ໂດຍເລີ່ມຈາກການກະທຳອັນນ້ອຍໆ, ເລີ່ມຈາກບັນດາບຸກຄົນ, ຈາກບັນດາອົງການຈັດຕັ້ງໃນຊຸມຊົນ, ບັນດາ “ສູນສີຂຽວ”, “ສູນຜະລິດຄືນໃໝ່” ນັບມື້ນັບໄດ້ສ້າງຫຼາຍຂຶ້ນໃນຊຸມຊົນ. ການກະທຳນີ້ໄດ້ເປີດຄວາມຫວັງການສ້າງເປັນປະຊາຄົມທີ່ມີຊີວິດສີຂຽວໂດຍໄວ. ສິ່ງທີ່ເປັນໜ້າປິຕິຊົມຊື່ນຍິ່ງກວ່າສິ່ງໃດໝົດ, ບັນດາຜູ້ນຳໜ້າປະຈັນບານສ່ວນຫຼາຍແມ່ນໄວໜຸ່ມ.
ເມື່ອໃຊ້ເຄື່ອງຢາງປຼາດຕິກໃຊ້ເທື່ອດຽວແລ້ວ ເພື່ອນຈະເຮັດຫຍັງກັບມັນ? ຖິ້ມອອກສູ່ສິ່ງແວດລ້ອມ ຫຼື ຫັນມັນກາຍເປັນເຄື່ອງໃຊ້ທີ່ເປັນປະໂຫຍດຕໍ່ໜ່ວຍໂລກ?
“ຂ້າພະເຈົ້າກໍ່ຢາກເບິ່ງວ່າ ປະເພດໃດຖິ້ມໄດ້ເລີຍ, ປະເພດໃດສາມາດນຳມາໃຊ້ຄືນໄດ້ອີກ, ແຕ່ບາງເທື່ອກໍ່ຟ້າວໄປ ສະນັ້ນກໍ່ຖິ້ມໃສ່ຖັງຂີ້ເຫຍື້ອໝົດເລີຍ”.
(ພາບ: nhandan.vn)
ແທນໃຫ້ການຖິ້ມຂີ້ເຫຍື້ອເຮັດດ້ວຍຢາງປຼາດຕິກ, ຂີ້ເຫຍື້ອສາມາດນຳມາໃຊ້ຄືນໄດ້ອີກ, ຈົ່ງຮັກສາມັນໄວ້ເພື່ອແລກເອົາຕົ້ນໄມ້ ຫຼື ບັນດາຂອງຂວັນທີ່ເຮັດດ້ວຍສິ່ງເປັນມິດກັບສິ່ງແວດລ້ອມ. ນີ້ແມ່ນສານທີ່ສູນຜະລິດຄືນໃໝ່ Ecohouse ໂດຍ ເຕື່ອງແອັງ, ຢູ່ ຮ່າໂນ້ຍ ສ້າງຕັ້ງຂຶ້ນ, ດ້ວຍຄວາມຫວັງວ່າ ການກະທຳອັນນ້ອຍໆຂອງຕົນຈະສາມາດທະວີຄູນ, ຈາກນັ້ນກໍ່ກາຍເປັນຄວາມລື້ງເຄີຍໃນການດຳລົງຊີວິດສີຂຽວໃນປະຊາຄົມ.
“ຂ້າພະເຈົ້າປາດຖະໜາຢາກມີສະຖານທີ່ເພື່ອແຜ່ກະຈາຍເຖິງທຸກໆຄົນກ່ຽວກັບການດຳລົງຊີວິດສີຂຽວ, ເຮັດແນວໃດເພື່ອຈຳກັດຂີ້ເຫຍື້ອທີ່ເຮັດຈາກຢາງປຼາດຕິກ. ນັ້ນແມ່ນແນວຄິດເພື່ອສ້າງ “ສູນຜະລິດຄືນໃໝ່”. ຂ້າພະເຈົ້າມີດີໃຈທີ່ສຸດຍ້ອນສາມາດເກັບບັນດາເຄື່ອງໃຊ້ ຫຼື ເຄື່ອງທີ່ຄິດວ່າຈະຖິ້ມໄປນັ້ນ ໄປແລກເອົາບັນດາຂອງຂວັນທີ່ແທດຈິງ”.
