ວັນທີ 08 ກໍລະກົດ, ກອງທັບ ອາເມລິກາ ໄດ້ດຳເນີນບັ້ນບຸກໂຈມຕີທາງອາກາດຄັ້ງໃໝ່ເລັ່ງໃສ່ ອີຣານ ຕາມຄຳຊີ້ນຳຂອງທ່ານ Donald Trump ປະທານາທິບໍດີ ອາເມລິກາ, ສ້າງຂີດໝາຍເກີດການບຸກໂຈມຕີດ້ວຍຂອບຂະໜາດໃຫຍ່ຢູ່ປະເທດສາທາລະນະລັດ ອິດສະລາມ 2 ຄືນຕິດຕໍ່ກັນ. ກ່ອນໜ້ານັ້ນ, ອີຣານ ໄດ້ດຳເນີນບັ້ນດັກບຸກໂຈມຕີເລັ່ງໃສ່ກ່ຳປັ່ນການຄ້າ 3 ລຳຢູ່ຊ່ອງແຄບທະເລ Hormuz.
ເກີດການປະທະກັນຄືນອີກ?
ບັນດາບັ້ນບຸກໂຈມຕີທາງອາກາດຂອງ ອາເມລິກາ ໄດ້ດຳເນີນພາຍຫຼັງຖະແຫຼງການຂອງທ່ານປະທານາທິບໍດີ ອາເມລິກາ Donald Trump ໃນກອງປະຊຸມສຸດຍອດອົງການສົນທິສັນຍາ ອັດລັງຕິກເໜືອ (NATO) ໃນວັນທີ 7 – 8 ກໍລະກົດ ຢູ່ Ankara, ຕວັກກີ, ທ່ານຖືວ່າ ຂໍ້ຕົກລົງຢຸດຍິງລະຫວ່າງ ອາເມລິກາ - ອີຣານ ໄດ້ສິ້ນສຸດລົງ. ຝ່າຍ ອາເມລິກາ ເນັ້ນໜັກວ່າ ນີ້ແມ່ນປະຕິກິລິຍາຕໍ່ບັນດາເຫດບຸກໂຈມຕີເລັ່ງໃສ່ກ່ຳປັ່ນຂົນສົ່ງສິນຄ້າໄປຜ່ານຊ່ອງແຄບທະເລ Hormuz ຢ່າງລຽນຕິດໃນຊຸມວັນກ່ອນ ເຊິ່ງງອາເມລິກາ ຖືວ່າ ອີຣານ ແມ່ນຝ່າຍຕ້ອງມີຄວາມຮັບຜິດຊອບ. ຝ່າຍ ອີຣານ ໄດ້ຄັດຄ້ານທັດສະນະດັ່ງກ່າວ ແລະ ກ່າວຫາ ອາເມລິກາ ລະເມີດຂໍ້ຕົກລົງຢຸດຍິງ ແລະ ມີການໂຕ້ຕອບຄືນຢ່າງວ່ອງໄວ.
ເຖິງວ່າ ບັນດາການກະທຳປະທະກັນລະຫວ່າງ ອາເມລິກາ ແລະ ອີຣານ ຍັງເກີດຂຶ້ນແບບກະແຈກກະຈາຍ ນັບແຕ່ເມື່ອສອງຝ່າຍລົງນາມໃນບົດບັນທຶກຄວາມເຂົ້າໃຈ (MOU) ວ່າດ້ວຍຂໍ້ຕົກລົງຢຸດຍິງໃນວັນທີ 17 ມິຖຸນາ ກໍຕາມ, ແຕ່ເລື່ອງສອງຝ່າຍບຸກໂຈມຕີເຊິ່ງກັນ ແລະ ກັນດ້ວຍຄວາມຖີ່ສູງຄືໃນປັດຈຸບັນ, ໄປຄຽງຄູ່ກັບຖະແຫຼງການກ່ຽວກັບການຢຸດຕິຄຳສັ່ງຢຸດຍິງຂອງທ່ານ Donald Trump, ອາດຈະຍູ້ໃຫ້ເຂົ້າໄປໃນວົງຈອນການໃຊ້ຄວາມຮຸນແຮງຮອບໃໝ່, ເຮັດໃຫ້ສອງປະເທດກັບຄືນໄປສູ່ສະພາວະປະທະກັນຢ່າງຮອບດ້ານ, ເຊິ່ງແມ່ນແຜນການທີ່ປະຊາຄົມສາກົນບໍ່ປາດຖະໜາ. ວັນທີ 09 ກໍລະກົດ, ທ່ານ Stephane Dujarric ໂຄສົກ ສປຊ ຖະແຫຼງວ່າ:
“ບັນດາເຫດການທີ່ເກີດຂຶ້ນໃນ 24 ຊົ່ວໂມງຜ່ານມາມີຄວາມສ່ຽງເຮັດໃຫ້ບັນດາຄວາມຄືບໜ້າທາງການທູດທີ່ ອີຣານ ແລະ ອາເມລິກາ ບັນລຸໄດ້ແລ້ວນັ້ນ ຈະໄປຜິດເຂວ. ເລື່ອງການປະທະກັນຮອບດ້ານເກີດຂຶ້ນຄືນໃໝ່ ຈະກໍ່ຜົນຮ້າຍຢ້ອນຫຼັງທີ່ຮ້າຍແຮງຕໍ່ປະຊາຊົນໃນພາກພື້ນ, ຕໍ່ກັບສັນຕິພາບ ແລະ ຄວາມໝັ້ນຄົງສາກົນ, ກໍຄືຕໍ່ກັບພື້ນຖານເສດຖະກິດທົ່ວໂລກ”.
