ເພື່ອນ ຄຳຫຼ້າ, ຢູ່ແຂວງຫຼວງພະບາງ ໄດ້ສົ່ງອີເມວມາຍັງລາຍການໂດຍແບ່ງປັນວ່າ: ສະບາຍດີບັນນາທິການລາຍການພາກພາສາລາວ, ວິທະຍຸກະຈາຍສຽງ ຫວຽດນາມ, ຂ້າພະເຈົ້າໄດ້ຕິດຕາມບັນດາບົດຂຽນ ແລະ ລາຍການທີ່ໄດ້ເອົາລົງໃນເວັບໄຊ vovworld.vn ເປັນປະຈຳ. ຂ້າພະເຈົ້າຢາກຝາກຄຳຂອບອົບຂອບໃຈໄປຍັງລາຍການຍ້ອນມີບັນດາຂໍ້ມູນທີ່ມີປະໂຫຍດໃນເວລາຜ່ານມາ. ຍ້ອນບັນດາບົດຂຽນທີ່ອຸດົມສູມບູນກ່ຽວກັບວັດທະນະທຳ, ປະຫວັດສາດ ແລະ ບັນດາສະຖານທີ່ທ່ອງທ່ຽວທີ່ສວຍງາມຂອງ ຫວຽດນາມ, ຂ້າພະເຈົ້າ ແລະ ຄອບຄົວໄດ້ມີຫຼາຍຄວາມຮູ້ກ່ຽວກັບປະເທດ ຫວຽດນາມ ທີ່ເປັນມິດ, ຮັກແພງແຂກຄົນຕື່ມອີກ. ຂໍອວຍພອນໃຫ້ລາຍການນັບມື້ນັບພັດທະນາ ແລະ ສືບຕໍ່ເປັນຂົວເຊື່ອມຕໍ່ນ້ຳໃຈອັນແໜ້ນແຟ້ນລະຫວ່າງປະຊາຊົນສອງປະເທດ ຫວຽດນາມ - ລາວ.
ເພື່ອນ ແສງອາລຸນ, ຢູ່ນະຄອນຫຼວງວຽງຈັນ (ລາວ) ໄດ້ສົ່ງຈົດໝາຍມາຍັງລາຍການ: ສະບາຍດີບັນນາທິການລາຍການພາສາລາວ (VOV5). ຂ້າພະເຈົ້າຂໍຂອບໃຈບັນດາຜູ້ເຮັດລາຍການ. ບັນດາບົດຂຽນຜ່ານມາກ່ຽວກັບສະພາບການເສດຖະກິດ, ສັງຄົມ ກໍ່ຄືເລື່ອງລາວຕ່າງໆໃນຊີວິດປະຈຳວັນຢູ່ ຫວຽດນາມ ທີ່ເອົາລົງເວັບໄຊໃນໄລຍະຜ່ານມາ ໄດ້ມີຄວາມດຶງດູດໃຈທີ່ສຸດ ແລະ ມີຂໍ້ມູນທີ່ຫຼາກຫຼາຍ. ບໍ່ພຽງແຕ່ຊ່ວຍໃຫ້ຂ້າພະເຈົ້າອັບເດດຂໍ້ມູນໄດ້ຢ່າງວ່ອງໄວ, ເວັບໄຊຂອງພວກເພື່ອນຍັງແມ່ນແຫຼ່ງຂໍ້ມູນທີ່ດີຫຼາຍ ຊ່ວຍໃຫ້ຂ້າພະເຈົ້າສະສົມ ແລະ ຍົກລະດັບພາສາຫວຽດ ຂອງຕົນໃນແຕ່ລະວັນ. ຂໍອວຍພອນໃຫ້ບັນດາບັນນາທິການ ມີສຸຂະພາບທີ່ເຂັ້ມແຂງ, ປະດິດສ້າງຫຼາກຫຼາຍລາຍການທີ່ດີຕື່ມອີກ.
