(ພາບ: nhandan.vn)
ມີບັນດາບັ້ນສູ້ຮົບໄດ້ສິ້ນສຸດລົງເປັນເວລາກວ່າເຄິ່ງສະຕະວັດແລ້ວ. ແຕ່ກໍ່ມີບັນດາການເຄື່ອນໄຫວທີ່ຍັງໄດ້ສືບຕໍ່ດຳເນີນ. ຢູ່ບັນດາເຂດປ່າໄມ້, ແຕ່ລະເປີ້ນພູເຊິ່ງເຄີຍເປັນສະໜາມຮົບໃນເມື່ອກ່ອນ, ບັນດາກອງຊອກຫາຂອງ ຫວຽດນາມ ຍັງເດີນທາງໄປຕາມຮ່ອງຮອຍນັ້ນໃນແຕ່ລະມື້ເພື່ອພາບັນດານັກຮົບເສຍສະຫຼະຊີວິດເພື່ອຊາດກັບເມືອຫາຄອບຄົວ. ໂດຍຮ່ວມເດີນທາງພ້ອມກັບເຂົາເຈົ້າບໍ່ພຽງແຕ່ມີກຳລັງຢູ່ພາຍໃນປະເທດເທົ່ານັ້ນ, ຫາກຍັງມີບັນດານັກຮົບເກົ່າ ອາເມລິກາ ທີ່ເຄີຍເຂົ້າຮ່ວມສົງຄາມຢູ່ ຫວຽດນາມ ອີກດ້ວຍ.
ສົງຄາມໄດ້ຜ່ານພົ້ນໄປມາແຕ່ດົນນານແລ້ວ, ແຕ່ຄວາມຊົງຈຳກ່ຽວກັບບັນດາຜູ້ທີ່ຍັງນອນຢູ່ຫັ້ນ ຍັງຄົງກະຕຸ້ນໃຫ້ນັກຮົບເກົ່າ ອາເມລິກາ ກັບມາ ຫວຽດນາມ. ເຂົາເຈົ້າໄດ້ນຳເອົາຄວາມຊົງຈຳ, ແຜນທີ່, ບັນດາສຳເນົາເອກະສານ ແລະ ນັບທັງຄວາມຫວັງຢາກປະກອບສ່ວນຮຳບາດແຜສົງຕາມ ຍ້ອນບັນດາຄວາມເສຍຫາຍຈາກສົງຄາມນຳມາອີກດ້ວຍ.
“ຂ້າພະເຈົ້າຕ້ອງເຮັດຫຼາຍກວ່າອີກ ແລະ ຂ້າພະເຈົ້າຕ້ອງຊອກຫາບັນດາຜູ້ທີ່ຍັງບໍ່ທັນຊອກເຫັນ, ເຂົາເຈົ້າຍັງຢູ່ຫັ້ນ. ຂ້າພະເຈົ້າໄດ້ເວົ້າກັບຕົນເອງວ່າ ເຈົາເຂົ້າກຳລັງຢູ່ຫັ້ນ”.
“ພວກຂ້າພະເຈົ້າໄດ້ຊອກຫາຢູ່ທຸກບ່ອນທີ່ເຄີຍເປັນສະໜາມຮົບໃນເມື່ອກ່ອນ, ບັນດາຖານທີ່ໝັ້ນການທະຫານກ່ອນນີ້ຂອງ ອາເມລິກາ ແລະ ອີງໃສ່ບັນດາຂໍ້ມູນທີ່ສະມາຊິກສະໜອງໃຫ້. ພວກຂ້າພະເຈົ້າຫວັງວ່າ ຈະສະໜອງຂໍ້ມູນໄດ້ຫຼາຍກວ່າອີກ ເພື່ອຊ່ວຍ ຫວຽດນາມ”.
ສິ່ງທີ່ກະຕຸ້ນໃຫ້ເຂົາເຈົ້າບໍ່ພຽງແຕ່ແມ່ນຄວາມຊົງຈຳໃນສົງຄາມເທົ່ານັ້ນ, ຫາກຍັງແມ່ນຄວາມປາດຖະໜາຢາກປະຕິບັດໜ້າທີ່ທີ່ຍັງບໍ່ທັນປະຕິບັດສຳເລັດອີກດ້ວຍ.
