ວັນທີ 10 ມິຖຸນາ, ກອງທັບອາເມລິກາ ໄດ້ດຳເນີນການບຸກໂຈມຕີເລັ່ງໃສ່ຫຼາຍເປົ້າໝາຍດ້ານການທະຫານຂອງ ອີຣານ ເພື່ອໂຕ້ຕອບເຫດເຮືອບິນເຮລີກອບເຕີທະຫານ ອາເມລິກາ ຖືກຕົກຢູ່ ຊ່ອງແຄບທະເລ Hormuz ກ່ອນນັ້ນ 1 ວັນ. ເພື່ອໂຕ້ຕອບຄືນ, ອີຣານໄດ້ບຸກໂຈມຕີຖານທີ່ໝັ້ນ ອາເມລິກາໃນພາກພື້ນ.
ການລະເມີດຢ່າງຕໍ່ເນື່ອງ
ໃນແຈ້ງການກ່ຽວກັບເຫດບຸກໂຈມຕີໃນຕອນເຊົ້າວັນທີ 10 ມິຖຸນາ, ກອງບັນຊາການສູນກາງອາເມລິກາ(CENTCOM) ໃຫ້ຮູ້ວ່າ ນີ້ແມ່ນການກະທຳປ້ອງກັນຕົນເລັ່ງໃສ່ອີຣານ ຕາມຄຳສັ່ງຂອງທ່ານປະທານາທິບໍດີ ອາເມລິກາ Donald Trump, ກ່ຽວກັບຂໍ້ກ່າວຫາກ່ອນນັ້ນທີ່ວ່າ ອີຣານ ໄດ້ຍິກຕົກ ເຮລີກອບເຕີການທະຫານ Apache ຂອງອາເມລິກາ ໃນຊ່ອງແຄບທະເລ Hormuz ໃນວັນທີ 9 ມິຖຸນາ, ເຖິງວ່າຝ່າຍ ອີຣານ ປະຕິເສດສິ່ງນີ້. ບັນດາເປົ້າໝາຍເຊິ່ງກອງທັບອາເມລິກາ ເລັ່ງໃສ່ໃນເຫດບຸກໂຈມຕີໃນວັນທີ 10 ມິຖຸນາ ແມ່ນບັນດາລະບົບ ຣາດາ ແລະ ປ້ອງກັນອາກາດຂອງ ອີຣານຢູ່ພາກພື້ນອ້ອມແອ້ມຊ່ອງແຄບທະເລ Hormuz ພ້ອມກັບຮາກຖານຈຳນວນໜຶ່ງຢູ່ພາກພື້ນທາງທິດຕາເວັນອອກແຂວງ Hormozgan, ທາງທິດໃຕ້ ອີຣານ ແລະ ເກາະ Qeshm ນອນໃນຊ່ອງແຄບທະເລ Hormuz.ໃນຂະນະນັ້ນ, ອີຣານໄດ້ນຳໃຊ້ວັດຖຸບິນບໍ່ມີຄົນຂັບ (UAV) ບຸກໂຈມຕີຖານທີ່ໝັ້ນກອງເຮືອຮົບເລກ 5 ຂອງອາເມລິກາຢູ່ Bahrain.
