ພວກຂ້າພະເຈົ້າມີຄວາມປະຕິຊົມຊື່ນເມື່ອໄດ້ຮັບນ້ຳໃຈຄວາມຮັກແພງ, ຄວາມນິຍົມ ແລະ ຄວາມສົນໃຈຂອງຜູ້ຟັງ ຜ່ານຈົດໝາຍນັບຮ້ອຍສະບັບຈາກຫຼາຍປະເທດ ແລະ ເຂດແຄວ້ນໃນໂລກ ທີ່ໄດ້ສົ່ງມາຍັງ VOV5. ຕໍ່ໄປນີ້ ເຊີນທ່ານຜູ້ຟັງ ພ້ອມກັບບັນນາທິການຂອງລາຍການ ເປີດອ່ານບັນດາຄຳເຫັນປະກອບ ແລະ ເນື້ອໃນຈົດໝາຍບາງສະບັບໃນຈໍານວນຈົດໝາຍທັງໝົດ 398 ສະບັບ ທີ່ໄດ້ສົ່ງມາຍັງ VOV5 ໃນອາທິດຜ່ານມາ, ສະເພາະລາຍການພາສາລາວ ໄດ້ຮັບຈົດໝາຍຈາກທ່ານຜູ້ຟັງລາວ 22 ສະບັບ. ຕໍ່ໄປ, ເຊີນທ່ານພ້ອມກັບນັກຂ່າວ VOV ເປີດອ່ານຈົດໝາຍບັນດາສະບັບດັ່ງກ່າວ.
ໃນຊຸມວັນເດືອນກໍລະກົດນີ້, ບໍ່ພຽງແຕ່ມີປະຊາຊົນ ຫວຽດນາມ ທີ່ຈາລຶກເຖິງບັນດານັກຮົບເສຍສະຫຼະຊີວິດເພື່ອຊາດເທົ່ານັ້ນ, ຫາກຍັງມີຜູ້ຟັງລາວຫຼາຍຄົນກໍໄດ້ສົ່ງຈົດໝາຍເຖິງລາຍການສະແດງຄວາມຮູ້ບຸນຄຸນຕໍ່ບັນດາທະຫານອາສາສະໝັກ ຫວຽດນາມ ທີ່ໄດ້ຮ່ວມຂຸມຄອງດຽວກັນ ໄດ້ເສຍສະຫຼະເລືອດເນື້ອເພື່ອປົກປັກຮັກສາເອກະລາດ, ເສລີພາບໃຫ້ແກ່ປະຊາຊົນລາວ. ໃນຈົດໝາຍຂອງເພື່ອນ ວຽງຄຳ, ຢູ່ແຂວງ ວຽງຈັນ ມີຕອນຂຽນວ່າ: “ໃນຊຸມວັນຜ່ານມາ, ຂ້າພະເຈົ້າໄດ້ເຫັນປະຈັກຕາຫຼາຍຂະບວນລົດຂອງທັງ ຫວຽດນາມ ແລະ ລາວ ຫຼັ່ງໄຫຼມາເຂດອະນຸສອນສະຖານຮ່ວມສຳພັນສູ້ຮົບ ລາວ - ຫວຽດນາມ ຢູ່ບ້ານເກີນ, ເມືອງທຸລະຄົມ, ແຂວງວຽງຈັນ ເພື່ອຈາລຶກບຸນຄຸນບັນດານັກຮົບເສຍສະຫຼະຊີວິດເພື່ອຊາດ. ນີ້ແມ່ນການກະທຳອັນສູງສົ່ງເຊິ່ງສອງປະເທດ ລາວ - ຫວຽດນາມ ຍາມໃດກໍຖະໜຸຖະໜອມ ແລະ ນັບມື້ນັບໄດ້ຮັບການເສີມຂະຫຍາຍ. ຈາກຫົວໃຈ, ຂ້າພະເຈົ້າກໍສະແດງຄວາມຮູ້ບຸນຄຸນຢ່າງລົ້ນເຫຼືອຕໍ່ການເສຍສະຫຼະອັນສູງສົ່ງຂອງບັນດານັກຮົບ”.
