ໃນໄລຍະເຄິ່ງສະຕະວັດແຫ່ງການພົວພັນທາງການທູດ ຫວຽດນາມ -ໄທ, ຄຽງຄູ່ກັບບັນດາຂີດໝາຍຮ່ວມມືດ້ານການເມືອງ, ເສດຖະກິດແລ້ວ, ມີຫຼາຍຄົນຍັງປະກອບສ່ວນຢ່າງມິດງຽບເຂົ້າໃນການເຊື່ອມຕໍ່ສອງຊາດດ້ວຍພາສາ, ວັດທະນະທຳ ແລະ ນ້ຳໃຈອັນຈິງໃຈ. ຄູສອນ ໂດຖຸຍຮ່າ ຜູ້ທີ່ສິດສອນພາສາຫວຽດ ຢູ່ ໄທ ເປັນເວລາກວ່າ 25 ປີ - ແມ່ນໜຶ່ງໃນບັນດາຂົວເຊື່ອມຕໍ່ອັນໜຽວແໜ້ນ. ບໍ່ພຽງແຕ່ນຳພາສາຫວຽດ ໄປເຖິງເພື່ອນມິດ ໄທ ເທົ່ານັ້ນ, ລາວຍັງນຳເອົາວັດທະນະທຳ ຫວຽດນາມ ເຂົ້າໃນຊີວິດປະຈຳວັນຂອງໄວໜຸ່ມ ໄທ ອີກດ້ວຍ.
ຊົ່ວໂມງຮຽນພາສາຫວຽດ ຢູ່ສູນພາສາ ແລະ ຄວາມຮູ້ ຫວຽດນາມ (VLK) ທີ່ ບາງກອກ ໄດ້ເຈາະຈີ້ຫຼາຍສິ່ງທີ່ຈັບໃຈເພື່ອໃຫ້ຄູ ແລະ ນັກຮຽນພ້ອມກັນຄົ້ນຫາ. ນັ້ນແມ່ນວິທີເຊິ່ງ ຄູ ໂດຖຸຍຮ່າ ນຳໃຊ້ເພື່ອໃຫ້ປະເທດຊາດ ແລະ ຊາວຫວຽດນາມ ມີຄວາມໃກ້ຊິດ, ມີຊີວິດຊີວາກວ່າໃນສາຍຕາຂອງຊາວໄທ. ຄູ ຖຸຍຮ່າ ແບ່ງປັນວ່າ ໃນຊຸມປີທ້າຍຂອງໄລຍະ 1990 – 1999, ການສອນພາສາຫວຽດ ຢູ່ມະຫາວິທະຍາໄລຈຸລາລົງກອນ, ເຊິ່ງແມ່ນໜຶ່ງໃນບັນດາມະຫາວິທະຍາໄລແຖວໜ້າຂອງ ໄທ ປະສົບກັບຄວາມຫຍຸ້ງຍາກຫຼາຍຢ່າງ. ເອກະສານພາສາຫວຽດ ຫາຍາກ, ອິນເຕີເນັດບໍ່ທັນເປັນທີ່ຮູ້ຈັກທົ່ວໄປ, ພາບພົດກ່ຽວກັບ ຫວຽດນາມ ສ່ວນຫຼາຍແມ່ນຕິດພັນກັບຄວາມຊົງຈຳກ່ຽວກັບສົງຄາມ ແລະ ເລື່ອງລາວກ່ຽວກັບປະຫວັດສາດ. ຈາກຄວາມຈິງແຫ່ງການສິດສອນ, ຄູ ໂດຖຸຍຮ່າ ໄດ້ຮັບຮູ້ແຕ່ຫົວທີວ່າ ການສອນພາສາຫວຽດ ບໍ່ພຽງແຕ່ແມ່ນການສອນຄຳສັບ, ໄວຍະກອນເທົ່ານັ້ນ ຫາກຍັງແມ່ນການສອນກ່ຽວກັບວິທີຄິດ, ວິຖີດຳລົງຊີວິດຂອງຄົນຫວຽດ ອີກດ້ວຍ.
