ວັນທີ 14 ກັນຍາ, ພະບາດສົມເດັດພຣະວະຊິຣະເກົ້າເຈົ້າຢູ່ຫົວ ແລະ ພະມະເຫສີ ເລີ່ມປະຕິບັດການຢ້ຽມຢາມ ທາງລັດຖະກິດຫວຽດນາມ, ແຕ່ວັນທີ 14 – 16 ກັນຍາ, ຕາມຄຳເຊື້ອເຊີນຂອງທ່ານເລຂາທິການໃຫຍ່, ປະທານປະເທດ ໂຕເລິມ.ນີ້ແມ່ນການຢ້ຽມຢາມທີ່ມີຄວາມໝາຍພິເສດ, ໄດ້ດຳເນີນໃນຂີດໝາຍກວ່າ 5 ທົດສະວັດແຫ່ງການພົວພັນທາງການທູດ ຫວຽດນາມ - ໄທ. ການຢ້ຽມຢາມບໍ່ພຽງແຕ່ສະແດງໃຫ້ເຫັນຄວາມສະໜິດຕິດພັນ, ຄວາມໄວ້ເນື້ອເຊື່ອໃຈລະຫວ່າງສອງປະເທດເທົ່ານັ້ນ, ຫາກຍັງເປີດຂີດໝາຍໃໝ່, ສ້າງກຳລັງໜູນນຳການພົວພັນ ຫວຽດນາມ - ໄທນັບມື້ນັບພັດທະນາຢ່າງແທ້ຈິງ, ເລິກເຊິ່ງ ແລະ ມີປະສິດທິຜົນ.
ຫວຽດນາມ ແລະ ໄທ ແມ່ນສອງປະເທດບ້ານໃກ້ເຮືອນຄຽງຢູ່ພາກພື້ນອາຊີຕາເວັນອອກສ່ຽງໃຕ້. ສອງຊາດມີຈຸດຄ້າຍກັນກ່ຽວກັບປະຫວັດສາດ, ວັດທະນະທຳ, ມູນເຊື້ອ ແລະ ແງ່ຫວັງສັນຕິພາບ, ພັດທະນາ. ນັບແຕ່ເວລາສ້າງຕັ້ງການພົວພັນທາງານທູດໃນປີ 1976, ການພົວພັນສອງປະເທດໄດ້ຜ່ານຜ່າເສັ້ນທາງຍາວໄກ ດ້ວຍຫຼາຍຂີດໝາຍທີ່ເປັນໜ້າຈົດຈຳ. ສິ່ງພິເສດແມ່ນ, ເລື່ອງສອງປະເທດຍົກລະດັບການພົວພັນຄູ່ຮ່ວມມືຍຸດທະສາດຮອບດ້ານໃນປີ 2025 ໄດ້ເປີດໜ້າປະຫວັດສາດໃໝ່ໃນການພົວພັນ ຫວຽດນາມ ໄທ.
ຄວາມໝາຍສັນຍາລັກເລິກເຊິ່ງ
ການຢ້ຽມຢາມຫວຽດນາມທາງລັດຖະກິດຂອງ ພະບາດສົມເດັດ ພຣະວະຊິ ຣະເກົ້າເຈົ້າຢູ່ຫົວ ແລະ ພະມະເຫສີໄທໄດ້ດຳເນີນໃນສະພາບການພິເສດ, ໃນຈຸດເວລາສອງປະເທດສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດ ((1976-2026).
ເລື່ອງ ພະບໍລົມວົງສານຸວົງໄທ ເລືອກ ຫວຽດນາມເປັນຈຸດນັດພົບ ໄດ້ຢັ້ງຢືນການຖືເປັນສຳຄັນຕໍ່ການພົວພັນຖານບ້ານໃກ້ເຮືອນຄຽງທີ່ເປັນມູນເຊື້ອ, ປັບປຸງຄວາມໄວ້ເນື້ອເຊື່ອໃຈດ້ານການເມືອງຢູ່ລະດັບສູງສຸດ; ສ້າງກຳລັງໜູນຢ່າງແຮງເພື່ອຫັນຂອບເຂດຄູ່ຮ່ວມມືຍຸດທະສາດຮອດບ້ານ ແຕ່ເດືອນພຶດສະພາ 2025 ມາຮອດປັດຈຸບັນໃຫ້ປະກົດຜົນເປັນຈິງ. ຕີລາຄາກ່ຽວກັບຄວາມໝາຍຂອງການຢ້ຽມຢາມ, ທ່ານ ຟ້າມຫວຽດຮຸ່ງ ເອກອັກຄະລັດຖະທູດ ຫວຽດນາມ ປະຈຳ ໄທແບ່ງປັນວ່າ:
