ດ້ວຍກວ່າ 17.000 ເກາະ, ການທ່ອງທ່ຽວ ອິນໂດເນເຊຍ ມີຊື່ສຽງດ້ວຍບັນດາຫາດຊາຍທີ່ສວຍງາມຢູ່ Bali, Lombok ຫຼື Labuan Bajo... ອາກາດຢູ່ຫຼາຍເຂດຂອງ ອິນໂດເນເຊຍ ໄດ້ຮັບຕີລາຄາວ່າແມ່ນຄ້າຍຄືກັນກັບອາກາດຢູ່ເຂດພາກກາງ ແລະ ພາກໃຕ້ຂອງ ຫວຽດນາມ, ໃນຂະນະທີ່ວັດທະນະທຳ ແລະ ອາຫານການກິນກໍ່ມີຈຸດທີ່ຄ້າຍຄືກັນ. ເຖິງຢ່າງໃດກໍຕາມ, ເມື່ອເວົ້າເຖິງການທ່ອງທ່ຽວ ຫວຽດນາມ, ຊາວອິນໂດເນເຊຍ ຫຼາຍຄົນຍັງຮູ້ສຶກຕື່ນເຕັ້ນທີ່ສຸດ.
ຜ່ານການສຳພາດຂອງນັກຂ່າວວິທະຍຸກະຈາຍສຽງ ຫວຽດນາມ (VOV) ປະຈຳ ອິນໂດເນເຊຍກໍ່ເຫັນວ່າ, ຊາປາ (ແຂວງ ລ່າວກາຍ) ແມ່ນສະຖານທີ່ທີ່ຊາວອິນໂດເນເຊຍ ຫຼາຍຄົນມັກເຕື້ອງເຖິງເມື່ອເວົ້າເຖິງ ຫວຽດນາມ, ດ້ວຍລາຍການທ່ອງທ່ຽວ ຮ່າໂນ້ຍ - ຊາຊາ - ຈ່າງອານ - ຮະລອງ. ຊາປາ ສ້າງຄວາມດຶງດູດ ດ້ວຍອາກາດເຢັນສະບາຍ, ເຊິ່ງແມ່ນສິ່ງທີ່ຕ່າງຫາກເມື່ອທຽບໃສ່ຫຼາຍເຂດຢູ່ ອິນໂດເນເຊຍ. ຢູ່ບ່ອນນີ້ມີບັນດາຜືນປ່າທີ່ເຕັມໄປດ້ວຍດອກໄມ້ເບັ່ງບານ, ພ້ອມກັບໝອກບາງໆປົກຄຸມ ແລະ ມີປະສົບການດ້ານວັດທະນະທຳທີ່ເປັນເອກະລັກສະເພາະຫຼາຍຢ່າງ. ສິ່ງພິເສດເຊິ່ງແຂກທ່ອງທ່ຽວອິນໂດເນເຊຍລໍຄອຍນັ້ນ ແມ່ນມາ ຊາປາ ຍາມລະດູໜາວເພື່ອມີໂອກາດໄດ້ເຫັນ ແລະ ສຳຜັດກັບຫິມະ. ເອື້ອຍ ຕານຕີ ຊາວອິນໂດເນເຊຍ ແບ່ງປັນກັບນັກຂ່າວ VOV ວ່າ:
ຂ້າພະເຈົ້າຍັງບໍ່ທັນໄດ້ມາ ຫວຽດນາມເທື່ອ ແຕ່ພວມຂຶ້ນແຜນຄົ້ນຄວ້າ. ເມື່ອເບິ່ງທາງສື່ສັງຄົມອອນໄລ, ຂ້າພະເຈົ້າຢາກໄປ ຊາປາ ເພື່ອໄດ້ສຳຜັັດກັບອາກາດທີ່ໜາວເຢັນ, ຊົມເບິ່ງຜືນປ່າດອກໄມ້. ຖ້າໂຊກດີ ຂ້າພະເຈົ້າອາດຈະເຫັນຫິມະຕົກ - ສິ່ງທີ່ຫາຍາກຖ້າໄປທ່ຽວບັນດາປະເທດອາຊີຕາເວັນອອກສ່ຽງໃຕ້ອື່ນໆ.
ມີສະຖານທີ່ແຫ່ງໜຶ່ງທີ່ລຶ້ງເຄີຍກັບແຂກທ່ອງທ່ຽວ ອິນໂດເນເຊຍ ນັ້ນແມ່ນ ດ່ານັ້ງ, ດ້ວຍທ່າໄດ້ປຽບກ່ຽວກັບການທ່ອງທ່ຽວທະເລ, ປະສົບການມໍລະດົກດ້ານວັດທະນະທຳ. ກໍ່ຄືອາຫານທີ່ອຸດົມສົມບຸນນັ້ນ. ເຂດພາກກາງຂອງ ຫວຽດນາມ ໄດ້ມີຍຸດທະສາດຕ້ອນຮັບແຂກທ່ອງທ່ຽວ ຊາວອິດສະລາມ ແຕ່ຫົວທີ. ມີຫຼາຍໂຄງການສົ່ງເສີມການທ່ອງທ່ຽວ, ໂຄສະນາສະຖານທີ່ທ່ອງທ່ຽວເຂດພາກກາງໃຫ້ ຊາວອິດສະລາມ ໄດ້ຮັບການປະຕິບັດຢູ່ ອິນໂດເນເຊຍ ເປັນປະຈຳ, ດ້ວຍບັນດາ tour ທ່ອງທ່ຽວທີ່ສ້າງຄວາມດຶງດູດ. ພິເສດໃນຊຸມປີມໍ່ໆນີ້, ບັນດາແຂວງ, ນະຄອນເຂດພາກກາງໄດ້ປະສານສົມທົບກັບບັນດາວິສາຫະກິດ, ຊຸມຊົນທ່ອງທ່ຽວເພື່ອແນໃສ່ສ້າງລະບົບນິເວດການທ່ອງທ່ຽວທີ່ເປັນມິດກັບຊາວອິດສະລາມ, ເອົາໃຈໃສ່ເປັນພິເສດເຖິງບັນດາຜະລິດຕະພັນກ່ຽວກັບອາຫານໃຫ້ຖືກ ຕາມມາດຖານ Halal.