ລາຍການພາສາລາວ, ວິທະຍຸກະຈາຍສຽງ ຫວຽດນາມ ຂໍຂອບໃຈຄຳແບ່ງປັນຂອງບັນດາຜູ້ຟັງທີ່ໄດ້ສະຫຼະເວລາໃຫ້ຄວາມສົນໃຈ, ສົ່ງຈົດໝາຍ, ອີເມວ ແລະ ຂໍ້ຄວາມສົ່ງກຳລັງໃຈອັນອົບອຸ່ນໃຫ້ແກ່ລາຍການຂອງພວກຂ້າພະເຈົ້າໃນເວລາຜ່ານມາ. ການຮ່ວມເດີນທາງ, ການແບ່ງປັນບັນດານ້ຳໃຈອັນລ້ຳຄ່າຂອງພວກເພື່ອນແມ່ນແຫຼ່ງກຳລັງອັນຍິ່ງໃຫຍ່ຊ່ວຍໃຫ້ຖັນແຖວພະນັກງານປະຕິບັດລາຍງານ ສືບຕໍ່ຍົກສູງຄຸນນະພາບເນື້ອໃນຢ່າງຕໍ່ເນື່ອງ. ພວກຂ້າພະເຈົ້າຫວັງວ່າຈະສືບຕໍ່ໄດ້ຮັບຄວາມສົນໃຈ, ການຕິດຕາມ ແລະ ສະໜັບສະໜູນຢ່າງສຸດໃຈຈາກທ່ານຜູ້ຟັງຜ່ານລາຍການກະຈາຍສຽງ ກໍ່ຄືບັນດາແພຼດພອມ ຄື ເວັບໄຊ vovworld.vn ແລະ Spotify ໃນໄລຍະຈະມາເຖິງ.
ສ່ວນເພື່ອນ ຈັນທະສອນ, ແຂວງ ວຽງຈັນ ໄດ້ສົ່ງອີເມວເຖິງລາຍການ, ໃນນັ້ນມີຕອນຂຽນວ່າ: ມີເພື່ອນ ຫວຽດນາມ ຄົນໜຶ່ງໄດ້ມອບເຂົ້າເໝົ້າ ຮ່າໂນ້ຍ ແລະ ໝາກພັບກອບໆໃຫ້ຄອບຄົວຂ້າພະເຈົ້າ, ເພື່ອນວ່າ ນີ້ແມ່ນຂອງກິນທີ່ເປັນເອກະລັກສະເພາະຂອງລະດູໃບໄມ້ຫຼົ່ນ ຮ່າໂນ້ຍ. ຂ້າພະເຈົ້າເຄີຍໄດ້ກິນເຂົ້າເໝົ້າມາແລ້ວ ແຕ່ບໍ່ເຄີຍກິນໝາກພັບກອບຄືແນວນີ້ຈັກເທື່ອ. ຂໍໃຫ້ທາງລາຍການແນະນຳກ່ຽວກັບບ່ອນປູກ, ເວລາເກັບໝາກພັບໃຫ້ຮູ້ແດ່?
ເພື່ອນ ຈັນທະສອນ ທີ່ຮັກແພງ, ໝາກພັບກອບ ເລີ່ມສຸກແຕ່ເດືອນກໍລະກົດ ຫາເດືອນກັນຍາ ຂອງແຕ່ລະປີ, ແຕ່ໝາກພັບໃນຕົ້ນລະດູບໍ່ທັນຫວານແຊບປານໃດ, ຮອດທ້າຍລະດູ ໝາກພັບຈຶ່ງຫວານ, ແຊບດີ, ດັ່ງນັ້ນ ຊ່ວງເດືອນສິງຫາ ໝາກພັບຈະກອບຫວານແຊບທີ່ສຸດ. ໂດຍຂຶ້ນກັບສະພາບດິນຟ້າອາກາດ, ໝາກພັບອາດຈະສຸກໄວ ຫຼື ຊ້າກວ່າປົກກະຕິ. ໝາກພັບກອບ ໄດ້ປູກຢູ່ ດາຫຼາດ, ແຂວງ ເລີມດົ່ງ ແລະ ບັນດາແຂວງທາງພາກເໜືອ ຫວຽດນາມ, ຄື: ແຂວງ ລາຍເຈົາ, ເຊີນລາ, ຕວຽນກວາງ… ໃນໝາກພັບມີວີຕາມິນ: A, C, B ສູງ ແລະ Fiber, Cacbohydrate, Beta Carotene, ແຮ່ທາດຫຼາຍຊະນິດ… ດັ່ງນັ້ນ, ກິນໝາກພັບກອບຈະດີຕໍ່ຕາ, ມີ calories ໜ້ອຍ ແລະ ພະລັງງານສູງ ດັ່ງນັ້ນຈິ່ງອິ່ມດົນ, ຊ່ວຍໃນການຫລຸດນ້ຳໜັກ… ປະຈຸບັນ, ໝາກພັບພວມສຸກເຫຼືອງງາມຕາຫຼາຍ, ເພື່ອນ ຈັນທະສອນ ຈົ່ງຍາດໂອກາດໄປ ຫວຽດນາມ ເພື່ອ Check – in ຢູ່ສວນໝາກພັບແດ່ເດີ.