ຕາມວົງການນັກສັງເກດການແລ້ວ, ບັນດາຈຸດໃຈກາງຂອງການແຕກແຫງລະຫວ່າງ ອາເມລິກາ ແລະ ອີຣານ ໃນປັດຈຸບັນ ຍັງຄົງແມ່ນສິດຄວບຄຸມຊ່ອບແຄບທະເລ Horumuz, ເສັ້ນທາງຂົນສົ່ງນ້ຳມັນອາຍແກັດສຳຄັນຂອງໂລກ. ກ່ອນອື່ນໝົດ, ທັດສະນະແຂງກະດ້າງຂອງສອງຝ່າຍພວມເຮັດໃຫ້ບັນດາຕະຫຼາດການເງິນ ແລະ ພະລັງງານທົ່ວໂລກມີການເຄື່ອນເໜັງ ແລະ ເຮັດໃຫ້ຄວາມຫວັງຄວບຄຸມໄພເງິນເຟີ້ຄ່ອຍໆຈືດຈາງໄປ. ທ່ານ Chris Brigati, ຜູ້ອຳນວຍການຝ່າຍລົງທຶນຂອງບໍລິສັດການບໍລິການການເງິນ SWBC (ອາເມລິກາ) ຕີລາຄາວ່າ:
“ບັນດານັກຊ່ຽວຊານນ້ຳມັນອາຍແກັດໃຫ້ຮູ້ວ່າ ຈະຕ້ອງເສຍເວລາ 2 – 3 ເດືອນ, ຊ້ຳບໍ່ໜຳແມ່ນເກືອບ 1 ປີ ເພື່ອປະຕິບັດການຟື້ນຟູທຸກຢ່າງທີ່ກ່ຽວຂ້ອງເຖິງຂອດຈຳໜ່າຍ, ການເຄື່ອນໄຫວໂຮງງານກັ່ນຕອງນ້ຳມັນ ແລະ ການຂົນສົ່ງ, ນັບທັງເມື່ອຊ່ອງແຄບທະເລ Hormuz ຍັງເປີດປະຕູຢ່າງລຸລ່ວງ. ເພາະສະນັ້ນ, ທີ່ສຸດແລ້ວ, ຂ້າພະເຈົ້າບໍ່ຖືວ່າ ບັນຫາໄພເງິນເຟີ່ໄດ້ສິ້ນສຸດລົງ. ຂ້າພະເຈົ້າຄາດຄະເນວ່າ ສະພາວະໄພເງິນເຟີ້ ຈະສືບຕໍ່ແກ່ຍາວໄປອີກ”.
ຍຸດທະວິທີເຈລະຈາ
ຄຳຖາມທີ່ຕັ້ງມາສຳລັບທຸກຝ່າຍໃນປັດຈຸບັນແມ່ນ ຖະແຫຼງການ “ຢຸດຕິການຢຸດຍິງ” ຂອງທ່ານປະທານາທິບໍດີ ອາເມລິກາ Donald Trump ຈະແມ່ນສັນຍານຂອງເລື່ອງການປະທະກັນຮອບດ້ານເກີດຂຶ້ນຄືນໃໝ່ຫຼືບໍ, ຫຼືວ່າ ພຽງແຕ່ແມ່ນຍຸດທະວິທີເຈລະຈາທີ່ຄຸ້ນເຄີຍຂອງ ວໍຊິງຕັນ ເທົ່ານັ້ນ?
ຫຼາຍນັກຊ່ຽວຊານ ໄດ້ໃຫ້ຂໍ້ສັງເກດວ່າ ສະພາບການປັດຈຸບັນແມ່ນມີລັກສະນະຈຸດພິເສດຂອງຍຸດທະສາດທາງການທູດທີ່ຄຸ້ນເຄີຍຈາກຝ່າຍ ອາເມລິກາ ຢ່າງຄົບຖ້ວນ, ນັ້ນແມ່ນ “ການກໍ່ກຳລັງກົດດັນຢ່າງສຸດຂີດ”. ຈຸດປະສົງຂອງຝ່າຍ ອາເມລິກາ ຈະແມ່ນຈະແຈ້ງທີ່ສຸດ ນັ້ນແມ່ນ: ບັງຄັບ ເຕເຮຣານ ຕ້ອງປະນິປະນອມຢ່າງເລິກເຊິ່ງກວ່າອີກ, ຕ້ອງຍອມຮັບບັນດາມາດຕາທີ່ເຄັ່ງຄັດກວ່າ ກ່ຽວກັບໂຄງການນິວເຄຼຍໃນໄລຍະເວລາກຳນົດ 60 ວັນຂອງ MOU.
ເຖິງແນວນັ້ນກໍຕາມ, ແຕ່ຄຳເຫັນສ່ວນຫຼາຍກໍຖືວ່າ ຍຸດທະວິທີນີ້ ຍາກທີ່ຈະເສີມຂະຫຍາຍຜົນປະໂຫຍດໄດ້ ເພາະວ່າ ການຂັດແຍ້ງກັນລະຫວ່າງ ອາເມລິກາ ແລະ ອີຣານ ສ່ວນຫຼາຍແມ່ນມາຈາກເລື່ອງຄວບຄຸມຊ່ອງແຄບທະເລ Hormuz ແລະ ບົດບັນທຶກຄວາມເຂົ້າໃຈ MOU ທີ່ສອງຝ່າຍໄດ້ລົງນາມນັ້ນ ໄດ້ສ້າງຊ່ອງຫວ່າງທີ່ສັບສົນໃຫ້ແກ່ບັນຫານີ້. ທ່ານ ປອ. Andreas Krieg, ຮອງສາດສະດາຈານ ໂຮງຮຽນຄົ້ນຄວ້າຄວາມໝັ້ນຄົງ ຂຶ້ນກັບ King`s College London (ປະເທດອັງກິດ) ໃຫ້ຂໍ້ສັງເກດວ່າ:
“ຖ້າພິຈາລະນະເນື້ອໃນ ແລະ ວີທີການສະແດງອອກຂອງຮ່າງເອກະສານນັ້ນ, ອາດເຫັນວ່າ ຍັງຄົງມີກຳລັງບົ່ມຊ້ອນ ເພື່ອໃຫ້ຝ່າຍ ອີຣານ ຖະແຫຼງອະທິປະໄຕ, ຊ້ຳບໍ່ໜຳແມ່ນຈັດວາງຄ່າຄ່າທຳນຽມການບໍລິການສຳລັບສິດເສລີໃນການເດີນເຮືອ, ເຊິ່ງແມ່ນສິ່ງທີ່ບັນດາປະເທດເຂດອ່າວ ແລະ ອາເມລິກາ ຖືວ່າ ບໍ່ສາມາດຍອມຮັບໄດ້. ດັ່ງນັ້ນ, ອີຣານ ຍັງມີຫຼາຍກາລະໂອກາດເພື່ອ ແຊກແຊງເຂົ້າບັນດາບັນຫາຄື: ເຂົາເຈົ້າເປີດປະຕູຊ່ອງແຄບທະເລ Hormuz ຕາມແບບວິທີ, ຈຸດເວລາ ແລະ ລະດັບໃດ, ກໍຄືພາຍໃຕ້ເງື່ອນໄຂໃດແດ່?”
ຕໍ່ໜ້າທັດສະນະທີ່ແຂງກະດ້າງຈາກສອງຝ່າຍຄືປັດຈຸບັນ, ບົດບາດຂອງບັນດາປະເທດເປັນກາງໄກ່ເກ່ຍຄື ປາກິດສະຖານ, ກາຕາ, ອີຢິບ… ໄດ້ຮັບຖືວ່າ ແມ່ນປັດໄຈຕັດສິນ. ເຖິງຢ່າງໃດກໍຕາມ, ບັນດາປະເທດເປັນກາງໄກ່ເກ່ຍໃນພາກພື້ນ ຈະຕ້ອງແຂ່ງກັບເວລາເພື່ອກູ້ເອົາຂໍ້ຕົກລົງ, ເພາະວ່າເກມ “ຢູ່ປາກເຫວສົງຄາມ” ນີ້ ມີຄວາມສ່ຽງຖືກແຕກຫັກສູງທີ່ສຸດ, ເມື່ອທັງສອງຝ່າຍລ້ວນແຕ່ບໍ່ຢາກສະແດງໃຫ້ເຫັນຈຸດອ່ອນຂອງຕົນຕໍ່ຝ່າຍກົງກັນຂ້າມ./.
