ໃນ 4 ວັນທີ່ດຳເນີນຊຸດບຳລຸງສ້າງ, ບັນດາຄູ່ຮ່ວມງານຝ່າຍ ຫວຽດນາມ ໄດ້ແນະນຳລາຍລະອຽດ, ແບ່ງປັນບົດຮຽນປະສົບການທັງດ້ານທິດສະດີ ແລະ ການປະຕິບັດຕົວຈິງກ່ຽວກັບບັນດາທັກສະການດຳເນີນອາຊີບທີ່ຈຳເປັນໃນສະພາບການຫັນສື່ມວນຊົນເປັນດີຈີຕອນ ໃຫ້ບັນດາຜູ້ທີ່ເຮັດວຽກງານ ສື່ມວນຊົນ ກຳປູເຈຍ.
ສຽງຂອງຄູສອນ ໂດວັນທ້ຽນ, ອະດີດຮອງເລຂາທິການກອງບັນນາທິການໃຫຍ່ ໜັງສືພິມກົດໝາຍ ນະຄອນໂຮ່ຈີມິນ ດັງຂຶ້ນໃນຫ້ອງຮຽນ, ສະຫຼັບກັບສຽງແລກປ່ຽນ, ສຽງຫົວມ່ວນ ເມື່ອມີຜູ້ໃດໜຶ່ງຫາກໍ່ສ້າງສ້ເລັດວີດີໂອສັ້ນໆດ້ວຍສະມາດໂຟນຂອງຕົນ. ນັ້ນແມ່ນບັນຍາກາດທີ່ຊິນເຄີຍໃນຕະຫຼອດໄລຍະ 4 ວັນຂອງຊຸດບຳລຸງສ້າງ. ນັກຂ່າວ Yan Yeat, ມາຈາກແຂວງ Tboung Khmum (ກຳປູເຈຍ) ແບ່ງປັນວ່າ:
ຂ້າພະເຈົ້າຄິດວ່າມີສອງທັກສະທີ່ຕົນເອງຮຽນໄດ້ ແລະ ນຳໃຊ້ດີພໍສົມຄວນໃນຊຸດບຳລຸງສ້າງຄັ້ງນີ້. ທີໜຶ່ງແມ່ນ AI, ຄູສອນໄດ້ອະທິບາຍລາຍລະອຽດກ່ຽວກັບວິທີການນຳໃຊ້ AI ໃນສື່ມວນຊົນ. ທີສອງແມ່ນວິທີຖ່າຍວີດີໂອ. ໃນເມື່ອກ່ອນ, ຂ້າພະເຈົ້າບໍ່ຮູ້ວ່າຕົນເອງຕ້ອງຖ່າຍເປົ້າໝາຍໃດແດ່, ວາງມູມກອງຖຢູ່ໃສ, ພາຍຫຼັງຊຸດບຳລຸງສ້າງນີ້, ຂ້າພະເຈົ້າໄດ້ມີຄວາມຮູ້ຕື່ມອີກຫຼາຍຢ່າງ.
