ໃນຊຸມມື້ຜ່ານມາ, ຢູ່ສູນວັດທະນະທຳສິລະປະ (ເຮືອນເລກທີ 22 ຖະໜົນ ຮວ່າງບວມ, ຕາແສງ ຮວ່ານກຽມ, ຮ່າໂນ້ຍ) ເຕັມໄປດ້ວຍສີສັນທີ່ຫຼາກຫຼາຍໂດຍແສງໂຄມໄຟຮູບດາວ, ໂຄມໄຟໝູນ... ສຽງກອງອັນຟົດຟື້ນປະສານກັບ ສຽງຫົວຂອງເດັກນ້ອຍໃນວັນບຸນໄຫວ້ພະຈັນວັນເພັງເດືອນ8.. ຢູ່ແຫ່ງນີ້, ໄດ້ຈັດງານວາງສະແດງ "ດວງພະຈັນ", ເຊິ່ງໄດ້ວາງສະແດງກວ່າ 50 ຜົນງານສິລະປະຂອງວັນບຸນໄຫວ້ພະຈັນໃນເມື່ອກ່ອນ ທີ່ໄດ້ຮັບການສ້າງຂຶ້ນຈາກຮູບແບບທີ່ມີອາຍຸຫຼາຍກວ່າໜຶ່ງສະຕະວັດ.
“ຫຼານຮູ້ສຶກມ່ວນ ແລະ ມັກຫຼາຍ, ຫຼານມັກບັນດາໂຄມໄຟນີ້ ແລະ ມັນງາມ ຫຼາຍ”.
“ສິ່ງທີ່ດຶງດູດໃຈທີ່ສຸດແມ່ນຜະລິດຕະພັນຮູບໂຕປູ, ຕຸກກະຕາ ແລະ ໂຄມໄຟຮູບສັດຂະໜາດໃຫຍ່ໂດຍບັນດານັກສິລະປະການໄດ້ຜະລິດ”.
ຕ້ອງການພຽງແຕ່ ແສງ ໂຄມໄຟຮູບດາວ, ໂຄມໄຟຮູບໂຕປາ, ໂຄມໄຟໂຕປູ... ກໍ່ພຽງພໍແລ້ວທີ່ຈະເຮັດໃຫ້ຊາວ ຫວຽດນາມ ຫຼາຍລຸ້ນຄົນຫວນຄືນຄວາມຊົງຈຳ ຂອງວັນບຸນໄຫວ້ພະຈັນຄາວໄວເດັກ. ໂດຍເຂົ້າຮ່ວມງານວາງສະແດງ, ເຄື່ອງໝາຍ ການຄ້າ ກົວໜາ ໄດ້ເລືອກເອົາການຟື້ນຟູບັນດາໂຄມໄຟບຸນໄຫວ້ພະຈັນ ແບບດັ້ງເດີມ, ເຊັ່ນ: ໂຄມໄຟຮູບໂຕກະປູ, ໂຄມໄຟຮູບໂຕກຸ້ງ ແລະ ໂຄມໄຟໝູນ... ດ້ວຍເຕັກນິກການຜະລິດແມ່ນເກືອບດັ້ງເດີມ. ໂດຍເປັນຜູ້ກໍ່ຕັ້ງເຄື່ອງໝາຍການຄ້າ ກົວໜາ, ອ້າຍ ຈິ້ງວັນເຄວ ໃຫ້ຮູ້ວ່າ:
“ໂຄມໄຟຮູບໂຕປູນີ້ເຮັດຂອບດ້ວຍໄມ້ໄຜ່ ແລະ ຫຸ້ມດ້ວຍເຈ້ຍສາ. ໂຄມໄຟຮູບໂຕປູໄດ້ນຳໃຊ້ໃນວັນບຸນໄຫວ້ພະຈັນຂອງຊາວ ຫວຽດນາມ ມາເປັນເວລາ ດົນນານແລ້ວ ແລະ ຂ້າພະເຈົ້າກໍ່ຊອກໄດ້ພາບຖ່າຍ, ເອກະສານຈຳນວນໜຶ່ງ ກ່ຽວກັບວັນບຸນໄຫວ້ພະຈັນຂອງ ຫວຽດນາມ, ພິເສດແມ່ນຂອງ ຮ່າໂນ້ຍ, ກ່ອນນີ້ເກືອບ 100 ປີ, ເຊິ່ງຊາວ ຝລັ່ງ ໄດ້ຮັບຮູ້”.
