ໃນປະຫວັດແຫ່ງການພົວພັນທາງການທູດ, ມີການພົບປະທີ່ໄດ້ດຳເນີນພຽງໃນເວລາສັ້ນໆ 2 – 3 ຊົ່ວໂມງເທົ່ານັ້ນ, ແຕ່ພັດສ້າງເປັນການພົວພັນສອງປະເທດ ຫວຽດນາມ ແລະ ໄທ ກ່ອນນີ້ 50 ປີ. ນັ້ນແມ່ນເລື່ອງລາວກ່ຽວກັບການພົບປະຢູ່ຫ້ອງລໍຖ້າທີ່ສະໜາມບິນ ດອນເມືອງ ເມື່ອປີ 1976 - ຈຸດເລີ່ມຕົ້ນໃຫ້ແກ່ວິວັດການຈາກ “ສະໜາມຮົບ” ກາຍເປັນ “ຄູ່ຮ່ວມມືຍຸດທະສາດຮອບດ້ານ” ລະຫວ່າງ ຫວຽດນາມ ແລະ ໄທ. ນີ້ແມ່ນເນື້ອໃນທີ່ການແບ່ງປັນໂດຍ C ASEAN ຈັດຂຶ້ນເນື່ອງໃນໂອກາດສະເຫຼີມສະຫຼອງ 50 ປີແຫ່ງການພົວພັນທາງການທູດ ຫວຽດນາມ - ໄທ ທີ່ດຳເນີນຢູ່ ຮ່າໂນ້ຍ.
ປະຫວັດແຫ່ງການພົວພັນທາງການທູດ ຫວຽດນາມ - ໄທ ບໍ່ໄດ້ເລີ່ມຕົ້ນຈາກບັນດາຫ້ອງປະຊຸມທີ່ຫຼູຫຼາ, ຫາກເລີ່ມມາຈາກສະຖານະການທີ່ມີລັກສະນະເປັນບາດລ້ຽວ. ປີ 1976, ເມື່ອບັນດາຮົ້ວກີດຂວາງທາງພູມີສາດການເມືອງຍັງຫຼວງຫຼາຍນັ້ນ, ການສ້າງຕັ້ງຊ່ອງທາງຕິດຕໍ່ສື່ສານລະຫວ່າງສອງປະເທດແມ່ນສິ່ງທ້າທາຍໃຫຍ່ທີ່ສຸດ. ທ່ານ ພິໄຊ (Bhichai) ລັດຖະມົນຕີການຕ່າງປະເທດ ໄທ ໃນເວລານັ້ນ ໄດ້ຮຽກຮ້ອງໃຫ້ຜູ້ຕາງໜ້າພິເສດຂອງຕົນຢູ່ ນິວຢອກ ຊອກຫາທຸກວິທີທາງເພື່ອເຊື່ອມຕໍ່ກັບຝ່າຍ ຫວຽດນາມ. ເມື່ອຮູ້ຂ່າວວ່າ ທ່ານ ຟານຫ່ຽນ ຮອງລັດຖະມົນຕີການຕ່າງປະເທດ ຫວຽດນາມ ຈະເດີນທາງອອກຈາກ ນິວຢອກ ກັບເມືອ ຫວຽດນາມ ແລະ ໄປຜ່ານແດນຢູ່ ບາງກອກ, ທ່ານໄດ້ສະເໜີໃຫ້ມີການພົບປະໃນເວລາສັ້ນໆຢູ່ສະໜາມບິນ. ທ່ານ ປ.ອ ຟານຈີແທັ່ງ ອະດີດເອກອັກຄະລັດຖະທູດ ຫວຽດນາມ ປະຈຳ ໄທ ໃຫ້ຮູ້ວ່າ:
“ເຂົາເຈົ້າໄດ້ມີການພົບປະໂອ້ລົມໃນເວລາ 2 ຊົ່ວໂມງຢູ່ຫ້ອງປະຊຸມຂອງສະໜາມບິນ. ຂ້າພະເຈົ້າເຊື່ອວ່າ ນັ້ນແມ່ນການໂອ້ລົມສົນທະນາຄັ້ງທຳອິດລະຫວ່າງລັດຖະມົນຕີການຕ່າງປະເທດ ໄທ ແລະ ຮອງລັດຖະມົນຕີ ການຕ່າງປະເທດຫວຽດນາມ ກ່ຽວກັບການສ້າງພື້ນຖານສັນຕິພາບ. ຫຼັງຈາກນັ້ນ 2 – 3 ເດືອນ, ຄະນະຜູ້ຕາງໜ້າ ໄທ ໄດ້ມາຢ້ຽມຢາມ ຫວຽດນາມ ແລະ ເລີ່ມຕົ້ນບັນດາການເຈລະຈາ, ພົບປະກັບລັດຖະມົນຕີການຕ່າງປະເທດ ແລະ ບັນດາການນຳ ຫວຽດນາມ. ນັ້ນແມ່ນການປຶກສາຫາລືທີ່ຫຍຸ້ງຍາກຂ້ຽວຂາດທີ່ສຸດ. ແຕ່ສຸດທ້າຍ, ຫຼັງຈາກນັ້ນ 2 – 3 ວັນ, ເຂົາເຈົ້າໄດ້ຕົກລົງນຳກັນວ່າ: ສອງຊາດຕ້ອງປະອະດີດຕະການໄວ້, ແລ້ວມຸ່ງໄປເຖິງອະນາຄົດ ແລະ ກາຍເປັນເພື່ອນມິດຂອງກັນ. ດ້ວຍວິໄສທັດເພື່ອໃຫ້ ອາຊີຕາເວັນອອກສ່ຽງໃຕ້ ເປັນເອກະພາບ, ແລະບັນດາປະເທດ ອາຊີຕາເວັນອອກສ່ຽງໃຕ້ ມີຄວາມໝັ້ນຄົງເຂັ້ມແຂງ, ຫວຽດນາມ ແລະ ໄທ ອາດຈະກາຍເປັນບັນດາປັດໄຈຫຼັກແຫຼ່ງ”.
ຈາກບັນດາບາດກ້າວທີ່ລະມັດລະວັງ, ຢຸດໆຢ່ອນໆ, ຫວຽດນາມ ແລະ ໄທ ໄດ້ສ້າງຄວາມໄວ້ເນື້ອເຊື່ອໃຈເທື່ອລະກ້າວ, ຜ່ານຜ່າຄວາມແຕກຕ່າງກັນ, ມຸ່ງໄປເຖິງສັນຕິພາບ. ພິເສດ, ດ້ວຍຄວາມຄ້າຍຄືກັນ ແລະ ບັນດາຈຸດພິເສດຂອງການພົວພັນ ຫວຽດນາມ - ໄທ ໄດ້ສ້າງເປັນການພົວພັນສະໜິດຕິດພັນ ແລະ ບັນດາຊາຕາກຳຮ່ວມຂອງສອງຊາດ. ທ່ານເອກອັກຄະລັດຖະທູດ ຟ້າມກວາງວິງ - ອະດີດຮອງລັດຖະມົນຕີການຕ່າງປະເທດ, ອະດີດຫົວໜ້າ SOM ອາຊຽນ ຂອງ ຫວຽດນາມ ໃຫ້ຂໍ້ສັງເກດວ່າ:
“ເຖິງວ່າທັງສອງປະເທດລ້ວນແຕ່ຢູ່ເຂດອາຊີຕາເວັນອອກສ່ຽງໃຕ້, ແຕ່ ຫວຽດນາມ ແລະ ໄທ ນອນຢູ່ໃຈກາງເຂດແມ່ນ້ຳຂອງ. ນີ້ແມ່ນຈຸດທີ່ແຕກຕ່າງກັນຫຼາຍ. ໃນອາຊຽນ, ພວກເຮົາພວມສ້າງພາກພື້ນທີ່ກວ້າງໃຫຍ່ກວ່າ ລວມມີທັງທະເລ ແລະ ດິນຕໍ່ແຜ່ນ. ແຕ່ສຳລັບ ໄທ, ຫວຽດນາມ ແລະ ໄທ ກໍ່ເອົາໃຈໃສ່ເປັນພິເສດເຖິງອະນຸພາກພື້ນແມ່ນ້ຳຂອງ, ຄວາມໝັ້ນຄົງແຫຼ່ງນ້ຳ, ການຫາເງິນລ້ຽງຊີບຂອງປະຊາຊົນ ແລະ ການຮັກສາການພັດທະນາແບບຍືນຍົງຢ່າງແນ່ນອນ”.
