ພາຍຫຼັງປະກາດຂໍ້ຕົກລົງນ້ຳມັນ diesel ກັບ ລັດເຊຍເປັນເວລາອງສາມວັນ, ວັນທີ 16 ຕຸລາ, ທ່ານ Donald Trump ປະທານາທິບໍດີ ອາເມລິກາ ສືບຕໍ່ເຊັ່ນລັດຖະດຳລັດຍົກເວັ້ນການນຳໃຊ້ບັນດາຄຳສັ່ງລົງໂທດທີ່ຄາດວ່າຈະເລັ່ງໃສ່ ລັດເຊຍ. ບັນດາການກະທຳເຫຼົ່ານີ້ສ່ອງແສງໃຫ້ເຫັນເຖິງການປ່ຽນແປງຢ່າງໃຫຍ່ຫຼວງໃນນະໂຍບາຍ ອາເມລິກາ ຕໍ່ ລັດເຊຍ, ສ້າງຄວາມກົດດັນອັນໃຫຍ່ຫຼວງຕໍ່ ຢູແກຼນ ແລະ ບັນດາປະເທດ ເອີລົບ.
ອີງຕາມລັດຖະດຳລັດທີ່ລົງໃນເວັບໄຊຂອງທຳນຽບຂາວໃນວັນທີ 16 ຕຸລາ, ທ່ານປະທານາທິບໍດີ Donald Trump ຕົກລົງຍົກເວັ້ນຫຼາຍມາດຕະການລົງໂທດ, ຂໍ້ຈຳກັດ ແລະ ພາສີອາກອນທີ່ລະບຸໄວ້ໃນກົດໝາຍ Lindsey Graham ກ່ຽວກັບການລົງໂທດ ລັດເຊຍ ແລະ ອີຣານໃນ ປີ 2026. ຂໍ້ຕົກລົງດັ່ງກ່າວໄດ້ຍົກອອກມາພາຍຫຼັງ ທີ່ ອາເມລິກາ ແລະ ລັດເຊຍ ບັນລຸໄດ້ຂໍ້ຕົກລົງກ່ຽວກັບນໍ້າມັນ diesel ໜຶ່ງອາທິດ.
ຮັກສາການເຈລະຈາ
ກົດໝາຍ Lindsey Graham ໄດ້ເຊັ່ນປະກາດໃຊ້ໃນວັນທີ 18 ກັນຍາ, ມຸ່ງໄປເຖິງເພີ່ມທະວີການລົງໂທດບັນດາເຈົ້າໜ້າທີ່, ທະນາຄານ ແລະ ຂົງເຂດພະລັງງານ, ການປ້ອງກັນຊາດຂອງລັດເຊຍ... ເຖິງຢ່າງໃດກໍ່ຕາມ, ລັດຖະດຳລັດໃໝ່ຂອງທ່ານປະທານາທິບໍດີ Trump ໄດ້ຍົກເວັ້ນຫຼາຍຂໍ້ມາດຕາລົງໂທດ ແລະ ພາສີອາກອນດັ່ງກ່າວກ່ອນທີ່ໄດ້ຮັບການຜັນຂະຫຍາຍ. ໂດຍປົກປ້ອງໃຫ້ແກ່ຂໍ້ຕົກລົງນີ້, ທ່ານປະທານາທິບໍດີ Trump ຖືວ່າ ການໂຈະຊົ່ວຄາວຄຳສັ່ງລົງໂທດຕໍ່ ລັດເຊຍ ເພື່ອແນໃສ່ບັນລຸໄດ້ສອງເປົ້າໝາຍຄື: ໜຶ່ງ, ເພື່ອຮັກສາ ລັດດເຊຍ ໄວ້ຢູ່ໂຕະເຈລະຈາເພື່ອຢຸດຕິການຂັດແຍ້ງກັບ ຢູແກຼນ, ແລະ ທີສອງແມ່ນ ເພື່ອສະກັດກັ້ນເລືອງ ລັດເຊຍ ສາມາດເຮັດຫຼາຍສິ່ງຫຼາຍຢ່າງກວ່າເພື່ອໜູນຊ່ວຍ ອີຣານ, ທ່ານ Chris Wright, ລັດຖະມົນຕີກະຊວງພະລັງງານ ອາເມລິກາ ກໍ່ໍ່ໄດ້ເນັ້ນໜັກເຖິງທັດສະນະນີ້ໃນສື່ມວນຊົນ ອາເມລິກາ.
