ໃນອາທິດຜ່ານມາ, ພະແນກກະຈາຍສຽງບັນດາລາຍການພາກພາສາຕ່າງປະເທດ, ວິທະຍຸກະຈາຍສຽງຫວຽດນາມ ໄດ້ຮັບຈົດໝາຍ, ອີເມວ 381 ສະບັບ ແລະ ໂທລະສັບຫຼາຍສາຍ ຈາກທ່ານຜູ້ຟັງທີ່ມາຈາກ 33 ປະເທດ ແລະ ເຂດແຄວ້ນ. ໃນນັ້ນ, ລາຍການພາກພາສາລາວ ໄດ້ຮັບຈົດໝາຍ, ອີເມວ 23 ສະບັບຈາກທ່ານຜູ້ຟັງລາວ. ໃນລາຍການໂອ້ລົມກັບເພື່ອນລາວ ມື້ນີ້, ພວກເຮົາຂໍຄັດສະເໜີເນື້ອໃນຈົດໝາຍ ແລະ ຕອບບາງຄຳຖາມເຊິ່ງທ່ານຜູ້ຟັງຝາກມາລາຍການໃນອາທິດຜ່ານມາ.
ເພື່ອນ ຄຳປະສົງ, ຢູ່ນະຄອນຫຼວງ ວຽງຈັນ ໄດ້ສົ່ງອີເມວມາຫາລາຍກາຍໂດຍແບ່ງປັນວ່າ: ຫວຽດນາມ ໄດ້ຈັດພິທີໄຫວ້ທຸກ ທ່ານ ໄຊສົມພອນ ພົມວິຫານ ຕາມພິທີລະດັບຊາດໃນວັນທີ 10 – 11 ສິງຫາ ເພື່ອສະແດງຄວາມເສົ້າສະຫຼົດໃຈ ແລະ ອອກມາຈາກສາຍພົວພັນແບບພິເສດ ຫວຽດນາມ - ລາວ. ໃນສານແບ່ງເບົາຄວາມເສົ້າສະຫຼົດໃຈ, ບັນດາການນຳ ຫວຽດນາມ ໃຫ້ຮູ້ວ່າ “ການຈາກໄປຂອງ ທ່ານ ໄຊສົມພອນ ພົມວິຫານ ແມ່ນການສູນເສຍອັນໃຫຍ່ຫຼວງຕໍ່ພັກ, ລັດ ແລະ ປະຊາຊົນ ລາວ ອ້າຍນ້ອງ; ພ້ອມກັນນັ້ນ, ພັກ ລັດ ແລະ ປະຊາຊົນ ຫວຽດນາມ ກໍ່ສູນເສຍເພື່ອນຜູ້ຍິ່ງໃຫຍ່, ສະຫາຍຜູ້ສັດຊື່ບໍລິສຸດ, ສະໜິດຕິດພັນ”. ສຳລັບຂ້າພະເຈົ້າແລ້ວ, ນີ້ແມ່ນສິ່ງພິສູດໃຫ້ເຫັນຢ່າງຈະແຈ້ງກ່ຽວກັບສາຍພົວພັນອັນສັດຊື່ບໍລິສຸດ, ມີໜຶ່ງບໍ່ມີສອງໃນໂລກ. ແລະຂ້າພະເຈົ້າເອງກໍ່ຂໍຂອບໃຈ ຫວຽດນາມ ທີ່ຍາມໃດກໍ່ຮຽງບ່າຮຽງໄຫຼ່ກັບປະເທດຊາດ ແລະ ປະຊາຊົນ ລາວ ໃນເມື່ອກ່ອນ, ປະຈຸບັນ ແລະ ໃນອະນາຄົດ. ຂ້າພະເຈົ້າຂໍອວຍພອນໃຫ້ນ້ຳໃຈສາມັກຄີລະຫວ່າງ 2 ປະເທດໃຫ້ນັບມື້ນັບສະໜິດແໜ້ນກວ່າເກົ່າ”.
(ພາບ: laodong.vn)
ເພື່ອນ ວັນວິໄລ ວິໄລວົງ, ຢູ່ແຂວງ ຫົວພັນ ໄດ້ສົ່ງອີເມວມາຫາລາຍການ, ແບ່ງປັນວ່າ ໃນໄລຍະຜ່ານມາ, ພາຍຫຼັງການໄປທ່ອງທ່ຽວຢູ່ ຮ່າໂນ້ຍ ແລະ ກວາງນິງ, ຂ້າພະເຈົ້າມີຄວາມແປກປະຫຼາດໃຈກັບຈຳນວນແຂກທ່ອງທ່ຽວ ອິນເດຍ ທີ່ໄດ້ເລືອກເອົາ ຫວຽດນາມ ແມ່ນສະຖານທີ່ມັກຮັກຂອງຕົນ. ສຳລັບຂ້າພະເຈົ້າແລ້ວ, ນີ້ແມ່ນປະເທດທີ່ມີຫຼາຍເຂດສວຍງາມ, ລາຄາກໍ່ເໝາະສົມ, ແຫ່ງທີ່ແຂກທ່ອງທ່ຽວສາມາດຮັບປະທານບັນດາເຍື່ອງອາຫານ, ຊົມທິວທັດທຳມະຊາດ, ນ້ຳໃຈຮັກແພງແຂກຄົນ ແລະ ມີຄວາມເປັນມືອາຊີບສຳລັບແຂກທ່ອງທ່ຽວ”.