ເພື່ອນ ແສງຈັນ, ຢູ່ແຂວງຜົ້ງສາລີ (ລາວ) ໄດ້ສົ່ງອີເມວມາຍັງລາຍການ: ສະບາຍດີບັນນາທິການ VOV. ຂ້າພະເຈົ້າຢາກຊອກຮູ້ກ່ຽວກັບປະຫວັດສາດອະລິຍະທຳນັບພັນປີຂອງ ນະຄອນຫຼວງ ຮ່າໂນ້ຍ. ຂໍໃຫ້ທາງລາຍການແນະນຳບາງຈຸດກ່ຽວກັບເຂດຮ່ອງຮອຍປະຫວັດສາດ ພາລະຊາວັງ ທັງລອງ ແລະ ບັນດາຈຸດທີ່ພົ້ນເດັ່ນເຊິ່ງແຂກທ່ອງທ່ຽວລາວ ບໍ່ຄວນພາດເມື່ອໄປແຫ່ງນີ້.
"ສະບາຍດີ ເພື່ອນ ແສງຈັນ ທີ່ຮັກແພງ! ເພື່ອຄົ້ນຫາປະຫວັດສາດນັບພັນປີຂອງ ຮ່າໂນ້ຍ, ພາລະຊາວັງ ທັງລອງ – ມໍລະດົກວັດທະນະທຳໂລກ ທີ່ UNESCO ໄດ້ຮັບຮອງເອົາເປັນຈຸດໝາຍປາຍທາງແຖວໜ້າທີ່ບໍ່ຄວນພາດ.
ບ່ອນນີ້ແມ່ນສູນກາງສິດອຳນາດການເມືອງ, ວັດທະນະທຳທີ່ຕິດພັນກັບປະຫວັດສາດ ຫວຽດນາມ ໃນຕະຫຼອດ 13 ສະຕະວັດ, ຕັ້ງແຕ່ສະຕະວັດທີ XI ຜ່ານຫຼາຍລາຊະວົງສັກດີນາ ຈົນຮອດຍຸກສະໄໝ ປະທານ ໂຮ່ຈີມິນ — ເຊິ່ງແມ່ນຄຸນຄ່າປະຫວັດສາດມີລັກສະນະພິເສດສະເພາະ ແລະ ມີໜ້ອຍທີ່ສຸດໃນໂລກ. ເມື່ອມາຢ້ຽມຢາມແຫ່ງນີ້, ນອກຈາກໄດ້ຊົມສະຖາບັດຕະຍາກຳກໍ່ສ້າງທີ່ເປັນສັນຍະລັກຄື: ປະຕູ ດວານມົນ, ວັງ ກິ້ງທຽນ, ເສົາທຸງ ຮ່າໂນ້ຍ ແລະ ເຂດບູຮານຄະດີ ຢູ່ເຮືອນເລກທີ 18 ຖະໜົນ ຮ່ວາງຢ້ຽວ ກັບວັດຖຸບູຮານພະລາຊະວັງອັນລ້ຳຄ່າແລ້ວ, ທ່ານຍັງສາມາດເຂົ້າຮ່ວມ Tour ທ່ຽວຊົມຍາມຄ່ຳຄືນ ເພື່ອຮັບຊົມການສະແດງສິລະປະພື້ນເມືອງ ແລະ ດື່ມຊາພະລາຊະວັງ ທ່າມກາງບັນຍາກາດທີ່ສວຍງາມໃນຍາມລາຕີ. ຂໍໃຫ້ ທ່ານ ແສງຈັນ ມີການທ່ອງທ່ຽວຄົ້ນຫາ ພາລະຊາວັງ ທັງລອງ ຮ່າໂນ້ຍ ທີ່ມີຄວາມໝາຍ".
