+ ເພື່ອນ ວົງຄຳ, ຢູ່ແຂວງ ອຸດົມໄຊ ໄດ້ສົ່ງອີເມວມາຍັງລາຍການ, ໂດຍແບ່ງປັນວ່າ: “ຂ້າພະເຈົ້າໄດ້ຕິດຕາມບັນດາລາຍການກະຈາຍສຽງຂອງພວກເພື່ອນໃນບໍ່ວ່າເວລາໃດທີ່ສາມາດຮັບຟັງໄດ້. ຂ້າພະເຈົ້າຮູ້ສຶກດີໃຈຫຼາຍເມື່ອໄດ້ຮັບຟັງຂ່າວກ່ຽວກັບສະພາບການເມືອງ, ວັດທະນະທຳ ແລະ ດ້ານອື່ນໆອີກໃນການດຳລົງຊີວິດຢູ່ປະເທດ ຫວຽດນາມ ຜ່ານຄື້ນວິທະຍຸກະຈາຍສຽງ”.
+ ເພື່ອນ ຄຳປະສົງ, ຢູ່ ຫຼວງພະບາງ ໄດ້ສົ່ງອີເມວມາຍັງລາຍການ, ໂດຍແບ່ງປັນວ່າ: “ເຖິງວ່າຈະຕ້ອງການເວລາເພື່ອທຳຄວາມລື້ງເຄີຍ ແລະ ນຳໃຊ້ໄດ້ສື່ເອເລັກໂຕນິກໃໝ່ຂອງພວກເພື່ອນກໍ່ຕາມ, ແຕ່ຂ້າພະເຈົ້າຈະພະຍາຍາມ, ເພາະວ່າບັນດາບົດຂຽນຂອງພວກເພື່ອນມີຄຸນນະພາບດີທີ່ສຸດ. ພາບສາລະຄະດີຂອງພວກເພື່ອນກໍ່ແຈ້ງດີ ແລະງາມ ກວ່າ. ຂ້າພະເຈົ້າມີຄວາມປະທັບໃຈຕໍ່ພາບສາລະຄະດີກ່ຽວກັບ ປູ່ຫຼວງ, ງາມທີ່ສຸດ. ນີ້ແມ່ນດິນແດນທີ່ຮົກເຮື້ອປະຖົມປະຖານເຮັດໃຫ້ຫຼາຍຄົນຢາກໄດ້ມາຢາມ”.
ລາຍການພາກພາສາ ລາວ ຂໍຂອບໃຈບັນດາທ່ານຜູ້ຟັງທີ່ໄດ້ໂທລະສັບ, ສົ່ງອີເມວ ແລະ ຈົດໝາຍມາຫາລາຍການໃນຕະຫຼອດໄລຍະຜ່ານມາ. ໃນໄລຍະຈະມາເຖິງ, ຫວັງວ່າ ພວກຂ້າພະເຈົ້າຈະສືບຕໍ່ໄດ້ຮັບຄຳເຫັນປະກອບ, ການແບ່ງປັນຈາກທ່ານຜູ້ຟັງຫຼາຍກວ່າອີກ ເພື່ອຊ່ວຍໃຫ້ລາຍການນັບມື້ນັບດີກວ່າຂຶ້ນ.
ຕໍ່ໄປນີ້, ລາຍການ “ໂອ້ລົມກັບເພື່ອນ ລາວ” ຈະຕອບຄຳຖາມຈຳນວນໜຶ່ງເຊິ່ງທ່ານຜູ້ຟັງໄດ້ສົ່ງມາລາຍການໃນອາທິດຜ່ານມາ.
ເພື່ອນ ດາລາວັນ ສີຫາລາດ, ຢູ່ແຂວງ ຫົວພັນ ໄດ້ສົ່ງຂໍ້ຄວາມທາງ Facebook ໂດຍໃຫ້ຮູ້ວ່າ: ຂ້າພະເຈົ້າໄດ້ຍິນກ່ຽວກັບການທ່ອງທ່ຽວດ້ວຍລົດເມ 2 ຊັ້ນ ຢູ່ ຮ່າໂນ້ຍ ຜ່ານລາຍການຄົ້ນຫາ ຫວຽດນາມ. ຂ້າພະເຈົ້າເຫັນວ່າ ລາຍການທ່ອງທ່ຽວນີ້ໄດ້ປະກອບສ່ວນສ້າງຄວາມງາມທີ່ເປັນເອກະລັກສະເພາະໃຫ້ ຮ່າໂນ້ຍ. ຜ່ານລາຍການ, ຂ້າພະເຈົ້າຢາກຊອກຮູ້ກ່ຽວກັບລາຍການທ່ອງທ່ຽວນີ້ຕື່ມອີກ.
