ເພື່ອຮັກສາລະດັບເຕີບໂຕໃນປີນີ້, ຫວຽດນາມ ຍາມໃດກໍ່ຖືການລົງທຶນຕ່າງປະເທດແມ່ນແຮງຈູງໃຈສຳຄັນ. ພ້ອມກັບຄວາມຮຽກຮ້ອງຕ້ອງການພັດທະນາແບບຍືນຍົງ, ການລົງທຶນໂດຍກົງຈາກຕ່າງປະເທດ (FDI) ນັບມື້ນັບໄດ້ຮັບຄວາມຫວັງຈະສ້າງມູນຄ່າຫຼາຍກວ່າໃຫ້ແກ່ພື້ນຖານເສດຖະກິດ, ຈາກເຕັກໂນໂລຢີ, ຊັບພະຍາກອນມະນຸດ ຕະຫຼອດຮອດຄວາມສາມາດໃນການຜະລິດຢູ່ກັບທີ່. ຄວາມຈິງແລ້ວການເຄື່ອນໄຫວຂອງບັນດາວິສາຫະກິດ ໄທ ຢູ່ ຫວຽດນາມສະແດງໃຫ້ເຫັນວ່າ: ບໍ່ພຽງແຕ່ສືບຕໍ່ລົງທຶນ ແລະ ເປີດກວ້າງການເຄື່ອນໄຫວ, ວິສາຫະກິດ ໄທ ຍັງເພີ່ມທະວີການບຳລຸງສ້າງຊັບພະຍາກອນມະນຸດ ຫວຽດນາມ, ຖ່າຍທອດບົດຮຽນປະສົບການ ແລະ ເຕັກໂນໂລຢີເທື່ອລະກ້າວ, ພ້ອມທັງຮ່ວມມືກັບບັນດາວິສາະວະກອນ, ວິສາຫະກິດ ຫວຽດນາມ ໃນບັນດາຂົງເຂດເຕັກໂນໂລຢີໃໝ່. ນັກຂ່າວ VOV ໄດ້ມີການແລກປ່ຽນກັບ ທ່ານ ສຸພະ ໄວສະຍາຣັດ (Supa Waisayarat), ຊ່ຽວຊານດ້ານການໃຫ້ຄຳປຶກສາຂອງ ບໍລິສັດ Super Energy ຢູ່ ຫວຽດນາມ, ທັງເປັນປະທານກຸ່ມບັນດາວິສາຫະກິດພະລັງງານ ໄທ ຢູ່ ຫວຽດນາມ ເພື່ອຊອກຮູ້ຕື່ມກ່ຽວກັບບັນຫານີ້.
ດ້ວຍບົດບາດເປັນຊ່ຽວຊານດ້ານການໃຫ້ຄຳປຶກສາຂອງ Super Energy ຢູ່ ຫວຽດນາມ, ທັງເປັນປະທານກຸ່ມບັນດາວິສາຫະກິດພະລັງງານ ໄທ ຢູ່ ຫວຽດນາມ ດ້ວຍປະມານ 20 ບໍລິສັດ, ທ່ານ Supa Waisayarat ໃຫ້ຮູ້ວ່າ ບໍລິສັດ Super Energy ກໍ່ຄືບັນດາບໍລິສັດອື່ນຂອງ ໄທ ລ້ວນແຕ່ພະຍາຍາມບຳລຸງກໍ່ສ້າງແຮງງານຫວຽດນາມ ເພື່ອໃຫ້ເຂົາເຈົ້າອສາມາດປະຕິບັດວຽກງານຢູ່ບໍລິສັດ. ປັດຈຸບັນ, ຢູ່ Super Energy ມີຜູ້ຄຸ້ມຄອງຊາວ ໄທ ພຽງ 2 ຄົນເທົ່ານັ້ນ, ໃນເບື້ອງຕົ້ນມີນັບສິບຄົນ. ຈຳນວນຄົນ ໄທ ຫຼຸດລົງເພື່ອໃຫ້ຄົນ ຫວຽດນາມ ສາມາດບໍລິຫານເອງ. ມີຫຼາຍບໍລິສັດກໍ່ໄດ້ສ້າງໂອກາດໃຫ້ແກ່ພາລະກອນ ຫວຽດນາມ ພັດທະນາຂຶ້ນສູ່ຕຳແໜ່ງສູງກວ່າ ແລະ ເປັນຜູ້ຄຸ້ມຄອງໃນບັນດາໂຄງການ. ໃນອະນາຄົດ, ບໍລິສັດແມ່ອາດສາມາດຮັບຜິດຊອບກ່ຽວກັບນະໂຍບາຍ ແລະ ການລົງທຶນ, ສ່ວນການເຄື່ອນໄຫວດຳເນີນງານ ອາດຈະແມ່ນພາລະກອນຢູ່ ຫວຽດນາມ ຮັບຜິດຊອບ.