"ນີ້ແມ່ນການໃຫ້ກຳລັງໃຈຕໍ່ ລັດເຊຍ. ຖ້າເຂົາເຈົ້າສາມາດຫຼຸດຜ່ອນການປະທະກັນກັບ ຢູແກຼນ, ຕົວຢ່າງຄືຮັບຮອງເອົາຂໍ້ຕົກລົງຢຸດຍິງໃນຂົງເຂດພະລັງງານ ຫຼື ຫຼຸດຜ່ອນການປະທະກັນເພື່ອໃຫ້ສາມາດສົ່ງອອກນ້ຳມັນ diesel ໄປຍັງຕະຫຼາດໂລກ, ນັ້ນຈະເປັນຜົນປະໂຫຍດທີ່ລະອຽດ. ນີ້ແມ່ນ 'ແຄລອດ' ເພື່ອຊຸກຍູ້ການຢຸດຕິການປະທະກັນ, ຫາກບໍ່ແມ່ນເຄື່ອງຊູຊີບເພື່ອກູ້ເອົາເສດຖະກິດໃຫ້ແກ່ ລັດເຊຍ."
ໄປພ້ອມກັບເລື່ອງ ວໍຊິງຈັນ ໂຈະມາດຕະການລົງໂທດຕໍ່ ລັດເຊຍ ໂດຍຊົ່ວຄາວ, ມີການກະທຳອີກອັນໜຶ່ງໃນຊຸມມື້ຜ່ານມາ ໄດ້ກໍ່ຄວາມວິຕົກ ກັງວົນໃຫ້ແກ່ ຢູແກຼນ ແລະ ເອີລົບ ນັ້ນແມ່ນຂໍ້ມູກ່ຽວຂ້ອງເຖິງເລື່ອງ ອາເມລິກາ ອາດຈະຫຼຸດຄວາມໄວໃນການສົ່ງສັນຍານຂອງລະບົບອິນເຕີເນັດດາວທຽມ Starlink (ເຊິ່ງມີເວີຊັນການທະຫານແມ່ນ Star Shield), ໄດ້ກໍ່ຜົນກະທົບທີ່ຫຍໍ້ທໍ້ຕໍ່ບັນດາແຜນການສູ້ຮົບຂອງກອງທັບ ຢູແກຼນ. ເຖິງວ່າບັນດາເຈົ້າໜ້າຂັ້ນສູງຂອງ ອາເມລິກາ ໄດ້ປະຕິເສດເລື່ອງມີຂໍ້ຈຳກັດໃດໆຕໍ່ກັບກ່ຽວກັບ Star Shield, ແຕ່ທ່ານ Douglas Barrie, ນັກຊ່ຽວຊານຂັ້ນສູງກ່ຽວກັບການບິນດ້ານການທະຫານ, ສະຖາບັນຄົ້ນຄວ້າຍຸດທະສາດສາກົນ (IISS, ອັງກິດ), ຖືວ່າ.
"ຍາກທີ່ຈະຮູ້ຢ່າງແນ່ນອນວ່າມີສິ່ງໃດໄດ້ເກີດຂຶ້ນ. ສິ່ງທີ່ໄດ້ເຫັນຢ່າງຈະແຈ້ງວ່າ ຫວ່າງມໍ່ໆມານີ້ໄດ້ປະກົດມີຄວາມເຄັ່ງຕຶງຈຳນວນໜຶງລະຫວ່າງ ວໍຊິງຕັນ ແລະ ກີແອັບ. ຕາມຂ້າພະເຈົ້າແລ້ວ, ເລື່ອງທີ່ສະພາບການກ່ຽວຂ້ອງເຖິງ Starlink ຫຼື StarShield ໄດ້ສ່ອງແສງສິ່ງດັ່ງກ່າວໄດ້ຫຼືບໍ່ ແມ່ນບັນຫາທີ່ໜ້າສົນໃຈເພື່ອຄາດຄະເນ. ເບິ່ງຄືວ່າ, ຢ່າງໜ້ອຍສຸດແມ່ນໃນຈຸດເວລານີ້, ບັນຫາດັ່ງກ່າວອາດສາມາດໄດ້ຮັບການແກ້ໄຂແລ້ວ."
ຄວາມກົດດັນເພີ່ມຂຶ້ນ
ບັນຫາທີ່ວາງອອກສຳລັບ ຢູແກຼນ ແລະ ບັນດາປະເທດພັນທະມິດ ເອີລົບ ຂອງປະເທດນີ້ນັ້ນແມ່ນ ການປ່ຽນແປງນະໂຍບາຍຫວ່າງມໍ່ໆມານີ້ຂອງ ວໍຊິງຕັນ ສຳລັບການປະທະກັນລະຫວ່າງ ລັດເຊຍ - ຢູແກຼນ "ບໍ່ສາມາດຕາວປິ້ນໄດ້" ຫຼື ພຽງແຕ່ແມ່ນຍຸດໂທບາຍຊົ່ວຄາວກ່ອນທີ່ດຳເນີນການເລືອກຕັ້ງກາງສະໄໝໃນວັນທີ 3 ພະຈິກ ທີ່ຈະມາເຖິງຢູ່ ອາເມລິກາ ຫຼືບໍ່ ແລະ ຢູແກຼນ ພ້ອມກັບ ເອີລົບ ຕ້ອງຮັບມືຄືແນວໃດ?
