ຍອດຜະລິດຕະພັນພາຍໃນປະເທດ (GDP) 6 ເດືອນຕົ້ນປີ 2026 ເພີ່ມຂຶ້ນ 8,18%, ລະດັບສູງສຸດໃນ 15 ປີຜ່ານມາ. ນີ້ແມ່ນໝາກຜົນທີ່ສ່ອງແສງໃຫ້ເຫັນປະສິດທິຜົນຂອງບັນດານະໂຍບາຍບໍລິຫານທີ່ຂ້ຽວຂາດ, ການຟື້ນຟູຢ່າງແຮງຂອງບັນດາກຳລັງໜູນເຕີບໂຕ ແລະ ບັນດາການປະຕິຮູບລະບອບລະບຽບການທີ່ພວມເສີມຂະຫຍາຍຜົນປະໂຫຍດໄດ້ເທື່ອລະກ້າວ.
ບັນດາສິ່ງທີ່ສ້າງຄວາມແຕກຕ່າງຂອງສະພາບເສດຖະກິດ 6 ເດືອນຕົ້ນປີ ບໍ່ພຽງແຕ່ນອນຢູ່ຕົວເລກ 8,18%. ສຳຄັນກວ່ານັ້ນ, ແມ່ນການເຕີບໂຕພວມໄດ້ຮັບການສ້າງຂຶ້ນຈາກບັນດາກຳລັງໜູນໃໝ່, ຍືນຍົງກວ່າ, ແທນທີ່ພຽງແຕ່ເປີດກວ້າງການລົງທຶນ ຫຼື ຂຸດຄົ້ນບັນດາທ່າໄດ້ປຽບທີ່ເປັນມູນເຊື້ອຄືເມື່ອກ່ອນ.
ລະບອບລະບຽບເປີດແລ້ວ, ພຽງແຕ່ລໍຖ້າການປະຕິບັດ
ຖ້າເມື່ອກ່ອນລະບອບລະບຽບການໄດ້ຮັບຖືວ່າແມ່ນ “ຈຸດອຸດຕັນຂອງການອຸດຕັນ”, ປັດຈຸບັນນີ້ ນະໂຍບາຍຊີ້ຂາດໃຫຍ່ຫຼາຍສະບັບໄດ້ ກ່ຽວກັບການປັບປຸງກົດໝາຍໃຫ້ສົມບູນແບບ, ແບ່ງຂັ້ນ, ແບ່ງສິດ, ພັດທະນາເສດຖະກິດພາກເອກະຊົນ, ວິທະຍາສາດເຕັກໂນໂລຢີ ແລະ ຫັນເປັນດີຈີຕອນ ຮັບການປະກາດໃຊ້. ບັນດາບັນຫາທີ່ວາງອອກໃນປັດຈຸບັນ ບໍ່ພຽງແຕ່ແມ່ນຂາດກົນໄກເທົ່ານັ້ນ, ຫາກຍັງແມ່ນການປະຕິບັດຢ່າງມີປະສິດທິຜົນອີກດ້ວຍ. ຄືດັ່ງທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ຫວຽດນາມ ໄດ້ຢັ້ງຢືນວ່າ, ລະບອບລະບຽບການບໍ່ພຽງແຕ່ແມ່ນຈຸດອຸດຕັນອີກແລ້ວ, ສິ່ງທີ່ສຳຄັນແມ່ນຕ້ອງນຳບັນດາແຜນນະໂຍບາຍເຂົ້າສູ່ຊີວິດຕົວຈິງຢ່າງວ່ອງໄວ.
“ພວກເຮົາແກ້ໄຂໄດ້ບັນຫາລະບອບລະບຽບການແລ້ວ, ດຽວນີ້ສຸມໃສ່ຈັດແບ່ງແຫຼ່ງກຳລັງດ້ານການເງິນ, ຊັບພະຍາກອນມະນຸດ, ແຫຼ່ງກຳລັງທີ່ດິນ… ບັນດາບັນຫາທັງໝົດເຫຼົ່ານີ້ ສູນກາງຫາກໍ່ແກ້ໄຂໝົດແລ້ວ. ພ້ອມດຽວກັນນັ້ນ ແມ່ນສຸມໃສ່ແກ້ໄຂບັນຫາພື້ນຖານໂຄງລ່າງ, ການຕະຫຼາດ, ນະໂຍບາຍ, ນັບທັງນະໂຍບາຍກ່ຽວກັບພະນັກງານອີກດ້ວຍ. ຖ້າພວກເຮົາບໍ່ເຮັດ ຫຼືເຮັດຊ້າ ແມ່ນຈະເສຍໂອກາດ”.