ວິໄສທັດກ່ຽວກັບການຮ່ວມຊະຕາກຳ ອາຊຽນ ໄດ້ຮັບການປັບປຸງຢ່າງຈະແຈ້ງນັບແຕ່ປີ 1995, ເມື່ອ ຫວຽດນາມ ເຂົ້າເປັນສະມາຊິກອາຊຽນ. ນັບແຕ່ເວລານັ້ນ, ສອງປະເທດບໍ່ພຽງແຕ່ແມ່ນປະເທດບ້ານໃກ້ເຮືອນຄຽງເທົ່ານັ້ນ ຫາກຍັງແມ່ນຊາຍຄາລວມຢ່າງແທ້ຈິງ. ພິເສດ, ກົນໄກປະຊຸມລະຫວ່າງລັດຖະບານຮ່ວມ - ກົນໄກໜຶ່ງດຽວຂອງໄທ ກັບ ຫວຽດນາມ ໄດ້ພິສູດໃຫ້ເຫັນລະດັບຄວາມໄວ້ເນື້ອເຊື່ອໃຈດ້ານການເມືອງຢ່າງເລິກເຊິ່ງລະຫວ່າງສອງຝ່າຍ. ທ່ານນາງ ອຸຣະວະດີ ສີພີຣົມ (Urawadee Sriphiromya) ເອກອັກຄະລັດຖະທູດ ຜູ້ມີອຳນາດເຕັມແຫ່ງລາຊະອານາຈັກ ໄທ ປະຈຳ ຫວຽດນາມ ຢັ້ງຢືນວ່າ:
ການພົວພັນສອງຝ່າຍລະຫວ່າງສອງປະເທດພວມຢູ່ໃນໄລຍະໃກ້ຊິດສະໜິດສະໜົມທີ່ສຸດ ແລະ ຢູ່ໃນລະດັບສູງທີ່ສຸດນັບແຕ່ກ່ອນມາຮອດປັດຈຸບັນ. ປັດຈຸບັນພວກເຮົາແມ່ນຄູ່ຮ່ວມມືຍຸດທະສາດຮອບດ້ານ. ສິ່ງນີ້ມີຄວາມໝາຍດຽວກັນກັບເລື່ອງພວກເຮົາພ້ອມກັນກໍ່ສ້າງບົນພື້ນຖານຄວາມໄວ້ເນື້ອເຊື່ອໃຈ, ນ້ຳໃຈມິດຕະພາບ ແລະ ການຮ່ວມມືແບບຍືນຍົງໃນໄລຍະກວ່າ 5 ທົດສະວັດຜ່ານມາ. ການນຳສອງປະເທດໄດ້ມອບໜ້າທີ່ສູ້ຊົນເພື່ອບັນລຸວົງເງິນການຄ້າສອງຝ່າຍໃຫ້ໄດ້ 25 ຕື້ USD ໂດຍໄວ. ປັດຈຸບັນ, ພວກເຮົາບັນລຸໄດ້ກວ່າ 22 ຕື້ USD ແລ້ວ. ຂ້າພະເຈົ້າເຊື່ອໝັ້ນວ່າເມື່ອຮ່ວມແຮງຮ່ວມໃຈ, ພວກເຮົາຈະບັນລຸໄດ້ຕົວເລກການຄ້າຄືດັ່ງໄດ້ວາງອອກ. ຂ້າພະເຈົ້າກໍ່ຢາກເວົ້າເຖິງຄວາມວັດທະນາຖາວອນ. ການພົວພັນຂອງພວກເຮົາພວມເດັ່ນຂຶ້ນໃນທຸກຂົງເຂດ, ແລະແຕ່ລະຂົງເຂດນັ້ນ ກໍ່ໜູນຊ່ວຍ, ປັບປຸງໃຫ້ກັນແລະກັນ. ນັ້ນແມ່ນເຫດຜົນເປັນຫຍັງການພົວພັນຄູ່ຮ່ວມມືຂອງພວກເຮົາຍາມໃດກໍ່ຟົດຟື້ນ ແລະ ຮຸ່ງເຮືອງເຫຼືອງເຫຼື້ອມ.
