ອາຍຸ 15 ຫຼື ຊ້ຳບໍ່ໜຳ 36 ປີ, ສຳລັບຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນ, ຊີວິດຈະຢຸດຢູ່ອາຍຸໄວເດັກຕະຫຼອດໄປ. ຄວາມເສຍຫາຍທາງດ້ານສະຕິປັນຍາ, ບັນດາຄູ່ຕາບໍ່ເຫັນຮຸ່ງ, ບັນດາຄຳເວົ້າທີ່ບໍ່ເປັນຖ້ອຍເປັນຄຳ ແມ່ນບາດແຜຍາວນານທີ່ເກີດມາຈາກສົງຄາມ. ເຖິງຢ່າງໃດກໍ່ຕາມ, ຢູ່ເບື້ອງຫຼັງປະຕູຂອງສູນ ປົກປ້ອງຜູ້ເຄາະຮ້າຍຈາກທາດພິດສີສົ້ມ ແລະ ເດັກທີ່ດ້ອຍໂອກາດ, ຮາກຖານ 1 (ນະຄອນ ດ່ານັ້ງ), ຄວາມເຈັບປວດນີ້ ໄດ້ຮັບການບັນເທົາໃນທຸກໆມື້ໂດຍຄວາມ ເຫັນອົກເຫັນໃຈຂອງບັນດາອ້າຍເອື້ອຍຄູຜູ້ດູແລ.
ເພື່ອສາມາດອອກສຽງຄຳວ່າ "ສະບາຍດີເອືິຶື້ອຍຄູ", ເດັກນ້ອຍຜູ້ເຄາະຮ້າຍຈາກ ທາດພິດສີສົ້ມ/ດີໂອຊິນ ຕ້ອງມີຄວາມພະຍາຍາມທີ່ສຸດ. ເຖິງແມ່ນວ່າຄຳເວົ້າຂອງ ເຂົາເຈົ້າເກິກະ ແລະ ບໍ່ຊັດເຈນ, ແຕ່ສຽງເວົ້ານັ້ນແມ່ນຈັງຫວະທີ່ອົບອຸ່ນເພື່ອເລີ່ມຕົ້ນມື້ ໃໝ່ຢູ່ສູນປົກປ້ອງຜູ້ຮັບເຄາະຮ້າຍຈາກສານພິດສີສົ້ມ ແລະ ເດັກທີ່ດ້ອຍໂອກາດ, ຮາກຖານ 1 (ນະຄອນ ດ່ານັ້ງ). ທີ່ການຮັບຕ້ອນໃນແຕ່ລະເຊົ້າ, ຄູອາຈານຈະສັງເກດ ເບິ່ງສາຍຕາ, ໃບໜ້າຂອງເດັກແຕ່ລະຄົນ, ມີພຽງແຕ່ການລົບກວນເລັກນ້ອຍກໍ່ສາມາດ ສົ່ງຜົນກະທົບຕໍ່ເຂົາເຈົ້າໄດ້. ເອື້ອຍຄູ ຟານທິແທ່ງ ໃຫ້ຮູ້ວ່າ:
"ເດັກນ້ອຍມີແຕ່ສະແດງຄວາມຮູ້ສຶກມ່ວນ ມີຄວາມສຸກ ຫຼື ໂສກເສົ້າ. ຂ້າພະເຈົ້າຕ້ອງກຳໄດ້ຄວາມຄິດຂອງເດັກແຕ່ລະຄົນໃນທຸກໆເຊົ້າ. ຖ້າພວກນ້ອງມີຄວາມໃນໃຈຈະແບ່ງປັນກັບຄູ. ຂ້າພະເຈົ້າຕ້ອງວາງຕົວເອງເຂົ້າໃນສະພາບຂອງພວກນ້ອງ ເພື່ອໃຫ້ເຂົ້າໃຈເຫັນໃຈ. ຖ້າພວກເຂົາບໍ່ພໍໃຈກັບສິ່ງໃດໜຶ່ງ, ເຂົາເຈົ້າຈະຄິດໃນຫົວໝົດມື້. ມື້ນັ້ນຈະບໍ່ປົກກະຕິ. ພຽງແຕ່ກອດ ເຂົາເຈົ້າກໍ່ຈະຮູ້ສຶກວ່າມີຄົນທີ່ຈະແບ່ງປັນ ແລະ ມີຄົນເຂົ້າໃຈຄວາມຮູ້ສຶກຂອງເຂົາເຈົ້າ".
ວິວັດການເດີນທາງຂອງການສອນຕົວໜັງສື, ສອນວິຊາຊີບຢູ່ສູນນີ້ແມ່ນໜຶ່ງ ໃນເສັ້ນທາງທີ່ຄູອາຈານປະເຊີນກັບສິ່ງທ້າທາຍຫຼາຍຢ່າງ. ເນື່ອງຈາກຜົນສະທ້ອນທີ່ຮ້າຍແຮງຂອງທາດພິດສີສົ້ມ/ດີໂອຊິນ, ເດັກນ້ອຍສ່ວນຫຼາຍລ້ວນແຕ່ມີຄວາມຫຍຸ້ງຍາກໃນການຮັບຮູ້, ພວກນ້ອງປະສົບກັບຄວາມຫຍຸ້ງຍາກໃນການ ຕັ້ງສະມາທິ, ຈື່ຊ້າ ແລະ ລືມໄວ. ເຖິງແມ່ນວ່າວຽກງານງ່າຍໆກໍ່ຕ້ອງສອນດົນ ແລະ ລະອຽດ, ແລະຮອດມື້ຕໍ່ມາ ທຸກຢ່າງກໍ່ຄືສິ່ງໃໝ່ໝົດ ແລະ ຄູອາຈານກໍໍ່ຕ້ອງສອນ ຕັ້ງແຕ່ເລີ່ມຕົ້ນ. ໂຮ່ທິຈ່ຽວ, ອາຍຸ 33 ປີ, ເປັນໜຶ່ງໃນຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນຢູ່ສູນທີ່ສາມາດສື່ສານໄດ້ນັ້ນ, ໄດ້ອວດໂສ້ງທີ່ນາງຫາກໍ່ຫຍິບ ສຳເລັດດ້ວຍຄວາມພາກພູມໃຈ:
“ມັກໄປຮຽນ, ມັກຫຍິບໂສ້ງ. 2 ເດືອນແລ້ວກໍ່ຫຍິບໄດ້ໂສ້ງຂາສັ້ນ. ຫຍິບໃຫ້ໝູ່ນຸ່ງ. ຫຍິບໃຫ້ ເງິນ ນຸ່ງ. ຄູສອນຫຍິບໃຫ້ ຢວຽນ ແລະ ຈ່ຽວ.”
ໂດຍຫ່າງຈາກຫ້ອງຮຽນຫຍິບບໍ່ໄກແມ່ນຫ້ອງຮຽນເຮັດທູບ. ຜູ້ສອນກໍ່ເປັນຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນ, ອ້າຍ ຫງວຽນງອັກເຟືອງ:
"ຂ້າພະເຈົ້າແບ່ງປັນວິທີສ້າງຄວາມໝັ້ນໃຈຕົນເອງໃຫ້ແກ່ພວກນ້ອງ. ມີບາງຄັ້ງທີ່ເຮັດອາຊີບ, ຮຽນອາຊີບຄືແນວນີ້, ພວກເພື່ອນກໍ່ສາມາດສ້າງເປັນຜະລິດຕະພັນໄດ້. ລູກຄ້າກໍ່ມາຊື້. ເຂົາເຈົ້າມີຄວາມສຸກ, ດີໃຈຫຼາຍ. ຍ້ອນເຫດນັ້ນ, ເຮົາຕ້ອງລະດົມກຳລັງໃຈໃຫ້ເຂົາເຈົ້າຕ້ອງມີຄວາມໝັ້ນໃຈສະເໝີ".
ເປັນໜ້າເອກອ້າງທະນົງໃຈກວ່າແມ່ນ ຈາກຫ້ອງຮຽນນີ້, ມີນັກຮຽນເຕີບໃຫຍ່ຂຶ້ນ, ມີຄວາມໝັ້ນໃຈກັບຄືນທ້ອງຖິ່ນເຊື່ອມຕົວເຂົ້າກັບຊຸມຊົນ. ທ່ານນາງ ວໍທິທູ, ຮອງຫົວໜ້າສູນ, ໃຫ້ຮູ້ວ່າ:
"ພວກນ້ອງຫຼາຍຄົນບໍ່ເຂົ້າໃຈການກະທຳຂອງຕົນໄດ້ໝົດ. ພວກຂ້າພະເຈົ້າປາດຖະໜາວ່າ ພວກນ້ອງຈະມີສຸຂະພາບແຂງແຮງ, ຮຽນຮູ້ທັກສະເພື່ອດູແລຕົນເອງໄດ້. ຂ້າພະເຈົ້າກໍ່ຫວັງວ່າ ເຂົາເຈົ້າຈະສາມາດເຮັດວຽກໄດ້ເພື່ອໃຫ້ພວກຂ້າພະເຈົ້າຊ່ວບພວກນ້ອງເຊື່ອມຕໍ່ເຂົ້າກັບຊຸມຊົນ. ແຕ່ມັນຍາກຫຼາຍເພາະວ່າ ເດັກນ້ອຍຢູ່ທີ່ນີ້ມີອາການໜັກ. ເມື່ອບໍ່ດົນມານີ້ມີຜູ້ໜຶ່ງໄດ້ຮັບການເຊື່ອມຕໍ່ແລະໄດ້ເຊື່ອມໂຍງກັບຊຸມຊົນ, ປະຈຸບັນພວມເປັນຊ່າງຕັດຫຍິບຢູ່ບໍລິສັດແຫ່ງໜຶ່ງ. ນັ້ນແມ່ນຄວາມສຳເລັດທີ່ໃຫຍ່ທີ່ ສຸດຂອງພວກຂ້າພະເຈົ້າ".
ບໍ່ເຄີຍມີຕອນຮຽນໃດຂອງພວກນ້ອງຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນ ມີໜ້າຄົບ. ອາການເຈັບປວດຢ່າງຕໍ່ເນື່ອງພ້ອມກັບສຸຂະພາບທີ່ອ່ອນແອໄດ້ເຮັດໃຫ້ຫຼາຍຄົນຕ້ອງຂາດຮຽນເລື້ອຍໆ. ຄວາມຮັກ, ຄວາມສຸດຈິດສຸດໃຈຂອງຄູອາຈານຄືດັ່ງແຫຼ່ງບັນດານໃຈທີ່ສົດຊື່ນບັນເທົາຄວາມ ເຈັບປວດ ແລະ ໄດ້ຕອບແທນດ້ວຍຮອຍຍິ້ມທີ່ສົດໃສບົນໃບໜ້າຂອງພວກນ້ອງໃນທຸກມື້. ບັນດາຮອຍຍິ້ມນັ້ນ ພວມຄ່ອຍໆບັນເທົາຄວາມເຈັບປວດທາງຮ່າງກາຍຂອງໃນແຕ່ລະມື້, ສ້າງຄວາມຫວັງຕໍ່ອະນາຄົດທີ່ດີງາມກວ່າ.
