ກອງປະຊຸມລັດຖະມົນຕີແຮງງານ ອາຊຽນ ຄັ້ງທີ 29 (ALMM 29) ພ້ອມກັບບັນດາກອງປະຊຸມທີ່ກ່ຽວຂ້ອງ ທີ່ຫາກໍ່ດຳເນີນຢູ່ ບາງກອກ, ໄທ, ໄດ້ເນັ້ນໜັກເຖິງບົດບາດຫຼັກຂອງກຳລັງແຮງງານ ອາຊຽນ ແລະ ກຳນົດທິດຫັນທັກສະເປັນມາດຖານ ມຸ່ງໄປເຖິງການຍອມຮັບໃນຂອບເຂດທົ່ວໂລກ. ເລື່ອງຄະນະ ຫວຽດນາມ ເຂົ້າຮ່ວມກອງປະຊຸມໄດ້ຢັ້ງຢືນການສະໜັບສະໜູນຢ່າງແຮງຂອງ ຫວຽດນາມ ຕໍ່ບັນດາຂໍ້ລິເລີ່ມຫັນທັກສະ ແລະ ພັດທະນາຊັບພະຍາກອນມະນຸດຂອງ ອາຊຽນ ເປັນມາດຖານ, ຮ່ວມແຮງຮ່ວມໃຈສ້າງຕະຫຼາດແຮງງານ ອາຊຽນ ໃຫ້ມີຄວາມເຂັ້ມແຂງດ້ວຍຕົນເອງ, ກວມລວມ ແລະ ເຊື່ອມໂຍງ. ໃນລາຍການຊາຍຄາອາຊຽນ ມື້ນີ້, ເຊີນທ່ານຮັບຟັງບົດຂຽນທີ່ມີຫົວຂໍ້ວ່າ “ອາຊຽນ ປຶກສາຍຸດທະສາດຊັບພະຍາກອນມະນຸດ ໃນສັງກາດ AI, ຫວຽດນາມ ຢັ້ງຢືນບົດບາດຮ່ວມເດີນທາງ”.
ກອງປະຊຸມເຕົ້າໂຮມບັນດາລັດຖະມົນຕີແຮງງານ ແລະ ການນຳບັນດາກະຊວງ, ຂະແໜງການທີ່ກ່ຽວຂ້ອງທີ່ມາຈາກ 11 ປະເທດສະມາຊິກ ອາຊຽນ, ບັນດາຄູ່ຮ່ວມມື ອາຊຽນ + 3 (ຈີນ, ຍີ່ປຸ່ນ, ສ.ເກົາຫຼີ) ພ້ອມກັບຜູ້ຕາງໜ້າບັນດາອົງການຈັດຕັ້ງສາກົນຄື: ອົງການແຮງງານສາກົນ (ILO), ອົງການຈັດຕັ້ງຮ່ວມມື ແລະ ພັດທະນາ ເສດຖະກິດ(OECD) ແລະ ອົງການຈັດຕັ້ງສາກົນເພື່ອການຍົກຍ້າຍຖິ່ນຖານ (IOM). ກ່າວຄຳເຫັນທີ່ພິທີໄຂ, ທ່ານອະນຸທິນ ຊານວິຣະກຸນ ນາຍົກລັດຖະມົນຕີ ໄທ ໄດ້ຢັ້ງຢືນຂອບຂະໜາດຍຸດທະສາດຂອງກຳລັງແຮງງານ ອາຊຽນ ໃນສະພາບການໂລກພວມມີການຫັນປ່ຽນຢ່າງວ່ອງໄວຍ້ອນເຕັກໂນໂລຢີ ແລະ ປັນຍາປະດິດ (AI):
ອາຊຽນ ແມ່ນຊາຍຄາລວມຂອງປະຊາຊົນກວ່າ 700 ລ້ານຄົນ, ດ້ວຍກຳລັງງແຮງງານກວ່າ 360 ລ້ານຄົນ, ແມ່ນໜຶ່ງໃນບັນດາຊັບພະຍາກອນມະນຸດຫຼາຍທີ່ສຸດ ແລະ ຂະຫຍັນຂັນເຄື່ອນທີ່ສຸດໃນໂລກ. ມະນຸດແມ່ນຊັບສິນຍິ່ງໃຫຍ່ທີ່ສຸດຂອງພວກເຮົາ, ທັກສະຂອງເຂົາເຈົ້າຈະຕັດສິນຄວາມສາມາດໃນການແກ້ງແຍ້ງກໍ່ຄືຄວາມວັດທະນາຖາວອນຂອງທົ່ວພາກພື້ນ ໃນໂລກເຕັມໄປດ້ວຍການຜັນແປ.
