ໂດຍຮ່ວມເດີນທາງພ້ອມກັບປະເທດຊາດມາເປັນເວລາກວ່າ 1 ສະຕະວັດ, ສື່ມວນຊົນປະຕິວັດ ຫວຽດນາມ ບໍ່ພຽງແຕ່ແມ່ນສຽງຂອງພັກ, ລັດ ແລະ ປະຊາຊົນ ຫວຽດນາມ ເທົ່ານັ້ນ, ຫາກຍັງແມ່ນກຳລັງນຳໜ້າໃນແນວຮົບໂຄສະນາສື່ສານການຕ່າງປະເທດ, ປະກອບສ່ວນເພີ່ມທະວີຄວາມເຂົ້າໃຈເຊິ່ງກັນ ແລະ ກັນ ແລະ ປັບປຸງຄວາມສາມັກຄີລະຫວ່າງ ຫວຽດນາມ ກັບເພື່ອນມິດສາກົນ. ໃນນັ້ນ, ຍາມໃດບັນດານັກຂ່າວສອງປະເທດລຸ້ນຕ່າງໆກໍ່ຮັກສາ, ເສີມສ້າງແລະແຜ່ຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ, ການຮ່ວມມືຮອບດ້ານ ຫວຽດນາມ - ລາວ ດ້ວຍບັນດາເລື່ອງລາວທີ່ແທ້ຈິງ ແລະ ເຕັມໄປດ້ວຍຄວາມສະເທືອນໃຈ. ເນື່ອງໃນໂອກາດສະເຫຼີມສະຫຼອງວັນສື່ມວນຊົນປະຕິວັດ ຫວຽດນາມ ຄົບຮອບ 101 ປີ (ວັນທີ 21 ມິຖຸນາ 1925 – 21 ມິຖຸນາ 2026), ເຊີນທ່ານຜູ້ຟັງ ຫວນຄືນໄລຍະທາງທີ່ບັນດານັກຂ່າວ ຫວຽດນາມ ແລະ ລາວ ຮຽງບ່າຮຽງໄຫຼ່ກັນເພື່ອຮັກສາຂົວຕໍ່ນາມມະທຳ ແຕ່ໜຽວແໜ້ນທີ່ສຸດໄວ້ - ນັ້ນແມ່ນຂົວຕໍ່ຂໍ້ມູນຂ່າວສານ, ຂົວຕໍ່ແຫ່ງຄວາມເຂົ້າໃຈເຊິ່ງກັນ ແລະ ກັນ ແລະ ໄມຕີຈິດມິດຕະພາບລະຫວ່າງສອງຊາດອ້າຍນ້ອງ.
ເຖິງວ່າ ປີນີ້, ນັກຂ່າວ ຫງວຽນເຖງຽບ ໄດ້ມີອາຍຸ 80 ກວ່າປີແລ້ວກໍຕາມ…, ແຕ່ເມື່ອອ່ານຄືນບັນດາກາບກອນກ່ຽວກັບໄລຍະເວລາຍັງເປັນນັກຊ່ຽວຊານຢູ່ປະເທດລາວນັ້ນ, ທ່ານກໍ່ຮູ້ສຶກຕື້ນຕັນໃຈ ແລະ ເອກອ້າງທະນົງໃຈທີ່ສຸດ. ໂດຍເປັນນັກຂ່າວສຳນັກຂ່າວສານ ຫວຽດນາມ ປະຈຳຢູ່ ເງະອານ ໃນຊຸມເດືອນປີສົງຄາມອັນດຸເດືອດ, ນັບແຕ່ປີ 1970 – 1973, ທ່ານໄດ້ຮັບແຕ່ງຕັ້ງໃຫ້ໄປລາວ ຊ່ວຍເຫຼືອເພື່ອນກໍ່ສ້າງສຳນັກຂ່າວສານ, ປະກອບສ່ວນສົ່ງຂໍ້ມູນຂ່າວສານທີ່ສຳຄັນເພື່ອຮັບໃຊ້ພາລະກິດຕໍ່ສູ້ປະຕິວັດຂອງປະຊາຊົນສອງປະເທດ… 3 ປີບໍ່ແມ່ນໄລຍະຍາວ, ແຕ່ທ່ານໄດ້ສະຫງວນທັງຊີວິດຂອງຕົນເພື່ອຮຽບຮຽງ, ຄົ້ນຄວ້າ, ສັງລວມບັນດາເລື່ອງລາວ, ເຫດການປະຫວັດສາດຂອງສອງປະເທດ, ພ້ອມກັບປື້ມຫຼາຍຫົວກ່ຽວກັບນ້ຳໃຈມິດຕະພາບ ຫວຽດນາມ - ລາວ . ນັກຂ່າວ ຫງວຽນເຖງຽບ, ເລົ່າສູ່ຟັງວ່າ:
"ວິທະຍຸກະຈາຍສຽງ ຫວຽດນາມ, ສຳນັກຂ່າວສານ ຫວຽດນາມ ແລະ ວິທະຍຸກະຈາຍສຽງ ປະເທດລາວ ມີສາຍພົວພັນພິເສດທີ່ສຸດ ແລະ ມີຄວາມຜູກພັນເລືອດເນື້ອແຕ່ປີ 1954 ມາຮອດປັດຈຸບັນ. ນັບແຕ່ປີ 1954, ນັກຂ່າວ ເຈິ່ນເລິມ (ເຊິ່ງເປັນໜຶ່ງໃນຈຳນວນໜ້ອຍຄົນທີ່ໄດ້ຮັບໜ້າທີ່ ກໍ່ສ້າງຂະແໜງກະຈາຍສຽງ ຫວຽດນາມຈາກ ປະທານ ໂຮ່ຈີມິນ ) ໄດ້ຊ່ວຍເຫຼືອລາວ ກໍ່ສ້າງສະຖານີວິທະຍຸກະຈາຍສຽງຢູ່ຄ້າຍອະນຸຊົນ ດົງດາ. ພວກຂ້າພະເຈົ້າກໍຊ່ວຍເຫຼືອລາວ ຢູ່ຕິດກັບຊາຍແດນ ຊຳເໜືອ. ຫຼັງຈາກນັ້ນ, ເມື່ອ ຊຳເໜືອ ໄດ້ຮັບການປົດປ່ອຍແລ້ວ ກໍຊ່ວຍກໍ່ສ້າງວິທະຍຸກະຈາຍສຽງ ບ້ານບັກ, ພວກຂ້າພະເຈົ້າ ມີສຳນັກຂ່າວສານຕັ້ງຢູ່ ພູແຄ. ທາງຝ່າຍລາວເຮັດໜ້າທີ່ກະຈາຍສຽງ, ສ່ວນພວກຂ້າພະເຈົ້າສະໜອງຂໍ້ມູນຂ່າວສານ ສະນັ້ນ ຈຶ່ງມີສາຍພົວພັນສະໜິດຕິດພັນນຳກັນ, ສອງຖືເປັນໜຶ່ງ, ໜຶ່ງຖືເປັນສອງ. ໃນຊຸມປີ 1962 – 1967, ເມື່ອ ອາເມລິກາ ບຸກໂຈມຕີຢ່າງດຸເດືອດນັ້ນ, ນັກຊ່ຽວຊານ ຫວຽດນາມ ໄດ້ຊ່ວຍລາວ ຍ້າຍສະຖານີວິທະຍຸໄປຍັງ ຍໍກວານ, ນິງບິ່ງ (ຫວຽດນາມ) ເພື່ອຮັບປະກັນໃຫ້ຄື້ນກະຈາຍສຽງບໍ່ຖືກຂາດວັກຂາດຕອນ”.
