ໃນອາທິດຜ່ານມາ, ພະແນກກະຈາຍສຽງບັນດາລາຍການພາກພາສາຕ່າງປະເທດ, ວິທະຍຸກະຈາຍສຽງ ຫວຽດນາມ ໄດ້ຮັບຈົດໝາຍ, ອີເມວ 336 ສະບັບ ແລະ ໂທລະສັບຫຼາຍສາຍ ຈາກທ່ານຜູ້ຟັງທີ່ມາຈາກ 34 ປະເທດ ແລະ ເຂດແຄວ້ນ. ໃນນັ້ນ, ລາຍການພາກພາສາລາວ ໄດ້ຮັບຈົດໝາຍ, ອີເມວ 24 ສະບັບຈາກທ່ານຜູ້ຟັງລາວ.
+ ເພື່ອນ ແສງດາວົງ, ຢູ່ແຂວງ ອັດຕະປື ໄດ້ສົ່ງຂໍ້ຄວາມມາຫາລາຍການ ແບ່ງປັນວ່າ: “ຂ້າພະເຈົ້າເຫັນວ່າ ລາຍການ podcast ຄັກທີ່ສຸດ. ຂ້າພະເຈົ້າຫວັງວ່າ ໃນລາຍການຕໍ່ໄປຈະສືບຕໍ່ໄດ້ຮັບຟັງກ່ຽວກັບຈຸດຄວາມງາມ, ປະຫວັດສາດ, ບັນດາສະຖານທີ່ທ່ອງທ່ຽວທີ່ມີຊື່ສຽງຂອງ ຫວຽດນາມ ຜ່ານບັນດາຄຳຖາມເຊິ່ງທ່ານຜູ້ຟັງໄດ້ຝາກມາລາຍການ ແລະ ຜ່ານຄຳຕອບຈາກບັນດາບັນນາທິການຂອງລາຍການ”.
+ ເພື່ອນ ວັນວິໄລ ວິໄລວົງ, ຢູ່ແຂວງ ຫົວພັນ ໄດ້ສົ່ງອີເມວຫາລາຍການ, ໂດຍແບ່ງປັນຄວາມຄິດພາຍຫຼັງທີ່ໄດ້ອ່ານຂ່າວ, ບົດກ່ຽວຂ້ອງກັບວັດທະນະທຳຫວຽດນາມ. ເພື່ອນແບ່ງປັນວ່າ: "ບັນດາບົດຂຽນໃນລາຍການ 'ເລື່ອງລາວເຂດບ້ານນາ' ໄດ້ຊ່ວຍໃຫ້ຂ້າພະເຂົ້າມີຄວາມເຂົ້າໃຈເຕີ່ມອີກກ່ຽວກັບການດຳລົງຊີວິດຢູ່ເຂດຊົນນະບົດຂອງ ຫວຽດນາມ. ແຕ່ລະບ້ານຈະມີເລື່ອງລາວທາງປະຫວັດສາດສະເພາະ, ຕິດພັນກັບອາຊີບຫັດຖະກຳທີ່ເປັນມູນເຊື້ອ ແລະ ບັນດາສີສັນວັດທະນະທຳທີ່ເປັນເອກະລັກສະເພາະ. ຂ້າພະເຈົ້າກໍ່ເຂົ້າໃຈວ່າ ນັບມື້ນັບມີໄວໜຸ່ມ ຫວຽດນາມ ຫຼາຍຄົນພວມອວ່າຍກັບໄປຫາກົກເຄົາເຫງົ້າກໍ, ຟື້ນຟູ, ພັດທະນາອາຊີບທີ່ເປັນມູນເຊື້ອ ແລະ ສີສັນວັດທະນະທຳບ້ານເກີດເມືອງນອນຂອງເຂົາເຈົ້າຜ່ານບັນດາພື້ນຖານດີຈີຕອນ".