ທ່ານນາຍົກລັດຖະມົນຕີ ອະນຸທິນ ກໍ່ເນັ້ນໜັກເຖິງການລົງທຶນຍົກສູງທັກສະໃຫ້ແກ່ຜູ້ອອກແຮງງານ, ລວມມີທັກສະດີຈີຕອນ, AI, ເສດຖະກິດສີຂຽວ ແລະ ເສດຖະກິດເບິ່ງແຍງດູແລ, ແມ່ນຂໍ້ກຸນແຈເພື່ອຮັບປະກັນການພັດທະນາແບບຍືນຍົງ ແລະ ບໍ່ໃຫ້ຜູ້ໃດຖືກປະໄວ້ຢູ່ທາງຫຼັງ.
ຢູ່ກອງປະຊຸມ, ບັນດາຜູ້ແທນໄດ້ສຸມໃສ່ປຶກສາບັນດາມາດຕະການເພີ່ມທະວີຊັບພະຍາກອນມະນຸດ ອາຊຽນ ເພື່ອປັບຕົວຕໍ່ການປ່ຽນແປງຢ່າງວ່ອງໄວຂອງເຕັກໂນໂລຢີ, ວິວັດການຫັນເປັນສີຂຽວ, ຫັນເປັນດີຈີຕອນ ແລະ ບັນດາການຜັນແປຂອງຕະຫຼາດແຮງງານ. ບັນດາປະເທດຢັ້ງຢືນຄືນຄຳໝັ້ນສັນຍາລວມສຳລັບການຊຸກຍູ້ວຽກເຮັດງານທຳຢ່າງສົມເຫດສົມຜົນ, ກວມລວມ, ຍົກສູງຄວາມສາມາດປັບຕົວຂອງກຳລັງແຮງງານ ແລະ ສ້າງໂອກາດຮ່ຳຮຽນຕະຫຼອດຊີວິດ, ຮັບປະກັນບໍ່ປະໃຫ້ໃຜຖືກປະໄວ້ຢູ່ທາງຫຼັງ, ສະໜັບສະໜູນວິໄສທັດປະຊາຄົມອາຊຽນ 2045 ແລະ ແຜນການຍຸດທະສາດປະຊາຄົມ ວັດທະນະທຳ - ສັງຄົມ ອາຊຽນ (ASCC) ຢ່າງແຮງ, ບັນດາປະເທດເນັ້ນຫນັກເຖິງຄວາມສຳຄັນຂອງການສ້າງແຜນການໂດຍອີງຕາມໝາກຜົນ ແລະ ຂໍ້ມູນເພື່ອປັບປຸງການຫາເງິນລ້ຽງຊີບໃຫ້ປະຊາຊົນ… ເພື່ອແນໃສ່ຫັນບັນດາເປົ້າໝາຍຍົກລະດັບຊັບພະຍາກອນມະນຸດໃຫ້ປະກົດຜົນເປັນຈິງ, ທ່ານ ຈຸລະພັນ ອາມົົນວິວັດ ລັດຖະມົນຕີກະຊວງແຮງງານ ໄທ ຕາງໜ້າຄະນະຈັດຕັ້ງປະກາດ 3 ເສົາຄ້ຳແຫ່ງການກະທຳຈຸດສຸມຂອງ ກອງປະຊຸມ ALMM 29 ວ່າ:
ດ້ວຍຫົວຂໍ້ ຊຸກຍູ້ຊັບພະຍາກອນມະນຸດ ອາຊຽນ: ຢັ້ງຢືນທັກສະມຸ່ງໄປເຖິງການຍອມຮັບທົ່ວໂລກ, ໄທ ມຸ່ງໄປເຖິງເປົ້າໝາຍຊຸກຍູ້ 3 ຂົງເຂດຢັ້ງຢືນທັກສະທີ່ມີການຜູກພັນຢ່າງແໜ້ນແຟ້ນນຳກັນ, ລວມມີໃບຢັ້ງຢືນຊຸດບຳລຸງກໍ່ສ້າງທັກສະ ອາຊຽນ; ໃບຢັ້ງຢືນມາດຖານທັກສະ ອາຊຽນ ແລະ ໃບຢັ້ງຢືນສູນດີເດັ່ນ ອາຊຽນ.
