ພວກຂ້າພະເຈົ້າມີຄວາມປະຕິຊົມຊື່ນເມື່ອໄດ້ຮັບນ້ຳໃຈຄວາມຮັກແພງ, ຄວາມນິຍົມ ແລະ ຄວາມສົນໃຈຂອງຜູ້ຟັງ ຜ່ານຈົດໝາຍນັບຮ້ອຍສະບັບຈາກຫຼາຍປະເທດ ແລະ ເຂດແຄວ້ນໃນໂລກ ທີ່ໄດ້ສົ່ງມາຍັງ VOV5. ຕໍ່ໄປນີ້ ເຊີນທ່ານຜູ້ຟັງ ພ້ອມກັບບັນນາທິການຂອງລາຍການ ເປີດອ່ານບັນດາຄຳເຫັນປະກອບ ແລະ ເນື້ອໃນຈົດໝາຍບາງສະບັບໃນຈໍານວນຈົດໝາຍທັງໝົດ 351 ສະບັບ ທີ່ໄດ້ສົ່ງມາຍັງ VOV5 ໃນອາທິດຜ່ານມາ, ສະເພາະລາຍການພາສາລາວ ໄດ້ຮັບຈົດໝາຍຈາກທ່ານຜູ້ຟັງລາວ 23 ສະບັບ. ຕໍ່ໄປ, ເຊີນທ່ານພ້ອມກັບນັກຂ່າວ VOV ເປີດອ່ານຈົດໝາຍບັນດາສະບັບດັ່ງກ່າວ.
ໃນອາທິດຜ່ານມາ, ລາຍການກະຈາຍສຽງພາກພາສາລາວ ໄດ້ຮັບຈົດໝາຍຂອງເພື່ອນ ຈິນດາ ຢູ່ນະຄອນຫຼວງວຽງຈັນ. ໃນຈົດໝາຍ, ເພື່ອນໄດ້ສະແດງຄວາມປະທັບໃຈຕໍ່ຄວາມງາມຂອງໝູ່ບ້ານດິນຈີ່ດິນເຜົາ ມາງທິດ ຢູ່ແຂວງ ຫວິງລອງ ຜ່ານພາບສາລະຄະດີ: ການທ່ອງທ່ຽວ ຫວິງລອງ: ຂຽນຕໍ່ເລື່ອງລາວດ້ານວັດທະນະທຳຢູ່ “ລາຊະອານາຈັກດິນຈີ່, ດິນເຜົາ”. ເພື່ອນແບ່ງປັນວ່າ: “ສະຖາປັດຕະຍາກຳຂອງບັນດາເຕົາເຜົາດິນຈີ່ດິນເຜົາໄດ້ສ້າງຄວາມມີສະເໜ່ທີ່ໜ້າປະທັບໃຈໃຫ້ໝູ່ບ້ານແຫ່ງນີ້. ຂ້າພະເຈົ້າຢາກໄປສຳຜັດກັບຕາ ເພື່ອຄົ້ນຫາບັນດາເລື່ອງລາວກ່ຽວກັບອາຊີບເຮັດດິນຈີ່ດິນເຜົາ ແລະ ຄວາມງາມທາງດ້ານວັດທະນະທຳ, ວິຖີການດຳລົງຊີວິດຂອງປະຊາຊົນໝູ່ບ້ານ ມາງທິດ ນີ້”.
ພວກຂ້າພະເຈົ້າຂໍແບ່ງປັນໃຫ້ທ່ານຮູ້ຕື່ມອີກວ່າ: ຫວິງລອງ ແມ່ນແຂວງທີ່ຢູ່ຫ່າງຈາກນະຄອນ ໂຮ່ຈີມິນ ປະມານ 130 ກິໂລແມັດ, ບໍ່ພຽງແຕ່ມີໝູ່ບ້ານດິນເຜົາ ມາງທິດ ເທົ່ານັ້ນ, ຫວິງລອງ ຍັງມີຫຼາຍຈຸດວັດທະນະທຳທີ່ເປັນເອກະລັກຂອງພາກຕາເວັນຕົກ ຫວຽດນາມ ດ້ວຍຫຼາຍລາຍການທ່ອງທ່ຽວລົງຕົວຈິງທີ່ຈັບອົກຈັບໃຈ ພວມດຶງດູດແຂກທ່ອງທ່ຽວທັງພາຍໃນ ແລະ ຕ່າງປະເທດເປັນຈຳນວນຫຼາຍ. ຫວັງວ່າ ເພື່ອນ ຈິນດາ ແລະ ທ່ານຜູ້ຟັງຈະໄປຄົ້ນຫາແຂວງ ຫວິງລອງ ໃນເວລາໄວໆນີ້.