ທີ່ກອງປະຊຸມສຸດຍອດ ສະຫະພາບເອີລົບ (EU), ຈັດຂຶ້ນໃນອາທິດແລ້ວນີ້ (ວັນທີ 15-16 ຕຸລາ) ຢູ່ ບຣຸກແຊນ, ໂດຍບໍ່ຫົວຊາຕໍ່ບັນດາບັນຫາພາຍໃນ, ຄື: ການເຕີບໂຕດ້ານເສດຖະກິດ ແລະ ຄວາມບໍ່ລົງລອຍກັນດ້ານງົບປະມານຂອງກຸ່ມ, ບັນດາປະເທດ EU ສ່ວນຫຼາຍລ້ວນແຕ່ຢືນຢັນຈະສືບຕໍ່ສະໜັບສະໜູນ ຢູແກຼນ, ຖືນີ້ແມ່ນບູລິມະສິດພູມສາດການເມືອງທີ່ມີຄວາມໝາຍເປັນຕາຍສຳລັບຄວາມໝັ້ນຄົງໃນໄລຍະຍາວຂອງ ເອີລົບ. ທ່ານ Friedrich Merz, ນາຍົກລັດຖະມົນຕີ ເຢຍລະມັນ ຖະແຫຼງວ່າ:
"ພວກຂ້າພະເຈົ້າຢາກຢືນຢັນຢ່າງຈະແຈ້ງຫຼັກໝັ້ນຂອງຕົນສຳລັບ ຢູແກຼນ. ພ້ອມກັນນັ້ນ, ພວກຂ້າພະເຈົ້າກໍ່ເຂົ້າໃຈວ່າ ຝ່າຍ ອາເມລິກາ ຍັງມີຜົນປະໂຫຍດອື່ນໆ; ຂ້າພະເຈົ້າຮັບຮູ້ສິ່ງນັ້ນ. ເຖິງຢ່າງໃດກໍ່ຕາມ, ພວກຂ້າພະເຈົ້າພວມໜູນຊ່ວຍ ຢູແກຼນ, ແລະ ພວກຂ້າພະເຈົ້າເຮັດແນວນັ້ນເພື່ອຜົນປະໂຫຍດຂອງ ເອີລົບເອງ."
ສຳລັບ ຢູແກຼນ, ການເລືອກເຟັ້ນຈະຫຍຸ້ງຍາກກວ່າ. ພາຍຫຼັງທີ່ ອາເມລິກາ - ລັດເຊຍ ປະກາດຂໍ້ຕົກລົງນ້ຳມັນ diesel, ອາເມລິກາ ກໍ່ໂຈະບັນດາຄຳສັ່ງລົງໂທດຕໍ່ ລັດເຊຍ, ທ່ານ Volodymyr Zelensky, ປະທານາທິບໍດີ ຢູແກຼນ ໄດ້ຖືວ່າ ອຳນາດການປົກຄອງຂອງທ່ານປະທານາທິບໍດີ Trump ປ່ຽນແປງນະໂຍບາຍກັບ ລັດເຊຍ ແມ່ນສິ່ງທີ່ "ຜິດພາດ". ເຖິງຢ່າງໃດກໍ່ຕາມ, ວົງການນັກສັງເກດການເຕືອນວ່າ ຄຳຖະແຫຼງຂອງ ປະທານາທິບໍດີ ຢູແກຼນ ອາດຈະສົ່ງຜົນສະທ້ອນກົງກັນຂ້າມ. ທ່ານ Marco Rubio, ລັດຖະມົນຕີກະຊວງການຕ່າງປະເທດ ອາເມລິກາ ໄດ້ຢືນຢັນໃນວັນທີ 18 ຕຸລາ ວ່າ ຍາມໃດ ຢູແກຼນ ກໍ່ໄດ້ຮັບຜົນປະໂຫຍດຈາກການເຂົ້າເຖິງ Star Shield ແຕ່ກໍ່ໃຫ້ຮູ້ວ່າ ເປົ້າໝາຍຂອງ ອາເມລິກາ ຍາມໃດກໍ່ແມ່ນເລື່ອງ ຢຸດຕິການປະທະກັນລະຫວ່າງ ລັດເຊຍ ແລະ ຢູແກຼນ ໂດຍໄວທີ່ສຸດເທົ່າສາມາດ, ສະນັ້ນ, ຢູແກຼນ (ແລະ ຣັດເຊຍ) ຄວນສຸມໃສ່ໃຫ້ແກ່ບັນດາຄວາມມານະພະຍາຍາມ ເພື່ອຢຸດຕິການປະທະກັນ ແທນທີ່ຕຳໜິຕິຕຽນບັນດາຂໍ້ຕົກລົງຂອງອຳນາດການປົກຄອງ ອາເມລິກາ.