ຈາກທິດສຳຜັດອື່ນ, ເຄື່ອງໝາຍການຄ້າ ທອງຢອງ ໄດ້ສ້າງຄວາມ ປະທັບໃຈໃນງານວາງສະແດງດ້ວຍຊຸດເຄື່ອງຫຼິ້ນສັດມຸງຄຸນ. ຝູງມ້າຂາວ, ມ້າແດງ, ມ້າດຳ, ມ້າເຫຼັກ... ໄດ້ເອົາແຮງບັນດານໃຈມາຈາກສິລະປະ ວິຈິດສິນບູຮານ ຫວຽດນາມ. ນັກຈິດຕະກອນ ນາມຈີ, ຜູ້ຕາງໜ້າເຄື່ອງໝາຍການຄ້າ ທອງຢອງ, ໃຫ້ຮູ້ວ່າ:
“ເມື່ອຂ້າພະເຈົ້າຜະລິດອອກຜະລິດຕະພັນເຫຼົ່ານີ້, ຂ້າພະເຈົ້າເຫັນວ່າ ບໍ່ພຽງແຕ່ຜູ້ອາຍຸສູງ ແລະ ໄວກາງເທົ່ານັ້ນ, ຫາກຍັງມີບັນດາເພື່ອນໜຸ່ມກໍ່ຢາກຊອກຮູ້ ແລະ ເປັນເຈົ້າຂອງຜະລິດຕະພັນໜຶ່ງ. ຂ້າພະເຈົ້າເຫັນວ່າ ປະຈຸບັນມີຫຼາຍຄົນພັດຢາກກັບຄືນສູ່ຄຸນຄ່າແບບດັ້ງເດີມ. ເພາະວ່າ ເນື້ອແທ້ຂອງຄຸນຄ່າ ແບບດັ້ງເດີມແມ່ນແກ່ນສານຂອງມະນຸດ”.
ໃນຂະນະນັ້ນ, The Annam ໄດ້ນຳບັນດາເຄື່ອງຫຼິ້ນທີ່ເຄີຍປະກົດຢູ່ ໃນງານບຸນ ແລະ ພະລາດຊະວັງ ມາວາງສະແດງໃນງານວາງສະແດງນີ້. ນັບແຕ່ຄັນຮົ່ມ, ເຄື່ອງຫຼິ້ນຮູບປະພັນນັກປະລິນຍາເອກເຮັດດ້ວຍເຈ້ຍ, ວີຂົນນົກ... ທັງໝົດເຫຼົ່ານັ້ນລ້ວນແຕ່ໄດ້ຮັບການຄົ້ນຄວ້າຈາກສິລະປະພື້ນເມືອງ. ທ່ານ ຫງວຽນດຶກແອັງ, ຜູ້ຕາງໜ້າຂອງ The Annam, ໄດ້ແບ່ງປັນວ່າ:
“ສຳລັບຄົນ gen Z ລຸ່ນພວກຂ້າພະເຈົ້າແລ້ວ, ຮູບປະພັນນັກປະລິນຍາເອກເຮັດດ້ວຍເຈ້ຍ ເກືອບຄືວ່າຖືກສູນຫາຍໄປ ແລະ ຊ້ຳບໍ່ໜຳແມ່ນບໍ່ປະກົດອີກ. ດ້ວຍຄວາມປາດຖະໜາທີ່ວ່າ ຈະນຳເອົາມໍລະດົກນີ້ ເຂົ້າສູ່ຊີວິດ ແລະ ເຮັດໃຫ້ລຸ້ນໜຸ່ມໄດ້ເຂົ້າເຖິງ, ຂ້າພະເຈົ້າໄດ້ຕັດສິນໃຈຟື້ນຟູຮູບປະພັນນັກປະລິນຍາເອກເຮັດດ້ວຍເຈ້ຍ. ນອກຈາກນັ້ນ, ຮູບປະພັນນັກປະລິນຍາເອກເຮັດດ້ວຍເຈ້ຍຍັງມີ ຄວາມໝາຍດ້ານວັດທະນະທຳມະນຸດຂອງຜູ້ຄົນໃນເມື່ອກ່ອນທີ່ສະຫງວນໃຫ້ແກ່ເດັກນ້ອຍ ໂດຍມີຄວາມໝາຍກ່ຽວກັບການຮຽນຮູ້ ແລະ ຄວາມມຸ່ງຫວັງອີກດ້ວຍ”.