ເພື່ອນ ດາລາວັນ ສີຫາລາດ, ທີ່ຮັກແພງ. ລົດເມ 2 ຊັ້ນຢູ່ ຮ່າໂນ້ຍ ແມ່ນຮູບແບບການບໍລິການທີ່ເປັນເອກະລັກສະເພາະ ແລະ ນຳມາເຊິ່ງການປະພຶດຕົວຈິງຫຼາຍຢ່າງໃຫ້ແກ່ແຂກທ່ອງທ່ຽວ. ການເດີນທາງໄປຢ້ຽມຊົມນະຄອນຫຼວງດ້ວຍລົດເມບໍ່ມີຫຼັງຄານີ້ ແນ່ນອນວ່າຈະສ້າງຄວາມປະທັບໃຈຫຼາຍຢ່າງໃຫ້ແຂກທ່ອງທ່ຽວ. ຈຸດພິເສດແມ່ນ, ຢູ່ສະຖານທີ່ທ່ອງທ່ຽວແຕ່ລະແຫ່ງນັ້ນ, ລະບົບອະທິບາຍຈະແນະນຳເຖິງແຂກທ່ອງທ່ຽວບັນດາຂໍ້ມູນກ່ຽວກັບປະຫວັດສາດ, ຈຸດພິເສດ, ຄວາມໝາຍຂອງສະຖານທີ່ແຕ່ລະແຫ່ງດ້ວຍຫຼາຍພາສາຢູ່ເທິງລົດເມ. ປະຈຸບັນ, ລົດເມນີ້ຈະມີ 2 ສາຍທີ່ຈະໂດຍສານແຂກທ່ອງທ່ຽວໄປຜ່ານສະຖານທີ່ປະຫວັດສາດທີ່ມີຊື່ສຽງຫຼາຍແຫ່ງຢູ່ ຮ່າໂນ້ຍ, :
+ ສາຍທີ 1 (City Tour): ເລີ່ມອອກເດີນທາງຈາກສະໜາມຫຼວງ ດົງກິງເງັ້ຍທຸກ (ຫຼື ໂຮງລະຄອນໃຫຍ່) ໄປຜ່ານໂບດໃຫຍ່, ເສົາທຸງ ຮ່າໂນ້ຍ, ສຸສານປະທານ ໂຮ່ຈີມິນ, ວັນມ້ຽວ - ກວັກຕືຢາມ, ພະລາຊະວັງ ທັງລອງ, ຄຸກ ຮວາລໍ່…
+ ສາຍທີ 2 (ທັງລອງ City Tour): ເລີ່ມອອກເດີນທາງຈາກຫໍພິພິຕະພັນປະຫວັດສາດການທະຫານ ຫວຽດນາມ ໄປຜ່ານພະລາຊະວັງ ທັງລອງ, ວັດ ເຈິ່ນກວັກ, ວິຫານ ກວານແທັງ, ສຸສານປະທານ ໂຮ່ຈີມິນ, ໂບດໃຫຍ່, ຫໍພິພິຕະພັນແມ່ຍິງ ຫວຽດນາມ ແລະ ສິ້ນສຸດຢູ່ໂບດໃຫຍ່.
ປີ້ລົດເມກໍ່ມີຫຼາຍລາຄາ, ໂດຍອີງໃສ່ເວລາໄປທ່ຽວ: ປີ້ໄປຮອບໜຶ່ງແມ່ນ 150.000 ດົ່ງ (ປະມານ 6 USD), ປີ້ໄປທ່ຽວໃນເວລາ 4 ຊົ່ວໂມງມີລາຄາ: 300.000 ດົ່ງ (ປະມານ 12 USD), ປີ້ໄປທ່ອງທ່ຽວໃນເວລາ 24 ຊົ່ວໂມງ ມີລາຄາ 450.000 ດົ່ງ (ປະມານ 17 USD)… ລົດເມນີ້ເລີ່ມເຄື່ອນໄຫວແຕ່ເວລາ 09 ໂມງ ຮອດ 17 ໂມງ ຂອງທຸກວັນໃນອາທິດ.
(ພາບ: cafef.vn)
ເພື່ອນ ສຸລິວົງ ຢູ່ແຂວງ ຫຼວງພະບາງ ໄດ້ສົ່ງອີເມວມາຍັງລາຍການ, ໂດຍໃຫ້ຮູ້ວ່າ: ຂ້າພະເຈົ້າໄດ້ອ່ານບົດຂຽນຂອງພວກເພື່ອນກ່ຽວກັບການເຄື່ອນໄຫວຮ່ວມມືກໍ່ສ້າງເສັ້ນທາງລົດໄຟ ວູງອາງ (ຫວຽດນາມ) - ວຽງຈັນ (ລາວ). ນີ້ແມ່ນເສັ້ນທາງເພື່ອຍົກສູງການແລກປ່ຽນການຄ້າລະຫວ່າງ 2 ປະເທດ, ແລະ ລະຫວ່າງ ລາວ ກັບສາກົນ. ໃນປະຈຸບັນ ໂຄງການນີ້ໄດ້ຜັນຂະຫຍາຍຄືແນວໃດແລ້ວ?
