ເນື່ອງໃນໂອກາດນີ້, ນັກຂ່າວວິທະຍຸກະຈາຍສຽງ ຫວຽດນາມ ໄດ້ມີການສຳພາດ ທ່ານ Uch Leang, ຮັກສາການຫົວໜ້າກົມຄົ້ນຄ້ວາ ອາຊີ - ອາຟະລິກາ ແລະ ພາກພື້ນຕາເວັນອອກກາງ, ສະຖາບັນການພົວພັນສາກົນ ກຳປູເຈຍ, ສະຖາບັນດິດພະບໍລົມວົງສານຸວົງ ກຳປູເຈຍ, ທັງເປັນປະທານສະມາຄົມອະດີດນັກສຶກສາ ກຳປູເຈຍ ຮ່ຳຮຽນຢູ່ ຫວຽດນາມ ກ່ຽວກັບບົດບາດ ແລະຄວາມສຳຄັນຂອງ ອາຊຽນ ທີ່ມີຕໍ່ການພັດທະນາຂອງ ຫວຽດນາມ ແລະ ກຳປູເຈຍ ກໍ່ຄືບັນດາການປະກອບສ່ວນອັນພົ້ນເດັ່ນຂອງສອງປະເທດໃນກອງປະຊຸມຄັ້ງນີ້.
ຕາມການຕີລາຄາຂອງ ນັກຮຽນຮູ້ Uch Leang ແລ້ວ, ໃນສະພາບການທົ່ວໂລກທີ່ເຕັມໄປດ້ວຍການຜັນແປ, ອາຊຽນ ສືບຕໍ່ຢັ້ງຢືນທີ່ຕັ້ງແມ່ນໜຶ່ງໃນບັນດາພາກພື້ນຂະຫຍັນຂັນເຄື່ອນທີ່ສຸດໃນໂລກ. ເມື່ອຕີລາຄາສູງຄວາມສຳຄັນຂອງ ອາຊຽນ ຕໍ່ການພັດທະນາຂອງ ຫວຽດນາມ ແລະ ກຳປູເຈຍ, ທ່ານໃຫ້ຮູ້ວ່າ ອາຊຽນ ນຳມາເຊິ່ງຜົນປະໂຫຍດຢ່າງແທ້ຈິງໃນຫຼາຍດ້ານຄື: ເປີດກວ້າງຕະຫຼາດສົ່ງອອກ, ດຶງດູດການລົງທຶນຕ່າງປະເທດ, ຖ່າຍທອດເຕັກໂນໂລຢີ, ພັດທະນາຊັບພະຍາກອນມະນຸດ ແລະ ເຂົ້າຮ່ວມບັນດາລະບົບຕ່ອງໂສ້ມູນຄ່າໃນພາກພື້ນ.
“ປັດຈຸບັນອາຊຽນ ຢືນອັນດັບທີ 5 ໃນທົ່ວໂລກກ່ຽວກັບຂອບຂະໜາດ GDP. ພາກພື້ນ ອາຊຽນ + 3 ສືບຕໍ່ພົ້ນເດັ່ນຂຶ້ນຄືດັ່ງໜຶ່ງໃນບັນດາຕະຫຼາດໃຫຍ່ທີ່ສຸດຢູ່ໂລກ, ດ້ວຍລະດັບການເຕີບໂຕເສດຖະກິດຂຶ້ນເຖິງ 4,5% ໃນປີ 2025, ໄດ້ຮັບການຊຸກຍູ້ຢ່າງແຮງຍ້ອນການຫັນເປັນດີຈີຕອນ, ເສດຖະກິດສີຂຽວ, ລະບົບຕ່ອງໂສ້ການສະໜອງໃນພາກພື້ນ ແລະ ຄວາມຕ້ອງການທີ່ນັບມື້ນັບສູງສຳລັບບັນດາຜະລິດຕະພັນກະເສດ, ປ່າໄມ້, ສິນໃນນ້ຳ, ບັນດາຂົງເຂດເຊິ່ງທັງ ຫວຽດນາມ ແລະ ກຳປູເຈຍ ລ້ວນແຕ່ມີທ່າໄດ້ປຽບໃນການແກ້ງແຍ້ງຢ່າງຈະແຈ້ງ.”
