ວັນທີ 23 ກໍລະກົດ, ຫ້ອງການຜູ້ຕາງໜ້າການຄ້າ ອາເມລິກາ (USTR) ໄດ້ປະກາດການຈັດວາງອັດຕາພາສີສຳລັບ 60 ພື້ນຖານເສດຖະກິດເພື່ອແນໃສ່ທົດແທນລະດັບພາສີຊົ່ວຄາວ 10% ໂດຍທ່ານ Donald Trump ປະທານາທິບໍດີ ອາເມລິກາ ຈັດວາງກ່ອນນັ້ນ. ນັບແຕ່ວັນທີ 24 ກໍລະກົດ, 60 ພື້ນຖານເສດຖະກິດ, ໃນນັ້ນມີບັນດາຄູ່ຮ່ວມມືສຳຄັນທີ່ສຸດຂອງ ອາເມລິກາ ຕ້ອງຈ່າຍອັດຕາພາສີແຕ່ 10% ຫາ 12,5%.
ນະໂຍບາຍພຽງລຳພັງຝ່າຍດຽວໃໝ່
ຕາມການອະທິບາຍຂອງ USTR ແລ້ວ, ບັນດາອັດຕາພາສີໃໝ່ໄດ້ຈັດວາງຕາມມາດຕາ 301 ຂອງກົດໝາຍວ່າດ້ວຍການຄ້າ ປີ 1974. ຕາມປະມວນກົດໝາຍສະບັບນີ້, ອຳນາດການປົກຄອງ ອາເມລິກາ ໃຫ້ຮູ້ວ່າ ເຂົາເຈົ້າພົບເຫັນວ່າ 60 ພື້ນຖານເສດຖະກິດດັ່ງກ່າວບໍ່ “ນຳໃຊ້ ແລະ ປະຕິບັດຄຳສັ່ງຫ້າມນຳເຂົ້າບັນດາສິນຄ້າທີ່ໄດ້ຮັບການຜະລິດດ້ວຍແຮງງານບີບບັງຄັບຢ່າງມີປະສິດທິຜົນ”. ໃນຕົວຈິງ, ນີ້ແມ່ນໜຶ່ງໃນບັນດາເຄື່ອງມືການຄ້າເຊິ່ງທ່ານປະທານາທິບໍດີ ອາເມລິກາ Donald Trump ໄດ້ນຳໃຊ້ນັບແຕ່ເມື່ອວັນທີ 20 ກຸມພາ ສານສູງສຸດອາເມລິກາ ປະຕິເສດບັນດາລະດັບພາສີສົມທົບທົ່ວໂລກ ເຊິ່ງອຳນາດການປົກຄອງ ອາເມລິກາ ຍົກອອກມາໃນປີກາຍນີ້.
ຕາມການປະກາດຂອງ USTR, ລະດັບພາສີ 10% ໄດ້ຈັດວາງໃສ່ສິນຄ້ານຳເຂົ້າຈາກບັນດາປະເທດຄື: ອາກຊັງຕິນ, ບັງກາລະເທດ, ອັງກິດ, ກຳປູເຈຍ, ການາດາ, ເອກົວດໍ, ອິນເດຍ, ອິນໂດເນເຊຍ, ຈໍແດນ, ມາເລເຊຍ, ເມັກຊີໂກ… ສຳລັບສະຫະພາບເອີລົບ (EU), ໄຕ້ຫວັນ (ຈີນ), ຍີ່ປຸ່ນ, ສ.ເກົາຫຼີ ແລະ ສະວິດ, ລະດັບພາສີໃໝ່ພາຍຫຼັງບວກກັບພາສີສຳລັບບັນດາປະເທດໄດ້ຮັບບຸລິມະສິດສູງ ໃນປັດຈຸບັນຈະແມ່ນ 10% ຫຼື 12,5% ແລ້ວແຕ່ແຕ່ລະພື້ນຖານເສດຖະກິດ. 38 ປະເທດທີ່ຍັງເຫຼືອ ແມ່ນຖືກຈັດວາງອັດຕາພາສີ 12,5% ໃນນັ້ນມີ ຈີນ, ຟີລິບປິນ, ໄທ…