ໃນຕະຫຼອດໄລຍະ 50 ປີຜ່ານມາ, ນີ້ເປັນຄັ້ງທຳອິດ ພະບາດສົມເດັດ ພຣະວະຊິ ຣະເກົ້າເຈົ້າຢູ່ຫົວ ແລະ ພະມະເຫສີ ໄທ ປະຕິບັດການຢ້ຽມຢາມຫວຽດນາມ ທາງລັດຖະກິດ. ພະບາດສົມເດັດ ພຣະວະຊິ ຣະເກົ້າເຈົ້າຢູ່ຫົວອົງນີ້ເປັນຄັ້ງທີສາມ ມາ ຫວຽດນາມ, ແຕ່ສອງຄັ້ງກ່ອນໃນຖານະຕຳແໜ່ງເປັນ ມົງກຸດລາຊະກຸມມານ, ຄັ້ງນີ້ ພະອົງມາດ້ວຍຖານະເປັນຜູ້ນຳລັດ, ຂີດໝາຍທີ່ມີລັກສະນະສັນຍາລັກທີ່ຍິ່ງໃຫຍ່ທີ່ສຸດ. ນັບແຕ່ຕົ້ນປີ, ທ່ານເລຂາທິການໃຫຍ່, ປະທານປະເທດ ໂຕເລິມ ໄດ້ຢ້ຽມຢາມ ໄທ. ເລື່ອງຜູ້ນຳລັດທັງສອງພ້ອມກັນແລກປ່ຽນບັນດາການຢ້ຽມຢາມເຊິ່ງກັນແລະກັນໃນປີໜຶ່ງ ໄດ້ສະແດງໃຫ້ເຫັນຄຳໝັ້ນສັນຍາຢ່າງໝັ້ນແກ່ນ ແລະ ຈະແຈ້ງຂອງສອງລັດ, ສອງລັດຖະບານ ສືບຕໍ່ຮ່ວມເດີນທາງ, ເພີ່ມພູນຄູນສ້າງໃຫ້ແກ່ການພົວພັນຮ່ວມມືສອງຝ່າຍໃນໄລຍະ 50 – 100 ປີຈະມາເຖິງ.
ການມີໜ້າຂອງ ພະບາດສົມເດັດ ພຣະວະຊິ ຣະເກົ້າເຈົ້າຢູ່ຫົວ ໄທ ປະກອບສ່ວນຫັນຄຳໝັ້ນສັນຍາທາງການທູດຂັ້ນສູງລະຫວ່າງການນຳສອງປະເທດໃນໄລຍະຜ່ານມາເປັນລະອຽດ, ເປັນຕົ້ນແມ່ນຄຳໝັ້ນສັນຍາຜັນຂະຫຍາຍຍຸດທະສາດ “ສາມເຊື່ອມຕໍ່” ຢ່າງມີປະສິດທິຜົນ. ນັ້ນແມ່ນການເຊື່ອມຕໍ່ລະບົບສະໜອງ: ເຊື່ອມຕໍ່ການຜະລິດ ແລະ ເສດຖະກິດລະຫວ່າງສອງປະເທດ, ການເຊື່ອມຕໍ່ວິສາຫະກິດ ແລະ ທ້ອງຖິ່ນ: ຊຸກຍູ້ການຮ່ວມມືຂັ້ນແຂວງ ແລະ ປະຊາຄົມວິສາຫະກິດ; ເຊື່ອມຕໍ່ບັນດາຍຸດທະສາດ ເຕີບໂຕແບບຍືນຍົງ: ມຸ່ງໄປເຖິງການພັດທະນາສີຂຽວ, ໝູນວຽນ ແລະ ນະວັດຕະກຳ.
ບັນດາຂົວຕໍ່ຈາກປະຊາຊົນ
ບໍ່ພຽງແຕ່ຢູ່ຂັ້ນລັດ, ບັນດາຂີດໝາຍຮ່ວມມື ຫວຽດນາມ ໄທຍັງໄດ້ເພີ່ມພູນຄູນສ້າງ ຈາກຊີວິດປະຊາຄົມ ແລະ ການພົບປະແລກປ່ຽນປະຊາຊົນ. ພະບໍລົມວົງສານຸວົງ ໄທ ໄດ້ສະຫງວນຄວາມເອົາໃຈໃສ່ພິເສດເຖິງບັນດາໂຄງການໜູນຊ່ວຍ ປະຊາຄົມຢູ່ ຫວຽດນາມ. ທ່ານເອກອັກຄະລັດຖະທູດ ຟ້າມວຽດຮຸ່ງ ໃຫ້ຮູ້ຕື່ມອີກວ່າ:
ນີ້ແມ່ນບັນດາໂຄງການທີ່ແທ້ຈິງ ແລະ ວັດທະນະທຳມະນຸດ. ຈາກປີ 2006 ມາຮອດປັດຈຸບັນ, ມະຫາຈັກກຣີສີຣິນທອນໄດ້ອຸປະຖຳ ແລະ ຜັນຂະຫຍາຍຫຼາຍໂຄງການຢູ່ບັນດາໂຮງຮຽນຢູ່ນິງບິ່ງ, ຮ່ວາບິ່ງ, ກ໋ວາງນິງ… ດ້ວຍບັນດາເປົ້າໝາຍແທ້ຈິງເພື່ອປັບປຸງໂພຊະນາການ, ເບິ່ງແຍງດູແລສຸຂະພາບ, ນ້ຳສະອາດ, ປູກຝັງ, ລ້ຽງສັດ ແລະ ທັກສະດຳລົງຊີວິດ. ສິ່ງທີ່ເປັນໜ້າເຄົາລົບກວ່ານັ້ນແມ່ນບັນດາໂຄງການນີ້ບໍ່ພຽງແຕ່ສຸມໃສ່ແກ້ໄຂບັນດາບັນຫາໃນສະເພາະໜ້າ, ຫາກຍັງຕິດພັນກັບຮູບແບບບຳລຸງສ້າງທັກສະດຳລົງຊີວິດ ແລະ ຮັບໃຊ້ໃຫ້ເປົ້າໝາຍພັດທະນາຍາວນານ ແລະ ຮອບດ້ານຂອງລຸ້ນຄົນອະນາຄົດ.
