ວັນທີ 16 ມິຖຸນາ, ທ່ານ ເລມິນຮຶງ, ນາຍົກລັດຖະມົນຕີ ຫວຽດນາມ ໄດ້ນຳໜ້າຄະນະຜູ້ແທນຂັ້ນສູງ ຫວຽດນາມ ເຂົ້າຮ່ວມກອງປະຊຸມສຸດຍອດ ສະເຫຼີມສະຫຼອງ 35 ປີແຫ່ງວັນສ້າງຕັ້ງການພົວພັນ ອາຊຽນ - ລັດເຊຍ ຢູ່ນະຄອນ Kazan, ສະຫະພັນ ລັດເຊຍ. ໃນສະພາບ ອາຊຽນ ແລະ ລັດເຊຍ ພວມຊອກຫາກຳລັງໜູນຮ່ວມມືໃໝ່ ຕໍ່ໜ້າບັນດາການປ່ຽນແປງຂອງສະພາບການໂລກ, ການໄປປະຕິບັດງານ (ແຕ່ວັນທີ 16 – 18 ມິຖຸນາ) ສະແດງໃຫ້ເຫັນຄວາມເປັນເປັນເຈົ້າການເຂົ້າຮ່ວມຂອງ ຫວຽດນາມ ໃນການຊຸກຍູ້ການໂອ້ລົມສົນທະນາ, ເພີ່ມທະວີການເຊື່ອມຕໍ່ ແລະ ປະກອບສ່ວນເຂົ້າໃນການກຳນົດທິດທາງຮ່ວມມືລະຫວ່າງ 2 ຝ່າຍໃນໄລຍະຈະມາເຖິງ.
ພາຍຫຼັງ 35 ປີແຫ່ງການສ້າງຕັ້ງການພົວພັນຄູ່ຮ່ວມມືຄູ່ເຈລະຈາ (1991 – 2026), ອາຊຽນ ແລະ ລັດເຊຍ ພວມຊອກຫາບັນດາກຳລັງໜູນຮ່ວມມືໃໝ່ ເພື່ອສືບຕໍ່ເຮັດໃຫ້ການພົວພັນຄູ່ຮ່ວມມືຍຸດທະສາດລະຫວ່າງ 2 ຝ່າຍທີ່ໄດ້ສ້າງຂຶ້ນແຕ່ປີ 2005 ເລິກເຊິ່ງກວ່າ. ສະນັ້ນ, ກອງປະຊຸມຢູ່ Kazan ແມ່ນໂອກາດເພື່ອໃຫ້ບັນດາການນຳປຶກສາຫາລືບັນດາບຸລິມະສິດຮ່ວມມືໃນໄລຍະຈະມາເຖິງ, ພ້ອມທັງ ເພີ່ມທະວີການເຊື່ອມຕໍ່ລະຫວ່າງ ລັດເຊຍ ກັບພາກພື້ນ ອາຊີຕາເວັນອອກສ່ຽງໃຕ້.
ບົດບາດຂອງ ຫວຽດນາມ ໃນການພົວພັນ ອາຊຽນ - ສະຫະພັນ ລັດເຊຍ
ໃນວິວັດແຫ່ງການພັດທະນາການພົວພັນ ອາຊຽນ - ລັດເຊຍ, ຫວຽດນາມ ໄດ້ຮັບຖືວ່າແມ່ນໜຶ່ງໃນບັນດາປະເທດປະກອບສ່ວນຢ່າງຕັ້ງໜ້າໃຫ້ແກ່ການເພີ່ມທະວີການຮ່ວມມືລະຫວ່າງ 2 ຝ່າຍ. ຕາມທ່ານ ດັ້ງມິນຄອຍ, ເອກອັກຄະລັດຖະທູດ ຫວຽດນາມ ປະຈຳ ສະຫະພັນ ລັດເຊຍ ແລ້ວ, ບົດບາດຂອງ ຫວຽດນາມ ຄືດັ່ງ “ຂົວເຊື່ອມຕໍ່” ລະຫວ່າງ ລັດເຊຍ ແລະ ອາຊຽນ ໄດ້ຮັບການສ້າງຕັ້ງນັບແຕ່ຊຸມປີທຳອິດທີ່ ລັດເຊຍ ສ້າງຕັ້ງການພົວພັນກັບ ອາຊຽນ.
