ຕົວເລກ ເສດຖະກິດ - ສັງຄົມ 5 ເດືອນຕົ້ນປີ 2026 ສະແດງໃຫ້ເຫັນວ່າ ເສດຖະກິດ ຫວຽດນາມ ມີເຄື່ອນເໜັງໄວ, ແຕ່ວ່າບໍ່ໝາຍຄວາມວ່າ ພື້ນຖານເສດຖະກິດມີຄວາມທົນທານຢ່າງພຽງພໍ.
“ມອບເໝົາ” ເພື່ອຊຸກຍູ້ການເຕີບໂຕ
5 ເດືອນຕົ້ນປີ 2026, ຕາມບົດລາຍງານຂອງກະຊວງການເງິນ ຫວຽດນາມ ຢູ່ກອງປະຊຸມລັດຖະບານນັດສາມັນ ເດືອນພຶດສະພາ (3 ມິຖຸນາ), ໃນພາບການຄາດຄະເນການເຕີບໂຕ GRDP ຂອງບັນດາທ້ອງຖິ່ນ, ມີບັນດາທ້ອງຖິ່ນບັນລຸລະດັບການເຕີບໂຕທີ່ຕັ້ງໜ້າ. ຫ໋າຍຝ່ອງ ແມ່ນຕົວຢ່າງໜຶ່ງ. ຕາມການຄາດຄະເນແລ້ວ, ການເຕີບໂຕ GRDP ໄຕມາດ II/2026 ຂອງນະຄອນທ່າກຳປັ່ນແມ່ນ 13,47% ສູງທີ່ສຸດໃນທົ່ວປະເທດ. 6 ເດືອນຕົ້ນປີແມ່ນ 12,42%, ທັງປີແມ່ນ 13,09%, ບັນລຸເປົ້າໝາຍທີ່ວາງອອກ 13%.
ກຸ່ມບັນດາທ້ອງຖິ່ນຕ້ອງສືບຕໍ່ຮັກສາທ່າເຕີບໂຕລວມມີ ຝູເທາະ, ນິງບິ່ງ, ທ້າຍງວຽນ ຮ່າຕິ້ງ.
ເຖິງຢ່າງໃດກໍຕາມ, ຕາມກະຊວງການເງິນແລ້ວ, ບົນພື້ນຖານການເຕີບໂຕ 5 ເດືອນຕົ້ນປີ, ມີທ້ອງຖິ່ນຈຳນວນໜຶ່ງຄາດຄະເນວ່າຈະມີການເຕີບໂຕຕ່ຳກວ່າເປົ້າໝາຍທັງປີ, ໃນນັ້ນມີບັນດາທ້ອງຖິ່ນໃຫຍ່ຄື: ນະຄອນໂຮ່ຈີມິນ, ຮ່າໂນ້ຍ, ບັກນິງ, ກວ໋າງນິງ. ສິ່ງນີ້ຈະສົ່ງຜົນສະທ້ອນເຖິງເປົ້າໝາຍການເຕີບໂຕ 2 ຕົວເລກຂອງທັງປີໃນທົ່ວປະເທດ. ໄລຍະຫ່າງລະຫວ່າງການເຕີບໂຕທີ່ບັນລຸໄດ້ໃນຕົວຈິງ ແລະ ຄາດໝາຍທີ່ໄດ້ວາງອອກແມ່ນຫຼາຍພໍສົມຄວນ, ເຊິ່ງຮຽກຮ້ອງຕ້ອງການມີຄວາມມານະພະຍາຍາມຫຼາຍທີ່ສຸດໃນ 6 ເດືອນທ້າຍປີເພື່ອບັນລຸໄດ້ເປົ້າໝາຍທີ່ໄດ້ວາງອອກ. ກ່ຽວກັບການເຕີບໂຕຂອງ ຮ່າໂນ້ຍ, ທ່ານ ໂງວັນຕວັນ ລັດຖະມົນຕີກະຊວງການເງິນ ຫວຽດນາມ ຖືວ່າ:
“ການເຕີບໂຕຂອງ ຮ່າໂນ້ຍ ແມ່ນສຳຄັນທີ່ສຸດ. ການເຕີບໂຕຢູ່ ຮ່າໂນ້ຍ 1% ຈະປະກອບສ່ວນເຂົ້າໃນການເຕີບໂຕຂອງທົ່ວປະເທດ 0,13%. ຮ່າໂນ້ຍມີ ການເຕີບໂຕພຽງແຕ່ 8,2% ເຮັດໃຫ້ການເຕີບໂຕຂອງປະເທດຫຼຸດລົງ 0,4%. ໂຄງປະກອບເສດຖະກິດຂອງ ຮ່າໂນ້ຍ ສຳຄັນທີ່ສຸດແມ່ນການຄ້າ, ການບໍລິການກວມເອົາເຖິງ 70% ໂຄງປະກອບການເຕີບໂຕ. ລະດັບການເຕີບໂຕນີ້ພາຍຫຼັງ 6 ເດືອນຕ່ຳ, ບັນລຸພຽງແຕ່ 8,1% ຕ່ຳກວ່າເປົ້າໝາຍທີ່ວາງອອກແມ່ນ 3,5%, ການສົ່ງອອກຂອງ ຮ່າໂນ້ຍ ບັນລຸພຽງແຕ່ 4,2%. ເພື່ອໃຫ້ບັນລຸການເຕີບໂຕໄດ້ນັ້ນ ໃນໄຕມາດທີ III, ຮ່າໂນ້ຍ ຕ້ອງບັນລຸລະດັບເຕີບໂຕເກືອບ 11,83% ແລະ ໄຕມາດທີ 4 13,19%. ນີ້ແມ່ນຕົວເລກທີ່ໃຫຍ່ທີ່ສຸດ”.