ບັນດາຄວາມຮູ້ສຶກຂອງ ນັກຂ່າວ Yan Yeat ບໍ່ແມ່ນໂດຍບັງເອີນ, ຫາກມາຈາກຊຸດຝືກອົບຮົບທີ່ໄດ້ອອກແບບຢ່າງມີວິທະຍາສາດ. ຊຸດບຳລຸງສ້າງໂດຍ ກົມສື່ມວນຊົນ (ກະຊວງວັດທະນະທຳ, ກິລາ ແລະ ການທ່ອງທ່ຽວ ຫວຽດນາມ) ຈັດຂຶ້ນແຕ່ວັນທີ 27 ຫາວັນທີ 30 ກໍລະກົດ 2026 ຢູ່ນະຄອນໂຮ່ຈີມິນ ທີ່ສະຫງວນໃຫ້ແກ່ພະນັກງານຄຸ້ມຄອງການຖະແຫຼງຂ່າວ ແລະ ນັກຂ່າວ 27 ຄົນທີ່ມາຈາກບັນດາແຂວງ, ນະຄອນຂອງ ກຳປູເຈຍ, ເຊິ່ງນອນໃນຂອບເຂດບົດບັນທຶກຊ່ວຍຈຳວ່າດ້ວຍການຮ່ວມມືລະຫວ່າງກະຊວງວັດທະນະທຳ, ກິລາ ແລະ ການທ່ອງທ່ຽວ ຫວຽດນາມ ແລະ ກະຊວງຖະແຫຼງຂ່າວ ລາຊະອານາຈັກ ກຳປູເຈຍ ໄລຍະ 2026 – 2030. ໃນໄລຍະເວລາ 4 ມື້, ບັນດານັກສຳມະນາກອນໄດ້ເຂົ້າເຖິງບັນດາຄວາມຮູ້ ແລະ ທັກສະໂດຍພື້ນຖານກ່ຽວກັບສື່ມວນຊົນດີຈີຕອນ: ການດຳເນີນອາຊີບຫຼາຍຮູບແບບດ້ວຍອຸປະກອນມືຖື, ການຂຽນຂ່າວສັ້ນ, ການຖ່າຍພາບ, ການຜະລິດ ແລະ ການຕັດຕໍ່ວີດີໂອດ້ວຍສະມາດໂຟນ, ພ້ອມກັບການໝູນໃຊ້ບັນດາເຄື່ອງມືດີຈີຕອນ, ປັນຍາປະດິດເຂົ້າໃນການເຄື່ອນໄຫວວຽກງານປະຈຳວັນ. ຕາມທ່ານ Phon Sareth ມາຈາກພະແນກຖະແຫຼງຂ່າວນະຄອນຫຼວງ ພະນົມເປັນ ແລ້ວ ຊຸດບຳລຸງສ້າງກໍ່ສະໜອງຫຼາຍເນື້ອໃນທີ່ເປັນປະໂຫຍດ ແລະ ດຶງດູດໃຈ.
ຂ້າພະເຈົ້າຮຽນໄດ້ວິທີການນຳໃຊ້ສະມາດໂຟນເພື່ອຜະລິດບັນດາຜະລິດຕະພັນ ສື່ມວນຊົນຕື່ມອີກ. ມັນຊ່ວຍໃຫ້ພວກເຮົາຂຽນຂ່າວໄວ, ຖ່າຍພາບ, ຖ່າຍວີດີໂອ, ອັດສຽງ ທີ່ມີຄຸນນະພາບດີ, ບໍ່ຕ້ອງກະກຽມເຄື່ອງມືອາຊີບທີ່ສັບສົນ ຫຼື ຮຽກຮ້ອງຕ້ອງມີພະນັກງານຫຼາຍຄົນເກີນໄປ.
ໂດຍແມ່ນຄູສອນໂດຍກົງໃນຊຸດຝຶກອົບຮົມ, ນັກຂ່າວ ໂດວັນທ້ຽນ ອະດີດຮອງບັນນາທິການໃຫຍ່ ໜັງສືພິມກົດໝາຍ ນະຄອນໂຮ່ຈີມິນ ຮູ້ສຶກໄດ້ຄວາມສຸດຈິດສຸດໃຈຈາກນັກສຳມະນາກອນ, ບັນດາຄູ່ຮ່ວມອາຊີບ ກຳປູເຈຍ ຢ່າງຈະແຈ້ງ.
ຂ້າພະເຈົ້າສະແດງຄວາມຊົມເຊີຍຕໍ່ຈິດໃຈຮ່ຳຮຽນຂອງບັນດາເພື່ອນ ກຳປູເຈຍ. ພວກເພື່ອນຮຽນ ໄດ້ແລກປ່ຽນ, ປຶກສານຳກັນຢ່າງຟົດຟື້ນ. ເມື່ອໄດ້ຮັບວຽກບ້ານໃນຕ່ອນທ່ຽງ ຫຼື ຕອນຄ່ຳ, ພວກເພື່ອນລ້ວນແຕ່ຍາດເວລາເພື່ອປະຕິບັດ ແລະ ຜົນໄດ້ຮັບແມ່ນມີບັນດາຜະລິດຕະພັນບົດຂຽນ, ພາບຖ່າຍ, ວີດີໂອທີ່ມີຊີວິດຊີວາ, ແທດຈິງຫຼາຍ.