ບັນດາຄວາມຊົງຈຳຂອງນັກຂ່າວ ຫງວຽນເງງຽບ ບໍ່ພຽງແຕ່ເຕື້ອງເຖິງໄລຍະປະຫວັດສາດທີ່ມີຄວາມສຳຄັນເປັນພິເສດຂອງສື່ມວນຊົນປະຕິວັດສອງປະເທດເທົ່ານັ້ນ, ຫາກຍັງສະແດງໃຫ້ເຫັນຄວາມສາມັກຄີແບບພິເສດ ຫວຽດນາມ - ລາວ ທີ່ໄດ້ຮັບການກໍ່ສ້າງແຕ່ຊຸມວັນທີ່ຫຍຸ້ງຍາກລຳບາກທີ່ສຸດອີກດ້ວຍ. ໃນສະພາບສົງຄາມອັນດຸເດືອດທີ່ສຸດນັ້ນ, ບັນດານັກຂ່າວ ຫວຽດນາມ ແລະ ເພື່ອນຮ່ວມງານລາວ ໄດ້ຮ່ວມຂຸມຕະຄອງດຽວກັນ, ພ້ອມກັນຮັກສາສັນຍານ , ຄື້ນກະຈາຍສຽງບໍ່ໃຫ້ຂາດວັກຂາດຕອນ, ເພື່ອໃຫ້ສຽງຂອງການປະຕິວັດ ດັງກ້ອງກັງວານ ໄປສູ່ປະຊາຊົນສອງປະເທດ ແລະ ເພື່ອນມິດສາກົນ. ກໍໃນຊຸມເດືອນປີນັ້ນ, ຍ້ອນມີການຊ່ວຍເຫຼືອຂອງບັນດານັກຊ່ຽວຊານລາວ, ວັນທີ 12 ຕຸລາ 1954, ລາຍການກະຈາຍສຽງພາກພາສາລາວ ຂອງວິທະຍຸກະຈາຍສຽງ ຫວຽດນາມ ໄດ້ອອກອາກາດຢ່າງເປັນທາງການ.
ດ້ວຍຈິດໃຈຊ່ວຍເພື່ອນແມ່ນຊ່ວຍຕົນເອງ, ບັນດາພະນັກງານ ແລະ ນັກຊ່ຽວຊານ ຫວຽດນາມ ກໍມານະພະຍາຍາມຜ່ານຜ່າທຸກຄວາມຫຍຸ້ງຍາກ, ສິ່ງທ້າທາຍນາໆປະການ ເພື່ອສືບຕໍ່ສ້າງລາຍການກະຈາຍສຽງພາກພາສາຫວຽດນາມ, ວັນທີ 1 ພຶດສະພາ 1966, ລາຍການກະຈາຍສຽງພາກພາສາຫວຽດນາມ ຂອງສະຖານີວິທະຍຸກະຈາຍສຽງແຫ່ງຊາດລາວ ໃນປັດຈຸບັນ ໄດ້ອອກອາກາດລາຍການທຳອິດຢ່າງເປັນທາງການ . ທ່ານ ຄຳໄພ ສຸພາວົງໄຕ ເປັນໜຶ່ງໃນໂຄສົກສອງຄົນທຳອິດຂອງລາຍການ ຍັງຈື່ຈຳຊຸມເດືອນປີທີ່ຜະລິດລາຍການໃນເງື່ອນໄຂຫຍຸ້ງຍາກທີ່ສຸດ, ແຕ່ເຕັມໄປດ້ວຍນ້ຳໃຈເພື່ອນມິດສະຫາຍ, ເພື່ອນຮ່ວມອາຊີບ.
“ນັບແຕ່ວັນວັນທີ 10 ມີນາ 1966, ຂ້າພະເຈົ້າໄດ້ໂຈະການຮຽນໄວ້ ເພື່ອໄປປະຕິບັດໜ້າທີ່ປະຕິວັດ. ອາວ ແຢວງ ຢູ່ວິທະຍຸກະຈາຍສຽງ ຫວຽດນາມ (VOV) ໄດ້ມາແນະນຳວິທີແປຂ່າວໃຫ້ຂ້າພະເຈົ້າ. ເມື່ອແປຂ່າວອອກເປັນພາສາຫວຽດ ແລ້ວ, ອາວ ແຢວງ ຈະກວດແກ້ໃຫ້ ເພື່ອອອກອາກາດລາຍການຂ່າວ ພາກພາສາຫວຽດ. ແຕ່ໃນປີ 1966 ນັ້ນ, ອາເມລິກາ ໄດ້ຖີ້ມລະເບີດລົງໃສ່ນະຄອນ ຮ່າໂນ້ຍ 2 – 3 ຄັ້ງ. ເວລານັ້ນ, ວິທະຍຸກະຈາຍສຽງ ປະເທດລາວ ຕ້ອງຍ້າຍໄປຍັງຖ້ຳ B1, ເມືອງ ຍໍກວານ, ແຂວງ ນິງບິ່ງ (ຫວຽດນາມ). VOV ໄດ້ຊ່ວຍກະກຽມທຸກຢ່າງຄືສະຖານທີ່, ຖ້ຳສຳລັບບັນນາທິການ, ຖ້ຳຕັ້ງເຄື່ອງຮັບສົ່ງສັນຍານເພື່ອໃຫ້ພວກຂ້າພະເຈົ້າຍ້າຍມາປະຕິບັດໜ້າທີ່”.