(ພາບ: VTC News)
ໃນເດືອນ ມິຖຸນາ ຜ່ານມາ, ທ່ານ Robert Ambrose Connor, ນັກຮົບເກົ່າ ອາເມລິກາ ໄດ້ກັບມາ ຫວຽດນາມ ພ້ອມກັບບັນດາຊຸດສຳເນົາເອກກະສານ ໃນຈຳນວນສຳເນົາເອກະສານສະໜາມຮົບທັງໝົດ 250 ສະບັບ ເຊິ່ງທ່ານ ແລະ ບັນດາເພື່ອນຮ່ວມກົມກອງໄດ້ເກັບໂຮມໃນຕະຫຼອດໄລຍະ 10 ປີຜ່ານມາ. ໂທລະສັບແຕ່ລະສາຍ, ຈົດໝາຍແຕ່ລະສະບັບ, ການພົບປະແຕ່ລະຄັ້ງກັບນັກຮົບເກົ່າໃນທົ່ວປະເທດ ອາເມລິກາ ໄດ້ຊ່ວຍໃຫ້ທ່ານປະຕິດປະຕໍ່ຄືນຄວາມຊົງຈຳເພື່ອເຮັດເປັນບັນດາຂໍ້ມູນທີ່ມີຄຸນຄ່າຮັບໃຊ້ວຽກງານຊອກຫາ.
“ກ່ອນທີ່ຈະມາ ຫວຽດນາມ, ຈົ່ງອ່ານເອກະສານກ່ຽວກັບ ຫວຽດນາມ ແລະ ວັດທະນະທຳຂອງປະເທດນີ້, ກ່ຽວກັບຈິດໃຈ, ຈິດວິນຍານ ແລະ ການສິ້ນສຸດລົງ, ກ່ຽວກັບການເຕົ້າໂຮມ. ແລະຍ້ອນເຫດນັ້ນ, ຂ້າພະເຈົ້າຈິ່ງຮູ້ສຶກໂລ່ງໃຈຂຶ້ນ ເມື່ອຊອກອັດຖິນັກຮົບເສຍສະຫຼະຊີວິດເພື່ອຊາດໄດ້ອັດຖິທຳອິດ, ແຕ່ຫຼັງຈາກນັ້ນ ຂ້າພະເຈົ້າເຫັນວ່າ ຕ້ອງຊອກຫາຕື່ມອີກ, ມານະພະຍາຍາມໃຫ້ຫຼາຍກວ່າອີກ ຍ້ອນມີຫຼາຍຄົນຍັງຢູ່ຫັ້ນ ແລະ ຍັງບໍ່ທັນໄດ້ກັບເມືອບ້ານ”.
ໂດຍມີຄວາມຄິດດຽວກັນ, ໃນຫຼາຍປີຜ່ານມາ ອະດີດນັກບິນ ອາເມລິກາ Richard W. Magnerກໍ່ລ້ວນແຕ່ສະຫງວນເວລາມາອົງການສຳເນົາເອກະສານແຫ່ງຊາດ ອາເມລິກາ ເພື່ອຊອກຫາເອກະສານທີ່ຕົກຄ້າງຫຼົງເຫຼືອ. ບັນດາກໍ້ຟີມທີ່ບັນທຶກການສອດແນມທາງອາກາດໃນປາງສົງຄາມນັ້ນ ທ່ານໄດ້ມານະພະຍາຍາມຫັນເປັນດີຈີຕອນ ແລະ ສົ່ງຂໍ້ມູນໃຫ້ຝ່າຍ ຫວຽດນາມ. ບັນດາເອກະສານນັ້ນໄດ້ກາຍເປັນຕົ້ນເງື່ອນທີ່ລ້ຳຄ່າ, ຊ່ວຍຂີດເສັ້ນເຂດທີ່ສົງໄສມີອັດຖິນັກຮົບເສຍສະຫຼະຊີວິດເພື່ອຊາດ.
“ຂ້າພະເຈົ້າໄດ້ມາສູນເກັບກຳຂໍ້ມູນຢູ່ທີ່ນີ້ເກືອບ 10 ເທື່ອໃນ 10 ປີຜ່ານມາ, ແລະ ຂ້າພະເຈົ້າກໍ່ພວມເຮັດວຽກຢູ່ປະມານ 200 ຈຸດໃນທົ່ວປະເທດ ຫວຽດນາມ, ຈຸດທີ່ສົງໄສວ່າມີຂຸມຝັງສົບລວມ. ຂ້າພະເຈົ້າຢາກສືບຕໍ່ຮ່ວມເດີນທາງໄປກັບວຽກງານນີ້ດົນທີ່ສຸດເທົ່າທີ່ຈະດົນໄດ້, ເພື່ອປະກອບສ່ວນຊ່ວຍບັນດາຄອບຄົວ ຫວຽດນາມ ຊອກຫາຍາດຕິພີ່ນ້ອງທີ່ຍັງຫາຍສາບສູນຈົນໄດ້”.
