ການຫັນເປັນດີຈີຕອນ ແລະ ຫັນເປັນສີຂຽວພວມກາຍເປັນຄວາມຮຽກຮ້ອງຕ້ອງການທີ່ນັບມື້ນັບຈະແຈ້ງສຳລັບວິສາຫະກິດໃນວິວັດການຍົກສູງຄວາມສາມາດໃນການແກ້ງແຍ້ງ. ຢູ່ ກວ໋າງນິງ, ການຫັນເປັນດີຈີຕອນ ພວມຄ່ອຍໆເລີ່ມຈາກເລື່ອງລາວກ່ຽວກັບເຕັກໂນໂລຢີໄປເຖິງບັນດາການປ່ຽນແປງລະອຽດໃນວິທິການຜະລິດ, ຄຸ້ມຄອງບໍລິຫານ ແລະ ນຳຜະລິດຕະພັນອອກສູ່ຕະຫຼາດຂອງວິສາຫະກິດ. ໃນວິວັດການນັ້ນ, ການຫັນເປັນສີຂຽວໄດ້ຮັບການປະຕິບັດໄປພ້ອມໆກັນ, ສ້າງກຳລັງໜູນເພື່ອໃຫ້ວິສາຫະກິດປ່ຽນແປງໃໝ່ເຕັກໂນໂລຢີ, ຍົກສູງຄຸນຄ່າຜະລິດຕະພັນ ແລະ ປັບໃຫ້ເຂົ້າກັບຮູບແບບການເຕີບໂຕໃໝ່.
ຢູ່ຕາແສງ ເດື່ອງຮວາ, ຄອບຄົວປ້າ ຟ້າມທິແທັງເຮືອງ ໄດ້ຕິດພັນກັບຕົ້ນຊາ ມາກວ່າ 30 ປີ. ໃນຕະຫຼອດໄລຍະຍາວ, ຍອດຊາທີ່ເກັບກ່ຽວຢູ່ເຂດຊາໃຫຍ່ທີ່ສຸດ ກວ໋າງນິງ ໄດ້ຂາຍເປັນພຽງແຕ່ວັດຖຸດິບ, ບໍ່ທັນສ້າງເປັນເຄື່ອງໝາຍການຄ້າທີ່ສົມຄູ່ກັບຄຸນຄ່າຂອງຜະລິດຕະພັນໄດ້. ຈົນຮອດປີ 2021, ບໍລິສັດ ການລົງທຶນກໍ່ສ້າງ ແລະ ການຄ້າ ຫວຽດຕູ ຈຳກັດ ຂອງຄອບຄົວ ປ້າເຮືອງ ໄດ້ເລີ່ມປ່ຽນທິດ, ຈາກການສະໜອງວັດຖຸດິບໃຫ້ແກ່ຕະຫຼາດເປັນສ່ວນຫຼາຍໄປເປັນການປຸງແຕ່ງດ້ວຍຕົນເອງ ແລະ ສ້າງເປັນຜະລິດຕະພັນ. ພ້ອມກັບການໝູນໃຊ້ເຕັກໂນໂລຢີປຸງແຕ່ງ, ເຕັກນິກການປູກຝັງອົງຄະທາດຕາມມາດຖານ ຍີ່ປຸ່ນ, ວິສາຫະກິດຍັງເອົາໃຈໃສ່ເປັນພິເສດເຖິງການລົງທຶນ ເນື້ອໃນດີຈີຕອນ, ການຄ້າເອເລັກໂຕນິກ ແລະ ຂໍ້ມູນລູກຄ້າ. ພາຍຫຼັງ 4 ປີ, ວິສາຫະກິດມີ 6 ຜະລິດຕະພັນບັນລຸມາດຖານໜຶ່ງຕາແສງໜຶ່ງຜະລິດຕະພັນ (OCOP) 5 ດາວລະດັບຊາດ (ຜະລິດຕະພັນທີ່ມີຄຸນນະພາບໂດດເດັ່ນ, ບັນລຸມາດຖານການສົ່ງອອກ ແລະ ເຂັ້ມຂຸ້ມໄປດ້ວຍຄຸນຄ່າວັດທະນະທຳທ້ອງຖິ່ນ) ແລະ ເດືອນກັນຍາ 2025 ໄດ້ຮັບການຢັ້ງຢືນແມ່ນວິສາຫະກິດວິທະຍາສາດ ແລະ ເຕັກໂນໂລຢີ. ຈາກການຜະລິດ ຈົນຮອດຕະຫຼາດ, ເຕັກໂນໂລຢີພວມກາຍເປັນພາກສ່ວນໜຶ່ງໃນວິທີທີ່ວິສາຫະກິດສ້າງຄຸນຄ່າໃຫ້ແກ່ຜະລິດຕະພັນ. ທ່ານນາງ ຟ້າມທິແທັງເຮືອງ, ຜູ້ອຳນວຍການບໍລິສັດ ການລົງທຶນກໍ່ສ້າງ ແລະ ການຄ້າ ຫວຽດຕູ ຈຳກັດ ແບ່ງປັນວ່າ:
