ໃນທ່າມກາງນ້ຳໝອກກົ້ວທີ່ປົກຄຸມໄປທົ່ວທາງກີ່ວເຂດຊາຍແດນ ຕຸ່ງວ່າຍ, ປ້ອມປ້ອງກັນ ຊາຍແດນ ບໍ່ພຽງແຕ່ເປັນບ່ອນປົກປັກຮັກສາຫຼັກໝາຍຊາຍແດນ ແຕ່ລະຫຼັກຂອງປະເທດຊາດເທົ່ານັ້ນ, ຫາກຍັງໄດ້ກາຍເປັນບ້ານຫຼັງທີສອງຂອງ ເດັກນ້ອຍທຸກຍາກຫຼາຍຄົນຢູ່ເຂດພູສູງ. ກໍ່ຍ້ອນບັນດາໂຄງການ, ຄື: “ຊ່ວຍນ້ອງໄປໂຮງຮຽນ - ລູກລ້ຽງປ້ອມປ້ອງກັນຊາຍແດນ” ແລະ ໂຄງການ “ພະນັກງານນັກຮົບກອງທັບ ຊ່ວຍນ້ອງໄປໂຮງຮຽນ”, ມມີເດັກນ້ອຍເກືອບປະຮຽນຫຼາຍຄົນ ກໍ່ໄດ້ຮັບການໜູນຊ່ວຍຈາກບັນດາທະຫານຕໍ່ກຳລັງແຮງ, ໃຫ້ມີຄວາມໝັ້ນໃຈສືບຕໍ່ສ້າງຄວາມໄຝ່ຝັນຂອງຕົນ.
ທີ່ການຈັດບຸນວັນເກີດຂອງນັກຮົບທີ່ເກີດໃນເດືອນສິງຫາ ຢູ່ປ້ອມປ້ອງກັນຊາຍແດນ ຕຸ່ງວ່າຍ ແມ່ນຄຶກຄຶ້ນກວ່າປົກກະຕິ. ນອກຈາກດອກໄມ້, ເຂົ້າໜົມ ແລະ ບັນດາຄຳອວຍພອນທະຫານແລ້ວ, ມື້ນີ້ປ້ອມປ້ອງກັນຊາຍແດນຍັງໄດ້ອຳລາ “ບຸກຄະລາກອນ” ພິເສດຄື: ວ່າງວັນຮວ່າງ. ນ້ອງ ຮວ່າງ ໃກ້ຈະຮຽນຈົບໂຮງຮຽນ ສາມັນກິນນອນຊົນເຜົ່າເມືອງ ກວານບະ ເພື່ອເລີ່ມເຂົ້າສົກຮຽນໃໝ່. ຮວ່າງ ເປັນເດັກກຳພ້າພໍ່ຕັ້ງແຕ່ຍັງນ້ອຍ, ຫຼັງຈາກຮຽນຈົບຊັ້ນປະຖົມຢູ່ໃກ້ບ້ານ, ການເດີນທາງໄປໂຮງຮຽນມັດທະຍົມຂອງ ຮວ່າງ ໄກກວ່າ 16 ກິໂລແມັດ. ເມື່ອ ຮວ່າງ ມາປ້ອມປ້ອງກັນຊາຍແດນເປັນຄັ້ງທຳອິດ, ນ້ອງຍັງມີຄວາມກັງວົນຢູ່.
“ປີນີ້ຫຼານຂຶ້ນຮຽນຊັ້ນ ມໍ 7 ແລະ ຫຼານໄດ້ເຂົ້າມາຢູ່ປ້ອມປ້ອງກັນຊາຍແດນ ຕຸ່ງວ່າຍ ເປັນເວລາເກືອບສອງປີແລ້ວ. ຕອນທີ່ຫຼານຫາກໍ່ມາຮອດໃໝ່ໆ, ຫຼານກໍ່ມີຄວາມກັງວົນ, ບໍ່ຮູ້ຈະເຮັດຫຍັງ... ຕໍ່ມາ ອ້າຍ Pao, ບັນດາອ້າຍ, ອາວໄດ້ຄ່ອຍໆສອນໃຫ້. ຕອນທີ່ຫຼານບໍ່ມີບົດຝຶກຫັດ, ຫຼານໄດ້ຊ່ວຍບັນດາອ້າຍ, ອາວທຳຄວາມສະອາດ. ຕອນຮຽນປະຖົມ, ຫຼານເປັນນັກຮຽນເກັ່ງ. ຕອນຮຽນຊັ້ນ ມໍ 6 ຫຼານເປັນນັກຮຽນປະເພດດີ”.