+ ເພື່ອນ ຄຳປະສົງ ຢູ່ນະຄອນຫຼວງ ວຽງຈັນ ໄດ້ສົ່ງອີເມວມາຫາລາຍການໂດຍແບ່ງປັນວ່າ: “ຜ່ານຄໍລຳພາບສາລະຄະດີເນື່ອງໃນໂອກາດວັນບຸນໄຫວ້ພະຈັນ, ຂ້າພະເຈົ້າເຫັນວ່າ ນັບແຕ່ກ່ອນມາຮອດປະຈຸບັນ, ຍາມໃດ ຫວຽດນາມ ກໍ່ສະຫງວນຄວາມເອົາໃຈໃສ່ຢ່າງໃຫຍ່ຫຼວງໃຫ້ກັບເດັກນ້ອຍ, ໃນນັ້ນ ມີດ້ານວັດທະນະທຳ, ການສຶກສາ... ຊ່ວຍໃຫ້ເດັກນ້ອຍມີຄວາມເຂົ້າໃຈກ່ຽວກັບການດຳລົງຊີວິດຫຼາຍຂຶ້ນ. ໃນໂອກາດນີ້, ຂ້າພະເຈົ້າຂໍສົ່ງຄຳອວຍພອນອັນດີງາມທີ່ສຸດໄປເຖິງເດັກນ້ອຍທຸກຄົນ. ຂໍອວຍພອນໃຫ້ເດັກນ້ອຍມີວັນບຸນໄຫວ້ພະຈັນທີ່ມີຄວາມສຸກ, ມີຄວາມອົບອຸ່ນ ແລະ ໜ້າຈົດຈຳ”.
ລາຍການພາກພາສາລາວ ຂໍຂອບໃຈບັນດາທ່ານຜູ້ຟັງທີ່ໄດ້ໂທລະສັບ, ສົ່ງອີເມວ ແລະ ຈົດໝາຍມາຫາລາຍການໃນຕະຫຼອດໄລຍະຜ່ານມາ. ໃນໄລຍະຈະມາເຖິງ, ຫວັງວ່າ ພວກຂ້າພະເຈົ້າຈະສືບຕໍ່ໄດ້ຮັບຄຳເຫັນປະກອບ, ການແບ່ງປັນຂອງທ່ານຜູ້ຟັງຫຼາຍກວ່າອີກ ເພື່ອຊ່ວຍໃຫ້ທາງລາຍການນັບມື້ນັບອຸດົມສົມບູນຂຶ້ນຕື່ມ.
(ພາບປະກອບ: hanoimoi.vn)
ຕໍ່ຈາກນີ້, ລາຍການ “ໂອ້ລົມກັບເພື່ອນລາວ” ຈະຕອບຄຳຖາມຈຳນວນໜຶ່ງເຊິ່ງທ່ານຜູ້ຟັງໄດ້ສົ່ງມາລາຍການໃນອາທິດຜ່ານມາ.
+ ເພື່ອນ ວົງຄຳ, ຢູ່ແຂວງ ອຸດົມໄຊ ໄດ້ສົ່ງອີເມວມາຫາລາຍການໂດຍແບ່ງປັນວ່າ: "ໂດຍເປັນຜູ້ໜຶ່ງທີ່ມັກເກັບສະສົມເງິນບູຮານຂອງປະເທດຂ້າພະເຂົ້າ, ກໍຄືຈາກບັນດາປະເທດທີ່ຂ້າພະເຈົ້າໄດ້ໄປຢ້ຽມຢາມ. ຜ່ານລາຍການ, ຂ້າພະເຈົ້າຢາກຊອກຮູ້ກ່ຽວກັບໄລຍະເວລາຂອງການອອກເງິນ, ປ່ຽນເງິນຕາຂອງປະເທດ ຫວຽດນາມ ຜ່ານສະໄໝຕ່າງໆ".
ເພື່ອນ ວົງຄຳ ທີ່ຮັກແພງ, ພາຍຫຼັງການປະຕິວັດເດືອນສິງຫາ ປີ 1945, ລັດຖະບານແຫ່ງສາທາລະນະລັດປະຊາທິປະໄຕ ຫວຽດນາມ ຕ້ອງປະເຊີນໜ້າກັບສະພາບການມີເງິນຫຼາຍປະເພດພວມນຳໃຊ້ພ້ອມກັນ, ເຊິ່ງກໍ່ໃຫ້ເກີດຄວາມສ່ຽງພື້ນຖານການເງິນ - ເງິນຕາແຫ່ງຊາດຖືກຄອບງຳຈາກພາຍນອກ. ໃນໄລຍະ 1946 - 1949 ແມ່ນຈຸດເວລາພິເສດໃນປະຫວັດສາດຂອງເງິນຕາ ຫວຽດນາມ, ສ້າງບາດກ້າວທຳອິດຂອງລັດຖະບານ ສາທາລະນະລັດປະຊາທິປະໄຕ ຫວຽດນາມ ໃນການຢືນຢັນອະທິປະໄຕທາງດ້ານເສດຖະກິດ ຜ່ານການພິມທະນະບັດສະເພາະຂອງຕົນເອງອອກໃຊ້, ໄປຄຽງຄູ່ກັບສົງຄາມຕ້ານພວກລ່າເມືອງຂຶ້ນ ຝລັ່ງ.
ຕັ້ງແຕ່ປີ 1945 ຈົນເຖິງປະຈຸບັນ, ລະບົບເງິນຕາຂອງ ຫວຽດນາມ ໄດ້ຜ່ານການປ່ຽນທະນະບັດທີ່ສຳຄັນ 6 ຄັ້ງໄປພ້ອມກັບການພິມທະນະບັດອອກຊຸດໃໝ່ໃນດ້ານວັດຖຸຜະລິດ, ຮູບແບບ, ແລະ ມູນຄ່າ. ບັນດາຈຸດເວລາສຳຄັນຫຼັກໃນການພິມທະນະບັດອອກຊຸດໃໝ່ ແລະ ປ່ຽນທະນະບັດທາງການ ລວມມີ:
• ເທື່ອທຳອິດ (1946-1951): ພິມທະນະບັດອອກຊຸດທຳອິດຂອງປະເທດສາທາລະນະລັດປະຊາທິປະໄຕ ຫວຽດນາມ (ໂດຍກະຊວງການເງິນພິມທະນະບັດອອກນຳໃຊ້).
• ເທື່ອທີ 2 (1951): ສ້າງຕັ້ງທະນາຄານແຫ່ງຊາດ ຫວຽດນາມ ແລະ ພິມທະນະບັດຊຸດໃໝ່ເພື່ອປ່ຽນແທນທະນະບັດທາງການເງິນ ດ້ວຍອັດຕາແລກປ່ຽນ 10 ດົ່ງທາງການເງິນ ເອົາ 1 ດົ່ງທາງທະນາຄານ.
• ຄັ້ງທີ 3 (1959-1960): ທາງພາກເໜືອແລກປ່ຽນເງິນ ດ້ວຍອັດຕາແລກປ່ຽນ 1 ດົ່ງໃໝ່ ເທົ່າກັບ1.000 ດົ່ງເກົ່າຂອງທະນາຄານແຫ່ງຊາດ.
• ເທື່ອທີ 4 (1975): ພາຍຫຼັງປົດປ່ອຍພາກໃຕ້, ໄດ້ພິມທະນະບັດປົດປ່ອຍເພື່ອປ່ຽນແທນທະນະບັດຂອງ ສາທາລະນະລັດ ຫວຽດນາມ ກ່ອນນີ້.
• ເທື່ອທີ 5 (1978): ໄດ້ເປັນເອກະພາບທະນະບັດໃນທົ່ວປະເທດ ພາຍຫຼັງການໂຮມປະເທດຊາດເປັນເອກະພາບ.
• ເທື່ອທີ 6 (1985): ດັດປັບຄ່າເງິນ - ເງິນເດືອນ - ທະນະບັດ, ປ່ຽນທະນະບັດຄັ້ງໃຫຍ່ທົ່ວປະເທດ.
• ໄລຍະປະຈຸບັນ (2003 - ປະຈຸບັນ): ທະນະບັດໃໝ່ເຮັດດ້ວຍ polymer, ໃຊ້ໄປພ້ອມກັບທະນະບັດເຮັດດ້ວຍ cotton. 100% ທະນະບັດໄດ້ອອກແບບເປັນເອກະພາບກັນ: ດ້ານໜ້າມີຮູບ ປະທານໂຮ່ຈີມິນ, ດ້ານຫຼັງສະແດງໃຫ້ເຫັນສະຖານທີ່ທີ່ມີຊື່ສຽງ, ກິດຈະກຳວັດທະນະທຳ - ເສດຖະກິດທີ່ດີເດັ່ນຂອງ ຫວຽດນາມ.
ເງິນເກົ່າແມ່ນໜຶ່ງໃນບັນດາວັດຖຸພັນທີ່ໄດ້ເກັບສະສົມ, ທັງແມ່ນຄວາມມັກຮັກ ແລະ ນຳມາເຊິ່ງຄຸນຄ່າຫຼາຍຢ່າງທາງດ້ານວັດຖຸ ແລະ ຈິດໃຈ. ຢູ່ຫວຽດນາມ, ມີຫຼາຍຄົນມີຄວາມເມົາມົວ, ມັກຮັກສະສົມບັນດາທະນະບັດເກົ່າ ດ້ວຍຫຼາຍມູນຄ່າທີ່ແຕກຕ່າງກັນ, ສ້າງເປັນຊຸດສະສົມທີ່ອຸດົມສົມບູນ, ເປັນເອກະລັກສະເພາະ.