ນັກຮຽນຮູ້ Uch Leang ຢັ້ງຢືນວ່າ ການພັດທະນາຂອງທັງ ຫວຽດນາມ ແລະ ກຳປູເຈຍ ແມ່ນບໍ່ສາມາດຕັດແຍກອອກຈາກຄວາມວັດທະນາຖາວອນລວມຂອງທັງພາກພື້ນ ອາຊຽນໄດ້.
ໂດຍເນັ້ນໜັກເຖິງນ້ຳໃຈສາມັກຄີເຊິ່ງສອງປະເທດ ຫວຽດນາມ - ກຳປູເຈຍ ໄດ້ຮັກສາໃນຕະຫຼອດຊຸມປີຜ່ານມາ, ນັກຮຽນຮູ້ Uch Leang ໃຫ້ຮູ້ວ່າ ນີ້ແມ່ນແບບຢ່າງທີ່ໃສແຈ້ງໃນພາກພື້ນ. ທີ່ກອງປະຊຸມສຸດຍອດ ອາຊຽນ ຄັ້ງທີ 48 ທີ່ໄດ້ດຳເນີນໃນສະພາບການໂລກມີການຜັນແປຫຼາຍຢ່າງ, ຫວຽດນາມ ແລະ ກຳປູເຈຍ ໄດ້ມີການປະກອບສ່ວນອັນໂດດເດັ່ນ. ນັກຮຽນຮູ້ Uch Leang ໃຫ້ຂໍ້ສັງເກດວ່າ:
“ສຳລັບຝ່າຍ ຫວຽດນາມ, ທ່ານນາຍົກລັດຖະມົນຕີ ເລມິງຮຶງ ໄດ້ຍົກອອກບັນດາຂໍ້ສະເໜີລະອຽດ, ມີລັກສະນະສ້າງສັນ ແລະ ທັນການ ເພື່ອແນໃສ່ຊຸກຍູ້ວິວັດການສ້າງປະຊາຄົມ ອາຊຽນ, ປະກອບສ່ວນປັບປຸງຄວາມເຂັ້ມແຂງດ້ວຍຕົນເອງ, ຍົກສູງຄວາມສາມາດຮັບມືຂອງພາກພື້ນ ຕໍ່ໜ້າບັນດາສິ່ງທ້າທາຍຫຼາຍດ້ານໃນປັດຈຸບັນ, ພິເສດແມ່ນບັນດາຜົນກະທົບຈາກການປະທະກັນຢູ່ພາກພື້ນຕາເວັນອອກກາງ ຕໍ່ກັບຄວາມໝັ້ນຄົງດ້ານພະລັງງານ, ສະບຽບອາຫານ ແລະ ລະບົບຕ່ອງໂສ້ການສະໜອງໃນທົ່ວໂລກ. ສຳລັບຝ່າຍ ກຳປູເຈຍ, ທ່ານນາຍົກລັດຖະມົນຕີ ໄດ້ເນັ້ນໜັກເຖິງຄວາມຕ້ອງການໃນການຮັກສາຄວາມສາມັກຄີພາຍໃນກຸ່ມ ແລະ ຊອກຫາມາດຕະການລວມໃຫ້ບັນດາສິ່ງທ້າທາຍຕໍ່ຄວາມໝັ້ນຄົງ, ຄວາມໝັ້ນຄົງດ້ານພະລັງງານ ແລະ ສະບຽບອາຫານ.”
