ໂດຍໄດ້ຮັບຄຳເຊື້ອເຊີນຂອງທ່ານ Tharman Shanmugaratnam ປະທານາທິບໍດີ ສິງກະໂປ ແລະ ທ່ານ Bastian Giegerich ຜູ້ອຳນວຍການໃຫຍ່, ທັງເປັນຜູ້ອຳນວຍການຝ່າຍບໍລິຫານສະຖາບັນຄົ້ນຄວ້າຍຸດທະສາດສາກົນ (IISS), ທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ຫວຽດນາມ ໄດ້ເດີນທາງໄປຢ້ຽມຢາມທາງລັດຖະກິດຢູ່ ສິງກະໂປ ແລະ ເຂົ້າຮ່ວມກອງປະຊຸມ Shangri – La ໃນລະຫວ່າງວັນທີ 29 – 31 ພຶດສະພາ 2026. ການຢ້ຽມຢາມ ບໍ່ພຽງແຕ່ປະກອບສ່ວນເຮັດໃຫ້ການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ສິງກະໂປ ເລິກເຊິ່ງຂຶ້ນຕື່ມເທົ່ານັ້ນ, ຫາກຍັງຢັ້ງຢືນບົດບາດທີ່ນັບມື້ນນັບເປັນເຈົ້າການ, ຕັ້ງໜ້າ ແລະ ມີຄວາມຮັບຜິດຊອບຂອງ ຫວຽດນາມ ໃນບັນດາບັນຫາສັນຕິພາບ, ຄວາມໝັ້ນຄົງ ແລະ ການຮ່ວມມືໃນພາກພື້ນອີກດ້ວຍ.
ການຢ້ຽມຢາມທາງລັດຖະກິດຢູ່ ສິງກະໂປ ຂອງທ່ານ ເລຂາທິການໃຫຍ່, ປະທານປະເທດ ໂຕເລິມ ຄັ້ງນີ້ ໄດ້ດຳເນີນພາຍຫຼັງ 1 ປີ ນັບແຕ່ເມື່ອສອງປະເທດສ້າງຕັ້ງສາຍພົວພັນຄູ່ຮ່ວມມືຍຸດທະສາດຮອບດ້ານ ແລະ ສິງກະໂປ ແມ່ນປະເທດທຳອິດໃນ ອາຊຽນ ທີ່ທ່ານເລຂາທິການໃຫຍ່, ປະທານປະເທດ ໂຕເລິມ ໄປຢ້ຽມຢາມ ພາຍຫຼັງທີ່ປະຕິບັດສຳເລັດການບູລະນະກົງຈັກການນຳຫຼັກແຫຼ່ງ.
ເຮັດໃຫ້ການພົວພັນ ຫວຽດນາມ - ສິງກະໂປ ເລິກເຊິ່ງຂຶ້ນຕື່ມ
ຈຸດພົ້ນເດັ່ນໃນການພົວພັນຮ່ວມມືລະຫວ່າງ ຫວຽດນາມ ແລະ ສິງກະໂປ ໃນປັດຈຸບັນແມ່ນຂົງເຂດເສດຖະກິດ, ແມ່ນຕົວແບບທີ່ປະສົບຜົນສຳເລັດຂອງການພົວພັນຮ່ວມມືໃນ ອາຊຽນ. ມີເຂດອຸດສາຫະກຳ ສິງກະໂປ (VSIP), ລະບົບເຂດອຸດສາຫະກຳຕົວແບບຮ່ວມມືລະຫວ່າງ ຫວຽດນາມ ແລະ ສິງກະໂປ 20ແຫ່ງທີ່ສຸມໃສ່ເຕັກໂນໂລຢີສູງ ແລະ ການພັດທະນາແບບຍືນຍົງ ປະກົດຢູ່ຫຼາຍທ້ອງຖິ່ນຂອງ ຫວຽດນາມ. ສອງຝ່າຍກໍພວມສູ້ຊົນບັນລຸໄດ້ເຂດອຸດສາຫະກຳ VSIP 30 ແຫ່ງໃນປີນີ້.
