ພາຍຫຼັງລົງຂ່າວທີ່ວ່າ: Unitel - ບໍລິສັດຮ່ວມທຸລະກິດຂອງ Viettel ແລະ Lao Asia Telecom ຈະຖ່າຍທອດສົດການແຂ່ງຂັນບານເຕະຂອງ FIFA World Cup 2026 ທັງໝົດ 104 ນັດໃຫ້ປະຊາຊົນລາວ ຮັບຊົມໃນທຸກແພຼດຟອມ (platform) ຂອງ Unitel ໂດຍບໍ່ເກັບຄ່າ, ເພື່ອນ ຄຳຫຼ້າ ສີບຸນເຮືອງ ຢູ່ນະຄອນຫຼວງ ວຽງຈັນ ໄດ້ສົ່ງຈົດໝາຍເຖິງລາຍການ ໂດຍແບ່ງປັນວ່າ: “ຂໍຂອບໃຈທາງ VOV5 ຫຼາຍໆ ທີ່ໄດ້ສົ່ງຂ່າວດີໆກ່ຽວກັບ World Cup ໄປເຖິງບັນດາແຟນບານພວກຂ້າພະເຈົ້າ. ພວກຂ້າພະເຈົ້າພວມໃຈຈົດໃຈຈໍ່ໍ່ ລໍຖ້າຮັບຊົມນັດແຂ່ງຂັນທຳອິດຂອງການແຂ່ງຂັນນີ້”.
ໃນຈົດໝາຍຂອງເພື່ອນ ຄຳມະນີ ຢູ່ນະຄອນຫຼວງ ວຽງຈັນ ສົ່ງເຖິງລາຍການ ມີເນື້ອໃນດັ່ງນີ້: “ຂ້າພະເຈົ້າເຫັນວ່າ ໃນບັນດາສື່ສັງຄົມອອນໄລ ໄດ້ແນະນຳຫຼາຍຮູບພາບອັນສວຍງາມກ່ຽວກັບທັດສະນີຍະພາບທຳມະຊາດຂອງ ຫວຽດນາມ. ເນື່ອງໃນໂອກາດພັກແລ້ງປີນີ້, ຂ້າພະເຈົ້າຈະພາລູກໄປທ່ຽວ ຫວຽດນາມ ໃນເດືອນມິຖຸນາ ແລະ ກໍລະກົດ. ຂໍໍໃຫ້ທາງລາຍການແນະນຳບາງສະຖານທີ່ທ່ອງທ່ຽວເປັນໜ້າມາຢາມທີສຸດໃຫ້ຂ້າພະເຈົ້າແດ່”.
ຫວຽດນາມ ມີຫຼາຍທັດສະນີຍະພາບທີ່ສວຍງາມຕະຫຼອດປີ ແລະ ດິນແດນແຕ່ລະເຂດລ້ວນແຕ່ມີຄວາມດູດດື່ມສະເພາະຂອງໃຜລາວ. ໃນເດືອນມິຖຸນາ ຫາເດືອນກໍລະກົດນີ້, ເພື່ອນສາມາດໄປທ່ຽວຢູ່ບັນດາຫາດຊາຍທະເລທີ່ຂຽວສົດໃສຄື ຍາຈາງ, ຝູອຽນ, ຄົ້ນຫາເຂດພູພຽງທີ່ເຢັນສະບາຍຢູ່ ດ່າລາດ ຫຼື ຮັບຊົມຄວາມງາມແບບສະຫງົບງຽບຂອງບັນດາແຂວງທາງທິດຕາເວັນຕົກ ຫວຽດນາມ. ເຖິງຢ່າງໃດກໍຕາມ, ຖ້າຕ້ອງເລືອກສະຖານທີ່ໃດໜຶ່ງທີ່ພົ້ນເດັ່ນທີ່ສຸດໃນຈຸດເວລານີ້, ຕາມຂ້າພະເຈົ້າແລ້ວເພື່ອນຄວນໄປທ່ຽວນະຄອນ ດ່າໜັງ. ບໍ່ພຽງແຕ່ມີບັນດາຫາດຊາຍທະເລທີ່ສວຍງາມແຖວໜ້າ ຫວຽດນາມ ເທົ່ານັ້ນ, ໃນຊ່ວງເວລານີ້ ດ່າໜັງ ກໍພວມດຳເນີນງານບຸນຍິງບັ້ງໄຟດອກສາກົນ ດ່າໜັງ ປີ 2026 (ແຕ່ວັນທີ 30 ພຶດສະພາ ຫາວັນທີ 11 ກໍລະກົດ 2026) - ເຊິ່ງເປັນເຫດການທີ່ດຶງດູດແຂກທ່ອງທ່ຽວທັງພາຍໃນ ແລະ ຕ່າງປະເທດນັບລ້ານຄົນ. ບັນດາລາຍການສະແດງຈະດຳເນີນຢູ່ແຄມຝັ່ງແມ່ນ້ຳ ຮ່ານ, ເວທີໃຫຍ່ຕັ້ງຢູ່ຖະໜົນ ເຈິ່ນຮຶງດ້າວ, ຈາກຂົວແຫ່ງຕ່າງໆທີ່ມີຊື່ສຽງຄື ຂົວ ຣົ່ງ (ມັງກອນ), ຂົວແມ່ນ້ຳ ຮ່ານ ຫຼື ບັນດາຮ້ານກາເຟແຄມແມ່ນ້ຳ ແຂກທ່ອງທ່ຽວສາມາດຮັບຊົມບັ້ງໄຟດອກໄດ້. ພິເສດ, ຈາກນະຄອນ ດ່າໜັງ ຜ່ານໄລຍະທາງບໍ່ໄກປານໃດ, ເພື່ອນສາມາດໄປຄົ້ນຫາ ເມືອງເກົ່າ ໂຮ້ຍອານ, ອ່າວ ລັງໂກ ທີ່ສວຍງາມດັ່ງໃນຝັນ ຫຼື ພະລາດຊະວັງເກົ່າ ເຫວ້ ທີ່ເຕັມໄປດ້ວຍຄຸນຄ່າປະຫວັດສາດ. ຈາກນະຄອນຫຼວງ ວຽງຈັນ ກໍມີຖ້ຽວບິນໂດຍກົງໄປຍັງ ດ່າໜັງ, ສະນັ້ນການເດີນທາງຂອງຄອບຄົວເພື່ອນຈະສະດວກສະບາຍທີ່ສຸດ.
ຫວັງວ່າ ບັນດາຂໍ້ມູນດັ່ງກ່າວ ຈະຊ່ວຍໃຫ້ເພື່ອນ ຄຳມະນີ ວາງແຜນການໄປຄົ້ນຫາ ຫວຽດນາມ ໃນລະດູຮ້ອນນີ້ໄດ້ຢ່າງງ່າຍດາຍ.
ໃນອາທິດຜ່ານມາ, ເພື່ອນ ເພັດມະນີ ຢູ່ນະຄອນຫຼວງ ວຽງຈັນ ໄດ້ແບ່ງປັນກັບພວກຂ້າພະເຈົ້າວ່າ: “ເມື່ອໄປຢ້ຽມຊົມງານຕະຫຼາດນັດສາກົນ ຫຼື ງານພົບປະແລກປ່ຽນວັດທະນະທຳບັນດາປະເທດ ອາຊຽນ, ຂ້າພະເຈົ້າເຫັນວ່າ ຫວຽດນາມ ໄດ້ວາງສະແດງ ແລະ ແນະນໍາບັນດາຜະລິດຕະພັນຫັດຖະກໍາ ສິລະປະກຳ, ດ້ວຍ ຫຼາຍຮູບແບບ ແລະ ສີສັນທີ່ແຕກຕ່າງກັນ. ຢູ່ລາວ ກໍມີຫຼາຍໝູ່ບ້ານອາຊີບຫັດຖະກໍາ ສິລະປະກຳພວມໄດ້ຮັບການລົງທຶນພັດທະນາ; ໂດຍສະເພາະແມ່ນບັນດາຜະລິດຕະພັນຈັກສານ ແລະ ແຜ່ນແພພື້ນເມືອງ. ຂ້າພະເຈົ້າຢາກຮູ້ວ່າ ບັນດາໝູ່ບ້ານຜະລິດເຄື່ອງຈັກສານຂອງ ຫວຽດນາມ ສ່ວນຫຼາຍແມ່ນຢູ່ແຂວງໃດແດ່? ຢູ່ນະຄອນຫຼວງ ຮ່າໂນ້ຍ ມີໝູ່ບ້ານຫັດຖະກຳທີ່ມີຊື່ສຽງໃດບໍ?”