ເພື່ອໃຫ້ປະຊາຊົນກັບຄືນມາປູກຊາອີກ, ຕາມຂ້າພະເຈົ້າ, ວິທີການດີທີ່ສຸດແມ່ນ ຕົ້ນຊາຕ້ອງນຳມາເຊິ່ງຄຸນຄ່າເສດຖະກິດທີ່ສູງ ແລະ ການດຳລົງຊີວິດທີ່ດີກວ່າໃຫ້ແກ່ປະຊາຊົນເຂດຊາ. ພວກຂ້າພະເຈົ້າໄດ້ໝູນໃຊ້ວິທະຍາສາດເຕັກໂນໂລຢີເພື່ອເຮັດຜະລິດຕະພັນໃຫ້ດີກວ່າ, ນຳໃຊ້ການຫັນເປັນດີຈີຕອນ ເພື່ອນຳຜະລິດຕະພັນອອກສູ່ຕະຫຼາດ, ຈາກນັ້ນ ກໍ່ສ້າງການເຕີບໂຕເພື່ອກັບຄືນມາລົງທຶນເຂົ້າເຂດວັດຖຸດິບ ແລະ ຊາວກະສິກອນ.
ຕາມສະພາບການຕົວຈິງຢູ່ນະຄອນ ກວ໋າງນິງ ໃນປັດຈຸບັນ, ການຫັນເປັນດີຈີຕອນ ວິສາຫະກິດພວມໄດ້ເຂົ້າເຖິງດ້ວຍການຕິດພັນກັບບັນດາຄວາມຕ້ອງການຕົວຈິງຂອງການຜະລິດ ແລະ ດຳເນີນທຸລະກິດ. ດ້ວຍວິສາຫະກິດກວ່າ 14.000 ແຫ່ງພວມເຄື່ອນໄຫວ, ໃນນັ້ນປະມານ 98% ແມ່ນວິສາຫະກິດຂະໜາດກາງ ແລະ ນ້ອຍ, ປະຊາຄົມວິສາຫະກິດ ກວ໋າງນິງ ມີຄວາມເປັນຫຼາຍຮູບແບບກ່ຽວກັບຂອບຂະໜາດ ແລະ ລະດັບການໝູນໃຊ້ເຕັກໂນໂລຢີ. ໃນນັ້ນ, ສະມາຄົມນັກທຸລະກິດໜຸ່ມ ກວ໋າງນິງ ແມ່ນກຳລັງນຳໜ້າ. ທ່ານ ຄຸກດິ່ງເຟືອງປະທານສະມາຄົມນັກທຸລະກິດໜຸ່ມ ກວ໋າງນິງ ໃຫ້ຮູ້ວ່າ:
ພວກຂ້າພະເຈົ້າສຸມໃສ່ປະຕິບັດແຜນຮ່າງກ່ຽວກັບຖານຂໍ້ມູນດີຈີຕອນຂອງສະມາຄົມນັກທຸລະກິດໜຸ່ມແຂວງ ກວ໋າງນິງ ເພື່ອແນໃສ່ຫັນເອກະສານວິສາຫະກິດສະມາຊິກເປັນດີຈີຕອນ ເກືອບ 300 ຊຸດ, ຊ່ວຍສ້າງການເຊື່ອມຕໍ່ໃນປະຊາຄົມນັກທຸລະກິດ, ວິສາຫະກິດ. ພ້ອມກັນນັ້ນ, ພວກຂ້າພະເຈົ້າກໍ່ປາດຖະໜາຢາກເຊື່ອມຕໍ່ກັບວິສາຫະກິດສະມາຊິກ 21.000 ແຫ່ງໃນທົ່ວປະເທດເພື່ອຫັນເປັນດີຈີຕອນ, ຫັນເປັນສີຂຽວ.