ເຖິງຢ່າງໃດກໍຕາມ, ທ່ານ Jamieson Greer ຜູ້ຕາງໜ້າທາງການຄ້າ ອາເມລິກາ ໃຫ້ຄຳໝັ້ນສັນຍາກັບບັນດາປະເທດທີ່ບັນລຸໄດ້ຂໍ້ຕົກລົງທາງການຄ້າກັບ ວໍຊິງຕັນ ວ່າ ລະດັບພາສີໃໝ່ຈະບໍ່ເຮັດໃຫ້ຍອດຄ່າພາສີລື່ນກາຍລະດັບເພດານທີ່ສອງຝ່າຍໄດ້ເຫັນດີເປັນເອກະພາບ ແຕ່ໃນຕົວຈິງສະແດງໃຫ້ເຫັນວ່າ ລະດັບພາສີໃໝ່ສຳລັບ 60 ຄູ່ຮ່ວມມືດ້ານການຄ້າແຖວໜ້າ ອາເມລິກາ, ກວມເອົາ 99,4% ຍອດປະລິມານສິນຄ້ານຳເຂົ້າຂອງປະເທດນີ້, ຍັງຊ້ອນແຝງໄປດ້ວຍຄວາມສ່ຽງເຮັດໃຫ້ຄວາມເຄັ່ງຕຶງດ້ານການຄ້າເພີ່ມຂຶ້ນ, ຍິ່ງໄປກວ່ານັ້ນແມ່ນມີຄວາມສ່ຽງເຮັດໃຫ້ບັນດາຂໍ້ຕົກລົງເຊິ່ງ ອາເມລິກາ ບັນລຸໄດ້ກັບບັນດາຄູ່ຮ່ວມມືຖືກລົ້ມເຫຼວ. ທ່ານນາງ Kaja Kallas ຜູ້ຕາງໜ້າຂັ້ນສູງ ກ່ຽວກັບນະໂຍບາຍການຕ່າງປະເທດ ແລະ ຄວາມໝັ້ນຄົງ ຂອງ EU ຖະແຫຼງວ່າ:
ພວກຂ້າພະເຈົ້າໄດ້ມີຂໍ້ຕົກລົງກັບ ອາເມລິກາ ແລະ ພວກຂ້າພະເຈົ້າໄດ້ປະຕິບັດຢ່າງຖືກຕ້ອງຕາມຄຳໝັ້ນສັນຍາຂອງຕົນ. ຕ້ອງເວົ້າວ່າ ວິວັດການເຈລະຈາບໍ່ງ່າຍເລີຍ. ສຳລັບບັນດາວິສາຫະກິດຂອງພວກຂ້າພະເຈົ້າ, ຄວາມສະຖຽນລະພາບ ແລະ ຄວາມສາມາດຄາດຄະເນສະພາບການແມ່ນສຳຄັນທີ່ສຸດ. ເພາະສະນັ້ນ, ບັນດາວິສາຫະກິດຍາມໃດກໍ່ເລັ່ງການບັນລຸໄດ້ໝາກຜົນ ແລະ ການລົງນາມບັນດາຂໍ້ຕົກລົງ, ຍ້ອນວ່າ ເລື່ອງກຳໄດ້ສະພາບການໃນອະນາຄົດ ຍັງດີກວ່າຫຼາຍເມື່ອທຽບໃສ່ກັບສະພາບການທີ່ມືດມົວ, ບໍ່ຮູ້ສິ່ງໃດຈະເກີດຂຶ້ນ.
ສິ່ງທີ່ເຮັດໃຫ້ທຸກຄູ່ຮ່ວມມືທີ່ຖືກຈັດວາງອັດຕາພາສີຂອງ ອາເມລິກາ ຮູ້ສຶກບໍ່ພໍໃຈ ແລະ ອອກສຽງຄັດຄ້ານຢ່າງແຮງແມ່ນບັນດາຄຳກ່າວຫາຂອງ ອາເມລິກາ ກ່ຽວກັບ “ການນຳໃຊ້ແຮງງານບີບບັງຄັບ”, ເມື່ອຄຳກ່າວຫານີ້ໄດ້ຮັບຖືວ່າແມ່ນບໍ່ມີລັກສະນະຊວນເຊື່ອ. ທ່ານ Don Farrell ລັດຖະມົນຕີກະຊວງການຄ້າ ອົດສະຕາລີ ໃຫ້ຮູ້ວ່າ:
ຂ້າພະເຈົ້າ ຂໍສະແດງຄວາມຜິດຫວັງຢ່າງເລິກເຊິ່ງຕໍ່ການຕັດສິນຂອງຜູ້ຕາງໜ້າທາງການຄ້າ ອາເມລິກາ ກ່ຽວກັບການເພີ່ມອັດຕາພາສີສຳລັບສິນຄ້າຈຳນວນໜຶ່ງຂອງ ອົດສະຕາລີ ທີ່ສົ່ງອອກໄປຍັງ ອາເມລິກາ. ພວກຂ້າພະເຈົ້າຖືວ່າ ການຕັດສິນນີ້ແມ່ນບໍ່ມີພື້ນຖານອ້າງອີງ, ພວກຂ້າພະເຈົ້າ ຖືວ່າ ໃນບັນດາປະເທດທັງໝົດໃນໂລກ, ອົດສະຕາລີ ຍາມໃດກໍ່ຖືເປັນສຳຄັນບັນຫາຂ້າທາດ ແລະ ຂ້າທາດທັນສະໄໝ, ແລະ ສືບຕໍ່ຮັກສາຄຳໝັ້ນສັນຍານັ້ນ.