ຈາກຈິດໃຈຮ່ຳຮຽນທີ່ຟົດຟື້ນນັ້ນ, ຊຸດບຳລຸງສ້າງໄດ້ອັດລົງດ້ວຍບັນດາໝາກຜົນເຊິ່ງທັງສອງຝ່າຍຮັບຮູ້. ກ່າວຄຳເຫັນທີ່ພິທີອັດຊຸດບຳລຸງສ້າງ, ທ່ານ ລຶວດິ່ງຟຸກ, ຫົວໜ້າກົມສື່ມວນຊົນ (ກະຊວງວັດທະນະທຳ, ກິລາ ແລະ ການທ່ອງທ່ຽວ ຫວຽດນາມ) ເນັ້ນໜັກວ່າ:
ຂ້າພະເຈົ້າດີໃຈຫຼາຍເມື່ອໄດ້ຮູ້ວ່າ ພາຍຫຼັງຊຸດບຳລຸງສ້າງ ນັກສຳມະນາກອນໄດ້ຕີລາຄາວ່າ ນີ້ແມ່ນຫົວຂໍ້ທີ່ດຶງດູດໃຈ, ຈຳເປັນ ແລະ ສົດໆຮ້ອນໆ ເພື່ອໃຫ້ບັນດານັກຂ່າວ ກຳປູເຈຍ ອັບເດດຄວາມຮູ້ຕື່ມ, ຍົກສູງຄວາມສາມາດ, ລະດັບວິຊາການໃນການເຄື່ອນໄຫວສື່ມວນຊົນ. ຜົນສຳເລັດຂອງຊຸດບຳລຸງສ້າງສື່ມວນຊົນແມ່ນໄມ້ຫຼາວັດແທກລັກສະນະປະສິດທິຜົນຂອງບົດບັນທຶກຊ່ວຍຈຳວ່າດ້ວຍການຮ່ວມມືໃນຂົງເຂດຖະແຫຼງຂ່າວ ແລະ ສື່ມວນຊົນໂດຍສອງກະຊວງລົງນາມ, ແມ່ນພື້ນຖານເພື່ອໃຫ້ພວກເຮົາເປີດກວ້າງ ແລະ ເພີ່ມທະວີການຮ່ວມມືລະຫວ່າງສອງກະຊວງໃນໄລຍະໃໝ່.
ຊຸດບຳລຸງສ້າງ 4 ວັນ ເຖິງວ່າຈະສັ້ນ, ແຕ່ໄດ້ສ້າງຄວາມປະທັບໃຈທີ່ດີງາມໃຫ້ແກ່ລັນດາສຳມະນາກອນ ນັບແຕ່ທັກສະດຳເນີນອາຊີບທີ່ຫາກໍ່ໄດ້ຮຽນຮູ້ຈາກຊຸດຝືກອົບຮົບ, ກີ່ນຫອມຂອງຈອກກາເຟ ຫວຽດນາມ ໃນເວລາພັກຜ່ອນ, ຕະຫຼອດຮອດຂົວເຊື່ອມຕໍ່ລະຫວ່າງສອງພື້ນຖານສື່ມວນຊົນ… ທຸກສິ່ງເຫຼົ່ານີ້ຈະສືບຕໍ່ຮ່ວມເດີນທາງພ້ອມກັບນັກຂ່າວ ກຳປູເຈຍ 27 ຄົນບົນເສັ້ນທາງ ດຳເນີນອາຊີບໃນຂ້າງໜ້າ.