ສານເຫຼົ່ານັ້ນ ກໍແມ່ນຄຳຮຽກຮ້ອງຕ້ອງການສຳລັບທັງລະບົບປະຕິບັດ. ລັດຖະບານພວມຫັນຈາກການຄຸ້ມຄອງຕາມຂັ້ນຕອນໄປສູ່ການຄຸ້ມຄອງຕາມໝາກຜົນ, ຕິດພັນກັບຄວາມຮັບຜິດຊອບຂອງຜູ້ນຳໜ້າ ຕໍ່ກັບຄວາມຄືບໜ້າປະຕິບັດ ແລະ ການປ່ອຍເງິນ.
ກຳລັງບົ່ມຊ້ອນເຕີບໂຕແມ່ນຍັງໃຫຍ່ຫຼວງທີ່ສຸດ
ໄປຄຽງຄູ່ກັບພື້ນຖານລະບອບລະບຽບການ, ກຳລັງບົ່ມຊ້ອນຂອງການເຕີບໂຕຂອງ ຫວຽດນາມ ແມ່ນຍັງເປີດກວ້າງຢູ່. ການລົງທຶນສາທາລະນະສືບຕໍ່ແມ່ນກຳລັງໜູນສຳຄັນເມື່ອມີຫຼາຍໂຄງການໂຄງລ່າງຈຸດສຸມກ້າວເຂົ້າສູ່ໄລຍະເລັ່ງລະດັບຄວາມໄວໃນການປ່ອຍເງິນ, ສ້າງຜົນກະທົບແຜ່ກະຈາຍໃຫ້ທົ່ວພື້ນຖານເສດຖະກິດ. ການບໍລິໂພກຢູ່ພາຍໃນປະເທດກໍຍັງມີກຳລັງບົ່ມຊ້ອນຫຼາຍຢ່າງ. ດ້ວຍຂອບຂະໜາດຕະຫຼາດທີ່ມີປະຊາກອນເກືອບ 110 ລ້ານຄົນ, ກຳລັງຊື້ຢູ່ພາຍໃນປະເທດຈະສືບຕໍ່ແມ່ນ “ຖານ” ອັນສຳຄັນໃນສະພາບການເສດຖະກິດໂລກຍັງມີການຜັນແປຫຼາຍຢ່າງ. ທ່ານ ເຈິ່ນຫືວລິງ, ຫົວໜ້າກົມຄຸ້ມຄອງ ແລະ ພັດທະນາການຕະຫຼາດຢູ່ພາຍໃນປະເທດ, ກະຊວງອຸດສາຫະກຳ ແລະ ການຄ້າ ຫວຽດນາມ ໃຫ້ຮູ້ວ່າ ບັນດາມາດຕະການຊຸກຍູ້ການບໍລິໂພກພວມໄດ້ຮັບການຜັນຂະຫຍາຍຢ່າງແຮງໃນຊຸມເດືອນທ້າຍປີ.
“ພວກຂ້າພະເຈົ້າໄດ້ສຸມໃສ່ໜູນຊ່ວຍບັນດາວິສາຫະກິດປັບຕົວເຂົ້າກັບທ່າອ່ຽງດຳເນີນທຸລະກິດດ້ວຍຫຼາຍຊ່ອງທາງທີ່ນັບມື້ນັບໄດ້ຮັບຄວາມນິຍົມ. ໄປຄຽງຄູ່ກັບບັນດາແບບວິທີການແນະນຳ, ຈຳໜ່າຍຜະລິດຕະພັນທີ່ເປັນມູນເຊື້ອ, ວິສາຫາກິດພວມສົ່ງເສີມໝູນໃຊ້ບັນດາພື້ນຖານດີຈີຕອນ, ການຄ້າເອເລັກໂຕນິກ, livestream ຂາຍເຄື່ອງ ແລະ ບັນດາຊ່ອງທາງອອນໄລ ເພື່ອເຂົ້າເຖິງຜູ້ບໍລິໂພກຢ່າງມີປະສິດທິຜົນກວ່າ. ພ້ອມດຽວກັນນັ້ນ, ບັນດາໂຄງການໜູນຊ່ວຍຍັງສຸມໃສ່ການໃຫ້ຄຳປຶກສາ ແລະ ຍົກສູງກຳລັງຄວາມສາມາດໃຫ້ແກ່ວິສາຫະກິດອີກດ້ວຍ”.