“35 ປີຜ່ານມາ, ຫວຽດນາມ ໄດ້ຍົກອອກຫຼາຍຂໍ້ລິເລີ່ມແນໃສ່ຊຸກຍູ້ການພົວພັນ ລັດເຊຍ - ອາຊຽນ, ສະໜັບສະໜູນເລື່ອງ ລັດເຊຍ ຕັ້ງໜ້າເຂົ້າຮ່ວມບັນດາລະບອບລະບຽບຂອງ ອາຊຽນກວ່າ. ຫວຽດນາມ ມີການພົວພັນຄູ່ຮ່ວມມືຍຸດທະສາດຮອບດ້ານກັບ ສະຫະພັນ ລັດເຊຍ, ສະນັ້ນ, ນີ້ແມ່ນເງື່ອນໄຂສະດວກເພື່ອໃຫ້ພວກເຮົາຊຸກຍູ້ການພົວພັນ ລັດເຊຍ - ອາຊຽນ ໃຫ້ຂຶ້ນສູ່ລະດັບສູງກວ່າ. ດ້ານອື່ນ, ໃນ ອາຊຽນ, ຫວຽດນາມ ນັບມື້ນັບພັດທະນາ ແລະ ມີທັດສະນະສຳຄັນ, ສະນັ້ນ ບົດບາດຂອງ ຫວຽດນາມ ໃນການຊຸກຍູ້ການພົວພັນ ລັດເຊຍ - ອາຊຽນ ມີລັກສະນະຕັ້ງໜ້າ ແລະ ສ້າງສັນ, ເຊິ່ງໄດ້ຮັບການຕີລາຄາສູງຈາກ ລັດເຊຍ ແລະ ບັນດາປະເທດ ອາຊຽນ”.
ບັນດາປັດໃຈນັ້ນຍິ່ງມີຄວາມໝາຍເມື່ອ ຫວຽດນາມ ຈະຮັບບົດບາດປະສານງານການພົວພັນ ອາຊຽນ - ລັດເຊຍ ໄລຍະ 2027 – 2030. ນີ້ໄດ້ຮັບຖືວ່າແມ່ນໂອກາດເພື່ອໃຫ້ ຫວຽດນາມ ສືບຕໍ່ປະກອບສ່ວນເຂົ້າໃນການສ້າງບັນດາໂຄງການຮ່ວມມືໃໝ່ລະຫວ່າງ 2 ຝ່າຍ, ພ້ອມທັງ, ຊຸກຍູ້ການໂອ້ລົມສົນທະນາ ແລະ ເພີ່ມທະວີການເຊື່ອມຕໍ່ໃນພາກພື້ນ. ທ່ານ ດັ້ງຮ່ວາງຢາງ, ຮອງລັດຖະມົນຕີການຕ່າງປະເທດ ຫວຽດນາມ, ໃຫ້ຮູ້ວ່າ:
“ຫວຽດນາມ ຈະພ້ອມກັບບັນດາປະເທດ ຊຸກຍູ້ວິທີເຂົ້າເຖິງທີ່ແທ້ຈິງ, ສົມດຸນ ແລະ ມຸ່ງໄປເຖິງໝາກຜົນລະອຽດໃນການຮ່ວມມື ອາຊຽນ - ລັດເຊຍ. ຈຸດສຸມແມ່ນສ້າງຄວາມສະດວກໃນບັນດາຂົງເຂດທີ່ມີຄວາມສາມາດບົ່ມຊ້ອນຫຼາຍຢ່າງແຕ່ຍັງບໍໍ່ທັນໄດ້ຮັບການຂຸດຄົ້ນຢ່າງຄົບຖ້ວນ, ຄື: ການຄ້າ, ວິທະຍາສາດ, ເຕັກໂນໂລຊີ, ການຫັນເປັນດີຈີຕອນ, ຄວາມໝັ້ນຄົງບໍ່ແມ່ນການທະຫານ, ການສຶກສາ, ພະລັງງານ".