ຕໍ່ໄປແມ່ນຄວາມຮູ້ສຶກຂອງຜູ້ຟັງຈຳນວນໜຶ່ງກ່ຽວກັບວິທະຍຸກະຈາຍສຽງ ຫວຽດນາມ (VOV). ເພື່ອນ Bidhan Chandra Sanyal, ຢູ່ ອິນເດຍ, ແບ່ງປັນວ່າ:
“ວິທະຍຸກະຈາຍສຽງ ຫວຽດນາມ (VOV) ບໍ່ພຽງແຕ່ແມ່ນພາຫະນະວິທະຍຸກະຈາຍສຽງ - ໂທລະພາບເທົ່ານັ້ນ, ຫາກຍັງແມ່ນກະບອກສຽງທີ່ເຂັ້ມແຂງກ່ຽວກັບສັນຕິພາບ, ຄວາມປອງດອງ ແລະ ໄມຕີຈິດມິດຕະພາບໃນເວທີສາກົນອີກດ້ວຍ. ການປະກອບສ່ວນຢ່າງຫຼວງຫຼາຍຂອງວິທະຍຸໃຫ້ແກ່ຄວາມສາມັກຄີທົ່ວໂລກ ແລະ ສັນຕິພາບໂລກແມ່ນຫຼາຍພໍສົມຄວນ”.
ໃນຈົດໝາຍຝາກເຖິງລາຍການກະຈາຍສຽງພາກພາສາ ແອັດສະປາຍ, ເພື່ອນ Najimuddin ຢູ່ ອິນເດຍ, ສະແດງຄວາມໃນໃຈສູ່ຟັງວ່າ: “ຜ່ານລາຍການກະຈາຍສຽງຂອງ VOV5, ຂ້າພະເຈົ້າຊອກຫາໄດ້ຂໍ້ມູນລະອຽດຫຼາຍຢ່າງກ່ຽວກັບ ຫວຽດນາມ. ຂ້າພະເຈົ້າມັກລາຍການຂ່າວຕ່າງປະເທດ ແລະ ບັນດາເຫດການສະຖານະການການເມືອງ, ກໍຄືຂໍ້ມູນຕ່າງໆທີ່ກ່ຽວຂ້ອງເຖິງ ຫວຽດນາມ, VOV5 ແມ່ນຊ່ອງສະໜອງຂໍ້ມູນທີ່ໜ້າເຊື່ອຖື”.
ຄຳຖາມທຳອິດຈາກເພື່ອນ ສິນປະເສີດ, ຢູ່ນະຄອນຫຼວງ ວຽງຈັນ, ມີດັ່ງນີ້: “ຂ້າພະເຈົ້າດີໃຈ ແລະ ຮູ້ສຶກປະຫຼາດໃຈພໍສົມຄວນເມື່ອອ່ານຂ່າວວ່າ: ຫວຽດນາມ ສົ່ງອອກປານິນງວດທໍາອິດໄປຍັງ ຍີ່ປຸ່ນ ເພື່ອເຮັດ ຊາຊິມິ (Sashimi). ປາຊະນິດນີ້ຕ້ອງບັນລຸໄດ້ມາດຕະຖານຫຍັງແດ່ຈຶ່ງສາມາດສົ່ງອອກໄປຍັງຕະຫຼາດທີ່ເຄັ່ງຂັດຄື ຍີ່ປຸ່ນ ນີ້ໄດ້?