ນັບແຕ່ເມື່ອມີລາຍການແລກຂີ້ເຫຍື້ອເອົາຕົ້ນໄມ້ ຫຼື ຂອງຂວັນ, ເອື້ອຍ ຮັ່ງງາ ໄດ້ປ່ຽນແປງຄວາມລື້ງເຄີຍຂອງຕົນ, ແທນທີ່ວ່າເບິ່ງທຸກສິ່ງທີ່ຈະບໍ່ໃຊ້ອີກເປັນຂີ້ເຫຍື້ອ ແລະ ເອົາໄປຖິ້ມນັ້ນ, ເອື້ອຍ ງາ ໄດ້ຈັດແຍກປະເພດຂີ້ເຫຍື້ອ ແລະ ເກັບໄວ້ເພື່ອສາມາດແລກເອົາຕົ້ນໄມ້.
“ຂີ້ເຫຍື້ອເຮັດດ້ວຍຢາງປຼາດຕິກຕ້ອງໃຊ້ເວລາດົນຈຶ່ງເປື່ອຍສະຫຼາຍໄດ້. ຂ້າພະເຈົ້າກໍ່ຊອກຮູ້ຢູ່ໃນອິນເຕີເນັດເພື່ອເບີ່ງວ່າມີວິທີໃດຈະແກ້ໄຂບໍ່ນັ້ນ ກໍ່ຈິ່ງໄດ້ຮູ້ວ່າມີບັນດາມາດຕະການຜະລິດຄືນໃໝ່, ນຳໃຊ້ຄືນໃໝ່, ສ້າງເປັນບັນດາຜະລິດຕະພັນກ່ຽວຂ້ອງເຖິງເຄື່ອງໃຊ້ທີ່ສາມາດໃຊ້ໄດ້ຫຼາຍເທື່ອ, ສະນັ້ນ ຂ້າພະເຈົ້າກໍ່ມາແຫ່ງນີ້. ຂ້າພະເຈົ້າຄິດວ່າ ນີ້ແມ່ນການກະທຳທີ່ເປັນປະໂຫຍດ”.
ຖ້າຫາກວ່າ Ecohouse ພຽງແຕ່ເກັບຂີ້ເຫຍື້ອເພື່ອແລກເອົາຂອງຂວັນ, ຢູ່ສູນສີຂຽວ Green ພັດດຶງດູດໄດ້ເພື່ອນໜຸ່ມຫຼາຍຄົນ ຍ້ອນການເກັບຂີ້ເຫຍື້ອ - ມອບຂອງຂວັນຜ່ານການສະສົມຄະແນນ. ເມື່ອເອົາຂີ້ເຫຍື້ອຊະນິດຕ່າງໆມາສູນນີ້, ຜູ້ເກັບຂີ້ເຫຍື້ອມາຈະໄດ້ຮັບ “ຄະແນນລາງວັນສີຂຽວ” ທີ່ທຽບເທົ່າກັບຈຳນວນຂີ້ເຫຍື້ອ. ຈາກຄະແນນດັ່ງກ່າວ ກໍ່ສາມາດແລກເອົາຕົ້ນໄມ້, ແນວປູກ, ຫຼື ບັນດາເຄື່ອງໃຊ້ທີ່ໄດ້ຜະລິດຄືນໃໝ່.
ສູນສີຂຽວ Green ໂດຍນາງ ເລທິເຟືອງຖາວເກີດປິ 1993 ສ້າງຕັ້ງຂຶ້ນ, ດ້ວຍຄວາມຫວັງຢາກຊ່ວຍຍົກສູງສະຕິຂອງປະຊາຄົມ, ຮ່ວມແຮງຮ່ວມໃຈປົກປັກຮັກສາສິ່ງແວດລ້ອມ. ຈາກກຸ່ມນ້ອຍໆ, ມາຮອດປະຈຸບັນ ສູນນີ້ໄດ້ມີສະມາຊິກອາສາສະໝັກ 26 ຄົນເຄື່ອນໄຫວຢ່າງຕັ້ງໜ້າ, ປະກອບສ່ວນເປີດກວ້າງຂອບຂະໜາດຂອງສູນສີຂຽວທີ່ມີຄວາມໝາຍດັ່ງກ່າວ.