ສືບຕໍ່ປັບປຸງສາຍພົວພັນອັນດີງາມ ຫວຽດນາມ - ສະຫະພັນ ລັດເຊຍ
ໃນຊຸມປີມໍ່ໆມານີ້, ການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ສະຫະພັນ ລັດເຊຍ ສືບຕໍ່ຮັບຮູ້ບັນດາບາດກ້າວພັດທະນາຢ່າງຕັ້ງໜ້າ. ຂົງເຂດການຮ່ວມມືດ້ານເສດຖະກິດ - ການຄ້າ ພວມຄ່ອຍໆຟື້ນຟູທ່າເຕີບໂຕ, ດ້ວຍວົງເງິນການຄ້າ 2 ຝ່າຍບັນລຸ 4,77 ຕື້ USD ໃນປີ 2025 ແລະ ບັນລຸ 1,72 ຕື້ USD ໃນ 4 ເດືອນຕົ້ນປີ 2026.
ໃນສະພາບການນັ້ນ, ການໄປປະຕິບັດງານຄັ້ງທຳອິດໃນຖານະຕຳແໜ່ງໃໝ່ຂອງທ່ານນາຍົກລັດຖະມົນຕີ ເລມິນຮຶງ ຢູ່ສະຫະພັນ ລັດເຊຍ ໄດ້ຮັບຄວາມຫວັງວ່າ ຈະປະກອບສ່ວນຮັກສາທ່າພັດທະນາທີ່ຕັ້ງໜ້າຂອງການພົວພັນ 2 ຝ່າຍ, ພ້ອມທັງ ສ້າງກຳລັງໜູນຕື່ມອີກໃຫ້ແກ່ການຜັນຂະຫຍາຍບັນດາທິດທາງຮ່ວມມືເຊິ່ງການນຳ 2 ປະທດໄດ້ເປັນເອກະພາບ. ທ່ານ ດັ້ງມິນຄອຍ ເອກອັກຄະລັດຖະທູດ ຫວຽດນາມ ປະຈຳ ສະຫະພັນ ລັດເຊຍ, ຖືວ່າ:
“ຢູ່ນອກກອງປະຊຸມ, ທ່ານນາຍົກລັດຖະມົນຕີ ເລມິນຮຶງ ຈະມີການພົບປະກັບການນຳຫຼາຍປະເທດ, ໃນນັ້ນມີການພົບປະກັບການນຳ ສະຫະພັນ ລັດເຊຍ. ຈຸດສຸມຂອງການພົບປະນີ້ແມ່ນເພື່ອຫວນຄືນການພົວພັນລະຫວ່າງ ຫວຽດນາມ - ສະຫະພັນ ລັດເຊຍ ໃນໄລຍະຜ່ານມາ ແລະ ປຶກສາຫາລືທິດທາງໃນໄລຍະຈະມາເຖິງ. ຂ້າພະເຈົ້າຫວັງວ່າ, ການຢ້ຽມຢາມຂອງທ່ານນາຍົກລັດຖະມົນຕີ ເລມິນຮຶງ ຈະບັນລຸໝາກຜົນແທ້ຈິງຫຼາຍຢ່າງ, ປະກອບສ່ວນສຳຄັນເຂົ້າໃນການຊຸກຍູ້ການພົວພັນ ຫວຽດນາມ - ສະຫະພັນ ລັດເຊຍ ໃຫ້ພັດທະນາຢ່າງແຮງ, ມີປະສິດທິຜົນ, ໝັ້ນແກ່ນໃນທຸກຂົງເຂດ, ພິເສດແມ່ນໃນຂົງເຂດທີ່ 2 ຝ່າຍຕ່າງມີຄວາມສົນໃຈ”.
ດ້ວຍພື້ນຖານອັນດີງາມທີ່ໄດ້ຮັບການສ້າງຕັ້ງຂຶ້ນໃນຫຼາຍປີຜ່ານມານັ້ນ, ຫວຽດນາມ ສືບຕໍ່ຢືນຢັນບົດບາດແມ່ນຄູ່ຮ່ວມມືທີ່ຕັ້ງໜ້າ, ມີຄວາມຮັບຜິດຊອບ ແລະ ແມ່ນຂົວເຊື່ອມຕໍ່ປະກອບສ່ວນຊຸກຍູ້ການຮ່ວມມືລະຫວ່າງ ອາຊຽນ ແລະ ສະຫະພັນ ລັດເຊຍ ໃນໄລຍະໃໝ່.