ຂອບໃຈຄໍາແບ່ງປັນ ແລະ ຄໍາຖາມທີ່ເພື່ອນ ເພັດມະນີ ທີ່ໄດ້ຝາກເຖິງລາຍການ. ສໍາລັບຄໍາຖາມຂອງເພື່ອນ, ພວກຂ້າພະເຈົ້າຂໍຕອບວ່າ: ຫວຽດນາມ ແມ່ນໜຶ່ງໃນບັນດາປະເທດຢູ່ ອາຊີຕາເວັນອອກສ່ຽງໃຕ້ ທີ່ມີມູນເຊື້ອຜະລິດບັນດາຜະລິດຕະພັນຫັດຖະກໍາມາແຕ່ດົນນານ. ບັນດາໝູ່ບ້ານອາຊີບເຮັດເຄື່ອງຈັກສານຂອງ ຫວຽດນາມ ປະກົດມີຢູ່ຫຼາຍແຂວງ, ແຕ່ສ່ວນໃຫຍ່ແມ່ນຢູ່ເຂດທົ່ງພຽງທາງພາກເໜືອ, ເຂດພາກກາງຕອນເໜືອ ແລະ ບາງແຂວງຢູ່ພາກໃຕ້. ມີຫຼາຍທ້ອງຖິ່ນທີ່ມີຊື່ສຽງກັບອາຊີບຈັກສານໄມ້ໄຜ່, ໄມ້ເຮັ້ຍ, ຫວາຍ ຄື: ແທັງຮວ໊າ, ເງະອານ, ຖາຍບິ່ງ, ນາມດິ້ງ, ນິງບິ່ງ ຫຼື ບິ່ງເຢືອງ.
ສະເພາະຢູ່ນະຄອນຫຼວງ ຮ່າໂນ້ຍ, ໝູ່ບ້ານອາຊີບຈັກສານໄມ້ໄຜ່, ຫວາຍທີ່ມີຊື່ສຽງ ທີສຸດມີໝູ່ບ້ານ ຝູວິງ ຂຶ້ນກັບຕາແສງ ຝູເຫງຍ, ຢູ່ຫ່າງຈາກໃຈກາງ ຮ່າໂນ້ຍ ປະມານ 27 ກິໂລແມັດ. ໝູ່ບ້ານນີ້ ມີປະຫວັດເປັນມາ 400 ກວ່າປີແລ້ວ, ແລະມີຊື່ສຽງດ້ວຍບັນດາຜະລິດຕະພັນຈັກສານທີ່ປະດິດປະດອຍຄື ພາບສິລະປະ, ເຄື່ອງປະດັບປະດາພາຍໃນເຮືອນ, ກະຕ່າ, ຖາດ ຫຼື ບັນດາຜະລິດຕະພັນສົ່ງອອກອື່ນໆອີກດ້ວຍ. ບໍ່ພຽງແຕ່ຮັກສາເຕັກນິກຫັດຖະກຳພື້ນເມືອງໄວ້ໄດ້ເທົ່ານັ້ນ, ບັນດານັກສິລະປະກຳ ຝູວິງ ຍັງປະດິດຫຼາຍຜະລິດຕະພັນທີ່ທັນສະໄໝ, ນຳຜະລິດຕະພັນ ຫວຽດນາມ ອອກສູ່ຫຼາຍຕະຫຼາດສາກົນ. ນອກຈາກ ຝູວິງ ແລ້ວ, ຢູ່ຮ່າໂນ້ຍ ຍັງມີໝູ່ບ້ານອາຊີບ ນິງເສີ ຢູ່ຕາແສງ ຮົ່ງເວີນ ແລະ ບາງຕາແສງອື່ນໆ ກໍຜະລິດດ້ວຍຂະໜາດນ້ອຍເພື່ອຮັບໃຊ້ພາຍໃນປະເທດ. ໃນຈຳນວນບັນດາໝູ່ບ້ານເຫຼົ່ານັ້ນ, ຝູວິງ ໄດ້ຮັບຖືວ່າ ແມ່ນໝູ່ບ້ານທີ່ເປັນຕົວແບບ ແລະ ມີຊື່ສຽງທີ່ສຸດຂອງ ຮ່າໂນ້ຍ. ຖ້າມີໂອກາດມາຢາມນະຄອນຫຼວງ ຮ່າໂນ້ຍ, ເຊີນເພື່ອນ ເພັດມະນີ ທ່ຽວຊົມບັນດາຮາກຖານຜະລິດ ແລະ ເຂົ້າຮ່ວມການຜະລິດໂດຍກົງເພື່ອຊອກຮູ້ບັນດາຜະລິດຕະພັນຈັກສານຂອງ ຮ່າໂນ້ຍ.