ສິ່ງທີ່ໜ້າສົນໃຈແມ່ນ, ວິທະຍາສາດເຕັກໂນໂລຢີ, ນະວັດຕະກຳ ແລະ ຫັນເປັນດີຈີຕອນ ພວມກາຍເປັນກຳລັງໜູນເຕີບໂຕໃໝ່, ປະກອບສ່ວນຍົກສູງສະມັດຕະພາບ, ຫຼຸດຜ່ອນຄ່າໃຊ້ຈ່າຍ ແລະ ເພີ່ມກຳລັງແກ້ງແຍ້ງຂອງພື້ນຖານເສດຖະກິດ. ນີ້ກໍແມ່ນຄຳຮຽກຮ້ອງ ໂດຍທ່ານ ເລມິງຮຶງ ນາຍົກລັດຖະມົນຕີ ຫວຽດນາມ ໄດ້ເນັ້ນໜັກເຖິງ.
“ສ້າງບາດກ້າວບຸກທະລຸໃນບັນດາກຳລັງໜູນເຕີບໂຕໃໝ່ຜ່ານການຊຸກຍູ້ການຄົ້ນຄວ້າແອັບຟຼີເຄຊັນພັດທະນາວິທະຍາສາດເຕັກໂນໂລຢີ, ນະວັດຕະກຳ, ຫັນເປັນດີຈີຕອນຢ່າງແຮງກວ່າອີກ. ຂ້າພະເຈົ້າສະເໜີໃຫ້ປະກາດໃຊ້ກອບສະຖາປັດຕະຍາກຳສັງລວມແຫ່ງຊາດດີຈີຕອນໂດຍດ່ວນ, ສ້າງໃຫ້ສຳເລັດ, ກັ່ນຕອງຂໍ້ມູນ ແລະ ຫັນເປັນມາດຕະຖານ ເຊື່ອມຕໍ່ກັບບັນດາຖານຂໍ້ມູນແຫ່ງຊາດ, ຖານຂໍ້ມູນລະຫວ່າງຂະແໜງກັບສູນຂໍ້ມູນແຫ່ງຊາດ ເພື່ອລະບຽບການບໍລິຫານຜ່ານປະຕູການບໍລິການສາທາລະນະແຫ່ງຊາດເຄື່ອນໄຫວຢ່າງລຸລ່ວງ, ປະກອບສ່ວນຫຼຸດຜ່ອນຄ່າໃຊ້ຈ່າຍ ແລະ ເວລາໃຫ້ແກ່ປະຊາຊົນ ແລະ ວິສາຫະກິດ. ພິເສດ ໃນປີນີ້ ຕ້ອງມີໝາກຜົນຜະລິດຕະພັນລະອຽດ ແລະ ມີຄຸນຄ່າ”.
ເພື່ອປະຕິບັດສຳເລັດເປົ້າໝາຍເຕີບໂຕສູງຂອງທັງປີ, ສິ່ງທີ່ຕັດສິນຊີ້ຂາດຍັງຄົງແມ່ນນຳບັນດາແຜນນະໂຍບາຍ, ນະໂຍບາຍເຂົ້າສູ່ຊີວິດຕົວຈິງ, ຂຸດຄົ້ນທຸກແຫຼ່ງກຳລັງ ແລະ ເສີມຂະຫຍາຍປະສິດທິຜົນຂອງບັນດາກຳລັງໜູນເຕີບໂຕໃໝ່. ນັ້ນບໍ່ພຽງແຕ່ແມ່ນຂໍ້ກຸນແຈເພື່ອປະຕິບັດສຳເລັດເປົ້າໝາຍປີ 2026 ເທົ່ານັ້ນ ຫາກຍັງສ້າງພື້ນຖານໃຫ້ແກ່ໄລຍະພັດທະນາຢ່າງວ່ອງໄວ, ຍືນຍົງ ແລະ ມີຄຸນນະພາບກວ່າໃນຊຸມປີຕໍ່ໄປອີກດ້ວຍ./.