ບັນດາການປະກອບສ່ວນໃນຕົວຈິງ ແລະ ຄວາມຄ້າຍຄືກັນລະຫວ່າງ ຫວຽດນາມ ແລະ ກຳປູເຈຍ ໄດ້ປະກອບສ່ວນສຳຄັນເຂົ້າໃນການຮັບຮອງເອົາເອກະສານຫຼາຍສະບັບຂອງກອງປະຊຸມຄື: ອະນຸສັນຍາ ເຊບູ, ບັນດາຖະແຫຼງການກ່ຽວກັບການຮ່ວມມືໃນການເດີນເຮືອ, ການຮັບມືກັບວິກິດການຢູ່ຕາເວັນອອກກາງ, ການມອບສິດໃຫ້ແກ່ຊາວໜຸ່ມໃນການກະທຳເພື່ອດິນຟ້າອາກາດ, ການຮ່ວມມືເພື່ອຮັບມືກັບໄພພິບັດທຳມະຊາດ ແລະ ອະນຸສັນຍາຍຸດທະສາດກ່ຽວກັບການຫັນປ່ຽນຮອບດ້ານ. ເມື່ອສັງເກດກ່ຽວກັບແງ່ຫວັງໃນອະນາຄົດ, ນັກຮຽນຮູ້ Uch Leang ສະເໜີບຸລິມະສິດຈຳນວນໜຶ່ງໃນການຮ່ວມມືລະຫວ່າງ ຫວຽດນາມ ແລະ ກຳປູເຈຍ ເພື່ອບໍ່ພຽງແຕ່ຊຸກຍູ້ການພັດທະນາແບບຍືນຍົງຢູ່ແຕ່ລະປະເທດເທົ່ານັ້ນ ຫາກຍັງປະກອບສ່ວນເຂົ້າໃນວິວັດການພັດທະນາລວມຂອງ ອາຊຽນ ອີກດ້ວຍ.
“ຫວຽດນາມ ແລະ ກຳປູເຈຍ ອາດຊຸກຍູ້ການຮ່ວມມືຢ່າງເລິກເຊິ່ງກວ້າງຂວາງໃນຫຼາຍຂົງເຂດບຸລິມະສິດ. ກ່ອນອື່ນໝົດ, ການຄ້າ ແລະ ການລົງທຶນແມ່ນຂົງເຂດຫຼັກແຫຼ່ງ ແລະ ມີຄວາມສາມາດບົ່ມຊ້ອນຫຼາຍທີ່ສຸດ. ສອງປະເທດພວກເຮົາພວມມຸ່ງໄປເຖິງເປົ້າໝາຍວົງເງິນການຄ້າສອງຝ່າຍບັນລຸ 20 ຕື້ USD ໃນຊຸມປີຕໍ່ໄປ. ທີສອງ, ຫວຽດນາມ ພວມຮັກສາທ່າເຕີບໂຕທີ່ໜ້າປະທັບໃຈ, ບັນລຸລະດັບກວ່າ 8% GDP ປີ 2025 ແລະ ມີແງ່ຫວັງບັນລຸລະດັບເຕີບໂຕແຕ່ 10% ຂຶ້ນໄປໃນຊຸມປີຕໍ່ໄປ, ກາຍເປັນໜຶ່ງໃນບັນດາພື້ນຖານເສດຖະກິດຂະຫຍັນຂັນເຄື່ອນທີ່ສຸດໃນພາກພື້ນ. ນີ້ແມ່ນໂອກາດເພື່ອໃຫ້ ກຳປູເຈຍ ໝູນໃຊ້ຮູບແບບ “ຫວຽດນາມ + ກຳປູເຈຍ” ຫຼື “ຫວຽດນາມ + 1”.”
ນັກຮຽນຮູ້ Uch Leang ເຊື່ອໝັ້ນວ່າ ການເພີ່ມທະວີການຮ່ວມມືສອງຝ່າຍ ຫວຽດນາມ - ກຳປູເຈຍ ແລະ ການຮ່ວມມືຢູ່ເຂດອະນຸພາກພື້ນ ບໍ່ພຽງແຕ່ສ້າງກຳລັງໜູນໃນການເຕີບໂຕໃຫ້ແຕ່ລະປະເທດເທົ່ານັ້ນ ຫາກຍັງກາຍເປັນແບບຢ່າງທີ່ດີໃຫ້ແກ່ບັນດາປະເທດສະມາຊິກ ອາຊຽນ ອື່ນອີກ, ປະກອບສ່ວນສ້າງປະຊາຄົມ ອາຊຽນ ສາມັກຄີ, ສ້າງຄວາມເຂັ້ມແຂງດ້ວຍຕົນເອງ ແລະ ວັດທະນາຖາວອນອີກດວ້ຍ.
