ວັນທີ 1 ກໍລະກົດ 2004,ທ່ານ ຊິໂນຣົດ ເບັນຈະຊະວະກຸນ ລົງຈາກເຮືອບິນດ້ວຍຫົວໃຈ່ທັງກະຕືລີລົ້ນທັງຕົກສະເງີ້ງົງງວຍ. ພາສາ, ວັດທະນະທຳ, ຊາວຫວຽດນາມ - ທຸກສິ່ງທຸກຢ່າງລ້ວນແຕ່ໃໝ່ອ່ຽມ. ໃນຕະຫຼອດໄລຍະຕິດພັນກັບ ຫວຽດນາມ, ວິວັດການຂອງລາວແມ່ນຊຸມວັນຜ່ານຜ່າສິ່ງທ້າທາຍບໍ່ແມ່ນໜ້ອຍ. ຈາກຄວາມຫຍຸ້ງຍາກດ້ານພາສາ ແລະ ຄວາມແຕກຕ່າງກັນດ້ານວັດທະນະທຳ, ລາວຄ່ອຍໆຮຽນພາສາ, ຊອກຮູ້ກ່ຽວກັບຮີດຄອງປະເພນີເພື່ອສາມາດເຊື່ອມຕໍ່ກັບຊາວຫວຽດນາມໄດ້ຢ່າງເລິກເຊິ່ງກວ່າ, ພິເສດແມ່ນບັນດາພາລະກອນຂອງຕົນຢູ່ສາຂາທັງໝົດໃນທົ່ວເຂດພາກທີ່ແຕກຕ່າງກັນຂອງຫວຽດນາມ. ໂດຍແມ່ນຊາວຕ່າງປະເທດທີ່ດຳລົງຊີວິດໄລຍະຍາວຢູ່ຫວຽດນາມ, ນີ້ບໍ່ພຽງແຕ່ແມ່ນບ່ອນ ເຮັດວຽກຂອງທ່ານ ຊິໂນຣົດ ເບັນຈະຊະວະກຸນເທົ່ານັ້ນ, ຫາກຍັງກາຍເປັນບ້ານເກີດເມືອງນອນແຫ່ງທີ 2, ແມ່ນຫ້ອງຮຽນຂອງຊີວິດ, ແມ່ນບ່ອນເຕີບໃຫຍ່ດ້ວຍຄວາມຊົງຈຳໃຕະຫຼອດໄລຍະ 20 ປີຜ່ານມາຂອງລາວອີກດ້ວຍ.
ເວລານັ້ນ, ຫວຽດນາມພວມຢູ່ໃນໄລຍະພັດທະນາ ແລະ ຂ້າພະເຈົ້າສາມາດເຫັນໄດ້ຫຼາຍໂອກາດທີ່ສຸດ. ທີໜຶ່ງແມ່ນ ໂອກາດໃຫ້ແກ່ຕົນເອງ - ບ່ອນສະແດງຄວາມສາມາດ, ບົດຮຽນປະສົບການ ເຊິ່ງຂ້າພະເຈົ້າສະສົມມາໄດ້ເມື່ອເຮັດວຽກຢູ່ໄທ, ກໍ່ຄືໝູນໃຊ້ຄວາມຮູ້ວິຊາສະເພາະຂອງຕົນເພື່ອແບ່ງປັນ ແລະ ຮ່ຳຮຽນຕື່ມອີກກ່ຽວກັບວັດທະນະທຳຢູ່ທີ່ນີ້. ສິ່ງນີ້ນຳມາເຊິ່ງຜົນປະໂຫຍດໃຫ້ທັງສອງຝ່າຍ: ສຳລັບຂ້າພະເຈົ້າເອງກໍ່ມີບົດຮຽນປະສົບການຕື່ມອີກ, ສ່ວນຝ່າຍ ຫວຽດນາມ ກໍ່ມີການເຊື່ອມໂຍງຕື່ມດ້ານຄວາມຮູ້, ວັດທະນະທຳ, ພາສາ ແລະ ວິຖີຊີວິດຈາກຄົນຕ່າງປະເທດ.
ພາຍຫຼັງຫຼາຍປີທີ່ຕິດພັນກັບຫວຽດນາມ, ທ່ານ ຊິໂນຣົດ ເບັນຈະຊະວະກຸນ ໄດ້ເຫັນປະຈັກຕາບັນດາໄລຍະຫັນປ່ຽນຂອງຫວຽດນາມ - ຈາກຄວາມຫຍຸ້ງຍາກໃນເບື້ອງຕົ້ນເຖິງການພັດທະນາຢ່າງແຮງໃນປັດຈຸບັນ. ບັນດາພຶດຕິກຳຕົວຈິງນັ້ນ ໄດ້ສ້າງເປັນມູມມອງໜຶ່ງທີ່ເຕັມໄປດ້ວຍຄວາມເຄົາລົບນັບຖືກ່ຽວກັບມະນຸດ ແລະການພັດທະນາ ຢູ່ທີ່ນີ້.