ການພົວພັນທາງການທູດລະຫວ່າງ ຫວຽດນາມ - ໄທ ໃນຕະຫຼອດໄລຍະ 50 ປີຜ່ານມາ ບໍ່ພຽງແຕ່ແມ່ນບບັນດາຕົວເລກເທົ່ານັ້ນ. ຫາກໃນວິວັດແຫ່ງການດຳລົງຊີວິດ ແລະ ເຮັດວຽກໃນຂົງເຂດການສຶກສາກວ່າ 25 ປີຢູ່ ໄທ ຂ້າພະເຈົ້າໄດ້ເຫັນການປ່ຽນແປງຢ່າງຈະແຈ້ງຈາກນັກສຶກສາລຸ້ນຕ່າງໆ. ບັນດານັກສຶກສາລຸ້ນທຳອິດທີ່ຂ້າພະເຈົ້າສິດສອນສ່ວນຫຼາຍແມ່ນນັກຄົ້ນຄ້ວາ, ນັກສຶກສາຮຽນກ່ຽວກັບວັນນະຄະດີ ຫວຽດນາມ ຫຼືປະຫວັດສາດ ຫວຽດນາມ… ເຖິງຢ່າງໃດກໍຕາມ, ນັກສຶກສາລຸ້ນຕໍ່ມາຂອງ ໄທ ພັດມີຄວາມເອົາໃຈໃສ່ເຖິງພາສາ, ການທ່ອງທ່ຽວ, ອາຫານການກິນ, ດົນຕີ ແລະ ແຟຊັ່ນ ຂອງຫວຽດນາມ ຫຼາຍກວ່າ. ສິ່ງດັ່ງກ່າວສະແດງໃຫ້ເຫັນວ່າພາບພົດຂອງ ຫວຽດນາມ ໃນຄວາມຮັບຮູ້ຂອງຊາວໄທ ໄດ້ຄ່ອຍໆປ່ຽນແປງ, ຈາກປະເທດທີ່ໄດ້ຮັບການຮູ້ຈັກສ່ວນຫຼາຍແມ່ນຜ່ານປຶ້ມ, ການຄົ້ນຄ້ວາ ແລະ ປະຫວັດສາດ, ປັດຈຸບັນໄດ້ມີຄວາມໃກ້ຊິດ, ມີຊີວິດຊາ ແລະ ປະກົດຕົວຫຼາຍກວ່າໃນຊີວິດປະຈຳວັນຂອງໄວໜຸ່ມ ໄທ.
ຈາກນັ້ນ, ໃນແຕ່ລະບົດສອນພາສາຫວຽດ, ຄູ ຮ່າເຄີຍແນະນຳເລື່ອງລາວກ່ຽວກັບປະຊາຊົນ, ງານບຸນ, ຮີດຄອງປະເພນີ, ຊີວິດປະຈຳວັນຂອງ ຊາວຫວຽດນາມ ຢ່າງມີຊີວິດຊີວາ. ກວ່າສອງທົດສະວັດທີ່ຕິດພັນກັບການສິດສອນ, ຄູ ຮ່າ ໄດ້ເຫັນປະຈັກຕາການປ່ຽນແປງໃນວິທີທີ່ໄວໜຸ່ມ ໄທ ຮັບຮູ້ກ່ຽວກັບ ຫວຽດນາມ - ຈາກປະເທດທີ່ຕິດພັນກັບປະຫວັດສາດ, ໄປສູ່ປະເທດທີ່ຂະຫຍັນຂັນເຄື່ອນ, ເຕັມໄປດ້ວຍພະລັງຊີວິດ ແລະ ຄວາມໃກ້ຊິດ.
ນັກສຶກສາລຸ້ນຕໍ່ມາເອົາໃຈໃສ່ຫຼາຍກວ່າເຖິງພາສາ, ການທ່ອງທ່ຽວ, ອາຫານການກິນ, ດົນຕີ, ແຟຊັ່ນຂອງ ຫວຽດນາມ . ສິ່ງດັ່ງກ່າວສະແດງໃຫ້ເຫັນວ່າການພົວພັນສອງປະເທດບໍ່ພຽງແຕ່ຢຸດຢູ່ການພົວພັນທາງການທູດເທົ່ານັ້ນ, ຫາກໄດ້ກາຍເປັນສ່ວນໜຶ່ງໃນຊີວິດປະຈຳວັນຂອງໄວໜຸ່ມໄທອີກດ້ວຍ.
ບໍ່ພຽງແຕ່ສິດສອນຢູ່ມະຫາວິທະຍາໄລເທົ່ານັ້ນ, ແຕ່ຕົ້ນຊຸມປີ 2000, ຄູ ໂດຖຸຍຮ່າ ໄດ້ສ້າງຕັ້ງສູນພາສາ ແລະ ຄວາມຮູ້ ຫວຽດນາມ (VLK) ຢູ່ບາງກອກອີກ, ໂດຍເລີ່ມມາຈາກຄວາມຮຽກຮ້ອງຕ້ອງການຕົວຈິງຂອງຜູ້ທີ່ມີຄວາມຮັກຕໍ່ ຫວຽດນາມ ແຕ່ບໍ່ມີບ່ອນເພື່ອຮຽນພາສາ ຫວຽດນາມ ແລະ ຊອກຮູ້ວັດທະນະທຳຫວຽດນາມ. VLK ຄ່ອຍໆກາຍເປັນ “Vietnam Corner” ຢູ່ໃຈກາງ ບາງກອກ ບ່ອນທີ່ຊາວໄທ, ຊາວຫວຽດນາມ ແລະ ເພື່ອນມິດສາກົນອາດສາມາດພົບປະ, ຮຽນພາສາ, ເບິ່ງໜັງ, ຟັງດົນຕີ, ພ້ອມກັນແບ່ງປັນຄວາມຮັກຕໍ່ປະເທດ ຫວຽດນາມ.
