ໂດຍບໍ່ຫົວຊາຕໍ່ຄຳຖະແຫຼງຈຳນວນໜຶ່ງຂອງເຈົ້າໜ້າທີ່ ອາເມລິກາ ກ່ຽວກັບເລື່ອງຈະບັນລຸຂໍ້ຕົກລົງກັບ ອີຣານ ທີ່ປິ່ນອ້ອມບັນຫາຊ່ອງແຄບທະເລ Hormuz ໂດຍໄວ, ແຕ່ຕົວຈິງ ໃນຊຸມມື້ຜ່ານມາ ການປະທະກັນຢູ່ຕາເວັນອອກກາງ ສະແດງໃຫ້ເຫັນສະພາບການບໍ່ມີທາງອອກທີ່ແກ່ຍາວພວມນັບມື້ນັບປະກົດຂຶ້ນ, ໄປພ້ອມກັບການສົ່ງຜົນສະທ້ອນທາງເສດຖະກິດ ແລະ ພູມສາດການເມືອງໃຫ້ແກ່ພາກພື້ນ ແລະ ໂລກຫຼາຍຢ່າງ.
ວັນທີ 05 ສິງຫາ, ທ່ານ Scott Bessent, ລັດຖະມົນຕີກະຊວງການເງິນ ອາເມລິກາ ຖະແຫຼງວ່າ “ຂໍ້ຕົກລົງກ່ຽວກັບການເປີດຊ່ອງແຄບທະເລ Hormuz ອາດສາມາດບັນລຸໄດ້ໃນ 1 ຫາ 2 ວັນ”. ກ່ອນໜ້ານັ້ນ, ທ່ານ Donald Trump, ປະທານາທິບໍດີ ອາເມລິກາ ກໍຢືນຢັນວ່າ ການປະທະກັນໃກ້ຈະສິ້ນສຸດລົງ. ເຖິງຢ່າງໃດກໍ່ຕາມ, ກໍຄ້າຍຄືກັບຫຼາຍຄຳຖະແຫຼງກ່ອນນີ້ຂອງບັນດາເຈົ້າໜ້າທີ່ ອາເມລິກາ, ສະພາບການບໍ່ມີທາງອອກຍັງສືບຕໍ່ແກ່ຍາວ.
ຖະແຫຼງການກົງກັນຂ້າມ
ພາຍຫຼັງຄຳຖະແຫຼງຂອງບັນດາເຈົ້າໜ້າທີ່ຂັ້ນສູງ ອາເມລິກາ 2 – 3 ວັນ, ວັນທີ 08 ສິງຫາ, ສະພາຄວາມໝັ້ນຄົງແຫ່ງຊາດສູງສຸດ ອີຣານ ໄດ້ຍົກອອກບັນດາເງື່ອນໄຂຕໍ່ກັບ ອາເມລິກາ ເພື່ອເປີດຊ່ອງແຄບທະເລ Hormuz ຄືນໃໝ່, ໃນນັ້ນ ຮຽກຮ້ອງໃຫ້ ວໍຊິງຕັນ ຢຸດຕິສົງຄາມ, ຖອນທະຫານອອກຈາກພາກພື້ນ ແລະ ຊົດເຊີຍຄວາມເສຍຫາຍໃຫ້ແກ່ ເຕເຮຣານ. ລະອຽດແມ່ນ, ອີຣານ ຮຽກຮ້ອງໃຫ້ ອາເມລິກາ ໃຫ້ຄຳໝັ້ນສັນຍາບໍ່ນາບຂູ່ປະເທດນີ້ໃນອະນາຄົດ; ຢຸດຕິສົງຄາມກັບ ອີຣານ ຕະຫຼອດການ ແລະ ບັນດາກຳລັງພັນທະມິດຂອງ ເຕເຮຣານ ຢູ່ພາກພື້ນ, ລວມມີ: ເຮັກໂບລາ, ຮາມາດສ ແລະ ຮູທີ; ຍົກເລີກການປິດລ້ອມທາງທະເລສຳລັບບັນດາທ່າກຳປັ່ນຂອງ ອີຣານ ແລະ ຖອນກຳລັງທະຫານ ອາເມລິກາ ອອກຈາກພາກພື້ນ. ນອກນັ້ນ, ອີຣານ ກໍ່ຮຽກຮ້ອງໃຫ້ຊົດເຊີຍບັນດາຄວາມເສຍຫາຍຍ້ອນສົງຄາມຢ່າງຄົບຖ້ວນ, ຍົກເລີກບັນດາມາດຕະການລົງໂທດ ແລະ ປ່ອຍຊັບສິນຂອງ ອີຣານ ທີ່ພວມຖືກອາຍັດທັງໝົດຢ່າງບໍ່ມີເງື່ອນໄຂ.ໃນຖະແຫຼງການທີ່ເອົາລົງໃນສື່ມວນຊົນແຫ່ງລັດ ອີຣານ, ທ່ານ Mohammad Bagher Zolghadr, ເລຂາສະພາຄວາມໝັ້ນຄົງແຫ່ງຊາດສູງສຸດ ອີຣານ ຢືນຢັນວ່າ ເຕເຮຣານ ຈະບໍ່ເປີດຊ່ອງແຄບທະເລ Hormuz ຄືນຈົນກວ່າ ອາເມລິກາຈະ “ປ່ຽນແປງວິທີການປະພຶດ”.
(ພາບ: REUTERS/Thaier Al-Sudani)
ພ້ອມກັບບັນຊີບັນດາເງື່ອນໄຂດັ່ງກ່າວ, ຝ່າຍ ອີຣານ ກໍ່ປະຕິເສດບັນດາຄຳຖະແຫຼງຂອງທ່ານປະທານາທິບໍດີ Donald Trump ທີ່ຖືວ່າ 2 ຝ່າຍພວມດຳເນີນ “ການເຈລະຈາເຄິ່ງໜຶ່ງ”. ທ່ານ Abbas Araqchi, ລັດຖະມົນຕີການຕ່າງປະເທດ ອີຣານ ຖະແຫຼງວ່າ:
“ການເຈລະຈາມີນິຍາມສະເພາະຂອງມັນເອງ; ເຖິງວ່າໃນກໍລະນີໃດ, ການເຈລະຈາກໍ່ດຳເນີນປິ່ນອ້ອມຫົວຂໍ້ລະອຽດເພື່ອບັນລຸໄດ້ໝາກຜົນ. ປະຈຸບັນ, ພວກຂ້າພະເຈົ້າບໍ່ດຳເນີນການເຈລະຈາກັບ ອາເມລິກາ. ແມ່ນວ່າມີການແລກປ່ຽນຂໍ້ມູນຜ່ານບັນດາຜູ້ເປັນກາງໄກເກ່ຍ, ແຕ່ສິ່ງດັ່ງກ່າວບໍ່ໄດ້ເອີ້ນວ່າການເຈລະຈາ; ນັ້ນພຽງແຕ່ແມ່ນການແລກປ່ຽນສານຂໍ້ມູນເທົ່ານັ້ນ. ຕາມທັດສະນະຂອງພວກຂ້າພະເຈົ້າ, ເມື່ອໃດບັນດາການກະທຳລະເມີດບົດບັນທຶກຊ່ວຍຈຳຍັງບໍ່ທັນສິ້ນສຸດລົງ ແລະ ອາເມລິກາ ຍັງບໍ່ທັນຊົດເຊີຍໃຫ້ບັນດາສິ່ງທີ່ເຂົາເຈົ້າໄດ້ລະເມີດໃນເອກະສານນັ້ນ, ກໍ່ຈະບໍ່ສາມາດເຊື່ອມຕໍ່ການເຈລະຈາໄດ້”.