ຈາກບັນດາຖ້ຳກະຈາຍສຽງໃນປາງສົງຄາມຢູ່ເຂດພູຜາປ່າໄມ້ ຍໍກວານ, ນິງບິ່ງ (ຫວຽດນາມ), ພູແຄ, ຊຳເໜືອ (ລາວ) ໃນຄາວນັ້ນ… ຕະຫຼອດຮອດບັນດາຫ້ອງອັດສຽງທີ່ທັນສະໄໝໃນປັດຈຸບັນ, ບັນດາລາຍການຂ່າວການຕ່າງປະເທດຍັງຄົງສືບຕໍ່ອອກອາກາດ, ປະກອບສ່ວນເພີ່ມທະວີຄວາມເຂົ້າໃຈເຊິ່ງກັນ ແລະ ກັນ, ປັບປຸງຄວາມໄວ້ເນື້ອເຊື່ອໃຈດ້ານການເມືອງ ແລະ ຊຸກຍູ້ການພົບປະແລກປ່ຽນລະຫວ່າງປະຊາຊົນສອງປະເທດ. ພິເສດ, ໃນຂົງເຂດກະຈາຍສຽງ - ເຊິ່ງເປັນປະເພດສື່ສານທີ່ມີລະດັບສົ່ງສັນຍານ ແລະ ກຳລັງແຜ່ກະຈາຍຢ່າງກວ້າງຂວາງ, ສອດຄ່ອງກັບເງື່ອນໄຂພູມີປະເທດທີ່ມີພູຜາປ່າໄມ້ຫຼາຍຄືຢູ່ລາວນັ້ນ - ການຮ່ວມມືລະຫວ່າງ ວິທະຍຸກະຈາຍສຽງ ຫວຽດນາມ ແລະ ສະຖານີວິທະຍຸກະຈາຍສຽງແຫ່ງຊາດລາວ ກໍໍນັບມື້ນັບເຂົ້າສູ່ລວງເລິກ ແລະ ນຳມາເຊິ່ງປະສິດທິຜົນແທດຈິງທີ່ສຸດ. ທ່ານ ຫວູຫາຍກວາງ, ຮອງຜູ້ອຳນວຍການໃຫຍ່ ວິທະຍຸກະຈາຍສຽງ ຫວຽດນາມ ໃຫ້ຮູ້ວ່າ:
“ພາຍຫຼັງປົດປ່ອຍ ເມື່ອປີ 1975, ວິທະຍຸກະຈາຍສຽງ ຫວຽດນາມ ໄດ້ຊ່ວຍເຫຼືອປະເທດເພື່ອນລາວ ກໍ່ສ້າງສະຖານີວິທະຍຸຢູ່ບັນດາແຂວງຄື ຊຽງຂວາງ, ຫົວພັນ ແລະ ບໍລິຄຳໄຊ. ນັບແຕ່ປີ 2008 ມາຮອດປັດຈຸບັນ, ຜ່ານຂໍ້ຕົກລົງວ່າດ້ວຍການຮ່ວມມືສອງຝ່າຍ ຫວຽດນາມ - ລາວ, ແຕ່ລະປີ, ວິທະຍຸກະຈາຍສຽງ ຫວຽດນາມ ໄດ້ຊ່ວຍກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ລາວ ບັນດາໂຄງການເພີ່ມທະວີພື້ນຖານດ້ານວັດຖຸ, ຍົກສູງກຳລັງຄວາມສາມາດຜະລິດລາຍການ ແລະ ເປີດກວ້າງພື້ນທີ່ຮັບສົ່ງສັນຍານກະຈາຍສຽງໃນຂອບເຂດທົ່ວປະເທດ”.
