົ້ນຫາທີ່ເປັນໜ້າຈັບໃຈອີຫຼີ”.
ດ້ວຍທ່າໄດ້ປຽບກ່ຽວກັບຊັບພະຍາກອນທຳມະຊາດຍັງເໝືອນເດີມ, ຟອງກວາງ ໄດ້ຮັບການຕີລາຄາວ່າ ແມ່ນໜຶ່ງໃນບັນດາບໍລິເວນທີ່ມີຄວາມສາມາດບົ່ມຊ້ອນ ເພື່ອພັດທະນາປະເພດທ່ອງທ່ຽວຍ່າງຄົ້ນຫາ. ຕາມຂະແໜງທ່ອງທ່ຽວແຂວງ ຖາຍງວຽນ ແລ້ວ ການພັດທະນາບັນດາເສັ້ນທາງທ່ອງທ່ຽວຕິດພັນກັບທຳມະຊາດ ບໍ່ພຽງແຕ່ປະກອບສ່ວນເຮັດໃຫ້ຜະລິດຕະພັນທ່ອງທ່ຽວເປັນຫຼາຍຮູບຫຼາຍແບບເທົ່ານັ້ນ ຫາກຍັງສ້າງໂອກາດໃຫ້ຊາວທ້ອງຖິ່ນມີການຫາເງິນລ້ຽງຊີບຜ່ານການເຄື່ອນໄຫວແນະນຳ, ການບໍລິການພັກເຊົາ, ຮ້ານກິນດື່ມ ແລະ ແນະນຳສິນພິເສດຢູ່ເຂດພູສູງ. ນາງ ຈູທິໂດ໊ ຮອງຫົວໜ້າສູນສົ່ງເສີມການທ່ອງທ່ຽວແຂວງ ຖາຍງວຽນ ໃຫ້ຮູ້ວ່າ:
“ຜ່ານການຄົ້ນຫາຢູ່ຕາແສງ ຟອງກວາງ ແຂວງ ຖາຍງວຽນ ແຂກທ່ອງທ່ຽວຈະໄດ້ຄົ້ນຫາ ນ້ຳຕົກຕາດ ຫຼຸ໋ງບ໊າງ ແລະ ເສັ້ນທາງຜ່ານທົ່ງຫຍ້າ ແລະ ໄດ້ຮັບຊົມບັນດາຕົ້ນຊາໃຫຍ່ ຊານຕວ໊ຽດ ທີ່ມີອາຍຸນັບຮ້ອຍປີ. ນີ້ແມ່ນການເຄື່ອນໄຫວມີລັກສະນະຄົ້ນຫາທຳມະຊາດ ຕິດພັນກັບວັດທະນະທຳທ້ອງຖິ່ນ”.
ໃນທ່າມກາງການດຳລົງຊີວິດທີ່ທັນສະໄໝ, ບັນດາເສັ້ນທາງຄື ເສັ້ນທາງໄປຍັງ ຫຼຸ໋ງບ໊າງ ກໍ່ຊ່ວຍໃຫ້ແຂກທ່ອງທ່ຽວມີໂອກາດກັບຄືນສູ່ທຳມະຊາດ ຊອກຫາຄຸນຄ່າດັ້ງເດີມຂອງການດຳລົງຊີວິດ. ນັ້ນແມ່ນຄວາມດູດດື່ມເປັນພິເສດຂອງການທ່ອງທ່ຽວຢູ່ແຂວງ ຖາຍງວຽນ ໃນວັນນີ້ ເຊິ່ງແມ່ນແຫ່ງທີ່ມີຄວາມງາມຮົກເຮື້ອຍັງຄົງໄດ້ຮັບການຮັກສາໄວ້ຢູ່ເຂດປ່າໄມ້ທີ່ກວ້າງໃຫຍ່ໄພສານ.