ປັດຈຸບັນ, ສອງປະເທດພວມສຸມໃສ່ຊຸກຍູ້ການຮ່ວມມືຢູ່ບັນດາຂົງເຂດທີ່ມີຄຸນນະພາບສູງຄື: ການຮ່ວມມືດ້ານເສດຖະກິດດີຈີຕອນ, ເສດຖະກິດສີຂຽວ, ປັນຍາປະດິດ, ທາດເຄິ່ງຊັກນຳ. ນີ້ແມ່ນບັນດາຂົງເຂດທີ່ມີກຳລັງບົ່ມຊ້ອນຫຼາຍຢ່າງ ເຊິ່ງສອງຝ່າຍກຳນົດວ່າ ແມ່ນເສົາຄ້ຳໃນການເຊື່ອມຕໍ່ການຮ່ວມມືທາງດ້ານເສດຖະກິດ ຫວຽດນາມ - ສິງກະໂປ ໃນໄລຍະຈະມາເຖິງ. ໃນສະພາບການນັ້ນ, ການຢ້ຽມຢາມທາງລັດຖະກິດຢູ່ ສິງກະໂປ ຂອງທ່ານເລຂາທິການໃຫຍ່, ປະທານປະເທດ ໂຕເລິມ ແມ່ນໂອກາດເພື່ອໃຫ້ສອງປະເທດ ຮ່ວມມືກັນໃນຫຼາຍຂົງເຂດສຳຄັນ, ຍຸດທະສາດ ເຂົ້າສູ່ລວງເລິກ, ໂດຍສະເພາະແມ່ນບັນດາຂົງເຂດທີ່ມີກຳລັງບົ່ມຊ້ອນດັ່ງກ່າວ. ທ່ານ ຫງວຽນແມ້ງເກື່ອງ ຮອງລັດຖະມົນຕີກະຊວງການຕ່າງປະເທດ ຫວຽດນາມ ໃຫ້ຮູ້ວ່າ:
“ໃນການຢ້ຽມຢາມຄັ້ງນີ້, ສອງປະເທດຈະຊຸກຍູ້ການຮ່ວມມືກ່ຽວກັບການເຊື່ອມຕໍ່ເຕັກໂນໂລຢີ. ຫວຽດນາມ ຈະຜັນຂະຫຍາຍຂໍ້ລິເລີ່ມເຊື່ອມຕໍ່ເຕັກໂນໂລຢີ TechConnect ຫວຽດນາມ - ສິງກະໂປ ເພື່ອແນໃສ່ເຊື່ອມຕໍ່ ລັດ, ນັກວິທະຍາສາດ ແລະ ວິສາຫະກິດ ເພື່ອນຳການຮ່ວມມືເຊື່ອມຕໍ່ເຕັກໂນໂລຢີລະຫວ່າງສອງປະເທດ ເຂົ້າໃນການປະຕິບັດຢ່າງມີປະສິດທິຜົນ ແລະ ແທດຈິງ. ແລະມຸ່ງໄປເຖິງການຊຸກຍູ້ສ້າງຕັ້ງພື້ນທີ່, ລະບົບນິເວດກ່ຽວກັບການຮ່ວມມືເຊື່ອມຕໍ່ເຕັກໂນໂລຢີລະຫວ່າງສອງປະເທດ ຫວຽດນາມ - ສິງກະໂປ”.
ຢັ້ງຢືນບົດບາດ, ສຽງເວົ້າຂອງ ຫວຽດນາມ ໃນໂຄງປະກອບພາກພື້ນ
ຢູ່ສິງກະໂປ, ທ່ານເລຂາທິການໃຫຍ່, ປະທານປະເທດ ຫວຽດນາມ ໂຕເລິມ ໄດ້ເຂົ້າຮ່ວມ ແລະ ມີບົດຄຳເຫັນເປີດຄຳນຳສະເໜີໃນກອງປະຊຸມ Shangri – la 2026. ນີ້ແມ່ນເວທີປາໄສຄວາມໝັ້ນຄົງ, ການປ້ອງກັນຊາດທີ່ມີຜົນສະທ້ອນແຖວໜ້າໃນພາກພື້ນ ອາຊີ - ປາຊີຟິກ, ໂດຍສະຖາບັນຄົ້ນຄວ້າຍຸດທະສາດສາກົນ ສ້າງຕັ້ງຂຶ້ນແຕ່ປີ 2002. ກອງປະຊຸມມີການເຂົ້າຮ່ວມຂອງຜູ້ແທນກວ່າ 550 ທ່ານ ທີ່ມາຈາກບັນດາອົງການປ້ອງກັນຊາດ, ປ້ອງກັນຄວາມສະຫງົບຂອງກວ່າ 40 ປະເທດໃນໂລກ ເຕົ້າໂຮມກັນເພື່ອແບ່ງປັນກ່ຽວກັບວິໄສທັດ ແລະ ແລກປ່ຽນກ່ຽວກັບບັນດາບັນຫາຍຸດທະສາດ, ການສ້າງຄວາມໄວ້ເນື້ອເຊື່ອໃຈ ແລະ ການຮ່ວມມືດ້ານປ້ອງກັນຊາດປ້ອງກັນຄວາມສະຫງົບ.