“ສິ່ງທີ່ພິເສດແມ່ນ ພວກຂ້າພະເຈົ້າໄດ້ນຳໃຊ້ໂປແກຼມ Greenpoint, ເມື່ອທຸກຄົນເອົາຂີ້ເຫຍື້ອມາ ຈະສາມາດແລກເອົາຄະແນນໄດ້. ທຸກຄົນສະສົມຄະແນນນັ້ນໃນໂປແກຼມ ແລະ ຫຼັງຈາກນັ້ນ ຈະເອົາຄະແນນເພື່ອແລກເອົາບັນດາຂອງຂວັນສີຂຽວ”.
(ພາບ: ກຸ່ມນັກສຶກສາ)
ບໍ່ພຽງແຕ່ເຂົ້າຮ່ວມການສ້າງບັນດາສູນເກັບຂີ້ເຫຍື້ອ, ແລກຂີ້ເຫຍື້ອເອົາຂອງຂວັນເທົ່ານັ້ນ, ບັນດາເພື່ອນໜຸ່ມຍັງຕັ້ງໜ້າເຂົ້າຮ່ວມການຜະລິດຂີ້ເຫຍື້ອຄືນໃໝ່, ປົກປັກຮັກສາສິ່ງແວດລ້ອມດ້ວຍບັນດາການຄົ້ນຄວ້າ, ຄວາມຮູ້ທີ່ໄດ້ຮຽນມາ.
ມີກຸ່ມນັກສຶກສາໂຮງຮຽນນາໆຊາດ, ມະຫາວິທະຍາໄລແຫ່ງຊາດ ຮ່າໂນ້ຍ, ໄດ້ຜັນຂະຫຍາຍໂຄງການເກັບກາກກາເຟເພື່ອຄົ້ນຄວ້າ ແລະ ຜະລິດຮູບແບບຖ່ານອົງຄະທາດຊີວະພາບ. ຫງວຽນມິນຈາງ, ສະມາຊິກຜູ້ໜຶ່ງຂອງໂຄງການ, ໃຫ້ຮູ້ວ່າ:
“ຢູ່ ຍີ່ປຸ່ນ, ເຂົາເຈົ້າພວມຄົ້ນຄວ້າວິທີເພື່ອຜະລິດພະລັງງານສີຂຽວຈາກກາກ ມາດຈາ ຊາຂຽວ, ພວກຂ້າພະເຈົ້າກໍ່ຄິດວ່າຈະສາມາດຜະລິດຖ່ານພະລັງງານໄດ້”.
ກຸ່ມນັກສຶກສາໄດ້ນຳໃຊ້ຈຸນລະຊີບເພື່ອທຳລາຍສານປະກອບໃນກາກກາເຟ, ຈາກນັ້ນ ກໍ່ປ່ອຍກະແສໄຟຟ້າສ້າງເປັນຖ່ານອົງຄະທາດ ຫາກບໍ່ເກີດສິ່ງເສດເຫຼືອກໍ່ຄວາມອັນຕະລາຍ, ພ້ອມກັນນັ້ນ, ຖ່ານນີ້ກໍ່ສາມາດສະຫຼາຍໄປເອງຂຶ້ນເຖິງ 95%. ໂຄງການຄວ້າໄດ້ລາງວັນທີ່ໜຶ່ງໃນການເສັງ ແນວຄິດປະດິດຄິດສ້າງເລີ່ມທຸລະກິດ Startup 2025, ເປີດອອກທິດທາງໃໝ່ໃຫ້ແກ່ບັນດາຂໍ້ລິເລີ່ມປ່ຽນແປງໃໝ່ຢ່າງມີຫົວຄິດປະດິດສ້າງຂອງນັກສຶກສາ ຫວຽດນາມ.