ໃນສະພາບການນັ້ນ, ກະຊວງການເງິນ ພວມຮີບດ່ວນສ້າງແຜນການປະຕິບັດການມອບຄາດໝາຍດັດຊະນີພັດທະນາເສດຖະກິດ - ສັງຄົມໃຫ້ແກ່ກະຊວງ, ຂະແໜງການ, ທ້ອງຖິ່ນ ແລະ ທັງກຸ່ມບໍລິສັດ, ລັດວິສາຫະກິດໃຫຍ່. ກະຊວງໄດ້ສຳຫຼວດກວດຄືນ, ຄາດຄະເນ 34 ດັດຊະນີຂອງທ້ອງຖິ່ນໃນໄລຍະ 2026 – 2030 ແລະ ປີ 2026. ໃນນັ້ນ, ມີດັດຊະນີຈຳນວນໜຶ່ງໄດ້ມີຄວາມຈະແຈ້ງ ກ່ຽວກັບວິທີການກຳນົດ, ອາດມອບການກຳນົດໃນທັນທີ, ຄື: ການເຕີບໂຕ GRDP ສະເລ່ຍ/ປີ, ການເຕີບໂຕເຂດກະສິກຳ, ເຄື່ອງປ່າຂອງດົງ ແລະ ສິນໃນນ້ຳ, ເຂດອຸດສາຫະກຳ ແລະ ກໍ່ສ້າງ, ການບໍລິການ… ດັ່ງນັ້ນ, ບໍ່ພຽງແຕ່ແມ່ນການເຕີບໂຕ GRDP ເທົ່ານັ້ນ, ຫາກຍັງມີຫຼາຍດັດຊະນີການພັດທະນາເສດຖະກິດ - ສັງຄົມອື່ນໆກໍ່ຈະໄດ້ມອບໝາຍໃຫ້ແກ່ບັນດາກະຊວງ, ຂະແໜງການ, ທ້ອງຖິ່ນ.
ບັນດາທ້ອງຖິ່ນນຳໜ້າຕ້ອງມານະພະຍາຍາມຢ່າງໃຫຍ່ຫຼວງທີ່ສຸດ
ເພື່ອຊຸກຍູ້ການເຕີບໂຕ, ບັນດາທ້ອງຖິ່ນມີບົດບາດຈຸດສຸມຕ້ອງ “ແບກຫາບ” ການເຕີບໂຕໃຫ້ແກ່ພື້ນຖານເສດຖະກິດ. ການຄິດໄລ່ໂດຍພື້ນຖານໃຫ້ເຫັນວ່າ ນະຄອນໂຮ່ຈີມິນ ຕ້ອງບວກຕື່ມ 1,7% , ຮ່າໂນ້ຍ 2,75%, ບັກນິງ 1,1 %... ນີ້ແມ່ນໜ້າທີ່ອັນໜັກໜ່ວງ, ຮຽກຮ້ອງຕ້ອງມີຄວາມມານະພະຍາຍາມບໍລິຫານ ແລະ ບັນດາແຜນການເຄື່ອນໄຫວບຸກທະລຸຂອງທ້ອງຖິ່ນ. ອາທິດຜ່ານມາ, ທ່ານ ເລມິງຮຶງ ນາຍົກລັດຖະມົນຕີ ຫວຽດນາມ ໄດ້ມີການເຮັດວຽກເປັນສອງຄັ້ງກັບບັນດາການນຳ ນະຄອນຮ່າໂນ້ຍ ແລະ ນະຄອນໂຮ່ຈີມິນ. ທີ່ການເຮັດວຽກກັບການນຳ ນະຄອນຮ່າໂນ້ຍ (11 ມິຖຸນາ), ທ່ານນາຍົກລັດຖະມົນຕີ ສະເໜີວ່າ:
“ສຸມໃສ່ບັນດາຄວາມມານະພະຍາຍາມຢ່າງສູງທີ່ສຸດເພື່ອຜັນຂະຫຍາຍກົດໝາຍວ່າດ້ວຍນະຄອນຫຼວງ, ອອກແບບຂໍ້ສະເໜີບັນດາກົນໄກ, ນະໂຍບາຍຢ່າງແຮງ, ບຸກທະລຸທີ່ໄດ້ຮັບການອະນຸຍາດໃນກົດໝາຍວ່າດ້ວຍນະຄອນຫຼວງ ເພື່ອສ້າງລະບອບລະບຽບການລຸລ່ວງ. ບັນຫາທີສອງແມ່ນ ຕ້ອງສຸມໃສ່ຍູ້ແຮງການເຊື່ອມຈອດພັດທະນາເຂດລະຫວ່າງ ຮ່າໂນ້ຍ ກັບບັນດາທ້ອງຖິ່ນໃນເຂດນະຄອນຫຼວງ, ເຂດທົ່ງພຽງແມ່ນ້ຳແດງ, ພິເສດແມ່ນເຊື່ອມຈອດກ່ຽວກັບພື້ນຖານໂຄງລ່າງ, ກ່ຽວກັບການຄຸ້ມຄອງສິ່ງແວດລ້ອມ, ແຫຼ່ງນ້ຳ, ການເຊື່ອມຈອດກ່ຽວກັບລະບົບການຜະລິດ, ຕອບສະໜອງຜະລິດຕະພັນການບໍລິການ, ສຸມໃສ່ຢູ່ລະດັບສູງສຸດ, ຕັດສິນໃຈມານະພະຍາຍາມສູງທີ່ສຸດເພື່ອສູ້ຊົນບັນລຸໄດ້ການເຕີບໂຕຢູ່ລະດັບ 11% ແລະ ອາດຈະແມ່ນຕ້ອງສູງກ່ວາອີກ”.
ສຳລັບນະຄອນໂຮ່ຈີມິນ, ທ່ານນາຍົກລັດຖະມົນຕີ ເນັ້ນໜັກວ່າ ການປະຕິບັດເປົ້າໝາຍການເຕີບໂຕບັນລຸລະດັບ 2 ຕົວເລກຂອງທັງປະເທດ ແມ່ນອີງໃສ່ການເຕີບໂຕຂອງນະຄອນຫຼາຍທີ່ສຸດ.
“ທາງນະຄອນຕ້ອງມອບໜ້າທີ່ໃຫ້ບັນດາພະແນກ, ຂະແໜງການ, ບັນດາທ້ອງຖິ່ນ ແລະ ພິເສດແມ່ນວິສາຫະກິດເຄື່ອນໄຫວໃນບໍລິເວນ. ບັນດາກຸ່ມໜ້າທີ່ລະອຽດທີ່ສຸດໃນບັນດາຂົງເຂດກ່ຽວກັບອຸດສາຫະກຳ, ກໍ່ສ້າງການຄ້າ, ການບໍລິການ, ກະສິກຳ, ວິທະຍາສາດເຕັກໂນໂລຢີ, ບັນດາໂຄງການລົງທຶນຈຸດສຸມ. ຂ້າພະເຈົ້າສະເໜີໃຫ້ສຳຫຼວດກວດຄືນບັນດາແຜນການ ແລະ ຄວາມຈຳເປັນກ່ຽວກັບການປັບປຸງກໍແຜນການຢ່າງລະອຽດ, ມີການມອບໝາຍໜ້າທີ່ຢ່າງລະອຽດເພື່ອຊີ້ນຳແຕ່ລະເນື້ອໃນຢ່າງລະອຽດ, ແກ້ໄຂບັນດາບັນຫາທີ່ເກີດຂຶ້ນໃໝ່, ຂໍ້ຕິດຂັດຢ່າງທັນການ”.
ເພື່ອໃຫ້ພື້ນຖານເສດຖະກິດອາດສາມາດບັນລຸໄດ້ເປົ້າໝາຍການເຕີບໂຕ GDP ຢູ່ລະດັບແຕ່ 10% ຂຶ້ນໄປໃນປີນີ້, ຕ້ອງມີຄວາມຕັດສິນໃຈ, ຄວາມມານະພະຍາຍາມຂອງທົ່ວລະບົບການເມືອງ. ໃນນັ້ນ, ຄວາມມານະພະຍາຍາມຂອງບັນດາທ້ອງຖິ່ນແມ່ນສຳຄັນທີ່ສຸດ.