ໂດຍພັກຢູ່ໃນຊາຍຄາປ້ອມປ້ອງກັນກັບ ຮວ່າງ ແມ່ນ ຢ່າງແທັ່ງປາວ, ບ້ານ ຕຸ່ງວ່າຍຟີ່ນ, ປາວ ແບ່ງປັນວ່າ:
“ຫຼານມາຢູ່ທີ່ນີ້ໄດ້ 4 ປີແລ້ວ, ຕອນທີ່ຫຼານຫາກໍ່ມາ, ຫຼານກໍ່ຮູ້ສຶກກັງວົນຫຼາຍ ແລະ ບໍ່ຄຸ້ນເຄີຍກັບທຸກຢ່າງເລີຍ. ຫຼັງຈາກນັ້ນ, ແຫ່ງນີ້ກໍ່ຄ່ອຍໆກາຍເປັນເຮືອນຂອງຫຼານ. ຢູ່ທີ່ນີ້, ຫຼານເຮັດການຜະລິດກັບບັນດາອາວທະຫານ, ການກິນການຢູ່ກໍ່ໄດ້ຮັບປະກັນ. ບັນດາອາວໄດ້ຊ່ວຍຫຼານໃນການຮຽນ. ບັນດາວິຊາທີ່ຫຼານຮຽນບໍ່ໄດ້, ຫຼານກໍ່ຂໍຄວາມຊ່ວຍເຫຼືອຈາກບັນດາອາວທະຫານເພື່ອໃຫ້ເພິ່ນສອນເພີ່ມ”.
ນັບແຕ່ປີ 2018, ຜ່ານບັນດາໂຄງການ "ຊ່ວຍນ້ອງໄປໂຮງຮຽນ - ລູກລ້ຽງປ້ອມປ້ອງກັນຊາຍແດນ" ແລະ ໂຄງການ "ພະນັກງານນັກຮົບກອງທັບ ຊ່ວຍນ້ອງໄປໂຮງຮຽນ", ປ້ອມປ້ອງກັນຊາຍແດນໄດ້ໜູນຊ່ວຍໃຫ້ນັກຮຽນ 22 ຄົນ (ໃນນັ້ນມີທັງການເບິ່ງແຍງລ້ຽງດູເດັກ 2 ຄົນຢູ່ກັບກົມກອງໂດຍກົງ). ທ່ານພັນຕີ ເລດິງຈ້ອງ, ນັກການເມືອງປ້ອມປ້ອງກັນຊາຍແດນ ຕຸ່ງວ່າຍ, ທະຫານຊາຍແດນ ຕຽນກວາງ, ໃຫ້ຮູ້ວ່າ:
“ແຕ່ລະມື້, ນອກຈາກເວລາໄດ້ຮັບການສິດສອນຈາກຄູອາຈານຢູ່ໂຮງຮຽນ ແລ້ວ, ເມື່ອກັບມາປ້ອມທະຫານກໍ່ຈະດຳລົງຊີວິດ, ຮ່ຳຮຽນຄືທະຫານຜູ້ໜຶ່ງ. ໃນຕອນເຊົ້າ ຕື່ນມາອອກກຳລັງກາຍ, ໄປໂຮງຮຽນ; ຕອນແລງເຂົ້າຮ່ວມຫຼີ້ນກິລາ, ທຳການຜະລິດກະສິກຳ; ຕອນຄ່ຳ ບັນດາອາວ, ອ້າຍທະຫານຈະສອນບົດຮຽນໃຫ້”.