ນອກນັ້ນ, ຈາກຄວາມຈິງແຫ່ງການເຮັດວຽກກັບຫຼາຍບໍລິສັດຢູ່ ຫວຽດນາມ, Super Energy ເຫັນໄດ້ວ່າ ບັນດາວິສະວະກອນ ຫວຽດນາມ ອາດມີທ່າແຮງດ້ານຊອບແວ ແລະ ການພັດທະນາຊອບແວ. ດັ່ງນັ້ນ, ນອກຈາກການນຳໃຊ້ຊອບແວຕ່າງປະເທດ, ວິສາຫະກິດນີ້ ຍັງນຳໃຊ້ຊອບແວໂດຍບັນດາວິສະວະກອນ ຫວຽດນາມ ພັດທະນາ.
ບໍ່ພຽງແຕ່ກ່ຽວກັບຊັບພະຍາກອນມະນຸດ ແລະ ເຕັກໂນໂລຢີ, ຕາມທັດສະນະຂອງ ທ່ານ Supa Waisayarat ແລ້ວ, ຫວຽດນາມ ນັບມື້ນັບມີຫຼາຍໂອກາດເຂົ້າຮ່ວມຕ່ອງໂສ້ການຜະລິດ, ການສະໜອງອຸປະກອນໃຫ້ແກ່ຂະແໜງພະລັງງານຢ່າງເລິກເຊິ່ງກວ່າ. ຫວຽດນາມ ອາດສາມາດຜະລິດວັດຖຸອຸປະກອນບາງປະເພດໄດ້ ຕົວຢ່າງຄືສາຍໄຟ, ໂຄງສ້າງເຫຼັກແລະ ຫຼາຍອຸປະກອນອື່ນໆໃນບັນດາໂຄງການໄຟຟ້າແຮງລົມຢູ່ເຂດຝັ່ງທະເລ ແລະ ໄຟຟ້າແຮງລົມຢູ່ນອກຝັ່ງ. ຈາກບັນດາສິ່ງທີ່ພວມດຳເນີນຢູ່ Super Energy, ທ່ານ Supa Waisayarat ຫວັງວ່າ ການຮ່ວມມືລະຫວ່າງ ວິສາຫະກິດ ໄທ ແລະ ຫວຽດນາມ ໃນຂົງເຂດພະລັງງານ, ເຕັກໂນໂລຢີຈະນັບມື້ນັບພັດທະນາຢ່າງແໜ້ນແຟ້ນ ແລະ ມີປະສິດທິຜົນກວ່າ.
ຈາກການເຄື່ອນໄຫວຕົວຈິງຂອງ Super Energy ອາດເຫັນໄດ້ວ່າ ການພົວພັນຮ່ວມມືລົງທຶນ ຫວຽດນາມ - ໄທ ພວມມີບາດກ້າວຫັນປ່ຽນໃໝ່. ວິສາຫະກິດ ໄທ ບໍ່ພຽງແຕ່ລົງທຶນດ້ານທຶນຮອນເຂົ້າ ຫວຽດນາມ ເທົ່ານັ້ນ ຫາກນັບມື້ນັບເອົາໃຈໃສ່ເປັນພິເສດເຖິງການບຳລຸງກໍ່ສ້າງຊັບພະຍາກອນມະນຸດ, ຖ່າຍທອດບົດຮຽນປະສົບການ, ນຳໃຊ້ຜະລິດຕະພັນ ແລະ ມາດຕະການໂດຍວິສາຫະກິດ, ວິສະວະກອນ ຫວຽດນາມ ພັດທະນາເອງ, ພ້ອມທັງ ເປີດກວ້າງການເຊື່ອມຕໍ່ກັບບັນດາຄູ່ຮ່ວມມືພາຍໃນປະເທດ. ນັ້ນກໍ່ແມ່ນທິດກ້າວເດີນເພື່ອໃຫ້ການຮ່ວມມື ຫວຽດນາມ - ໄທ ໃນຂົງເຂດພະລັງງານ ແລະ ເຕັກໂນໂລຢີນັບມື້ນັບເຂົ້າສູ່ລວງເລິກ, ແທ້ຈິງ ແລະ ຍືນຍົງກວ່າ.
