ເພື່ອນ ຄຳມະນີ ຢູ່ນະຄອນຫຼວງ ວຽງຈັນ ແມ່ນ 1 ໃນຈຳນວນຜູ້ຟັງ 26 ທ່ານທີ່ໄດ້ຝາກຈົດໝາຍເຖິງລາຍການໃນອາທິດຜ່ານມາ ໄດ້ແບ່ງປັນວ່າ: “ຂ້າພະເຈົ້າມັກບັນດາຮູບແບບແຜ່ກະຈາຍວັດທະນະທຳຂອງ ຫວຽດນາມ ທີ່ສຸດ, ມັນມີຫຼາຍຮູບຫຼາຍແບບຫຼາຍ. ເມື່ອຮັບຟັງທາງລາຍການກະຈາຍສຽງພາກພາສາລາວ ໄດ້ແບ່ງປັນກ່ຽວກັບ ສະມາຄົມ We love Pho - ພວກເຮົາຮັກເຝີ ແນະນຳເຝີ ແລະ ວັດທະນະທຳ ຫວຽດນາມ ຢູ່ ເອີຣົບ, ຂ້າພະເຈົ້າຢາກຮູ້ວ່າ ໃຜເປັນຜູ້ທີ່ກໍ່ຕັ້ງສະມາຄົມນີ້ຂຶ້ນມາ ແລະ ມີການເຄື່ອນໄຫວຄືແນວໃດ?
ສະມາຄົມ We Love Phở ໄດ້ຮັບການສ້າງຕັ້ງຂຶ້ນເມື່ອເດືອນມິຖຸນາ 2025 ຢູ່ ບຣຸກແຊນ (ແບນຊິກ) ໂດຍນັກທຸລະກິດຊາວ ຫວຽດນາມ ອາໄສຢູ່ ໂປໂລຍ ທີ່ມີຊື່ວ່າ ມາຍຫາຍເລິມ ລິເລີ່ມ ແລະ ເປັນປະທານ. We Love Phở ໄດ້ເຄື່ອນໄຫວຕາມຮູບແບບເປັນເຄືອຂ່າຍເປີດ, ໂດຍເຕົ້າໂຮມບັນດາພັດທະຄານ, ພໍ່ຄົວ, ວິສາຫະກິດ ແລະ ຜູ້ທີ່ຮັກມັກເຝີຢູ່ຫຼາຍປະເທດ, ເຊິ່ງປັດຈຸບັນໄດ້ມີໜ້າຢູ່ 17 ປະເທດ ເອີຣົບ. ການເຊື່ອມຕໍ່ - ອະນຸລັກຮັກສາມໍລະດົກ ເຝີ - ພັດທະນາແບບຍືນຍົງ ແມ່ນເປົ້າໝາຍຍາວນານຂອງເຄືອຂ່າຍນີ້. ອົງການນີ້ບໍ່ໄດ້ເຄື່ອນໄຫວຄືດັ່ງເປັນວິສາຫະກິດການຄ້າ ແຕ່ສວມບົດບາດເປັນຂົວຕໍ່ວັດທະນະທຳ, ເຊື່ອມຕໍ່ບັນດາສະມາຊິກເຂົ້າກັນ ໂດຍຜ່ານບັນດາເຫດການອາຫານການກິນ, ການເຄື່ອນໄຫວສື່ມວນຊົນ ແລະ ແລກປ່ຽນວັດທະນະທຳ. ທ່ານ ມາຍຫາຍເລິມ ແບ່ງປັນວ່າ: ໃນໄລຍະຈະມາເຖິງ, ທາງສະມາຄົມຈະສຸມໃສ່ສ້າງຕັ້ງເຄືອຂ່າຍສະມາຊິກ, ສ້າງ ແລະ ປັບປຸງບັນດາຊ່ອງຂໍ້ມູນຂ່າວສານໃຫ້ສົມບູນແບບ, ຫັນບັນດາສິດຜົນປະໂຫຍດ ແລະ ພັນທະຂອງຜູ້ເຂົ້າຮ່ວມເປັນລະອຽດ. ຄ່ອຍໆປ່ຽນແປງພາບພົດ ແລະ ຄວາມຮັບຮູ້ຂອງຜູ້ເຂົ້າຮ່ວມ ຫຼື ຮູ້ຈັກເຖິງສະມາຄົມ We Love Phở ແບບບັງເອີນນັ້ນ ຢ່າງຕັ້ງໜ້າ ບົນເນື້ອໃນຈິດໃຈ ສ້າງປະຊາຄົມອາຫານການກິນ ຫວຽດນາມ ຄືດັ່ງແມ່ນບັນດາບັດປະຈຳຕົວທາງດ້ານວັດທະນະທຳ ຫວຽດນາມ ຢູ່ຕ່າງປະເທດ. ໃນອະນາຄົດຂ້າງໜ້າ ອາດຈະມຸ່ງໄປເຖິງການສ້າງເຄື່ອງໝາຍການຄ້າແຫ່ງຊາດ ກໍຄື ມໍລະດົກອາຫານການກິນ ອະນຸລັກຮັກສາ.