ອາທິດຜ່ານມາ, VOV5 ໄດ້ຮັບຈົດໝາຍຈາກເພື່ອນ Sun Phol, ຈາກ ພະນົມເປັນ, ກຳປູເຈຍ, ດ້ວຍເນື້ອໃນ: “ນັບແຕ່ເມື່ອຮູ້ຂ່າວວ່າ ຫວຽດນາມ ໄດ້ຈັດສົ່ງຄະນະກູ້ໄພກູ້ຊີບໄປຊ່ວຍເຫຼືອ ເວເນຊູເອລາ ພາຍຫຼັງວິນາດຕະກຳແຜ່ນດິນໄຫວທີ່ເກີດຂຶ້ນຢ່າງຮ້າຍແຮງໃນຊ່ວງຫວ່າງແລ້ວນີ້, ຂ້າພະເຈົ້າໄດ້ຕິດຕາມການເຄື່ອນໄຫວຂອງຄະນະຢ່າງໃກ້ຊິດ. ບັນດາການກະທຳດັ່ງກ່າວສະແດງໃຫ້ເຫັນຢ່າງຈະແຈ້ງເຖິງມູນເຊື້ອມະນຸດສະທຳ, ຈິດໃຈສາກົນຂອງ ຫວຽດນາມ. ຂ້າພະເຈົ້າເຊື່ອໝັ້ນຢ່າງແນ່ວແນ່ວ່າ ຄະນະກູ້ໄພກູ້ຊີບຂອງ ຫວຽດນາມ ຈະປະຕິບັດສຳເລັດໜ້າທີ່ຄືກັນກັບການຊ່ວຍເຫຼືອ ຕວັກກີ ແລະ ມຽນມາ ກ່ອນໜ້ານີ້”.
ເພື່ອນ Nijat Imranli ຈາກ ເຢຍລະມັນ ໄດ້ແບ່ງປັນວ່າ: “ລາຍການກະຈາຍສຽງຂອງ VOV5 ໄດ້ຊ່ວຍໃຫ້ຂ້າພະເຈົ້າມີຄວາມເຂົ້າໃຈກ່ຽວກັບວັດທະນະທຳ, ປະຫວັດສາດ ແລະ ຊີວິດຍຸກປັດຈຸບັນຂອງ ຫວຽດນາມ ຕື່ມອີກ. ດັ່ງນັ້ນ, ຂ້າພະເຈົ້າຍາມໃດກໍສົນໃຈຕິດຕາມບັນດາລາຍການຂອງພວກເພື່ອນ”
ນອກຈາກບັນດາຄຳແບ່ງປັນທີ່ພວກຂ້າພະເຈົ້າຫາກໍ່ແນະນຳເຖິງບັນດາທ່ານແລ້ວ, ຕໍ່ໄປນີ້, ພວກຂ້າພະເຈົ້າຂໍຕອບບັນດາຄຳຖາມເຊິ່ງທ່ານຜູ້ຟັງໄດ້ຝາກມາລາຍການໃນອາທິດຜ່ານມາ.
ທຳອິດແມ່ນຄຳຖາມຂອງເພື່ອນ ວິໄລ ຢູ່ນະຄອນຫຼວງ ວຽງຈັນ. ເພື່ອນໄດ້ຖາມມາວ່າ: ເປັນຫຍັງ ຊື່ຂອງຖະໜົນສາຍຕ່າງໆຢູ່ເຂດເມືອງເກົ່າ ຮ່າໂນ້ຍ ລ້ວນແຕ່ເລີ່ມຕົ້ນດ້ວຍຄຳວ່າ “ຮ່າງ”?
ເພື່ອນ ວິໄລ ທີ່ຮັກແພງ! ນີ້ແມ່ນຄຳຖາມທີ່ເປັນໜ້າສົນໃຈຫຼາຍ. ຄຳວ່າ “ຮ່າງ” ໃນພາສາ ຫວຽດ ໝາຍເຖິງຄຳວ່າ “ສິນຄ້າ” ໃນພາສາ ລາວ. ໃນເມື່ອກ່ອນ, ຖະໜົນແຕ່ລະສາຍ ຈະຕິດພັນກັບອາຊີບ ຫຼື ສິນຄ້າປະເພດໃດໜຶ່ງທີ່ເປັນເອກະລັກ. ເປັນຕົ້ນແມ່ນ, ຖະໜົນ ຮ່າງບາກ ໄດ້ເປັນທີ່ຮູ້ຈັກກັນດີກັບອາຊີບ ຕີເງິນຕີຄຳ, ຖະໜົນ ຮ່າງມ໊າ ຕິດພັນກັບອາຊີບເຮັດເຄື່ອງປະດັບປະດາ ແລະ ເຄື່ອງຖະຫວາຍບູຊາ, ຖະໜົນ ຮ່າງທຽກ ຕິດພັນກັບອາຊີບຜະລິດບັນດາຜະລິດຕະພັນເຮັດດ້ວຍຊືນ, ຖະໜົນ ຮ່າງຢາຍ ມີຊື່ສຽງດ້ວຍອາຊີບຕ່ຳຫູກທໍໄໝ, ຂາຍແພໄໝ ແລະ ເຄື່ອງຫັດຖະກຳ, ສ່ວນຖະໜົນ ຮ່າງກວາດ ແມ່ນບ່ອນຜະລິດ ແລະ ດຳເນີນທຸລະກິດ ວີພື້ນເມືອງຊະນິດຕ່າງໆ. ໄປຄຽງຄູ່ກັນນັ້ນ ຍັງມີຖະໜົນ ຮ່າງດ່າວ ຕິດພັນກັບອາຊີບ ຍ້ອມສີ ແລະ ຂາຍແຜ່ນແພ… ຜ່ານການເວລາ, ຫຼາຍອາຊີບ ໄດ້ປ່ຽນແປງ ຫຼື ບໍ່ໄດ້ຄົງຕົວຄືເມື່ອກ່ອນອີກແລ້ວ, ແຕ່ຊື່ຖະໜົນສາຍຕ່າງໆນັ້ນ ຍັງໄດ້ຮັກສາໄວ້ຄືເປັນພະຍານຫຼັກຖານປະຫວັດສາດ ແລະ ວັດທະນະທຳຂອງພະລາດຊະວັງທັງລອງ - ຮ່າໂນ້ຍ. ປັດຈຸບັນນີ້, ເມືອງເກົ່າ ຮ່າໂນ້ຍ ບໍ່ພຽງແຕ່ເປັນຈຸດໝາຍປາຍທາງທີ່ດຶງດູດແຂກທ່ອງທ່ຽວເທົ່ານັ້ນ ຫາກຍັງເປັນບ່ອນປະກອບສ່ວນຮັກສາ ແລະ ແນະນຳບັນດາຄຸນຄ່າຂອງອາຊີບຫັດຖະກຳພື້ນເມືອງຂອງຊາວ ຮ່າໂນ້ຍ ໄປເຖິງເພື່ອນມິດສາກົນອີກດ້ວຍ.
ກ່ອນຈະສິ້ນສຸດລາຍການມື້ນີ້, ພວກຂ້າພະເຈົ້າຂໍແນະນຳກ່ຽວກັບຖ້ຳ ຖັງ ທີ່ຫາກໍ່ພົບເຫັນຢູ່ອຸທິຍານແຫ່ງຊາດ ຟອງຍາ - ແກ໋ບ່າງ ຕາມຄວາມປະສົງຂອງເພື່ອນ ບຸນຍວງ.
ທ່ານອາດຈະຮູ້ຈັກສວນອຸທິຍານແຫ່ງຊາດ ຟອງຍາ - ແກ໋ບາງ, ແຂວງ ກວາງຈິ ຫວຽດນາມ ບ່ອນທີ່ເຊື່ອມຕໍ່ໂດຍກົງກັບສວນອຸທິຍານແຫ່ງຊາດ ຫີນໜາມໜໍ່ ແຂວງ ຄຳມ່ວນ, ລາວ - ມໍລະດົກຂ້າມຊາຍແດນແຫ່ງທຳອິດຂອງ ຫວຽດນາມ - ລາວ. ຫວ່າງມໍ່ໆມານີ້, ບັນດານັກພະຈົນໄພໄດ້ພົບເຫັນຖ້ຳແຫ່ງໃໝ່ທີ່ມີຊື່ວ່າ ຖ້ຳ ຖັງ ຫຼື ເອີ້ນວ່າ Victory Cave ນອນໃນຂອບເຂດສວນອຸທິຍານແຫ່ງຊາດ ຟອງຍາ - ແກ໋ບາງ. ຖ້ຳມີລວງຍາວປະມານ 3 ກິໂລແມັດ ດ້ວຍລະບົບນົມຫີນ (ຫີນຍ້ອຍ) ທີ່ໃຫຍ່ໂຕມະໂຫຖານ ພ້ອມດ້ວຍຫຼາຍກຸ່ມໄຂ່ມຸກຖ້ຳ (Cave pearl) ທີ່ມີຂະໜາດໃຫຍ່ຫາຍາກ, ເຊິ່ງໄດ້ຮັບການກໍ່ຕົວຂຶ້ນຜ່ານຫຼາຍຮ້ອຍພັນປີ. ຕາມການຕີລາຄາຂອງຫົວໜ່ວຍສຳຫຼວດແລ້ວ, ດ້ວຍຂອບຂະໜາດໃຫຍ່, ທັດສະນີຍະພາບທີ່ຮົກເຮື້ອປະຖົມປະຖານ ພ້ອມດ້ວຍລະບົບນົມຫີນ ແລະ ເມັດໄຂ່ມຸກຖ້ຳທີ່ເປັນເອກະລັກ, ຖ້ຳ ຖັງ ໝັ້ນໝາຍວ່າຈະກາຍເປັນຈຸດເດັ່ນໃໝ່ໃນວິວັດທະນາການຄົ້ນຫາທຳມະຊາດຢູ່ແຂວງ ກວາງຈິ, ປະກອບສ່ວນຫັນຜະລິດຕະພັນທ່ອງທ່ຽວແບບພະຈົນໄພໃຫ້ມີຄວາມຫຼາກຫຼາຍກວ່າ, ຍົກສູງຄຸນຄ່າຂອງມໍລະດົກທຳມະຊາດລະດັບໂລກຂອງສວນອຸທິຍານແຫ່ງຊາດ ຟອງຍາ - ແກ໋ບາງ ໃນໄລຍະຈະມາເຖິງ.