ເຂົ້າຮ່ວມກອງປະຊຸມ, ຄະນະຜູ້ແທນ ຫວຽດນາມ ໂດຍທ່ານ ກາວຮຸຍ ຮອງລັດຖະມົນຕີກະຊວງພາຍໃນ ເປັນຜູ້ຕາງໜ້າ ໄດ້ຢັ້ງຢືນການສະໜັບສະໜູນຢ່າງແຮງຂອງ ຫວຽດນາມ ຕໍ່ບັນດາຂໍ້ລິເລີ່ມຫັນທັກສະ ແລະ ການພັດທະນາຊັບພະຍາກອນມະນຸດຂອງ ອາຊຽນ ເປັນມາດຖານ, ຮ່ວມແຮງຮ່ວມໃຈສ້າງຕະຫຼາດແຮງງານ ອາຊຽນ ມີຄວາມເຂັ້ມແຂງດ້ວຍຕົນເອງ, ກວມລວມ ແລະ ເຊື່ອມໂຍງ. ພ້ອມກັນນັ້ນ, ຫວຽດນາມ ກໍ່ເຂົ້າຮ່ວມການປຶກສາກ່ຽວກັບບັນດາທິດທາງຮ່ວມມືໃນພາກພື້ນ, ໃນນັ້ນເນັ້ນໜັກເຖິງການສ້າງລະບົບຢັ້ງຢືນທັກສະບັນລຸມາດຖານສາກົນ ແລະ ຊຸກຍູ້ກົນໄກຮັບຮອງເຊິ່ງກັນແລະກັນແມ່ນ ຂໍ້ກຸນແຈ ຍຸດທະສາດເພື່ອເປີດໂອກາດເຮັດວຽກແບບຍືນຍົງ, ຜ່ານນັ້ນ ຍົກສູງຄວາມສາມາດໃນການແກ້ງແຍ້ງ ໃຫ້ແກ່ກຳລັງແຮງງານທົ່ວພາກພື້ນ. ເພື່ອແນໃສ່ຫັນເປົ້າໝາຍນີ້ໃຫ້ປະກົດຜົນເປັນຈິງ, ຫວຽດນາມ ໄດ້ສະເໜີ 3 ຈຸດສຸມຮ່ວມມືຍຸດທະສາດ.
ທີໜຶ່ງ, ເປີດກວ້າງຂອບຂະໜາດ ແລະ ປະລິມານຂໍ້ຕົກລົງຮັບຮູ້ເຊິ່ງກັນແລະກັນ (MRAs) ໃນພາກພື້ນ, ເສີມຂະຫຍາຍບົດບາດຂອງສະພາສຶກສາອາຊີບ ອາຊຽນ (ATC) ເພື່ອເຊື່ອມຈອດລະບົບຢັ້ງຢືນທັກສະແຫ່ງຊາດ ດ້ວຍມາດຖານພາກພື້ນ ແລະ ທົ່ວໂລກ.