ຕາມວົງການນັກສັງເກດການແລ້ວ, ພາຍຫຼັງໄລຍະຄວາມເຄັ່ງຕຶງໂດຍຖະແຫຼງຢຸດຕິຂໍ້ຕົກລົງຢຸດຍິງ ແລະ ຍູ້ແຮງບັ້ນບຸກໂຈມຕີຢ່າງຕໍ່ເນື່ອງແນໃສ່ເປົ້າໝາຍຂອງ ອີຣານ ໃນເວລາກາງເດືອນ ກໍລະກົດ ຫາກບໍ່ສາມາດບັງຄັບໃຫ້ ອີຣານ ຖອຍໄປໄດ້, ສະພາບການຕົວຈິງຢູ່ສະໜາມຮົບໄດ້ເຮັດໃຫ້ ອາເມລິກາ ຕ້ອງຍອມຮັບການຕົກເຂົ້າສູ່ສະພາບບໍ່ມີທາງອອກຄືໃນປະຈຸບັນ, ຊ້ຳບໍ່ໜຳແມ່ນພວມຄ່ອຍໆເສຍຄວາມເປັນເຈົ້າການໃຫ້ແກ່ຝ່າຍ ອີຣານ.
ຈະບໍ່ມີທາງອອກຈົນຮອດເວລາໃດ?
ສະພາບບໍ່ມີທາງອອກໃນປະຈຸບັນໄດ້ວາງອອກຄຳຖາມທີ່ວ່າ ອຳນາດການປົກຄອງ ອາເມລິກາ ຈະສາມາດຮັກສາຍຸດທະສາດ “ສ້າງຄວາມກົດດັນຢ່າງສຸດຂີດ” ຮອດເວລາໃດ. ໃນບົດລາຍງານສະບັບຫຼ້າສຸດ, ສູນຄົ້ນຄວ້າສາກົນ ແລະ ຍຸດທະສາດ (CSIS) ມີສຳນັກງານຕັ້ງຢູ່ ວໍຊິງຕັນ ດີຊີ, ອາເມລິກາ ໄດ້ຊີ້ໃຫ້ເຫັນວ່າ ເລື່ອງ ອາເມລິກາ ສົມທົບການປິດລ້ອມ, ຈັດວາງຄວາມກົດກັນຢ່າງສຸດຂີດ ແລະ ດຳເນີນບັນດາການບຸກໂຈມຕີທາງອາກາດໂດຍມີຂອບເຂດຈຳກັດ ໃນຂະນະທີ່ຍັງຮັກສາບັນດາຊ່ອງທາງການເຈລະຈາທາງອ້ອມ (ຜ່ານ ໂອມານ, ປາກິດສະຖານ) ເນື້ອແທ້ແມ່ນຮູບແບບຕໍ່ລອງຜ່ານຄວາມເຄັ່ງຕຶງ.
(ພາບ: REUTERS/Kylie Cooper)
ນອກນັ້ນ, ເພື່ອຮັກສາຍຸດທະສາດດັ່ງກ່າວ, ອາເມລິກາ ຕ້ອງຜ່ານຜ່າສິ່ງທ້າທາຍຫຼາຍຢ່າງທາງດ້ານການທະຫານ ແລະ ບົດໂຈດລາຍຈ່າຍ - ປະສິດທິຜົນ. ລະອຽດແມ່ນ, ເລື່ອງ ອາເມລິກາ ແລະ ພັນທະມິດຕ້ອງໃຊ້ລູກສອນໄຟສະກັດຕີທີ່ມີລາຄາແພງ (ຄື THAAD, SM-3, Aegis) ຢ່າງລຽນຕິດເພື່ອຕ້ານຄືນບັນດາເປົ້າໝາຍທີ່ມີລາຄາຖືກຂອງ ອີຣານ ພວມສ້າງຄວາມກົດດັນຢ່າງຮ້າຍແຮງຕໍ່ສາງອາວຸດສຳຮອງຂອງ ອາເມລິກາ, ເຮັດໃຫ້ເສຍຜົນປະໂຫຍດຖ້າການປະທະກັນຖືກແກ່ຍາວ. ສິ່ງສຳຄັນທີ່ສຸດ, ເຖິງວ່າຄວາມກົດດັນດ້ານການທະຫານແກ່ຍາວນານ ກໍ່ບໍ່ແນ່ວ່າຈະປ່ຽນແປງບັນດາທັດສະນະຂອງ ເຕເຮຣານ ໄດ້. ທ່ານ J.D Vance, ຮອງປະທານາທິບໍດີ ອາເມລິກາ, ຍອມຮັບວ່າ:
“ບາງເທື່ອເບິ່ງຄືວ່າ ອາເມລິກາ ບັນລຸໄດ້ຄວາມຄືບໜ້າ, ແຕ່ມີບາງເທື່ອເບິ່ງຄືວ່າບໍ່ແມ່ນຄືແນວນັ້ນ. ຕົວຈິງແມ່ນ, ທີ 1, ຊາວ ອີຣານ ແມ່ນບັນດາຜູ້ແຂງກະດ້າງທີ່ສຸດ. ທີ 2, ລະບົບຂອງເຂົາເຈົ້າຖືກແບ່ງແຍກ. ພາຍໃນລະບົບນັ້ນ, ມີຜູ້ຢາກຢຸດຕິການປະທະກັນ, ແຕ່ກໍ່ມີຜູ້ຢາກໃຫ້ການປະທະກັນສືບຕໍ່ດຳເນີນໄປ. ໜ້າທີ່ຂອງພວກຂ້າພະເຈົ້າແມ່ນຊອກຫາວິທີໃນສະພາບການນັ້ນ ເພື່ອບັນລຸໄດ້ໝາກຜົນດີທີ່ສຸດ. ຂ້າພະເຈົ້າຖືວ່າ ໝາກຜົນສຸດທ້າຍຈະສັບສົນພໍສົມຄວນ ແລະ ຕ້ອງມີເວລາເພື່ອບັນລຸໄດ້”.
ການຕີລາຄາຂອງນັກຊ່ຽວຊານຈຳນວນໜຶ່ງພວມອ່ຽງໃສ່ແຜນການສະພາບບໍ່ມີທາງອອກທີ່ແກ່ຍາວ, ຍ້ອນທັງ ອາເມລິກາ ແລະ ອີຣານ ລ້ວນແຕ່ຍາກທີ່ຍົກອອກບັນດາການປະໜິປະນອມໃຫຍ່ປິ່ນອ້ອມບັນຫາຫຼັກແມ່ນຄຸ້ມຄອງຊ່ອງແຄບທະເລ Hormuz. ປັດໄຈ “ເລືອກຕັ້ງກາງສະໄໝ” ຢູ່ ອາເມລິກາ ໃນເດືອນ ກັນຍາ ນີ້ເບິ່ງຄືວ່າບໍ່ແມ່ນຄວາມສົນໃຈໃຫຍ່ຂອງ ວໍຊິງຕັນ ອີກ ຍ້ອນວ່າໃນບົດກ່າວປາໄສຕໍ່ໜ້າບັນດາຜູ້ມີສິດເລືອກຕັ້ງ ອາເມລິກາ ຫວ່າງມໍ່ໆມານີ້, ທ່ານປະທານາທິບໍດີ Donald Trump ໄດ້ເຕື້ອງເຖິງແຜນການທີ່ວ່າ ອາເມລິກາ ຕ້ອງຍອມຮັບລາຄານ້ຳມັນສູງໃນໄລຍະໜຶ່ງ, ເຖິງວ່າການຫຼຸດລາຄານ້ຳມັນລົງເພື່ອຊ່ວຍຫຼຸດຜ່ອນຄ່າຄອງຊີບຂອງຜູ້ມີສິດເລືອກຕັ້ງ ອາເມລິກາ ໄດ້ຮັບຖືວ່າແມ່ນປັດໄຈແຖວໜ້າເຊິ່ງ ອາເມລິກາ ຕ້ອງຊັ່ງຊາໃນການປະທະກັນກັບ ອີຣານ.