ບັນດານ້ຳໃຈ ແລະ ຂີດໝາຍຂອງປະຊາຄົມຊາວຫວຽດນາມອາໄສຢູ່ໄທ ກໍ່ແມ່ນພາກສ່ວນສຳຄັນໃນການພົວພັນສະໜິດຕິດພັນລະຫວ່າງສອງຊາດ. ຢູ່ແຂວງ ອູດອນທານີ, ເຫດເປີດນຳໃຊ້ “ເສັ້ນທາງຫວຽດນາມ” ແຕ່ປີ 2026 ແມ່ນພະຍານຫຼັກຖານຢ່າງມີຊີວິດຊີວາໃຫ້ແກ່ການມີໜ້າ ແລະ ປະກອບສ່ວນຂອງປະຊາຄົມຊາວຫວຽດນາມອາໄສຢູ່ໄທ. ທ່ານ ກາວີ ຈອງກິດຕະວົນ, ນັກຊ່ຽວຊານສະຖາບັນຄົ້ນຄ້ວາ ຄວາມໝັ້ນຄົງ ແລະ ສາກົນຂຶ້ນກັບມະຫາວິທະຍາໄລ ຈຸລາລົງກອນ, ໄທ ເນັ້ນໜັກວ່າ:
ນີ້ແມ່ນເສັ້ນທາງທີ່ໃສ່ຊື່ຫວຽດນາມ ທຳອິດຢູ່ພາກພື້ນ, ມັນສະແດງໃຫ້ເຫັນການມີໜ້າ ແລະ ບັນດາຂີດໝາຍເຂັ້ມຂຸ້ມຂອງປະຊາຄົມຊາວຫວຽດນາມອາໄສຢູ່ຕ່າງປະເທດ. ນີ້ກໍ່ແມ່ນການຮັບຮູ້ຂອງອຳນາດການປົກຄອງ ຢູ່ໄທ, ພິເສດແມ່ນລັດຖະບານແຂວງ ອຸດອນທານີ, ກ່ຽວກັບສະຖານທີ່ທີ່ໄດ້ເອີ້ນວ່າ ຖະໜົນ ຫວຽດນາມ. ສິ່ງນີ້ມີຄວາມໝາຍຢູ່ໄທ, ຍ້ອນວ່າມີຊາວຫວຽດນາມກວ່າ 100.000 ຄົນພວມດຳລົງຊີວິດ, ເຮັດວຽກ ແລະ ມີການປະກອບສ່ວນທີ່ຍິ່ງໃຫຍ່ເຂົ້າການພັດທະນາ ຂອງເຂດປະຈຳຖິ່ນ.
ຈາກບັນດາຂີດໝາຍຢູ່ລະດັບສູງຕະຫຼອດຮອດບັນດາການເຊື່ອມຈອດໃນຊີວິດປະຊາຄົມ, ການພົວພັນ ຫວຽດນາມ ໄທພວມສ້າງຂຶ້ນບົນພື້ນຖານນັບມື້ນັບໝັ້ນແກ່ນ. 50 ປີແມ່ນຂີດໝາຍຂອງໄລຍະທາງໜຶ່ງ, ແຕ່ກໍ່ແມ່ນຈຸດເລີ່ມຕົ້ນໃຫ້ແກ່ການເດີນທາງໃໝ່; ພ້ອມກັນມຸ່ງໄປເຖິງອະນາຄົດ. ໃນສະພາບການນັ້ນ, ການຢ້ຽມຢາມ ຫວຽດນາມ ຂອງ ພະບາດສົມເດັດພຣະວະຊິຣະເກົ້າເຈົ້າຢູ່ຫົວ ແລະ ພະມະເຫສີ ມີຄວາມໝາຍສັນຍາລັກໃຫຍ່, ໂດຍໄດ້ຮັບຄວາມມຸ່ງຫວັງຈະສືບຕໍ່ປັບປຸງຄວາມເຂົ້າໃຈ, ຄວາມໄວ້ເນື້ອເຊື່ອໃຈເຊິ່ງກັນແລະກັນ, ສ້າງກຳລັງໜູນເພື່ອໃຫ້ສອງປະເທດປະຕິບັດບັນດາຄຳໝັ້ນສັນຍາຮ່ວມມືໃນຂອບເຂດຄູ່ຮ່ວມມືຍຸດທະສາດຮອບດ້ານ ໃຫ້ປະກົດຜົນເປັນຈິງ.