ບັນດາໂຄງການຊ່ວຍເຫຼືອດ້ານເຕັກນິກ, ຍົກສູງຄວາມສາມາດຜະລິດລາຍການ, ເປີດກວ້າງພື້ນທີ່ຮັບສົ່ງສັນຍານກະຈາຍສຽງ ຫຼື ບຳລຸງສ້າງຊັບພະຍາກອນມະນຸດໃຫ້ແກ່ເພື່ອນລາວ ຂອງວິທະຍຸກະຈາຍສຽງ ຫວຽດນາມ ບໍ່ພຽງແຕ່ປະກອບສ່ວນພັດທະນາລະບົບສືື່ມວນຊົນຂອງລາວ ເທົ່ານັ້ນ, ຫາກຍັງສະແດງໃຫ້ເຫັນຈິດໃຈຮ່ວມມືຢ່າງຈິງໃຈ ແລະ ມີປະສິດທິຜົນລະຫວ່າງສອງປະເທດອີກດ້ວຍ.
ບໍ່ພຽງແຕ່ໃນຂົງເຂດກະຈາຍສຽງເທົ່ານັ້ນ, ໃນຊຸມປີມໍ່ໆມານີ້, ແຕ່ລະປີ, ບັນດາອົງການສື່ມວນຊົນໃຫຍ່ຂອງສອງປະເທດເຊັ່ນ: ວິທະຍຸກະຈາຍສຽງ, ສຳນັກຂ່າວສານ, ໜັງສືພິມປະຊາຊົນ ຫຼື ສະມາຄົມນັກຂ່າວ… ກໍໄດ້ປະສານສົມທົບກັນຈັດຕັ້ງບັນດາກອງປະຊຸມສຳມະນາກ່ຽວກັບວິຊາສະເພາະ, ຊຸດບຳລຸງ, ຝຶກອົບຮົມກ່ຽວກັບວິຊາການ, ແລກປ່ຽນບົດຮຽນປະສົບການກ່ຽວກັບການຫັນເປັນດີຈີຕອນ ແລະ ໝູນໃຊ້ເຕັກໂນໂລຢີໃໝ່ເຂົ້າໃນການເຄື່ອນໄຫວສື່ມວນຊົນ. ພາຍຫຼັງເຂົ້າຮ່ວມຊຸດຝຶກອົບຮົມ, ບຳລຸງສ້າງກ່ຽວກັບທັກສະລົງຂ່າວບັນດາບັນຫາສິ່ງແວດລ້ອມ ໂດຍສະມາຄົມນັກຂ່າວ ຫວຽດນາມ ແລະ ສະມາຄົມນັກຂ່າວລາວ ສົມທົບກັນຈັດຕັ້ງ ເມື່ອເດືອນ ທັນວາ 2025, ທ່ານ ວິໄລວອນ ສິດທິໄຊ, ຮອງຫົວໜ້າພະແນກສື່ສານ, ຄະນະໂຄສະນາອົບຮົມແຂວງ ສາລະວັນ, ລາວ ໃຫ້ຮູ້ວ່າ:
"ໄລຍະຜ່ານມາ ການຮ່ວມມືດ້ານວຽກງານສື່ມວນຊົນ ລະຫວ່າງ ລາວ-ຫວຽດນາມ, ຫວຽດນາມ-ລາວ ແມ່ນມີການປະສານງານພົວພັນກັນຢ່າງແໜ້ນແຟ້ນ ແລະ ໃຫ້ການຊຸກຍູ້, ສົ່ງເສີມຕໍ່ສື່ມວນຊົນລາວ ທຸກດ້ານ ໂດຍສະເພາະ ການຍົກລະດັບ, ບຳລຸງສ້າງບຸກຄະລາກອນ ສື່ມວນຊົນລາວ ທັງໄລຍະສັ້ນ, ໄລຍະຍາວ, ແລກປ່ຽນບົດຮຽນ ແລະ ໃຫ້ຄວາມຮູ້ກ່ຽວກັບການນຳໃຊ້ສື່ແບບໃໝ່ທີ່ທັນສະໄໝ, ເຕັກນິກ, ວິທີການໃນການຜະລິດຂ່າວ, ການນຳໃຊ້ສື່ດິຈິຕັອນ ແລະ ຮູບແບບການຜະລິດຂ່າວ ທີ່ມີເນື້ອໃນ, ຮັດກຸ່ມ ແລະ ເຂົ້າເຖີງທຸກກຸ່ມເປົ້າໝາຍ, ແນະນຳການຜະລິດຂ່າວແບບໃໝ່. ຂ້າພະເຈົ້າ, ມີຄວາມຮູ້ສຶກພາກພູມໃຈ ແລະ ດີໃຈ ທີ່ໄດ້ແລກປ່ຽນບົດຮຽນ, ປະສົບການ ແລະ ໄດ້ຮັບຄວາມຮູ້ໃໝ່ໆ ແລະ ເປັນການສົ່ງຕໍ່ຄວາມຮູ້ ເພື່ອໃຫ້ສື່ມວນຊົນລາວ ໄດ້ມີການປັບປຸງ, ດັດປັບ ແລະ ຫມູນໃຊ້ບົດຮຽນຂອງຫວຽດນາມ ມາປະຍຸກໃຊ້ ແລະ ປັບປຸງໃຫ້ດີຂຶ້ນ."
ຈາກບັນດາລາຍການຂ່າວທີ່ໄດ້ສົ່ງໄປໃນປາງສົງຄາມຕະຫຼອດຮອດບັນດາຜະລິດຕະພັນສື່ມວນຊົນຫຼາຍແພຼດຟອມຂອງຍຸກດີຈີຕອນໃນວັນນີ້, ສື່ມວນຊົນປະຕິວັດ ຫວຽດນາມ ຍາມໃດກໍຮ່ວມເດີນທາງພ້ອມກັບການພັດທະນາຂອງສາຍພົວພັນ ຫວຽດນາມ - ລາວ.
ວັນທີ 13 ພຶດສະພາ 2026 ຜ່ານມາ, ຢູ່ນະຄອນຫຼວງ ວຽງຈັນ, ລາວ, ໃນຂອບເຂດການພົບປະສອງຝ່າຍລະຫວ່າງກະຊວງວັດທະນະທຳ, ກິລາ ແລະ ທ່ອງທ່ຽວ ຫວຽດນາມ ກັບກະຊວງວັດທະນະທຳ ແລະ ການທ່ອງທ່ຽວ ລາວ, ສອງຝ່າຍໄດ້ລົງນາມໃນບົນບັນທຶກຄວາມເຂົ້າໃຈວ່າດ້ວຍການຮ່ວມມືດ້ານຂໍ້ມູນຂ່າວສານ ຫວຽດນາມ - ລາວ, ໄລຍະ 2026 – 2030. ໝາກຜົນນີ້ ບໍ່ພຽງແຕ່ສ່ອງແສງໃຫ້ເຫັນ ປະສິດທິຜົນການຮ່ວມມືລະຫວ່າງສອງປະເທດເທົ່ານັ້ນ, ຫາກຍັງສະແດງໃຫ້ເຫັນຄວາມມານະພະຍາຍາມຢ່າງບໍ່ຢຸດຢັ້ງຂອງ ຂະແໜງສື່ມວນຊົນ, ສື່ສານ ແລະ ບັນດານັກຂ່າວ, ປະກອບສ່ວນເຊື່ອມຕໍ່ຫົວໃຈກັບຫົວໃຈ, ຊ່ວຍໃຫ້ປະຊາຊົນສອງປະເທດມີຄວາມເຂົ້າໃຈກັນກວ່າ, ມີຄວາມໄວ້ເນື້ອເຊື່ອໃຈກວ່າ ແລະ ພ້ອມກັນເພີ່ມພູນຄູນສ້າງໃຫ້ແກ່ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດ ຫວຽດນາມ - ລາວ ໝັ້ນຄົງຂະໜົງແກ່ນໄປຊົ່ວກາລະນານ./.