ເພື່ອນ ບຸນຫຼວງ ຢູ່ແຂວງ ຈຳປາສັກ ໄດ້ສົ່ງຈົດໝາຍເຖິງລາຍການ ດ້ວຍຄວາມປາດຖະໜາຢາກຮັບຟັງການແນະນຳກ່ຽວກັບທະເລ ຈ່າໂກ ຢູ່ແຂວງ ກວາງນິງ ຫວຽດນາມ. ສະນັ້ນ, ຕໍ່ໄປນີ້, ພວກຂ້າພະເຈົ້າຈະແນະນຳໂດຍສັງເຂບກ່ຽວກັບຫາດຊາຍທະເລທີ່ສວຍງາມນີ້.
ທະເລ ຈ່າໂກ ໄດ້ຮັບຖືວ່າ ແມ່ນໜຶ່ງໃນບັນດາຫາດຊາຍທະເລທີ່ມີຄວາມງາມທີ່ເປັນສະເໜ່ສະເພາະຂອງເຂດຕາເວັນອອກສ່ຽງເໜືອ ຫວຽດນາມ. ໂດຍຕ່າງກັບບັນດາຫາດຊາຍທະເລທີ່ຄຶກຄື້ນ ແລະ ມີຄົນໄປມາຢ່າງຄັບຄາໜາແໜ້ນ, ຈ່າໂກ ດຶງດູດແຂກທ່ອງທ່ຽວ ຍ້ອນມີພື້ນທີ່ອັນສະຫງົບງຽບ, ປະຖົມປະຖານ ດ້ວຍຫາດຊາຍທີ່ມີຄວາມຍາວເກືອບ 17 ກິໂລແມັດ ລຽບຕາມແຖວຕົ້ນສົນທີ່ຂຽວເຢັນສະບາຍ. ຈຸດພິເສດຂອງສະຖານທີ່ແຫ່ງນີ້ ແມ່ນຕັ້ງຢູ່ເຂດດິນເໜືອສຸດຂອງປະເທດ ຫວຽດນາມ, ໃກ້ກັບເສັ້ນຊາຍແດນ ຫວຽດນາມ - ຈີນ, ເຮັດໃຫ້ສະຖານທີ່ແຫ່ງນີ້ກາຍເປັນຈຸດແລກປ່ຽນວັດທະນະທຳທີ່ເປັນເອກະລັກ. ເມື່ອມາທະເລ ຈ່າໂກ, ແຂກທ່ອງທ່ຽວ ບໍ່ພຽງແຕ່ໄດ້ອາບນ້ຳທະເລ, ຜັກຜ່ອນຢ່ອນອາລົມໃນບັນຍາກາດອັນສະຫງົບງຽບເທົ່ານັ້ນ ຫາກຍັງມີໂອກາດໄດ້ລົງຕົວຈິງຫຼາຍກິດຈະກຳທີ່ຈັບອົກຈັບໃຈ ເຂັ້ມຂຸ້ນໄປດ້ວຍຈຸດວັດທະນະທຳຂອງເຂດດິນແດນເໜືອສຸດຂອງ ຫວຽດນາມ. ແຂກທ່ອງທ່ຽວ ສາມາດຍ່າງເລາະລຽບຕາມຫາດຊາຍທະເລ, ນັ່ງຢູ່ກ້ອງແຖວຕົ້ນສົນຊົມວິວຍາມຮຸ່ງອາລຸນ ຫຼື ສາຍັນ ແລະ ຊິມອາຫານທະເລສົດແຊບ. ນອກຈາກນັ້ນແລ້ວ, ແຂກທ່ອງທ່ຽວກໍອາດຈະສາມາດຢ້ຽມຊົມສາລາ ຈ່າໂກ ທີ່ເກົ່າແກ່, ຊອກຮູ້ວິຖີການດຳລົງຊີວິດຂອງຊາວປະມົງຢູ່ທ້ອງຖິ່ນ, ລົງເລາະຕະຫຼາດຂາຍເຄື່ອງທະເລຍາມເຊົ້າ ແລະ ຊອກຮູ້ກ່ຽວກັບຈຸດວັດທະນະທຳທີ່ເປັນເອກະລັກຜ່ານງານບຸນ ສາລາ ຈ່າໂກ ທີ່ຈະດຳເນີນໃນທ້າຍເດືອນ 5 ແລະ ຕົ້ນເດືອນ 6 ຕາມຈັນທະປະຕິທິນຂອງທຸກໆປີ. ຈາກ ຈ່າໂກ, ແຂກທ່ອງທ່ຽວກໍສາມາດໄປຢ້ຽມຊົມ ແຫຼມ ຊາຫວີ - ເຊິ່ງເປັນບ່ອນວາງປາຍປາກກາທຳອິດໃນແຜນທີ່ຮູບຕົວ S ຂອງ ຫວຽດນາມ ອີກດ້ວຍ.
