ໃນທ່າມກາງເຂດພູຜາປ່າໄມ້ທາງທິດຕາເວັນອອກພາກເໜືອທີ່ກວ້າງໃຫຍ່ໄພສານ. ໜອງ ບາເບ໋ ປາກົດຂຶ້ນປຽນເໝືອນແຖບຜ້າໄໝຂຽວງາມພວມເລື່ອນລອຍໃນທ່າມກາງເຂດພູຜາປ່າໄມ້. ພາຍຫຼັງທີ່ໄດ້ໂຮມເຂົ້າແຂວງ ຖາຍງວຽນ, ໜອງນີ້ບໍ່ພຽງແຕ່ເປີດກວ້າງເຂດພັດທະນາການທ່ອງທ່ຽວເທົ່ານັ້ນ ຫາກັຍງສ້າງການເຊື່ອມຕໍ່ລະຫວ່າງເຂດ ນຳແຂກທ່ອງທ່ຽວຍັບເຂົ້າໃກ້ກັບຄຸນຄ່າຮົກເຮື້ອດັ້ງເດີມຂອງທຳມະຊາດ
ເມື່ອໄດ້ຂີ່ເຮືອລ່ອງຕາມສາຍນ້ຳເຢັນ, ແຂກທ່ອງທ່ຽວຮູ້ສຶກໄດ້ເຖິງຄວາມສະຫງົບງຽບຍາກທີ່ຈະຫາໄດ້ໃນທ່າມກາງການດຳລົງຊີວິດທີ່ທັນສະໄໝ. ອ້າຍ ດັ້ງວັນຄາງ ແຂກທ່ອງທ່ຽວມາຈາກ ຮ່າໂນ້ຍ ໃຫ້ຮູ້ວ່າ:
“ນັບແຕ່ກ່ອນເປັນຕົ້ນມາ, ໜອງ ບາເບ໋ ແມ່ນສະຖານທີ່ທ່ອງທ່ຽວທີ່ຍັງຮົກເຮື້ອ. ເມື່ອຂີ່ເຮືອຢູ່ທີ່ນີ້ກໍ່ຮູ້ສຶກສະຫວາດສະເຫວີຍ, ອາກາດເຢັນສະບາຍແທດເໝາະກັບແຂກທ່ອງທ່ຽວມັກຄົ້ນຫາທຳມະຊາດ ເປັນຕົ້ນແມ່ນແຂກທ່ອງທ່ຽວຕ່າງປະເທດ”.
ບໍ່ພຽງແຕ່ໄດ້ຢ້ຽມຊົມທັດຊະນີຍະພາບເທົ່ານັ້ນ, ການຄົ້ນຫາໜອງ ບາເບ໋ ຍັງນຳມາເຊິ່ງການເຄື່ອນໄຫວທ່ອງທ່ຽວທີ່ໃໝ່ອ່ຽມ. ຈາກການພາຍເຮືອຕະຫຼອດຮອດການຕັ້ງຄ້າຍຢູ່ແຄມໜອງ ເຊິ່ງລ້ວນແຕ່ເປັນການສຳຜັດກັບທຳມະຊາດຢ່າງໃກ້ຊິດ ສະໜິດສະໜົມຫຼາຍກວ່າ. ແຂກທ່ອງທ່ຽວຍິງຄົນໜຶ່ງມາຈາກ ຝຣັ່ງ ເປີດເປີຍວ່າ:
“ທິວທັດທຳມະຊາດຢູ່ແຫ່ງນີ້ເປັນເອກະລັກຢ່າງແທ້ຈິງ. ເປັນໜ້າຈັບໃຈອີຫຼີ, ປະຊາຊົນຢູ່ທີ່ນີ້ມີຄວາມຮັກແພງແຂກ ແລະ ຂ້າພະເຈົ້າພາກພູມໃຈ ເພາະໄດ້ມີການເດີນທາງຄົ້ນຫາຢູ່ທີ່ນີ້”.