ກ້າວເຂົ້າສູ່ໄລຍະໃໝ່: ສັງກາດແຫ່ງການປະດິດຄິດສ້າງ ແລະ ຄວາມຍືນຍົງ. ເປົ້າໝາຍບໍ່ພຽງແຕ່ແມ່ນການພົບປະແລກປ່ຽນແບບເກົ່າເທົ່ານັ້ນ ຫາກແມ່ນການຮ່ວມປະດິດຄິດສ້າງ. ທ່ານນາງ ເຈິ່ນຫ໋າຍເວິນ ຮອງຫົວໜ້າກົມຮ່ວມມືສາກົນ, ກະຊວງວັດທະນະທຳ, ກິລາ ແລະ ການທ່ອງທ່ຽວ ຫວຽດນາມ ໃຫ້ຂໍ້ສັງເກດວ່າ:
“ຮອດເວລາແລ້ວທີ່ພວກເຮົາຕ້ອງຫັນປ່ຽນຈາກບບັນດາການເຄື່ອນໄຫວພົບປະແລກປ່ຽນວັດທະນະທຳທີ່ມີຢູ່ແລ້ວ ໄປສູ່ບັນດາການຮ່ວມມືທີ່ແທ້ຈິງກວ່າ. ຂ້າພະເຈົ້າຖືວ່າ ພວກເຮົາຄວນຊຸກຍູ້ຢ່າງແຮງການຮ່ວມຜະລິດ ບັນດາຜະລິດຕະພັນປະດິດຄິດສ້າງ. ລະອຽດແມ່ນ ຊຸກຍູ້ການຮ່ວມຜະລິດໃນຂົງເຂດອຸດສາຫະກຳວັດທະນະທຳ ແລະ ຫົວຄິດປະດິດສ້າງ, ພ້ອມກັນນັ້ນແມ່ນບັນດາຜະລິດຕະພັນກິລາລວມ ແລະ ເຊື່ອມຕໍ່ການທ່ອງທ່ຽວ”.
50 ປີທຳອິດໄດ້ອັດລົງເພື່ອເປີດໜ້າໃໝ່, ຫວຽດນາມ ແລະ ໄທ ບໍ່ພຽງແຕ່ແມ່ນປະເທດບ້ານໃກ້ເຮືອນຄຽງຮ່ວມຜະລິດເຂົ້ານາທາມເທົ່ານັ້ນ. ຫາກໃນບົດເພງປະສານສຽງຂອງ ອາຊຽນ ທີ່ສ້າງຄວາມເຂັ້ມແຂງດ້ວຍຕົນເອງ, ສອງປະເທດ ໄດ້ ແລະ ພວມສວມບົດບາດແມ່ນບັນດານັກດົນຕີຫຼັກແຫຼ່ງ, ສືບຕໍ່ຮ່ວມກັນຂຽນບົດເພງສະຫຼອງໄຊກ່ຽວກັບອາຊີຕາເວັນອອກສ່ຽງໃຕ້ ສັນຕິພາບ, ສະຖຽນລະພາບ, ວັດທະນາຖາວອນ ແລະ ປະດິດສ້າງຢ່າງບໍ່ຢຸດຢັ້ງ.