ການຫັນເປັນດີຈີຕອນກໍ່ວາງອອກຄວາມຮຽກຮ້ອງຕ້ອງການກ່ຽວກັບລະບົບນິເວດໜູນຊ່ວຍເພື່ອໃຫ້ວິສາຫະກິດ, ເປັນຕົ້ນແມ່ນວິສາຫະກິດຂະໜາດກາງ ແລະ ນ້ອຍ, ອາດສາມາດເຂົ້າເຖິງເຕັກໂນໂລຢີທີ່ເໝາະສົມ. ຕາມນັ້ນແລ້ວ, ແຕ່ປີ 2015 ກວ໋າງນິງ ໄດ້ຮັກສາຮູບແບບກາເຟນັກທຸລະກິດເພື່ອສ້າງຊ່ອງທາງແລກປ່ຽນລະຫວ່າງວິສາຫະກິດ ແລະ ອົງການຄຸ້ມຄອງ. ຫວ່າງແລ້ວນີ້, ໂຄງການໃຫ້ຄຳປຶກສາສຳລັບຜູ້ອຳນວຍການຝ່າຍບໍລິຫານກໍ່ໄດ້ນຳມາທ້ອງຖິ່ນ, ພ້ອມກັບການກຳນົດທິດປ່ຽນແປງໃໝ່ການເຄື່ອນໄຫວຂອງສູນ ແອັບຟຼີເຄຊັ່ນ ແລະ ນະວັດຕະກຳ. ທ່ານນາງ ຫວູທິກິມຈີ, ຮອງຫົວໜ້າພະແນກວິທະຍາສາດ ແລະ ເຕັກໂນໂລຢີ ນະຄອນ ກວ໋າງນິງ ໃຫ້ຮູ້ວ່າ:
ໃນປີນີ້, ພວກຂ້າພະເຈົ້າຈະປ່ຽນແປງໃໝ່ຮູບແບບສູນ ແອັບຟຼີເຄຊັ່ນ ແລະ ນະວັດຕະກຳ ເພື່ອກາຍເປັນເວທີປາໄສ “ຕະຫຼາດເຕັກໂນໂລຢີ” ຢ່າງແທ້ຈິງ, ແບ່ງປັນລະຫວ່າງການສະໜອງ ແລະ ຄວາມຕ້ອງການ, ລະຫວ່າງປັນຍາຊົນ ແລະ ວິສາຫະກິດຢ່າງມີປະສິດທິຜົນກວ່າ. ເຊິ່ງຈະຜັນຂະຫຍາຍກາຍເປັນລະບົບ ຕົວຢ່າງຄື Tech Cafe, Tech Connect ແລະ ປີໜ້າຈະກາຍເປັນ Fast of Connect ຢ່າງເປັນປະຈຳ ແລະ ຕໍ່ເນື່ອງກວ່າ.
ພ້ອມກັບການຫັນເປັນດີຈີຕອນ, ບັນດາການປ່ຽນແປງໃນເຕັກໂນໂລຢີ ແລະ ແບບວິທີການຜະລິດ ກໍ່ພວມເປີດທິດເດີນຂຽວກວ່າໃຫ້ແກ່ວິສາຫະກິດ ກວ໋າງນິງ. ຈາກການຍົກສູງຄຸນນະພາບເຂດວັດຖຸດິບ, ລົງທຶນເຕັກໂນໂລຢີຕະຫຼອດຮອດການນຳໃຊ້ບັນດາແຫຼ່ງກຳລັງຢ່າງມີປະສິດທິຜົນ, ການຫັນເປັນສີຂຽວພວມໄດ້ວາງອອກໃນວິວັດການປ່ຽນແປງໃໝ່ການເຄື່ອນໄຫວຜະລິດ, ດຳເນີນທຸລະກິດເທື່ອລະກ້າວ.
ຄວາມເປັນເຈົ້າການຈາກເຂດເສດຖະກິດເອກະຊົນ ແລະ ຄວາມມານະພະຍາຍາມໜູນຊ່ວຍກ່ຽວກັບເຕັກໂນໂລຢີ, ນະວັດຕະກຳ ແລະ ການເຊື່ອມຈອດຂອງນະຄອນກວ໋າງນິງ ພວມສ້າງພື້ນຖານໃຫ້ແກ່ວິວັດການຫັນປ່ຽນຕື່ມອີກ. ຈາກແຕ່ລະວິສາຫະກິດ, ການຫັນເປັນດີຈີຕອນ ແລະ ການຫັນເປັນສີຂຽວ ພວມຄ່ອຍໆກາຍເປັນສ່ວນໜຶ່ງໃນວິທີທີ່ ກວ໋າງນິງ ສ້າງກຳລັງໜູນການເຕີບໂຕໃໝ່.