ຕາມຂໍ້ມູນຈາກ ບໍລິສັດຫຸ້ນສ່ວນສິນໃນນ້ຳສະອາດ ຫວຽດນາມ (Cleanfood) ນະຄອນ ເກີ່ນເທີ, ເຊິ່ງແມ່ນວິສາຫະກິດທີ່ຫາກໍ່ສົ່ງອອກປານິນ fillet ງວດທຳອິດໄປຍັງ ຍີ່ປຸ່ນ ເພື່ອຮັບໃຊ້ການປຸງແຕ່ງບັນດາເຍື່ອງອາຫານ sushi ແລະ sashimi, ໃຫ້ຮູ້ວ່າ: ເພື່ອພິຊິດຕະຫຼາດນີ້, ທາງວິສາຫະກິດໄດ້ເສຍເວລາປະມານ 6 ເດືອນເພື່ອສຳເລັດຂັ້ນຕອນການລ້ຽງ ແລະ ປຸງແຕ່ງປານິນ fillet ຕາມມາດຕະຖານສຳລັບຜະລິດຕະພັນອາຫານທີ່ມີມູນຄ່າເພີ່ມ. ໃນຂະນະທີ່ຫຼາຍປະເທດຍັງບໍ່ທັນສາມາດສົ່ງອອກຜະລິດຕະພັນທີ່ຄ້າຍຄືກັນເຂົ້າຕະຫຼາດ ຍີ່ປຸ່ນ ໄດ້, Cleanfood ໄດ້ສ້າງບາດກ້າວບຸກທະລຸຍ້ອນການລົງທຶນທີ່ຄົບຊຸດເຂົ້າໃນພື້ນຖານໂຄງລ່າງ, ເຕັກໂນໂລຢີການລ້ຽງ ແລະ ປຸງແຕ່ງ. ຍ້ອນເຫດນັ້ນ, ຜະລິດຕະພັນຈຶ່ງຕອບສະໜອງໄດ້ບັນດາມາດຕະຖານທີ່ເຄັ່ງຂັດກ່ຽວກັບຄຸນນະພາບ ດ້ວຍຊີ້ນປາຫອມ, ສະອາດ, ບໍ່ມີຈຸນລະຊີບ ແລະ ບໍ່ມີຢາຕ້ານເຊື້ອຕົກຄ້າງ. ໄປຄຽງຄູ່ກັນນັ້ນ, ທາງວິສາຫະກິດຍັງລົງທຶນເຕັກໂນໂລຢີບຳບັດນ້ຳ, ເປັນເຈົ້າການສ້າງສວນປູກຕົ້ນໄມ້ກິນໝາກເພື່ອຮັບໃຊ້ການລ້ຽງປາໂດຍສະເພາະອີກດ້ວຍ.
ເພື່ອນ ຄຳມະລີ ຢູ່ນະຄອນຫຼວງ ວຽງຈັນ ໄດ້ແບ່ງປັນວ່າ: “ລູກສາວຂອງຂ້າພະເຈົ້າ ມັກຊົມລາຍການສະແດງສິລະປະຟ້ອນຕຸກກະຕາ/ລະຄອນຫຸ່ນ ທີ່ສັບປະດາວັດທະນະທຳ ຫວຽດນາມ ຢູ່ ລາວ ທີ່ສຸດ. ເຖິງວ່າລາຍການສະແດງໄດ້ສິ້ນສຸດລົງໄດ້ 2 ເດືອນປາຍແລ້ວກໍຕາມ, ແຕ່ດຽວນີ້ຫຼານຍັງເວົ້າເຖິງບັນດາໂຕຕຸກກະຕາທີ່ໜ້າຮັກ ແລະ ຢາກໄປ ຫວຽດນາມ ເພື່ອຮັບຊົມລາຍການສະແດງສິລະປະຟ້ອນຕຸກກະຕາຕື່ມອີກ. ຂ້າພະເຈົ້າຢາກຮູ້ວ່າ ຢູ່ ຮ່າໂນ້ຍ ສາມາດຊົມລາຍການສະແດງຕຸກຟ້ອນກະຕານີ້ໄດ້ຢູ່ໃດແດ່?”