ມີຈຸດເດັ່ນອີກອັນໜຶ່ງແມ່ນພາໝາກໄມ້ຫ້າຊະນິດຂະໜາດໃຫຍ່ທີ່ເຮັດດ້ວຍໄມ້ໄຜ່, ປົກດ້ວຍເຈ້ຍສີ, ມີເສັ້ນຜ່າສູນກາງເຖິງ 1,5 ແມັດ. ພາໝາກໄມ້ຂະໜາດໃຫຍ່ນັ້ນໄດ້ເຮັດໃຫ້ຮູບພາບພາໝາກໄມ້ໃນວັນບຸນໄຫວ້ພະຈັນທີ່ເປັນມູນເຊື້ອຍິ່ງພົ້ນເດັ່ນຂຶ້ນ. ສຳລັບແຂກທ່ອງທ່ຽວຫຼາຍຄົນ, ເມື່ອແວ່ຢ້ຽມເຂດນີ້ກໍ່ແມ່ນໂອກາດ ທີ່ຈະໄດ້ລະນຶກເຖິງ ວັນບຸນໄຫວ້ພະຈັນຂອງຫຼາຍປີກ່ອນ.
ເອື້ອຍ ຫງວຽນແທັງຖາວ, ຢູ່ ຮ່າໂນ້ຍ, ໃຫ້ຮູ້ວ່າ:
“ໂດຍເປັນຜູ້ເຕີບໃຫຍ່ຢູ່ ຮ່າໂນ້ຍ ແລະ ດຳລົງຊີວິດຢູ່ຖະໜົນ ຮ່າງມ໋າ, ຂ້າພະເຈົ້າໄດ້ເຫັນແນວໂນ້ມກ່ຽວກັບໂຄມໄຟໃນວັນບຸນໄຫວ້ພະຈັນແຕ່ລະຄັ້ງ. ວັນບຸນໄຫວ້ພະຈັນຕອນທີ່ຂ້າພະເຈົ້າຍັງເປັນເດັກນ້ອຍ, ຂ້າພະເຈົ້າໄດ້ເຫັນໂຄມໄຟບູຮານ ແຕ່ໄລຍະຕໍ່ມາຖຖືກສູນຫາຍໄປ. ສະນັ້ນ, ຂ້າພະເຈົ້າເຫັນວ່າ ເມື່ອໂຄມໄຟເມື່ອກ່ອນໄດ້ຮັບການຟື້ນຟູຈະຊ່ວຍໃຫ້ລຸ້ນໜຸ່ມເຊື່ອມຕໍ່ກັບວັດທະນະທຳທີ່ເປັນມູນເຊື້ອ”.
ງານວາງສະແດງ "ດວງພະຈັນ" ໄດ້ວາດພາບເຖິງວັນບຸນໄຫວ້ພະຈັນໃນເມື່ອກ່ອນຢ່າງມີຊີວິດຊີວາ, ຊຶ່ງເປັນການຫວນຄືນຄວາມຊົງຈຳ, ວັດທະນະທຳທີ່ເປັນມູນເຊື້ອຂອງຊາວ ຫວຽດນາມ.