“ຈາກບັນດາສິ່ງທີ່ຂ້າພະເຈົ້າເຫັນປະຈັກຕາໃນເມື່ອກ່ອນມາຮອດປັດຈຸບັນ, ດ້ວຍຖານະເປັນຊາວໄທທີ່ໄດ້ດຳລົງຊີວິດຢູ່ຫວຽດນາມເປັນເວລາຫຼາຍທົດສະວັດ, ຂ້າພະເຈົ້າເຫັນໄດ້ຄວາມພ້ອມຂອງປະຊາຊົນ ກໍ່ຄືຄວາມສາມາດໃນການຄຸ້ມຄອງບໍລິຫານທີ່ນັບມື້ນັບສົມບູນ. ຈາກປະເທດພັດທະນາບໍ່ແຮງ, ມາຮອດປັດຈຸບັນ ຫວຽດນາມໄດ້ກ້າວເຂົ້າສູ່ໄລຍະພັດທະນາຢ່າງຈະແຈ້ງ. ຂ້າພະເຈົ້າຂໍສະແດງຄວາມຊົມເຊີຍຕໍ່ຫວຽດນາມ ແລະ ຮູ້ສຶກເອກອ້າງທະນົງໃຈເມື່ອເປັນສ່ວນໜຶ່ງໃນວິວັດການພັດທະນານັ້ນ”.
ໃນວິວັດແຫ່ງການຕິດພັນກັບຫວຽດນາມ, ສິ່ງຈັບໃຈທີ່ສຸດແມ່ນລາວໄດ້ຊອກເຫັນຄວາມໝາຍໃນການດຳລົງຊີວິດຂອງຕົນ, ເມື່ອບັນຫາຢູ່ຫວຽດນາມ ຫຼື ອອກຈາກຫວຽດນາມ ບໍ່ມີຄວາມສຳຄັນອີກ. ລາວຮູ້ສຶກເອກອ້າງທະນົງໃຈພິເສດຕໍ່ຊື່ຫວຽດນາມຂອງຕົນແມ່ນ “ຫງວຽນບາຕີ” ໂດຍທ່ານໝໍຫວຽດນາມຕັ້ງໃຫ້ໃນການເຄື່ອນໄຫວອາສາໝັກຢູ່ຫວຽດນາມ.
ໃນເຫດການຈຳນວນໜຶ່ງ, ເມື່ອ ເຫັນປ້າຍທີ່ມີຊື່ຂອງຕົນແມ່ນ ຫງວຽນບາຕີ້ ຕັ້ງຢູ່ເທິງໂຕະ, ຂ້າພະເຈົ້າຮູ້ສຶກເອກອ້າງທະນົງໃຈຫຼາຍ. ບາງເທື່ອການໃຊ້ຊື່ຫວຽດໃນການເຮັດວຽກ, ຫຼືທຳຄວາມຮູ້ຈັກເບື້ອງຕົ້ນ ຮູ້ສຶກວ່າມີຄວາມໃກ້ຊິດກວ່າ. ເຂົາບັນທຶກຊື່ຂ້າພະເຈົ້າໃນໂທລະສັບວ່າ ຕີ ແລະ ເມື່ອໂທຫາເຂົາກໍ່ບອກວ່າ ອ້າຍຕີ… ເຮັດໃຫ້ຂ້າພະເຈົ້າດີໃຈ, ຮູ້ສຶກເປັນຕາຮັກ ແລະ ເປັນມິດກວ່າ.
ກວ່າ 2 ທົດສະວັດແຫ່ງການແຜ່ກະຈາຍບັນດາຄຸນຄ່າມະນຸດສະທຳ
ໃນໄລຍະເວລາກວ່າ 20 ປີແຫ່ງການດຳລົງຊີວິດ ແລະ ເຮັດວຽກຢູ່ຫວຽດນາມ, ທຸກການເຄື່ອນໄຫວຂອງບໍລິສັດຫຸ້ນສ່ວນລ້ຽງສັດ CP ຫວຽດນາມ ຄືການບໍລິຈາກເລືອດດ້ວຍຄວາມສະໝັກໃຈ, ກວດປິ່ນປົວພະຍາດແບບເຄື່ອນທີ່, ການຊ່ວຍເຫຼືອປະຊາຊົນເຂດປະສົບກັບຄວາມຫຍຸ້ງຍາກ, ມອບທຶນການສຶກສາ, ການຮ່ວມມືກັບບັນດາມະຫາວິທະຍາໄລ, ການຮັບເອົານັກສຶກສາມາຝືກງານ, ກໍ່ຄືບັນດາການເຄື່ອນໄຫວໜູນຊ່ວຍຄົນທຸກຍາກ, ຄົນພິການ ແລະ ເດັກກຳພ້າ ແລະ ກູ້ຊ່ວຍຍາມຖືກໄພທຳມະຊາດ, ພາຍຸນ້ຳຖ້ວມຢູ່ຫວຽດນາມ… ລ້ວນແຕ່ມີການເຂົ້າຮ່ວມຂອງ ທ່ານ ຫງວຽນບາຕີ.