ນອກຈາກນັ້ນ, ມີສະຖານທີ່ທ່ອງທ່ຽວແຫ່ງໜຶ່ງທີ່ຫາກໍພົ້ນເດັ່ນຂຶ້ນສຳລັບແຂກທ່ອງທ່ຽວ ອິນໂດເນເຊຍ ນັ້ນແມ່ນ ຝູກວັກ ດ້ວຍອາກາດເຂດຮ້ອນ, ອາຫານທີ່ອຸດົມສົມບູນ ແລະ ລະບົບພັກເຊົ່າຄົບທຸກລະດັບ, ຕອບສະໜອງຄວາມຕ້ອງການທີ່ຫຼາຍຮູບຫຼາຍແບບຂອງແຂກທ່ອງທ່ຽວສາກົນ. ທ່ານ Ramanda Raka Aditya ຜູ້ອຳນວຍການ Marketing ຂອງບໍລິສັດຕົວແທນທ່ອງທ່ຽວ AviaTour ແບ່ງປັນວ່າ:
ຊາວອິນໂດເນເຊຍ ພວມເວົ້າຫຼາຍກ່ຽວກັບ ຝູກວັກ - ສະຖານທີ່ທີ່ພວກຂ້າພະເຈົ້າປຽບເໝືອນວ່າແມ່ນ 'Monaco ຂອງ ຫວຽດນາມ”. ສະຖານທີ່ແຫ່ງນີ້ມີຊື່ສຽງທີ່ສຸດ ຍ້ອນນຳມາເຊິ່ງປະສົບການທີ່ໂດດເດັ່ນ, ຕ່າງກັນຫຼາຍເມື່ອທຽບໃສ່ກັບສິ່ງທີ່ເຂົາເຈົ້າເຄີຍນຶກພາບກ່ຽວກັບ ອາຊີຕາເວັນອອກສ່ຽງໃຕ້ ຫຼື ຫວຽດນາມ . ນັ້ນແມ່ນສາຍເຫດເພື່ອໃຫ້ ບໍລິສັດ ພວກຂ້າພະເຈົ້າ ແລະ ບັນດາບໍລິສັດຕົວແທນທ່ອງທ່ຽວຢູ່ ອິນໂດເນເຊຍ ສ້າງ tour ທ່ອງທ່ຽວໄປ ຝູກວັກ.
ພ້ອມກັບບັນດາຖ້ຽວບິນໂດຍກົງລະຫວ່າງສອງປະເທດ, ການກໍ່ສ້າງພື້ນຖານໂຄງລ່າງທີ່ເປັນມິດກັບຊາວອິດສະລາມ, ພ້ອມກັບບັນດາລາຍການສົ່ງເສີມການທ່ອງທ່ຽວ... ໄດ້ຊ່ວຍໃຫ້ບັນດາສະຖານທີ່ທ່ອງທ່ຽວຂອງ ຫວຽດນາມ ນັບມື້ນັບໃກ້ຊິດກວ່າກັບແຂກທ່ອງທ່ຽວຊາວອິດສະລາມ ອິນໂດເນເຊຍ.
ນອກຈາກນັ້ນ, ໃນສະພາບລະບົບນິເວດສື່ສັງຄົມອອນໄລຂອງ ອິນໂດເນເຊຍ ພິເສດສະເພາະທີສຸດ ຍ້ອນລະດັບການເຊື່ອມຕໍ່ເຄືອຂ່າຍມືຖືສູງ ແລະ ຈຳນວນຜູ້ນຳໃຊ້ອິນເຕີເນັດ ເພີ່ມຂຶ້ນໃນແຕ່ລະປີນັ້ນ, ການນຳໃຊ້ຜູ້ທີ່ມີອິດທິພົນຊື່ສຽງ (KOL, vlogger...) ຢູ່ ອິນໂດເນເຊຍ ໄດ້ສວມບົດບາດຫຼັກໃນການກຳນົດຄວາມຮັບຮູ້ຂອງຜູ້ບໍລິໂພກ. ບັນດາແຟຣດຟອມທົ່ວໄປຄື Instagram, TikTok ແລະ YouTube ກໍ່ດຶງດູດຄວາມເອົາໃຈໃສ່ຈາກປະຊາຊົນຫຼາຍທີສຸດ. ຄວາມຈິງແລ້ວ, ເມື່ອຖືກຖາມ, ຊາວອິນໂດນເຊຍ ຫຼາຍຄົນໄດ້ຮູ້ຈັກເຖິງ ຫວຽດນາມ ຜ່ານພາບຂອງ KOLs ທ້ອງຖິ່ນ...ດັ່ງນັ້ນ, ສື່ສັງຄົມອອນໄລ ແລະ ຜູ້ມີຊື່ສຽງ ແມ່ນຊ່ອງທາງທີ່ມີປະສິດທິຜົນຊ່ວຍແຜ່ກະຈາຍພາບພົດຂອງປະເທດຊາດ, ຊາວຫວຽດນາມ ເຖິງປະຊາຊົນ ອິນໂດເນເຊຍ.