ເພື່ອນ ວັນນິທອງ, ຢູ່ນະຄອນຫຼວງ ວຽງຈັນ ໄດ້ຖາມວ່າ: ໃກ້ຈະຮອດລະດູໝາກລີ້ນຈີ່ ຫວຽດນາມ ແລ້ວບໍ? ໝາກລີ້ນຈີ່ ຫວຽດນາມ ໄດ້ສົ່ງອອກໄປຍັງປະເທດໃດແດ່?
ເພື່ອນ ວັນນິທອງ ທີ່ຮັກແພງ! ລະດູໝາກລີ້ນຈີ່ຢູ່ ຫວຽດນາມ ໄດ້ເລີ່ມແຕ່ປະມານເດືອນພຶດສະພາ ຫາເດືອນກໍລະກົດ ຂອງທຸກໆປີ, ໃນນັ້ນ ຈຸດເວລາທີ່ໃຫ້ການເກັບກ່ຽວຫຼາຍທີ່ສຸດແມ່ນໃນເດືອນມິຖຸນາ. ບັນດາເຂດປູກຕົ້ນລີ້ນຈີ່ທີ່ມີຊື່ສຽງຂອງ ຫວຽດນາມ ນັ້ນແມ່ນແຂວງ ບັກນິງ, ຫາຍຟ່ອງ ແລະ ແຂວງພາກເໜືອຈຳນວນໜຶ່ງ. ໝາກລີ້ນຈີ່ຂອງ ຫວຽດນາມ ມີຊື່ສຽງ ຍ້ອນໃຫ້ລົດຫວານພໍດີ, ເນື້ອໜາ, ແກ່ນນ້ອຍ ແລະ ມີຄວາມຫອມເປັນເອກະລັກ ສະນັ້ນ ຈຶ່ງໄດ້ຮັບຄວາມນິຍົມຊົມຊອບຈາກຫຼາຍຕະຫຼາດສາກົນ. ວັນທີ 25 ພຶດສະພາຜ່ານມາ, ບໍລິສັດ CP Ameii ຫວຽດນາມ ຫາກໍ່ສົ່ງອອກໝາກລີ້ນຈີ່ສົດຈຳນວນ 40 ໂຕນ ໄປຍັງ ອາເມລິກາ ຜ່ານທາງທະເລ. ນີ້ແມ່ນງວດລີ້ນຈີ່ທຳອິດຂອງແຂວງ ຫາຍຟ່ອງ ໃນປີ 2026 ທີ່ໄດ້ສົ່ງອອກໄປຍັງຕະຫຼາດທີ່ຮຽກຮ້ອງມາດຕະຖານເຄັ່ງຄັດອັນດັບຕົ້ນໆນີ້. ຕາມບົດລາຍງານວິເຄາະຕະຫຼາດຂອງ Research and Markets ແລ້ວ, ປັດຈຸບັນ, ຫວຽດນາມ ແມ່ນປະເທດສົ່ງອອກລີ້ນຈີ່ຫຼາຍອັນດັບທີ 2 ໃນໂລກ. ສ່ວນຕາມການຕີລາຄາຂອງກົມນຳເຂົ້າສົ່ງອອກ, ກະຊວງອຸດສາຫະກຳ ແລະ ການຄ້າ ຫວຽດນາມ, ປັດຈຸບັນ, ໝາກລີ້ນຈີ່ ຖ່ຽວ ຫວຽດນາມ ໄດ້ມີໜ້າຢູ່ກວ່າ 30 ປະເທດ, ເຂດແຄວ້ນໃນໂລກ, ຕອບສະໜອງຄວາມຕ້ອງການຂອງບັນດາຕະຫຼາດຂັ້ນສູງສຸດ. ໃນນັ້ນ ຕະຫຼາດສົ່ງອອກຕົ້ນຕໍຂອງ ຫວຽດນາມ ແມ່ນ ຈີນ, ອາເມລິກາ, ຍີ່ປຸ່ນ ແລະ ອີຢູ.