ສິລະປະຟ້ອນຕຸກກະຕາ ຫວຽດນາມ ແມ່ນມໍລະດົກວັດທະນະທຳທີ່ເປັນເອກະລັກ, ໂດຍພົ້ນເດັ່ນຂຶ້ນດ້ວຍບັນດາປະເພດຄື ຟ້ອນຕຸກກະຕານ້ຳ ແລະ ຟ້ອນຕຸກກະຕາເທິງເວທີໜ້າດິນ. ໃນນັ້ນ, ສິລະປະຟ້ອນຕຸກກະຕານ້ຳແມ່ນປະເພດສິລະປະທີ່ມີພຽງແຕ່ຢູ່ ຫວຽດນາມ ເທົ່ານັ້ນ. ປີ 2012, ສິລະປະຟ້ອນຕຸກກະຕານ້ຳໄດ້ຮັບການຮັບຮອງວ່າ ເປັນມໍລະດົກວັດທະນະທຳບໍ່ເປັນວັດຖຸລະດັບຊາດ. ປັດຈຸບັນນີ້, ຫວຽດນາມ ພວມສ້າງສຳເນົາເອກະສານສະເໜີໃຫ້ ອົງການ UNESCO ຮັບຮອງເອົາເປັນມໍລະດົກວັດທະນະທຳບໍ່ເປັນວັດຖຸຂອງມວນມະນຸດ. ເມື່ອມາ ຮ່າໂນ້ຍ, ເພື່ອນສາມາດຮັບຊົມສິລະປະທີ່ເປັນເອກະລັກນີ້ຢູ່ ໂຮງລະຄອນຟ້ອນຕຸກກະຕານ້ຳ ທັງລອງ ຢູ່ໜອງ ຮວ່ານກຽມ (ເຮືອນ 57B ດິງຕຽນຮວ່າງ - ຕາແສງ ຮວ່ານກຽມ) - ສະຖານທີ່ທີ່ມີຊື່ສຽງ ແລະ ດຶງດູດແຂກທ່ອງທ່ຽວຫຼວງຫຼາຍທີ່ສຸດ. ນອກຈາກນັ້ນແລ້ວ, ຍັງມີໂຮງລະຄອນຟ້ອນຕຸກກະຕານ້ຳ ດອກບົວ ຢູ່ເຮືອນເລກທີ 16 ຫຼີຖາຍໂຕ, ຮວ່ານກຽມ, ຮ່າໂນ້ຍ ຫຼື ໂຮງລະຄອນຟ້ອນຕຸກກະຕາ ຫວຽດນາມ ຢູ່ ເຮືອນເລກທີ 361 ເຈື່ອງຈິງ, ຕາແສງ ແທັງຊວັນ ເຊິ່ງເປັນບ່ອນທີ່ຈັດບັນດາລາຍການສະແດງ ແລະ ແນະນຳຫຼາຍຮູບແບບຟ້ອນຕຸກກະຕາທີ່ເປັນມູນເຊື້ອຂອງ ຫວຽດນາມ.
ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນຂອງທ່ານຜູ້ຟັງທີ່ຝາກມາລາຍການໃນອາທິດຜ່ານມາ, ຫວັງວ່າ ທ່ານຜູ້ຟັງຈະສືບຕໍ່ຝາກຈົດໝາຍ, ອີເມວ ຫຼື ໂທລະສັບມາຫາລາຍການ ເພື່ອປະກອບຄຳເຫັນຊ່ວຍໃຫ້ລາຍການຂອງພວກເຮົາ ນັບມື້ນັບດີກວ່າເກົ່າ. ພວກເພື່ອນກໍ່ສາມາດຝາກຈົດໝາຍມາຍັງລາຍການໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງ ຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ ຫຼື ໂທມາໂດຍກົງກໍ່ໄດ້ ຕາມເບີໂທ 0084.243.8256631 ຫຼື ອີເມວ laovov5@gmail.com. ທ່ານຜູ້ຟັງກໍ່ສາມາດເຂົ້າເບິ່ງໃນສື່ເອເລັກໂຕນິກ vovworld.vn.