+ ເພື່ອນ ແສງດາວົງ, ຢູ່ແຂວງ ອັດຕະປື, ໄດ້ສົ່ງຂໍ້ຄວາມມາຫາລາຍການໂດຍແບ່ງປັນວ່າ: “ຂ້າພະເຈົ້າມັກອ່ານບັນດາບົດຂຽນກ່ຽວກັບບັ້ນເຄື່ອນໄຫວ 500 ວັນ ແລະ ຄືນຢູ່ ຫວຽດນາມ. ຂ້າພະເຈົ້າບໍ່ຄິດວ່າ ຍັງມີທະຫານ ຫວຽດນາມ ທີ່ເສຍສະຫຼະຊີວິດເພື່ອຊາດທີ່ຍັງບໍ່ທັນຢັ້ງຢືນໄດ້ຊື່ ແລະ ນາມສະກຸນ, ຊ້ຳບໍ່ໜຳຍັງບໍ່ທັນຊອກໄດ້ອັດຖິຫຼາຍຄືແນວນັ້ນ. ນີ້ແມ່ນລາຍການມີລັກສະນະມະນຸດສະທຳ ແລະ ເປັນການຕອບບຸນແທນຄຸນຕໍ່ຜູ້ມີຄຸນງາມຄວາມດີຕໍ່ປະເທດຊາດ”.
ລາຍການພາກພາສາ ລາວ ຂໍຂອບໃຈບັນດາທ່ານຜູ້ຟັງທີ່ໄດ້ໂທລະສັບ, ສົ່ງອີເມວ ແລະ ຈົດໝາຍມາຫາລາຍການໃນຕະຫຼອດໄລຍະຜ່ານມາ. ໃນໄລຍະຈະມາເຖິງ, ຫວັງວ່າ ພວກຂ້າພະເຈົ້າຈະສືບຕໍ່ໄດ້ຮັບຄຳເຫັນປະກອບ, ການແບ່ງປັນຂອງທ່ານຜູ້ຟັງໃຫ້ຫຼາຍກວ່າ ເພື່ອຊ່ວຍໃຫ້ທາງລາຍການນັບມື້ນັບອຸດົມສົມບູນກວ່າ.
(ພາບ: baochinhphu.vn)
ຕໍ່ຈາກນີ້, ລາຍການ “ໂອ້ລົມກັບເພື່ອນ ລາວ” ຈະຕອບຄຳຖາມຈຳນວນໜຶ່ງເຊິ່ງທ່ານຜູ້ຟັງໄດ້ສົ່ງມາລາຍການໃນອາທິດຜ່ານມາ.
ເພື່ອນ ສຸລິວົງ, ຢູ່ແຂວງ ຫຼວງພະບາງ ໄດ້ສົ່ງອີເມວມາຫາລາຍກາຍ, ດ້ວຍຄວາມຢາກຊອກຮູ້ກ່ຽວກັບສະຖານທີ່ທ່ອງທ່ຽວແຫ່ງຈິດວິນຍານທີ່ມີຊື່ສຽງຂອງ ຫວຽດນາມ.
ເພື່ອນ ສຸລິວົງ ທີ່ຮັກແພງ, ຫວຽດນາມ ບໍ່ພຽງແຕ່ມີທຳມະຊາດສວຍງາມດ້ວຍທິວທັດທຳມະຊາດໃຫຍ່ໂຕມະໂຫຖານເຮັດໃຫ້ແຂກທ່ອງທ່ຽວມີຄວາມຕື່ນຕາຕື່ນໃຈເທົ່ານັ້ນ, ຫາກຢູ່ຫຼາຍທ້ອງຖິ່ນຂອງ ຫວຽດນາມ ກໍ່ຍັງມີສະຖານທີ່ທ່ອງທ່ຽວແຫ່ງຈິດວິນຍານເພື່ອໃຫ້ແຂກທ່ອງທ່ຽວແວ່ຢາມ, ໄປນະມັດສະການອີກດ້ວຍ. ເພື່ອໃຫ້ຄຳຕອບຕໍ່ຄຳຖາມຂອງເພື່ອນ, ພວກຂ້າພະເຈົ້າຂ້ແນະນຳເຖິງທ່ານຜູ້ຟັງ, ຜູ້ອ່ານກ່ຽວກັບບັນດາສະຖານທີ່ທ່ອງທ່ຽວແຫ່ງຈິດວິນຍານທີ່ມີຊື່ສຽງຢູ່ທັງ 3 ພາກຂອງ ຫວຽດນາມ, ຄື:
+ ທາງພາກເໜືອ:
- ວັດ ບ້າຍດິງ (ນິງບິ່ງ): ວັດໃຫຍ່ ທີ່ໄດ້ຮັບຫຼາຍສະຖິຕິຂອງ ອາຊີ ແລະ ອາຊີຕາເວັນອອກສ່ຽງໃຕ້, ພົ້ນເດັ່ນແມ່ນລະບຽງພະອໍລະຫັນທີ່ຍາວ ແລະ ມີຮູບປັ້ນພະພຸດທະເຈົ້າໄດ້ເຮັດດ້ວຍທອງເຄືອບຄຳ.