ເພື່ອນ ສຸລິວົງ ທີ່ຮັກແພງ, ເສັ້ນທາງລົດໄຟ ວູງອາງ - ມູຢ້າ - ທ່າແຂກ - ວຽງຈັນ ໄດ້ຮັບຖືວ່າແມ່ນໜຶ່ງໃນບັນດາໂຄງການເຊື່ອມຕໍ່ພື້ນຖານໂຄງລ່າງຈຸດສຸມລະຫວ່າງ ຫວຽດນາມ ແລະ ລາວ. ທີ່ການໂອ້ລົມສົນທະນາທີ່ຫາກໍ່ຈັດຂຶ້ນຫວ່າງມໍ່ໆມານີ້, ຢູ່ ຮ່າໂນ້ຍ (ຫວຽດນາມ) ລະຫວ່າງ ທ່ານ ເຈິ່ນຮົ່ງມິນ, ລັດຖະມົນຕີກະຊວງກໍ່ສ້າງ ຫວຽດນາມ ແລະ ທ່ານ ເຫຼັກໄຫຼ ສີວິໄລ, ລັດຖະມົນຕີກະຊວງໂຍທາທິການ ແລະ ຂົນສົ່ງ ລາວ ແມ່ນເພື່ອແນໃສ່ກວດກາຄວາມຄືບໜ້າບັນດາໂຄງການພື້ນຖານໂຄງລ່າງຈຸດສຸມ ແລະ ແລກປ່ຽນກ່ຽວກັບທິດທາງຮ່ວມມືດ້ານຄົມມະນາຄົມຂົນສົ່ງລະຫວ່າງ 2 ປະເທດໃນໄລຍະຈະມາເຖິງ.
ສຳລັບເສັ້ນທາງລົດໄຟດັ່ງກ່າວ, ທ່ານລັດຖະມົນຕີ ເຈິ່ນຮົ່ງມິນ ຕີລາຄາສູງເລື່ອງ ລັດຖະບານ ລາວ ໄດ້ລົງນາມໃນສັນຍາໂອນສິດກັບນັກລົງທຶນ ແລະ ພວມຕັ້ງໜ້າກະກຽມບັນດາເງື່ອນໄຂເພື່ອຜັນຂະຫຍາຍໂຄງການ. ສຳລັບ 2 ເສັ້ນທາງລົດໄຟ ວູງອາງ - ມູຢ້າ ແລະ ທ່າແຂກ - ເຂດຊາຍແດນ ຫວຽດນາມ - ລາວ, ການນຳກະຊວງກໍ່ສ້າງສະເໜີໃຫ້ນັກລົງທຶນຮ່ວມທຸລະກິດ (Petro Trade Laos (PTL) - ແດ່ວກາ) ຕ້ອງສູ້ຊົນເຮັດບົດລາຍງານຄົ້ນຄ້ວາຄວາມສາມາດເປັນໄປໄດ້ໃນເບື້ອງຕົ້ນໃຫ້ສຳເລັດໃນໄຕມາດທີ 4 ປີ 2026, ເຮັດບົດລາຍງານຄົ້ນຄ້ວາຄວາມສາມາດເປັນໄປໄດ້ໃຫ້ສຳເລັດໃນໄຕມາດທີ 2 ປີ 2028 ແລະ ມຸ່ງໄປເຖິງເປົ້າໝາຍເລີ່ມຕົ້ນລົງມືກໍ່ສ້າງກ່ອນປີ 2030.
ໃນຂະນະນັ້ນ, ກ່ຽວກັບຝ່າຍ ລາວ, ທ່ານລັດຖະມົນຕີ ເຫຼັກໄຫຼ ສີວິໄລ ຕີລາຄາວ່າ ໂຄງການເສັ້ນທາງລົດໄຟ ທ່າແຂກ - ວຽງຈັນ ໄດ້ບັນລຸບາດກ້າວສຳຄັນຫຼາຍຢ່າງ. ໃນນັ້ນ, ມີເນື້ອໃນ ຄົ້ນຄວ້າຄວາມສາມາດເປັນໄປ ແລະ ການຮ່ວມມືຈຳນວນໜຶ່ງລະຫວ່າງບັນດານັກລົງທຶນ ໄດ້ຮັບການຜັນຂະຫຍາຍ. ຕາມທ່ານແລ້ວ, ບັນດາຈຸດເຊື່ອມຕໍ່ຂອງເສັ້ນທາງລົດໄຟໄດ້ຮັບການກຳນົດໃນລະດັບເບື້ອງຕົ້ນ ແລະ 2 ຝ່າຍຕ້ອງສືບຕໍ່ສົມທົບກັນເພື່ອກ້າວໄປເຖິງການລົງມືກໍ່ສ້າງໂຄງການໃນໄລຍະເວລາທີ່ເໝາະສົມ.
ເລື່ອງບັນດາຝ່າຍໄດ້ເຫັນດີເປັນເອກະພາບນຳກັນຕໍ່ຫຼາຍເນື້ອໃນຫຼັກກ່ຽວກັບຄວາມຄືບໜ້າ, ເຕັກໂນໂລຊີ ແລະ ຈຸດເຊື່ອມຕໍ່ເສັ້ນທາງ, ໄດ້ຮັບຖືວ່າແມ່ນບາດກ້າວສຳຄັນໃນການກະກຽມລົງທຶນເສັ້ນທາງລົດໄຟ ວູງອາງ - ມູຢ້າ - ທ່າແຂກ - ວຽງຈັນ.