ເປີດແຕ່ລະໜ້າ “ປຶ້ມແດງ” ບໍລິຈາກເລືອດ ເຊິ່ງລາວໄດ້ຮັກສາໄວ້ຢ່າງລະມັດລະວັງໃນໄລຍະ 30 ກວ່າປີນັ້ນ, ສາມາດເຫັນໄດ້ຄວາມຊົງຈຳທີ່ມິດງຽບແຕ່ທົນທານ. ຈາກຊຸມວັນຍັງເປັນນັກສຶກສາຢູ່ມະຫາວິທະຍາໄລ ຊຽງໃໝ່ ທີ່ໄດ້ບໍລິຈາກເລືອດຄັ້ງທຳອິດ, ມາຮອດປັດຈຸບັນເມື່ອກາຍເປັນການນຳຂັ້ນສູງຂອງ CP ຫວຽດນາມ, ສິ່ງທີ່ບໍ່ປ່ຽນແປງສຳລັບລາວນັ້ນແມ່ນຫົວໃຈຍາມໃດກໍ່ມຸ່ງໄປເຖິງການແບ່ງປັນ. ໂດຍແມ່ນໜຶ່ງໃນບັນດາຊາວຕ່າງປະເທດຢູ່ຫວຽດນາມ ທີ່ໄດ້ບໍລິຈາກເລືອດຫຼາຍທີ່ສຸດ: 36 ຄັ້ງໃນການບໍລິຈາກເລືອດທັງໝົດ 65 ຄັ້ງໄລ່ຮອດປັດຈຸບັນ, ແລະເປົ້າໝາຍທີ່ລາວໄດ້ວາງອອກແມ່ນຈະເຂົ້າຮ່ວມການບໍລິຈາກເລືອດ 100 ຄັ້ງ. ບັນດາສິ່ງທີ່ລຽບງ່າຍເຫຼົ່ານັ້ນໄດ້ເຮັດໃຫ້ລາວກາຍເປັນຜູ້ສ້າງແຮງບັນດານໃຈໃຫ້ແກ່ຜູ້ຮ່ວມງານຫວຽດນາມ.
ອ້າຍ ຊິໂນຣົດ ແມ່ນການນຳທີ່ສຸດຈິດສຸດໃຈ. ລາວບໍ່ພຽງແຕ່ກຳນົດທິດຍຸດທະສາດດ້ານບຸກຄະລາກອນ ແລະ ພັດທະນາວັດທະນະທຳວິສາຫະກິດເທົ່ານັ້ນ ຫາກຍັງສ້າງແຮງບັນດານໃຈໃຫ້ແກ່ພວກຂ້າພະເຈົ້າຜ່ານບັນດາການເຄື່ອນໄຫວສັງຄົມທີ່ມີຄວາມໝາຍ. ພິເສດແມ່ນການບໍລິຈາກເລືອດຢ່າງສະໝ່ຳສະເໝີ ດ້ວຍເປົ້າໝາຍເຊິ່ງລາວໃກ້ທີ່ຈະບັນລຸໄດ້ແມ່ນ100 ຄັ້ງ.
ກວ່າສອງທົດສະວັດທີ່ຕິດພັນກັບຫງຽດນາມ, ປະເທດນີ້ໄດ້ກາຍເປັນເຮືອນແຫ່ງທີສອງຂອງ ທ່ານ ຊິໂນຣົດ ເບັນຈະຊະວະກຸນ - ຫງວຽນບາຕີ, ບ່ອນທີ່ລາວຊອກໄດ້ການເຕີບໃຫຍ່, ການແບ່ງປັນ ແລະ ຄວາມໝາຍໃນການດຳລົງຊີວິດ. ວິວັດແຫ່ງການເຮັດວຽກຢູ່ຫວຽດນາມຂອງລາວ ບໍ່ພຽງແຕ່ແມ່ນເລື່ອງລາວຂອງການນຳ ຫຼືຜູ້ໃຈບຸນເທົ່ານັ້ນ, ຫາກຍັງມີທັງຫົວໃຈອາສາສະໝັກກາຍເປັນຂົວເຊື່ອມຕໍ່ທີ່ມິດງຽບ ແຕ່ທົນທານ, ຕິດພັນສອງພື້ນຖານວັດທະນະທຳ ຫວຽດນາມ - ໄທ. ແລະເຖິງວ່າຈະຢູ່ໃສ, ລາວກໍ່ຈະສືບຕໍ່ແຜ່ກະຈາຍບັນດາຄຸນຄ່າວັດທະນະທຳມະນຸດ, ເຊື່ອມຕໍ່ລະຫວ່ງຄົນກັບຄົນ.