ເລື່ອງທ່ານເລຂາທິການໃຫຍ່, ປະທານປະເທດ ໂຕເລິມ ມີບົດກ່າວຄຳເຫັນທີ່ກອງປະຊຸມ Shangri – la ກໍ່ແມ່ນໂອກາດເພື່ອໃຫ້ ຫວຽດນາມ ສົ່ງສານຂໍ້ຄວາມຢ່າງຈະແຈ້ງກ່ຽວກັບວິໄສທັດຄວາມໝັ້ນຄົງໃນພາກພື້ນ: ບໍ່ເລືອກຝ່າຍສູ້ຢັນກັນ, ບໍ່ແລ່ນຕາມການແກ້ງແຍ້ງສິດອຳນາດ, ຫາກຊຸກຍູ້ການຮ່ວມມື, ການສົນທະນາ ແລະ ສ້າງຄວາມໄວ້ເນື້ອເຊື່ອໃຈຍຸດທະສາດ. ໃນສະພາບການເກີດມີຫຼາຍຈຸດຮ້ອນເຮັ່ງທາງດ້ານຄວາມໝັ້ນຄົງຍັງຊ້ອນແຝງຄວາມສ່ຽງເພີ່ມຂຶ້ນນັ້ນ, ສຽງເວົ້າຍົກສູງກົດໝາຍສາກົນ, ເຄົາລົບອະທິປະໄຕ ແລະ ຮັບປະກັນສັນຕິພາບ, ສະຖຽນລະພາບຂອງ ຫວຽດນາມ ນັ້ນ ຍິ່ງມີຄຸນຄ່າກວ່າອີກ. ທ່ານຮອງລັດຖະມົນຕີການຕ່າງປະເທດ ຫງວຽນແມ້ງເກື່ອງ ຊີ້ແຈ້ງວ່າ:
“ຫວຽດນາມ ໄດ້ຮັບການຕີລາຄາສູງ ເພາະວ່າ ພວກເຮົາມີການເຊື່ອມໂຍງກັບໂລກ ແລະ ພາກພື້ນຢ່າງເລິກເຊິ່ງກວ້າງຂວາງ, ແຕ່ພວກເຮົາຍັງຮັກສາໄດ້ນະໂຍບາຍເອກະລາດເປັນເຈົ້າຕົນເອງ. ບົດກ່າວຄຳເຫັນຂອງທ່ານເລຂາທິການໃຫຍ່, ປະທານປະເທດ ໂຕເລິມ ຢູ່ເວທີປາໄສ ເຈລະຈາ Shangri-la ຄັ້ງນີ້ ຈະສົ່ງສານຂໍ້ຄວາມ ແລະ ບັນດາທັດສະນະຂອງ ຫວຽດນາມ ກ່ຽວກັບການກຳນົດທິດຍຸດທະສາດ ເພື່ອແກ້ໄຂບັນດາບັນຫາທີ່ເກີດຂຶ້ນໃນວິວັດທະນາການຫັນປ່ຽນໂຄງປະກອບຂອງພາກພື້ນ ແລະ ສາກົນ”.
ທ່ານ ເຈິ່ນເຟືອກແອັງ ເອກອັກຄະລັດຖຸະທູດ ຫວຽດນາມ ປະຈຳ ສິງກະໂປ ຢັ້ງຢືນວ່າ:
“ເມື່ອການນຳສູງສຸດຂອງ ຫວຽດນາມ ເປັນຜູ້ປະຖະກະຖານັ້ນ ກໍແມ່ນຂີດໝາຍໜຶ່ງທີ່ສຳຄັນ. ນີ້ກໍແມ່ນໂອກາດເພື່ອສົ່ງສານຂໍ້ຄວາມ, ຜ່ານນັ້ນ ກໍ່ສະແດງໃຫ້ເຫັນທີ່ຕັ້ງ, ອິດທິພົນຊື່ສຽງ ແລະ ສຽງເວົ້າຂອງ ຫວຽດນາມ ໃນເວທີສາກົນ, ພິເສດແມ່ນໃນຂົງເຂດປ້ອງກັນຊາດ - ປ້ອງກັນຄວາມສະຫງົບຂອງພາກພື້ນ ແລະ ໃນໂລກ.”
ການຢ້ຽມຢາມທາງລັດຖະກິດຢູ່ ສິງກະໂປ ແລະ ເຂົ້າຮ່ວມກອງປະຊຸມເຈລະຈາ Shangri-la ຂອງ ທ່ານເລຂາທິການໃຫຍ່, ປະທານປະເທດ ໂຕເລິມ ແມ່ນບາດກ້າວເດີນທາງການຕ່າງປະເທດທີ່ມີຄວາມໝາຍຍຸດທະສາດ. ນັ້ນທັງແມ່ນການສືບທອດແນວທາງການຕ່າງປະເທດເອກະລາດ, ເປັນເຈົ້າຕົນເອງຂອງ ຫວຽດນາມ, ທັງສະແດງໃຫ້ເຫັນທີ່ຕັ້ງຂອງ ຫວຽດນາມ ທີ່ນັບມື້ນັບສູງຂຶ້ນໃນເວທີສາກົນໄດ້ຢ່າງຈະແຈ້ງ. ໃນສະພາບການໂລກທີ່ຂາດຄວາມໝັ້ນທ່ຽງຄືປັດຈຸບັນ, ຫວຽດນາມ ພວມຊີ້ໃຫ້ເຫັນຮູບພາບປະເທດ ຫວຽດນາມ ທີ່ມີຄວາມຮັບຜິດຊອບ, ເປັນເຈົ້າການ, ກຽມພ້ອມປະກອບສ່ວນເຂົ້າໃນສັນຕິພາບ, ສະຖຽນລະພາບ ແລະ ການພັດທະນາຂອງພາກພື້ນ ກໍຄື ທົ່ວໂລກ./.