ບັນດາການກະທຳນີ້ຂອງ ອາເມລິກາ ແລະ ອີຣານພຽງແຕ່ແມ່ນເຫດລະເມີດຄຳສັ່ງຢຸດຍິງສະບັບຫຼ້າສຸດໃນບັນດາເຫດການຕ່າງໆທີ່ມີຄວາມຮຸນແຮງເພີ່ມຂຶ້ນໃນສອງອາທິດຜ່ານມາ. ກ່ອນໜ້ານັ້ນ, ພາຍຫຼັງຫຼາຍອາທິດປະທະກັນ, ອາເມລິກາ ແລະ ອີຣານ ໄດ້ເຫັນດີຢຸດຍິງໃນວັນທີ 8 ເມສາ ແລະ ກ້າວເຂົາສູ່ການເຈລະຈາທີ່ແກ່ຍາວເພື່ອເປີດຊ່ອງແຄບທະເລ Homuz ຄືນໃໝ່ ແລະ ແກ້ໄຂບັນຫາໂຄງການນິວເຄຼຍຂອງ ອີຣານ. ນັບແຕ່ນັ້ນມາ, ອາເມລິກາ ແລະ ອີຣານ ໄດ້ດຳເນີນບັນດາການບຸກໂຈມຕີຢ່າງໜ້ອນສຸດ 4 ຄັ້ງ, ແຕ່ໃນແຕ່ລະກໍລະນີ, ທັງສອງຝ່າຍລ້ວນແຕ່ວາດພາບການກະທຳຂອງຕົນແມ່ນມີ “ຂໍ້ຈຳກັດ”, ພ້ອມທັງເນັ້ນໜັກເຖິງລະດັບຄວາມສຳຄັນຂອງການຮັກສາຄຳສັ່ງຢຸດຍິງ. ເຖິງຢ່າງໃດກໍຕາມ, ວົງການສັງເກດການມີຄວາມວິຕົກກັງວົນວ່າ ບັນດາຂໍ້ຈຳກັດ ນີ້ອາດສາມາດຢຸດຕິໂດຍໄວ ຖ້າບັນດາຝ່າຍບໍ່ບັນລຸໄດ້ຂໍ້ຕົກລົງໂດຍໄວ. ທ່ານ ສາດສະດາຈານການພົວພັນຕ່າງປະເທດສາກົນ, ທັງແມ່ນນັກຊ່ຽວຊານໃຫ້ຄຳປຶກສາຢູ່ສະຖາບັນ Chatham House (ສະຖາບັນຄົ້ນຄ້ວາສາກົນ ລາຊະອານາຈັກ ອັງກິດ) Yossi Mekelberg ອະທິບາຍວ່າ:
“ບັນດາຂໍ້ຕົກລົງຢຸດຍິງບໍ່ຈຳເປັນຕ້ອງແກ່ຍາວ. ບັນດາຂໍ້ຕົກລົງນັ້ນແມ່ນຄວນໃນໄລຍະຊົ່ວຄາວ ແລະ ພາໄປເຖິງວິທີການຍາວນານ. ຄຳສັ່ງຢຸດຍິງໝາຍຄວາມວ່າ ບັນດາກົກສາຍປາຍເຫດຂອງການປະທະກັນຍັງບໍ່ທັນໄດ້ແກ້ໄຂ. ທຸກຂໍ້ຕົກລົງຢຸດຍິງລ້ວນແຕ່ຖືກລົ້ມລະລາຍຢ່າງງ່າຍດາຍຕາມຄວາມນິຍາມ, ຍ້ອນວ່າ ເຂົາເຈົ້າພຽງແຕ່ຢຸດຍິງ ເພື່ອອະນຸຍາດບັນດາຝ່າຍເຈລະຈາວິທີການທີ່ຍາວນານກວ່າ.”
ບັນດາຄວາມສ່ຽງສຳລັບຄຳສັ່ງຢຸດຍິງບໍ່ພຽງແຕ່ມາຈາກອາເມລິກາ ແລະ ອີຣານເທົ່ານັ້ນ. ວັນທີ 7 ມິຖຸນາ, ຄຳສັ່ງຢຸດຍິງຕ້ອງປະເຊີນໜ້າກັບສິ່ງທ້າທາຍທີ່ຍິ່ງໃຫຍ່ທີ່ສຸດ ເມື່ອອີຣານ ຍິງລູກສອນໄພເລັ່ງໃສ່ອິດສະລາແອັນ ເພື່ອໂຕ້ຕອບບັນດາການບຸກໂຈມຕີຂອງ ອິດສະລາແອັນ ເລັ່ງໃສ່ເຂດຊານເມືອງທາງທິດໃຕ້ ນະຄອນຫຼວງ Beirut ຂອງລີບັງ. ຫຼັງຈາກນັ້ນ ກອງທັບອິດສະລາແອັນໄດ້ດຳເນີນບັນດາການບຸກໂຈມຕີທາງອາກາດເລັ່ງໃສ່ອີຣານ ເພື່ອໂຕ້ຕອບ. ນີ້ແມ່ນການບຸກໂຈມຕີລະຫວ່າງສອງປະເທດຄັ້ງທຳອິດ ນັບແຕ່ເວລາຄຳສັ່ງຢຸດຍິງໄດ້ຮັບການລົງນາມ, ການກະທຳດັ່ງກ່າວໂດຍນັກຊ່ຽວຊານສ່ວນຫຼາຍຕີລາຄາວ່າຮ້າຍແຮງກວ່າຫຼາຍເມື່ອທຽບໃສ່ກັບບັນດາການບຸກໂຈມຕີໃສ່ກັນລະຫວ່າງ ອາເມລິກາ ແລະ ອີຣານກ່ອນນັ້ນ, ຍ້ອນວ່າ ປັດຈຸບັນ ລັດຖະບານ ອິດສະລາແອັນຂອງ ທ່ານນາຍົກລັດຖະມົນຕີ Benjamin Netanyahu ຍັງຮັກສາຫຼັກໝັ້ນແຂງກ້າດ້າງກັບອີຣານ, ຍາມໃດກໍ່ປະກາດພ້ອມທີ່ຈະເຊື່ອມຕໍ່ການປະທະກັນກັບ ອີຣານ ໃນບໍ່ວ່າເວລາໃດ, ຕ່າງກັນກັບຄວາມມານະພະຍາຍາມໃຫ້ບຸລິມະສິດແກ່ວິທີການທາງການທູດຄືອຳນາດການປົກຄອງອາເມລິກາໃນປັດຈຸບັນ.
ຄວາມກົດດັ່ນບັນລຸໄດ້ຂໍ້ຕົກລົງ
ການລະເມີດຂໍ້ຕົກລົງຢຸດຍິງກົງກັນຂ້າມກັບບັນດາຖະແຫຼງການຢ່າງຕໍ່ເນື່ອງຂອງທ່ານປະທານາທິບໍດີ ອາເມລິກາ Donald Trump ວ່າ ຂໍ້ຕົກລົງຍາວນານກັບ ອີຣານ ເກືອບຈະບັນລຸໄດ້, ຜ່ານນັ້ນອະນຸຍາດໃຫ້ຊ່ອງແຄບທະເລ Hormuz ເປີດປະຕູຄືນໃໝ່ໃຫ້ການຄົມມະນາຄົມ ແລະ ເລີ່ມຕົ້ນວິວັດການເຈລະຈານິວເຄຼຍໃໝ່. ເຖິງຢ່າງກໍຕາມ, ໃນຫຼາຍອາທິດຜ່ານມາ, ບັນດາຖະແຫຼງການຂອງທ່ານ Donald Trump ຍັງບໍ່ທັນປະກົດຜົນເປັນຈິງ, ນັບທັງເວລາການປະທະກັນພາກພື້ນຕາເວັນອອກກາງ ທີ່ແກ່ຍາວຜ່ານຂີດໝາຍສຳຄັນແມ່ນ 100 ວັນແມ່ນວັນທີ 8 ມິຖຸນາແລ້ວ.
ຕາມວົງການສັງເກດການແລ້ວ, ບັນດາການເຈລະຈາ ອາເມລິກາ ອີຣານ ພວມຢູ່ໃນໄລຍະລະອຽດອ່ອນ. ໜັງສືພິມ New York Times (ອາເມລິກາ) ສະບັບອອກຕົ້ນເດືອນນີ້ໄດ້ຄັດສະເໜີຫຼາຍແຫຼ່ງຂ່າວຂັ້ນສູງໂດຍໃຫ້ຮູ້ວ່າ ບັນດາການເຈລະຈາ ອາເມລິກາ ອີຣານ ໄດ້ຮັດແຄບລົງເຫຼືອ 4 ບັນຫານິວເຄຼຍຈຸດສຸມລວມມີ: ວໍຊິງຕັນຮຽກຮ້ອງອີຣານ ຢຸດຕິບັນດາການເຄື່ອນໄຫວເສີມທາດ ຢູຣານີ ໃນເວລາຢ່າງໜ້ອຍສຸດ 15 