- ວັດ ຕາມຈຸກ (ຮ່ານາມ, ແຂວງ ນິງບິ່ງ): ວັດມີເນື້ອທີ່ໃຫຍ່ທີ່ສຸດໃນໂລກ ຕັ້ງຢູ່ພູມສັນຖານທີ່ສວຍງາມ, ມີຊື່ສຽງໂດຍ ວັງ ຕາມເຖ ແລະ ສວນ ກົດກິງ.
- ສະຖານທີ່ທ່ອງທ່ຽວທິວທັດທຳມະຊາດ ອຽນຕື (ກວາງນິງ): ພະຄຳພີພຸດທະສາສາໜາຂອງນິກາຍ ຈຸກເລິມ ອຽນຕື, ຕິດພັນກັບເຈົ້າຊີວິດ ເຈິ່ນເຍິນຕົງ ແລະ ວັດ ດົ່ງ ທີ່ຕັ້ງຢູ່ຍອດພູ.
- ວັດເຮືອງ (ຮ່າໂນ້ຍ): ເປັນເຂດລວມວັດທະນະທຳ - ສາສະໜາ ລວມມີວັດ ແລະ ຫໍບູຊາຢູ່ໃນຖ້ຳເປັນຈຳນວນຫຼາຍ, ໄດ້ດຶງດູດແຂກທ່ອງທ່ຽວເປັນຈຳນວນຫຼາຍໄປນະມັດສະການໃນລະດູບານໃໝ່.
+ ທາງພາກກາງ
- ວັດ ທຽນມູ (ນະຄອນ ເຫ້ວ): ມີວັດແຫ່ງໜຶ່ງຕັ້ງຢູ່ແຄມແມ່ນ້ຳ ເຮືອງ ງາມດັ່ງໃນຝັນ, ເປັນສັນຍາລັກດ້ານວັດທະນະທຳ ແລະ ຄວາມສັກສິດມາແຕ່ດົນນານຂອງ ເຫ້ວ.
- ວັດ ລິງອືງ (ດ່ານັ້ງ): ຕັ້ງຢູ່ແຫຼມ ເຊີນຈ່າ, ມີຊື່ສຽງດ້ວຍຮູບປັ້ນພະພຸດທະເຈົ້າໃຫຍ່ ໜ້າມຸ່ງອອກທະເລເພື່ອປົກປ້ອງໃຫ້ແກ່ຊາວປະມົງ.
+ ທາງພາກໃຕ້
- ພູ ບ່າແດນ: “ແມ່ນຫຼັງຄາຂອງພາກໃຕ້” ດ້ວຍບັນດາວັດເກົ່າແກ່ສັກສິດ ແລະ ມີຮູບປັ້ນເຈົ້າແມ່ ໄຕໂບດ່າເຊີນ ຫຼໍ່ດ້ວຍທອງ ມີລວງສູງບັນລຸສະຖິຕິຢູ່ ອາຊີ.
- ຫໍ ບ່າຈົ້ວຊື (ອານຢາງ): ສະຖານທີ່ໄປນະມັດສະການທີ່ມີຊື່ສຽງຢູ່ພູ ຊາມ, ດຶງດູດແຂກທ່ອງທ່ຽວນັບລ້ານເທື່ອຄົນມາຂໍຄວາມສະຫງົບສຸກ, ຂໍໂຊກລາບໃນແຕ່ລະປີ.
ເພື່ອນ ສຸລິວົງ ທີ່ຮັກແພງ, ດັ່ງທີ່ກ່າວມາຂ້າມເທິງແມ່ນສະຖານທີ່ທ່ອງທ່ຽວແຫ່ງຈິດວິນຍານທີ່ມີຊື່ສຽງຈຳນວນໜຶ່ງຂອງ ຫວຽດນາມ. ພວກຂ້າພະເຈົ້າຫວັງວ່າ ດ້ວຍຄຳຕອບດັ່ງກ່າວຈະຊ່ວຍໃຫ້ເພື່ອນມີຄວາມຮູ້ຕື່ມອີກກ່ຽວກັບບັນດາສະຖານທີ່ທ່ອງທ່ຽວຂອງ ຫວຽດນາມ.