ການປ່ຽນແປງຂອງພວກເດັກນ້ອຍຢູ່ເຂດພູສູງ ບໍ່ແມ່ນມື້ໜຶ່ງ, ສອງມື້, ຫາກແມ່ນໄລຍະທາງແຫ່ງຄວາມອົດທົນຂອງກົມກອງທັງໝົດ. ທ່ານພັນຈັດຕະວາ ວ່າງວັນສາງ, ຫົວໜ້າກອງລະດົມຂົນຂວາຍມະຫາຊົນ, ປ້ອມທະຫານປ້ອງກັນຊາຍແດນ ຕຸ່ງວ່າຍ, ໃຫ້ຮູ້ວ່າ:
“ຕອນທີ່ຫາກໍ່ມາປ້ອມທະຫານ, ພວກເດັກນ້ອຍຍັງຂີ້ອາຍ, ຈຽມຕົວ, ບໍ່ຄ່ອຍຫ້າວຫັນ, ແລະ ບໍ່ຮູ້ເຮັດຫຍັງ... ແຕ່ຫຼັງຈາກໄດ້ຢູ່ກັບພະນັກງານ, ທະຫານປະມານໜຶ່ງເດືອນ, ກໍ່ເລີ່ມປັບຕົວເຂົ້າກັບຊີວິດຢູ່ປ້ອມທະຫານ. ໃນຊ່ວງເວລາທີ່ພວກຫຼານຢູ່ທີ່ນີ້, ເດັກຮູ້ຄວາມ, ເຂົ້າຮ່ວມທຳການຜະລິດກະສິກຳ ກັບອາວທະຫານ. ພວກຂ້າພະເຈົ້າໄດ້ຂຶ້ນແຜນຕາຕະລາງຮຽນປະຈຳອາທິດໃຫ້ພວກນ້ອງ. ໃນວັນຈັນ, ວັນອັງຄານ, ວັນພະຫັດ ຈະມີ ສະມາຊິກສອງຄົນຂອງ ກອງລະດົມມະຫາຊົນເປັນຜູ້ຊີ້ສອນໃຫ້ພວກນ້ອງ.”
ກໍ່ຍ້ອນມີລະບຽບວິໄນບວກກັບຄວາມຮັກແພງຂອງບັນດາທະຫານ, ຜົນການ ຮຽນຂອງ ຮວ່າງ ແລະ ປາວ ໄດ້ດີຂຶ້ນຢ່າງຊັດເຈນ. ແຕ່ສິ່ງທີ່ສຳຄັນກວ່ານັ້ນແມ່ນ ຄວາມຝັນຂອງພວກຫຼານກໍ່ເລີ່ມເຕີບໃຫຍ່.
“ກໍ່ຍ້ອນບັນດາອາວຈຶ່ງເຮັດໃຫ້ຫຼານຮຽນດີຂຶ້ນ. ຫຼານຫວັງວ່າຈະຮຽນໄດ້ດີ, ປະຕິບັດໄດ້ຕາມຄວາມຫວັງຂອງຂອງບັນດາອາວທະຫານ, ກາຍເປັນທະຫານປ້ອງກັນຊາຍແດນຜູ້ໜຶ່ງ”.
“ຫຼານຫວັງວ່າ ໃນອະນາຄົດຈະເປັນທະຫານຄືກັບອາວທະຫານຢູ່ທີ່ນີ້, ສະນັ້ນ ຫຼານຈະພະຍາຍາມຮຽນໃຫ້ດີ ເພື່ອເປັນການຕອບແທນນ້ຳໃຈ ແລະ ການລ້ຽງດູ ຂອງພວກອາວ”.
ຢູ່ ຕຸ່ງວ່າຍ, ນ້ຳໝອກອາດຈະບິດບັງເສັ້ນທາງກັບເມືອບ້ານ, ແຕ່ມັນບໍ່ສາມາດ ບິດບັງເສັ້ນທາງຂອງ ຮວ່າງ ຫຼື ປາວ ແລະ ເດັກຄົນອື່ນໆໄດ້. ຢູ່ທ່າມກາງເຂດພູຜາປ່າໄມ້ທີ່ຂຽວອຸ່ມທຸ່ມຂອງເຂດຊາຍແດນ, ພວກເດັກນ້ອຍກຳພ້າ, ຜູ້ທີ່ເກືອບຄືວ່າຈະປະຮຽນ, ກໍ່ພວມເຕີບໃຫຍ່ຂຶ້ນໃນນ້ຳໃຈຄວາມຮັກແພງຂອງບັນດາທະຫານ. ແລະໃນອະນາຄົດ ເມື່ອເຕີບໃຫຍ່ຂຶ້ນມາ, ຊຸມເດືອນປີພັກອາໄສຢູ່ປ້ອມປ້ອງກັນຊາຍແດນ ຕຸ່ງວ່າຍ ຍາມໃດກໍ່ຈະເປັນບ່ອນອີງທີ່ແຂງແກ່ນເພື່ອຊ່ວຍໃຫ້ພວກນ້ອງມີຄວາມໝັ້ນໃຈໃນການເດີນທາງເພື່ອສ້າງວິຊາອາຊີບ.