ເປົ້າໝາຍຂອງສູນບໍ່ພຽງແຕ່ຢຸດຢູ່ການສອນພາສາຫວຽດເທົ່ານັ້ານ ຫາກຍັງແມ່ນສະຖານທີ່ແຫ່ງໜຶ່ງຢູ່ ບາງກອກ ເພື່ອໃຫ້ຊາວໄທ ທີ່ມີຄວາມຮັກຕໍ່ ຫວຽດນາມ, ແລະຊາວຫວຽດນາມ ສາມາດມາພົບປະແລກປ່ຽນ, ແບ່ງປັນ ເພື່ອເຂົ້າໃຈ ຫວຽດນາມ ກວ່າອີກ. ຢູ່ສູນທຸກຄົນສາມາດຢືມ, ເບິ່ງວີດີໂອ, ໜັງ, ຟັງດົນຕີ, ຢືມປຶ້ມ, ເວົ້າພາສາຫວຽດ ຫຼືດື່ມກາເຟ. ໃນວັນບຸນສຳຄັນຂອງ ຫວຽດນາມ ຄືບຸນເຕັດປະເພນີ, ບຸນຫໍ່ເຂົ້າປະດັບດິນ, ວັນຊາດ... ສູນກໍ່ຈັດບັນດາກິດຈະກຳນ້ອຍໆ ເພື່ອໃຫ້ທຸກຄົນເຂົ້າຮ່ວມຊອກຮູ້ ແລະ ເຊື່ອມຕົວເຂົ້າກັບບັນຍາກາດວັດທະນະທຳ ຫວຽດນາມ ໂດຍບໍ່ເກັບຄ່າ.
ສານທີ່ລຽບງ່າຍແຕ່ເລິກເຊິ່ງທີ່ ຄູ ໂດຖຸຍຮ່າ ຢາກສົ່ງເຖິງຜູ້ຊົມຜ່ານບັນດາກິດຈະກຳຂອງສູນ ນັ້ນແມ່ນ ບໍ່ຈຳເປັນຕ້ອງເລີ່ມຈາກສິ່ງທີ່ໃຫຍ່ໂຕເທົ່ານັ້ນ ຫາກນ້ຳໃຈມິດຕະພາບລະຫວ່າງສອງຊາດທີ່ໄດ້ຮັບການປູກລ້ຽງຈາກສິ່ງທີ່ລຽບງ່າຍໃນຊີວິດປະຈຳວັນ.
ນ້ຳໃຈມິດຕະພາບບໍ່ພຽງແຕ່ສະແດງໃຫ້ເຫັນຢູ່ເວທີປາໄສໃຫຍ່ ຫຼືຄຳເວົ້າທີ່ດີງາມ, ຫາກຍັງຢູ່ໃນຊີວິດປະຈຳວັນ - ໃນສຽງດົນຕີທີ່ເຮົາໄດ້ຟັງ, ອາຫານທີ່ເຮົາມັກ, ວິຖີດຳລົງຊີວິດທີ່ເຮົາຮຽນໄດ້ ແລະ ຄວາມເຄົາລົບນັບຖືທີ່ສະຫງວນໃຫ້ກັນ.
ກວ່າ 25 ປີທີ່ສອນພາສາຫວຽດ ຢູ່ປະເທດ ໄທ, ຄູ ໂດຖຸຍຮ່າ ໄດ້ປະກອບສ່ວນນຳ ຫວຽດນາມ ຫຍັບໃກ້ເຂົ້າກັບເພື່ອນມິດ ໄທ ດ້ວຍພາສາ, ວັດທະນະທຳ ແລະ ຄວາມເຂົ້າໃຈກັນ. ເລື່ອງລາວຂອງຄູ ແມ່ນຫຼັກຖານພະຍານທີ່ມີຊີວິດຊີວາກ່ຽວກັບກຳລັງແຮງຂອງການພົບປະແລກປ່ຽນປະຊາຊົນ ພື້ນຖານອັນໝັ້ນແກ່ນເພື່ອໃຫ້ນ້ຳໃຈມິດຕະພາບ ຫວຽດນາມ - ໄທ ສືບຕໍ່ໄດ້ຮັບການເພີ່ມພູນຄູນສ້າງໃນອະນາຄົດ.