ປີ, ຮ່ວມມືກັບອົງການພະລັງງານປະລະມານູສາກົນ (IAEA) ເພື່ອຫຼຸດຈຳນວນທາດຢູຣານີ ໃນສາງເກັບສຳຮອງລົງ, ມ້າງທຳລາຍ 3 ຮາກຖານນິວເຄຼຍໃຫຍ່ທີ່ສຸດຢູ່ Natanz, Fordo ແລະ Isfahan; ແລະ ອະນຸຍາດປະຕິບັດບັນດາການກວດກາສາກົນ ໃນບໍ່ວ່າເວລາໃດ ແລະ ສະຖານທີ່ໃດຂອງອີຣານ. ເຖິງຢ່າງໃດກໍຕາມ, ອາທິດກ່ອນ, ຕົວເອງທ່ານ Donald Trump ປະທານາທິບໍດີ ອາເມລິກາ ກໍ່ຍອມຮັບວ່າ, ເຖິງວ່າຂໍ້ຕົກລົງໃກ້ຊີ້ຈະມີຄວາມສາມາດບັນລຸໄດ້ແລ້ວກໍ່ຈະມີຄວາມມານະພະຍາຍາມທາງການທູດສຸດທ້າຍ. ທ່ານ Jared Mondschein ຜູ້ອຳນວຍການສູນຄົ້ນຄ້ວາຢູ່ ສູນຄົ້ນຄ້ວາອາເມລິກາ ໃຫ້ຂໍ້ສັງເກດວ່າ:
“ຂ້າພະເຈົ້າຄິດວ່າສຸດທ້າຍເບິ່ງຄືວ່າບໍ່ມີວິທີການແກ້ໄຂຢ່າງຈະແຈ້ງ, ງ່າຍດາຍ ແລະ ວ່ອງໄວ ໃຫ້ແກ່ສະພາບການລະຫວ່າງ ອາເມລິກາ ແລະ ອີຣານ. ບັນຫານີ້ອາດສາມາດກໍ່ຜົນສະທ້ອນຕໍ່ອຳນາດການປົກຄອງຂອງທ່ານ Donald Trump ໃນຫຼາຍເດືອນຈະມາເຖິງ, ຍ້ອນວ່າເມື່ອອຳນາດການປົກຄອງທ່ານ Donald Trump ບັນລຸໄດ້ບັນດາຄວາມຄືບໜ້າເຊິ່ງຫຼາຍຄົນຖືວ່າຫຼາຍພໍສົມຄວນໃນບໍ່ວ່າຂໍ້ຕົກລົງໃດສຳລັບອີຣານ, ມີສະມາຊິກຫຼາຍທ່ານໃນພັກການເມືອງຂອງ ທ່ານ Donald Trump ພັດຄັດຄ້ານຍ້ອນວ່າ ເຂົາເຈົ້າຖືວ່ານັ້ນແມ່ນຂໍ້ຕົກລົງເຊິ່ງອຳນາດການປົກຄອງ Obama ໄດ້ລົງນາມກັບ ອີຣານ”
ສຳລັບຝ່າຍອີຣານ, ວັນທີ 9 ມິຖຸນາ ທ່ານລັດຖະມົນຕີການຕ່າງປະເທດ Abbas Araghchi ໄດ້ປະກາດວ່າ ເຕເຮຣານຍັງໃຫ້ບຸລິມະສິດວິທີການທາງການທູດ, ແຕ່ຢັ້ງຢືນບັນດາກຳລັງປະກອບອາວຸດ ອີຣານ ໄດ້ສະແດງໃຫ້ເຫັນຄວາມສາມາດຮັບມືກັບທຸກສິ່ງທ້າທາຍຕໍ່ຄວາມໝັ້ນຄົງ. ນັກການທູດ ອີຣານ ກໍ່ເນັ້ນໜັກວ່າ ຊ່ອງແຄບທະເລ ບໍ່ພຽງແຕ່ແມ່ນເຂດທະເລສາກົນ ຢ່າງສິ້ນເຊິ່ງເທົ່ານັ້ນ ຫາກຍັງແມ່ນເຂດທະເລວວມລະຫວ່າງ ອີຣານ ແລະ ໂອມານ, ພ້ອມທັງຖືວ່າວິທີການດີທີ່ສຸດເພື່ອຫຼຸດຜ່ອນຄວາມສ່ຽງເກີດຂຶ້ນບັນດາບັນຫາແມ່ນກຳລັງຕ່າງປະເທດຖອນຕົວອອກຈາກພາກພື້ນ.