ນອກຈາກໜອງ ບາເບ໋ ແລ້ວ, ໜອງ ໜຸຍກົກ ເຊິ່ງແມ່ນສະຖານທີ່ທ່ອງທ່ຽວທີ່ລື້ງເຄີຍນອນໃນເຂດທີ່ກວ້າງໃຫຍ່ກວ່າ ທີ່ໄດ້ເຊື່ອມຕໍ່ກັບບັນດາໜອງທຳມະຊາດ ແລະ ໜອງຂຸດເອງເຊິ່ງເປັນການພັດທະນາການທ່ອງທ່ຽວຫຼາກຫຼາຍສີສັນ. ທ່ານ ຫງວຽນຈູທູ ຮອງຫົວໜ້າພະແນກວັດທະນະທຳ, ກິລາ ແລະ ທ່ອງທ່ຽວ ແຂວງ ຖາຍງວຽນ ເນັ້ນໜັກວ່າ:
“ຖາຍງວຽນ ມີສອງໜອງຈຸດສຸມ ນັ້ນແມ່ນໜອງ ໜຸຍກົກ ແລະ ໜອງ ບາເບ໋. ນອກຈາກນັ້ນ ຖາຍງວຽນ ຍັງມີ 70 ໜອງທຳມະຊາດ ແລະ ຂຸດເອງ ໂດຍ ຖາຍງວຽນສ້າງເຄື່ອງໝາຍ: “ໜອງເທິງພູ”.
ໃນສະພາບການທ່ອງທ່ຽວທີ່ນັບມື້ ນັບເຊີດຊູປັດໄຈຄວາມໝັ້ນຄົງ, ການຂຸກຄົ້ນໜອງທຳມະຊາດ ບໍ່ພຽງແຕ່ແມ່ນເລື່ອງລາວພັດທະນາຜະລິດຕະພັນທ່ອງທ່ຽວເທົ່ານັ້ນ ຫາກຍັງແມ່ນການອະນຸລັກຮັກສາອີກດ້ວຍ. ອຳນາດການປົກຄອງທ້ອງຖິ່ນ ແລະ ຂະແໜງທ່ອງທ່ຽວແຂວງ ຖາຍງວຽນ ພວມສ້າງຮູບແບບພັດທະນາຢ່າງກົມກຽວລະຫວ່າງການຂຸດຄົ້ນ ແລະ ຮັກສາສະຖານທີ່ທ່ອງທ່ຽວເທື່ອລະກ້າວ. ທ່ານ ຈູທິໂດ໊ ຮອງຫົວໜ້າຮັບຜິດຊອບສູນຂຸດຄົ້ນສົ່ງເສີມພັດທະນາການທ່ອງທ່ຽວແຂວງ ຖາຍງວຽນ ໃຫ້ຮູ້ວ່າ:
“ປັດຈຸບັນພ້ອມກັບການລົງທຶນ ເພື່ອຮັບປະກັນຄຸນນະພາບການບໍລິການນັ້ນ, ວຽກງານສ້າງປົກປັກຮັກສາທັດຊະນີຍະພາບສິ່ງແວດລ້ອມ ກໍ່ຄືສ້າງສະຖານທີ່ທ່ອງທ່ຽວຢ່າງກົມກຽວ ເພື່ອດຶງດູດນັກທ່ອງທ່ຽວມາຄົ້ນຫາ ພິເສດຢູ່ເຂດທ່ອງທ່ຽວໜອງ ບາເບ໋, ພວກຂ້າພະເຈົ້າກໍ່ໄດ້ເພີ່ມທະວີການໂຄສະນາຂົນຂວາຍປະຊາຊົນ ເພື່ອມີຄວາມຮັບຜິດຊອຍສ້າງສິ່ງແວດລ້ອມທ່ອງທ່ຽວທີ່ເປັນມິດຢ່າງແທ້ຈິງ”.
ພາຍຫຼັງໂຮມແຂວງເຂົ້າກັນ, ການເປີດກວ້າງອານາເຂດການປົກຄອງ ໄດ້ສ້າງປະຖົມປັດໄຈໃຫ້ແກ່ການເປີດກວ້າງວິໄສທັດພັດທະນາ. ຖາຍງວຽນ ພວມຢືນຢູ່ຕໍ່ໜ້າໂອກາດໃຫຍ່ ເພື່ອຢັ້ງຢືນການທ່ອງທ່ຽວເດີນຕາມທິດສີຂຽວຍືນຍົງ ແລະ ຫຼາກຫຼາຍສີສັນ. ສຳລັບແຂວງ ຖາຍງວຽນ ແລ້ວ ການຄົ້ນຫາໜອງຕ່າງໆ ບໍ່ພຽງແຕ່ແມ່ນຜະລິດຕະພັນທ່ອງທ່ຽວເທົ່ານັ້ນ ຫາກຍັງແມ່ນການກຳນົດທິດ ກ່ຽວກັບວິທີພັດທະນາ: ພັດທະນາຈາກທຳມະຊາດ ເພື່ອທຳມະຊາດ ແລະ ພ້ອມກັບທຳມະຊາດ.