ເຫດຜົນໃໝ່ ເນື້ອໃນເກົ່າ
ເມື່ອຕີລາຄາກ່ຽວກັບບັນດາລະດັບອັດຕາພາສີໃໝ່ຂອງອຳນາດການປົກຄອງ ອາເມລິກາ, ວົງການສັງເກດການສາກົນ ຖືວ່າ ການຈັດວາງອັດຕາພາສີໃໝ່ສະແດງໃຫ້ເຫັນນະໂຍບາຍ “ເຫດຜົນໃໝ່ ເນື້ອໃນເກົ່າ” ຂອງທຳນຽບຂາວ ແລະ ມາດຕາ 301 ພວມຖືກຫັນເປັນອາວຸດ. ເລື່ອງອ້າງເຫດຜົນ ຕ້ານການນຳໃຊ້ແຮງງານບັງຄັບ ໄດ້ຮັບຖືວ່າແມ່ນ “ເສື້ອຄຸມດ້ານນິຕິກຳ” ມີເວລາສຳຫຼວດກວດຄືນ 4 ປີ ເພື່ອຮັກສາລະດັບພາສີແບບຍືນຍົງ.
ສະຖາບັນຄົ້ນຄ້ວາການຄ້າທົ່ວໂລກ (GTRI), ມີສຳນັກງານຢູ່ New Dehli (ອິນເດຍ), ຫຼືສະຖາບັນນະໂຍບາຍທີ່ກ້າວໜ້າ (PPI), ມີສຳນັກງານຢູ່ Washington (ອາເມລິກາ) ຖືວ່າ ບົດລາຍງານຂອງ USTR ຂາດຫຼັກຖານຕົວຈິງລະອຽດກ່ຽວກັບການລະເມີດການບັງຄັບໃຊ້ແຮງງານຢູ່ແຕ່ລະປະເທດສະເພາະ, ເຮັດໃຫ້ການກະທຳນີ້ມີລັກສະນະການເມືອງ ແລະ ການອາລັກຂາເສດຖະກິດທີ່ຈະແຈ້ງກວ່າດ້ວຍເຫດຜົນມະນຸດສະທຳ. ທ່ານ Glenn Stevens Jr., ຫ້ອງການການຄ້າ ເຂດ Detroit, ລັດ Michigan (ອາເມລິກາ) ໃຫ້ຮູ້ວ່າ:
ພວກຂ້າພະເຈົ້າໄດ້ແລກປ່ຽນກັບການນຳວິສາຫະກິດຫຼາຍທ່ານເປັນປະຈຳ ແລະ ລົງຢ້ຽມຢາມໂຮງງານໃນທົ່ວລັດໂດຍກົງ, ສິ່ງທີ່ເຂົາເຈົ້າຢາກບັນລຸໄດ້ຢ່າງແທ້ຈິງນັ້ນແມ່ນຄວາມແນ່ນອນໃນລະບົບສະໜອງ, ກໍ່ຄືໃນວຽກງານວາງແຜນຜັງດຳເນີນທຸລະກິດ. ເຖິງຢ່າງໃດກໍຕາມ, ເຂົາເຈົ້າພັດບໍ່ມີສິ່ງນັ້ນ ເມື່ອສະພາບການການຄ້າ ແລະ ພາສີອາກອນຢູ່ຫຼາຍປະເທດ, ພິເສດແມ່ນປະເທດບ້ານໃກ້ເຮືອນຄຽງ ມີຫຼາຍການຜັນແປຕໍ່ເນື່ອງ, ໃນຂະນະນັ້ນ ສະຖຽນລະພາບນີ້ແມ່ນປັດໄຈທີ່ຈຳເປັນໃຫ້ແກ່ອະນຄົດ.
ຕາມການຄາດຄະເນຈາກທະນາຄານກາງ ສະຫະລັດ ອາເມລິກາ (Fed) ສາຂາ New York ແລະ PPI, ຜູ້ບໍລິໂພກ ແລະ ວິສາຫະກິດນຳເຂົ້າ ອາເມລິກາ ຈະຕ້ອງຈ່າຍ ກວ່າ 90% ຄ່າໃຊ້ຈ່າຍເພີ່ມຂຶ້ນຈາກພາສີ (ຄາດວ່າຕ້ອງໃຊ້ເງິນປະມານ 100 ຕື້ USD/ປີ), ຈາກນັ້ນ ກໍ່ເພີ່ມຄວາມກົດດັນໄພເງິນເຟີ້ພາຍໃນປະເທດຂຶ້ນ. ໃນຕົວຈິງ, ທຳນຽບຂາວກໍ່ມີຄວາມວິຕົກກັງວົນກ່ຽວກັບກໍລະນີນີ້ ດັ່ງນັ້ນໃນລະດັບພາສີໃໝ່, ມີບາງກໍລະນີໄດ້ຮັບການຍົກເວັ້ນ, ໃນນັ້ນ ມີປຸ໋ຍ ແລະ ເຊື້ອເພີງບາງຊະນິດ ເຊິ່ງແມ່ນສິນຄ້າສອງປະເພດພວມຂຶ້ນລາຄາຢ່າງແຮງຍ້ອນການປະທະກັນລະຫວ່າງ ອາເມລິກາ ແລະ ອີຣານ. ພ້ອມກັນນັ້ນ, ອາຫານ, ລົດໂອໂຕ, ໂລຫະ ແລະ ຢຸກຢາ ບາງຊະນິດ ກໍ່ໄດ້ຮັບການຍົກເວັ້ນພາສີ.