ເວລາບໍ່ລໍຖ້າໃຜ. ບັນດານັກຮົບເກົ່າ ແລະ ຕົວພະຍານຂອງທັງ 2 ຝ່າຍກໍ່ລ້ວນແຕ່ເຖົ້າແກ່ຫຼາຍແລ້ວ. ແຕ່ລະຄວາມຊົງຈຳທີ່ໄດ້ບັນທຶກໃນມື້ນີ້ ອາດຈະແມ່ນແຫຼ່ງຂໍ້ມູນທີ່ບໍ່ອາດຈະມີໂອກາດເພື່ອໄດ້ເລົ່າຄືນໃນມື້ໜ້າ, ຄືດັ່ງທີ່ທ່ານ John Terzano, ກອງທຶນນັກຮົບເກົ່າ ອາເມລິກາ ປະຈຳ ຫວຽດນາມ, ເຄີຍແບ່ງປັນວ່າ:
“ບັນດາຄວາມຊົງຈຳທຳອິດເມື່ອຂ້າພະເຈົ້າມາ ຫວຽດນາມ ບໍ່ມີຍາມໃດວ່າຈະສວຍງາມ ຍ້ອນທຸກຄວາມຊົງຈຳສົງຄາມລ້ວນແຕ່ເປັນແນວນັ້ນ. ແຕ່ມີສິ່ງທີ່ຂ້າພະເຈົ້າບໍ່ອາດຄິດເຖິງນັ້ນແມ່ນໄດ້ກັບມາ ຫວຽດນາມ ເປັນຫຼາຍຄັ້ງຄືແນວນັ້ນ. ກັບມາແຕ່ລະເທື່ອນັ້ນ ໄດ້ເຮັດໃຫ້ຂ້າພະເຈົ້າຕ້ອງປ່ຽນຄວາມຄິດຄືດັ່ງເປັນຄັ້ງທຳອິດ ແລະ ເຫັນວ່າມີຫຼາຍສິ່ງທີ່ຕ້ອງການເຮັດຫຼາຍກວ່າອີກ”.
ຍ້ອນເຫດນັ້ນ, ໃນຫຼາຍປີຜ່ານມາ, ບັນດານັກຮົບເກົ່າ ອາເມລິກາ ຍັງກັບມາ ຫວຽດນາມ ຢ່າງມິດງຽບ, ສົມທຽບເອກະສານດ້ານການທະຫານ, ຢັ້ງຢືນສະຖານທີ່ເກີດການຕໍ່ສູ້, ສຳຫຼວດພູມສາດຕົວຈິງ ແລະ ແບ່ງປັນທຸກສິ່ງທີ່ເຂົາເຈົ້າຮັກສາ ແລະ ເກັບໄວ້ໄດ້. ອັດຖິແຕ່ລະຊຸດທີ່ໄດ້ພົບເຫັນ ແມ່ນຈະມີຄອບຄົວໜຶ່ງທີ່ບໍ່ຕ້ອງລໍຖ້າອີກ.
ບັ້ນຮົບ 500 ວັນ ແລະ ຄືນຍູ້ແຮງການປະຕິບັດ, ທ້ອນໂຮມ ແລະ ຢັ້ງຢືນຊື່ແລະນາມສະກຸນອັດຖິນັກຮົບເສຍສະຫຼະຊີວິດເພື່ອຊາດພວມຜັນຂະຫຍາຍໃນທົ່ວປະເທດຫວຽດນາມ, ຍ້ອນແນວນັ້ນ ຈິ່ງບໍ່ພຽງແຕ່ແມ່ນວິວັດການເດີນທາງຊອກຫາບັນດານັກຮົບເສຍສະຫຼະຊີວິດເພື່ອຊາດທີ່ຫາຍສາບສູນເທົ່ານັ້ນ, ຫາກຍັງແມ່ນວິວັດການເດີນທາງຂອງການແບ່ງປັນ, ຄວາມເມດຕາປານີ ແລະ ຄວາມໄກ່ເກຍປອງດອງອີກດ້ວຍ.
